Category: ڈیرہ غازی خان

ڈیرہ غازی خان (باغی ٹی وی،نامہ نگارشہزادخان) آرپی اوکیپٹن (ر) سجاد حسن خان کی روزانہ کھلی کچہری، فوری کارروائی کے احکامات

ریجنل پولیس آفیسر (آر پی او) ڈیرہ غازی خان کیپٹن (ر) سجاد حسن خان عوامی مسائل کے حل کے لیے روزانہ کی بنیاد پر کھلی کچہری کا انعقاد کر رہے ہیں۔ اس سلسلے میں، ریجن بھر سے آنے والے سائلین کی درخواستوں کی سماعت کی جاتی ہے اور فوری طور پر متعلقہ افسران کو کاروائی کے احکامات جاری کیے جاتے ہیں۔

تفصیلات کے مطابق آر پی او نے ڈیرہ غازی خان، مظفرگڑھ، راجن پور اور لیہ سے آنے والے سائلین کی شکایات کا بغور جائزہ لیا اور تمام اضلاع کے متعلقہ افسران کو فوری رپورٹ فراہم کرنے کا حکم دیا۔ مارک کی گئی تمام درخواستوں کے مکمل فالو اپ کا بھی حکم دیا گیا تاکہ شکایات کا جلد از جلد ازالہ ہو سکے۔

آر پی او کیپٹن (ر) سجاد حسن خان نے اس موقع پر کہا کہ "کسی بھی شہری کے ساتھ زیادتی ہرگز برداشت نہیں کی جائے گی اور عوام کو انصاف کی فراہمی کو ہر صورت یقینی بنایا جائے گا۔” ان کا کہنا تھا کہ عوامی دادرسی اور فوری انصاف فراہم کرنا ان کی اولین ترجیحات میں شامل ہے۔

ڈیرہ غازی خان(باغی ٹی وی ،نامہ نگار)ڈی جی اورناز تھیٹر میں بے حیائی کا زور،انتظامیہ کی طوطاچشمی

تفصیلات کے مطابق ڈیرہ غازیخان شہر کے مشہور ناز تھیٹر اور ڈی جی تھیٹر میں جاری ڈراموں کی سرگرمیاں ایک نئی بحث کا آغاز کر رہی ہیں۔ مقامی شہریوں کا کہنا ہے کہ ان تھیٹروں میں نہ صرف غیر قانونی سرگرمیاں جاری ہیں بلکہ ان کے آس پاس مافیا کی موجودگی نے صورت حال کو اور بھی خراب کر دیا ہے۔

علاقے کے لوگوں نے شکایت کی ہے کہ چوہدری مشتاق، پائل چوہدری اور علی جانی جیسے افراد قانون کی دھجیاں اڑا رہے ہیں جبکہ مقامی انتظامیہ اور قانون نافذ کرنے والے ادارے ان کے سامنے بے بس نظر آتے ہیں۔ ان کے مطابق ان تھیٹروں میں آنے والے افراد کی سرگرمیوں میں شراب، چرس، اور اسلحے کی نمائش عام بات بن چکی ہے۔ذرائع کا کہنا ہے کہ کچھ میڈیا سے تعلق رکھنے والے لوگ بھی ان کی سرپرستی کرنے والوں میں شامل ہے

شہریوں کا یہ بھی کہنا ہے کہ یہاں پر ناچنے والی خواتین آدھے کپڑے پہن کر جسم کا نمائش کرتی ہیں، جو کہ نہ صرف بے ہودگی کی علامت ہے بلکہ اس سے فنکاروں کی عزت بھی مجروح ہوتی ہے۔ اس کے علاوہ کچھ فنکاروں اور طوائفوں کی جانب سے بے ہودہ ڈرامے کیے جا رہے ہیں جو اصل آرٹسٹ کے ساتھ مذاق کرنے کے مترادف ہیں۔

ذرائع کے مطابق آرٹس کونسل کے ڈائریکٹر اور ڈپٹی ڈائریکٹر بھی اس معاملے میں ملوث ہیں کیونکہ انہیں ان سرگرمیوں کے بدلے مالی فوائد حاصل ہو رہے ہیں۔ یہ مافیا پنجاب کے مختلف شہروں سے ناچنے والی لڑکیوں کو لاتا ہے اور ان کا غلط استعمال کرتا ہے۔ اطلاعات ہیں کہ یہ لڑکیاں گن پوائنٹ پر لائی جاتی ہیں اور ان کے ساتھ بدسلوکی کی جاتی ہے۔

عوام نے مزید شکایت کی ہے کہ بجلی کی فری استعمال بھی ان غیر قانونی سرگرمیوں کا حصہ ہے جس میں واپڈا کے کچھ ملازمین بھی شامل ہیں۔ اس صورت حال نے شہریوں کو بے حد پریشان کر دیا ہے کیونکہ وہ خوف محسوس کر رہے ہیں کہ یہاں کسی بھی وقت کوئی ناخوشگوار واقعہ پیش آ سکتا ہے۔

پولیس کو بدنام کرنے کی کوشش کے طور پر جعلی وردی میں ملبوس افراد کو بھی یہاں بٹھایا جاتا ہے۔ ان کے ذریعے عوام میں خوف و ہراس پیدا کرنے کی کوشش کی جاتی ہے جبکہ یہ اعلان بھی کیا جاتا ہے کہ موویز بنانا منع ہے۔

علاقے کے عوام نے وزیراعلیٰ پنجاب، آئی جی پنجاب، کمشنر ڈیرہ غازی خان اور ڈپٹی کمشنر سے اپیل کی ہے کہ وہ اس مافیا کے خلاف فوری کارروائی کریں اور ان غیر قانونی سرگرمیوں کے اڈوں کو بند کریں۔ عوام کا مطالبہ ہے کہ انہیں تحفظ فراہم کیا جائے تاکہ وہ اپنی زندگیوں میں سکون محسوس کر سکیں۔

ڈیرہ غازی خان (باغی ٹی وی رپورٹ) بی ایم پی چیک پوسٹوں پر رشوت اور اثر و رسوخ کا راج

تفصیلات کے مطابق بین الصوبائی چیک پوسٹ و تھانہ بواٹہ پر تعینات ایس ایچ او اقبال لغاری اور اہلکار شوکت کے بارے میں انکشاف ہوا ہے کہ وہ چیک پوسٹ راکھی گارج پر تعینات فیاض نامی اہلکار کے ساتھ مل کر مبینہ طور پر سمگلروں اور با اثر سیاستدانوں کے مفادات کی حفاظت کر رہے ہیں۔ ذرائع کے مطابق یہ اہلکار مبینہ طور پر سمگلنگ کے ذریعے کمایا گیا پیسہ سیاستدانوں تک پہنچاتے ہیں جبکہ ایس ایچ اوز بے بس ہو کر خاموش تماشائی بنے ہوئے ہیں۔

عوامی حلقوں نے بارڈر ملٹری پولیس کے سینئر کمانڈنٹ شاہد زمان لک اور کمانڈنٹ اسد خان چانڈیہ سے اپیل کی ہے کہ ان اہلکاروں کو چیک پوسٹوں سے فوری طور پر ہٹایا جائے تاکہ کرپشن اور لوٹ مار کا خاتمہ ہو سکے۔

ذرائع کا کہنا ہے کہ ان اہلکاروں کو چوٹی زیریں اور فورٹ منرو کے با اثر سیاستدانوں کی مکمل پشت پناہی حاصل ہے جس کی وجہ سے موجودہ دور حکومت میں بھی ان کا تبادلہ ممکن نہیں ہو سکا۔

مزید برآں ذرائع کا کہنا ہے کہ فیاض نامی اہلکار کے حوالے سے کہا جا رہا ہے کہ وہ ایس ایچ اوز پر دباؤ ڈالتا ہے اور ان سے من مانی کرواتا ہے۔ اس نے یہاں تک دھمکی دی ہے کہ اگر اس کا تبادلہ کیا گیا تو وہ چوٹی جا کر تمام بڑے افسروں کو لاہور بھیج دے گا۔ عوامی حلقے اس صورتحال پر شدید تشویش کا اظہار کر رہے ہیں اور فوری ایکشن کا مطالبہ کر رہے ہیں۔

ڈیرہ غازی خان (باغی ٹی وی رپورٹ) دری میرو کے قریب پولیس مقابلہ، ایک ملزم زخمی حالت میں گرفتار

تفصیلات کے مطابق تھانہ دراہمہ پولیس نے دورانِ گشت بستی گرنڈ کے قریب موٹر سائیکل پر سوار تین مشتبہ افراد کو دیکھا جو پولیس کو دیکھتے ہی فرار ہوگئے۔

پولیس نے فوری طور پر ملزمان کا تعاقب کیا اور سپر دھنوتر دری میرو کے قریب پہنچ کر ملزمان نے پولیس پر فائرنگ شروع کر دی۔ جوابی فائرنگ کے بعد علاقے میں سرچ آپریشن کیا گیا، جس کے دوران ایک ملزم الطاف عرف الطافی ولد عبدالمجید قوم ڈاڈا سکنہ چھابری زیریں کو زخمی حالت میں گرفتار کیا گیا۔ الطاف کے دائیں گھٹنے پر گولی لگی تھی۔

زخمی حالت میں گرفتار ہونے والے الطاف نے انکشاف کیا کہ اس کے ساتھی حیدر عرف راجو ڈاڈا اور صفدر کھا کھی موقع سے فرار ہو چکے ہیں۔ مزید تحقیقات سے پتہ چلا کہ الطاف موٹر سائیکل چھیننے اور دیگر پولیس مقابلوں میں ملوث تھا اور وہ متعدد سنگین جرائم میں بھی مطلوب تھا۔

زخمی ملزم الطاف کو فوری طور پر ٹراما سینٹر منتقل کیا گیا جہاں پولیس کی حراست میں اس کا علاج جاری ہے۔ پولیس نے فرار ہونے والے دیگر ملزمان کی گرفتاری کے لیے مختلف مقامات پر چھاپے مارنے کا سلسلہ بھی شروع کر دیا ہے۔

ڈیرہ غازیخان(باغی ٹی وی،سٹی رپورٹر جواد اکبر)ڈیرہ غازیخان کے نواحی علاقے دری ڈھولے والی کے قریب ہوتہ ہتوانی میں شادی کی تقریب اس وقت ماتم میں بدل گئی جب پرانی دشمنی کی بنا پر مسلح افراد نے تقریب میں گھس کر فائرنگ کر دی۔ واقعہ بیگے والا چوک کے قریب پیش آیا، جس میں 4 افراد ہلاک ہوگئے جبکہ متعدد زخمی ہوئے ۔تھانہ کالا کی حدود موضع ہوتہ ہتوانی میں قتل کی لرزہ خیز واردات میں کلاشنکوف کی فائرنگ کے ساتھ ساتھ ہینڈ گرنیڈ پھینکا گیا پولیس رپورٹ

ریسکیو 1122 کنٹرول روم ڈیرہ غازی خان کو ایمرجنسی کال موصول ہوئی کالر نے بتایا کہ شادی کی تقریب میں اچانک فائرنگ ہو گئی ہے اور تین سے چار افراد شدید زخمی ہو چکے ہیں۔ کالر نے یہ بھی بتایا کہ وہ زخمیوں کو بیگے والا چوک کی طرف لے جا رہے ہیں تاکہ فوری طبی امداد دی جا سکے۔

فوری ریسپانس دیتے ہوئے ریسکیو 1122 نے فیکٹری موڑ سے قریب ترین ایمبولینس DGA.10 کو جائے حادثہ کی طرف روانہ کیا۔ مزید یہ کہ دوسری ایمبولینس DGA.12 جو پہلے شادن لنڈ میں مریض شفٹ کر رہی تھی اسے فوری طور پر فری کرا کے موقع پر پہنچنے کے لیے روانہ کیا گیا۔ ڈی جی خان سے TSA.09 کو بھی صورتحال کی سنگینی کو مدنظر رکھتے ہوئے بھیجا گیا۔

زخمیوں میں حفیظ اللہ ولد اللہ وسایا جسے پیٹ کے نچلے حصے اور دائیں ٹانگ پر گولی لگی جس کی وجہ سے وہ موقع پر ہی جاں بحق ہو گیا۔ اس کی لاش کو فوری طور پر علامہ اقبال ٹیچنگ ہسپتال منتقل کر دیا گیا۔

صداقت ولد سجاد حسین جسے سر پر گولی لگی اور اس کی حالت تشویشناک ہے۔ اسے فوری طور پر ہسپتال منتقل کیا گیا، جہاں ڈاکٹروں کی ٹیم اس کی جان بچانے کی کوشش کر رہی ہے۔

دلشاد ولد مجاہدکو دائیں بازو اور منہ پر گولی لگی اس کی حالت بھی نازک بتائی جا رہی ہے جبکہ الیاس ولد شاہد کو بائیں پاؤں پر گولی لگی، اس کی حالت خطرے سے باہر ہے، تاہم اسے بھی فوری علاج کے لیے ہسپتال منتقل کیا گیا۔

پولیس کو بھی فوری طور پر واقعے کی اطلاع دی گئی، جس نے موقع پر پہنچ کر شواہد اکٹھے کیے اور فائرنگ میں ملوث ملزمان کی تلاش شروع کر دی ہے۔ ابتدائی اطلاعات کے مطابق یہ فائرنگ پرانی دشمنی کا شاخسانہ تھی۔ پولیس مختلف زاویوں سے اس واقعے کی تحقیقات کر رہی ہے تاکہ جلد از جلد ملوث افراد کو قانون کے کٹہرے میں لایا جا سکے۔

آخری اطلاعات کے مطابق ڈیرہ غازی خان کے نواحی گاؤں ہوتہ ہتوانی شادی کی تقریب میں فائرنگ سے4 افراد جاں بحق جبکہ متعدد مہمان زخمی ہوگئے وجہ عناد سعودی عرب میں لین دین کا تنازعہ بتائی جاتی ہے

ڈیرہ غازی خان(باغی ٹی وی ،سٹی رپورٹرجواد اکبر) وزیراعلیٰ پنجاب مریم نواز شریف کے ویژن کے تحت ڈیرہ غازی خان میں تجاوزات کے خاتمے اور قیمتوں کی جانچ پڑتال کے عمل میں تیزی آ گئی ہے۔ ڈپٹی کمشنر مہر شاہد زمان لک نے شہر کے مختلف اہم چوکوں اور بازاروں کا دورہ کیا اور تجاوزات کے خلاف کارروائی کی قیادت کی۔

دورے کے دوران تجاوزات قائم کرنے والے پانچ دکانداروں کو موقع پر گرفتار کر لیا گیا اور ان کی جانب سے رکھی گئی سولر پلیٹ بلاکس کو بحقِ سرکار ضبط کر لیا گیا۔ ڈپٹی کمشنر نے دکانوں کے آگے لکیریں لگانے کے احکامات جاری کیے تاکہ آئندہ تجاوزات کی روک تھام کی جا سکے۔

ڈپٹی کمشنر نے واضح وارننگ دیتے ہوئے کہا کہ جو دکاندار اپنی حدود سے باہر سامان سجائیں گے، ان کے خلاف سخت کارروائی کی جائے گی اور گرفتاریاں بھی کی جائیں گی۔

مہر شاہد زمان لک نے ہسپتال چوک، پرانا غلہ منڈی روڈ، پل پیارے والا، اور چورہٹہ چوک پر تجاوزات کے خاتمے کے آپریشن کی قیادت کی۔ انہوں نے اپنی نگرانی میں سڑک کنارے رکھی گئی سولر پلیٹ بلاکس کو ضبط کروایا۔

ڈپٹی کمشنر نے میڈیا سے گفتگو کرتے ہوئے کہا کہ وزیراعلیٰ پنجاب کے احکامات کے تحت تجاوزات کا خاتمہ اولین ترجیح ہے۔ انہوں نے افسران کو ہدایت کی کہ وہ شفٹوں میں شہر کا دورہ کریں اور حدود سے باہر رکھا گیا سامان فوری طور پر ضبط کر لیا جائے۔ ان کا کہنا تھا کہ سرکاری پراپرٹی کسی کی ذاتی جاگیر نہیں اور دکانداروں کو اپنی حدود میں رہتے ہوئے کام کرنا ہوگا۔

ڈپٹی کمشنر نے مزید احکامات جاری کیے کہ سٹرک کنارے لائنیں لگائی جائیں اور بازاروں میں بار بار انسپکشن کی جائے۔ انہوں نے ہسپتال چوک پر روٹی کے وزن اور قیمت کی جانچ بھی کی، اور زائد قیمت پر روٹی بیچنے والے ہوٹل کے مالک کو گرفتار کروا دیا۔ دورے کے دوران اے ڈی سی آر نعمان فاروق تارڑ، سی او ایم سی جواد الحسن گوندل، امیر مسلم اور خالد رسول بھی ان کے ہمراہ تھے۔