Category: ڈیرہ غازی خان

ڈیرہ غازیخان(تنویر احمد)سیوریج لائن کے مین ہول کی صفائی کرتے ہوئے دم گھٹنے سے دو بھائیوں سمیت ایک ہی خاندان کے تین مزدور جاں بحق، جاں بحق ہو نے والے تینوں افراد فیصل آباد کے رہائشی تھے،مین ہول میں زہریلی گیس اور اچانک سیوریج پانی آنے سے ہلاکتیں ہوئیں،دوران صفائی کوئی حفاظتی آلات نہیں پہنے ہوئے تھے علاقہ مکین،کمشنر ڈیرہ اطلاع ملتے ہی موقع پر پہنچ گئے ریسکیو آپریشن کی نگرانی کی،وزیر اعلیٰ پنجاب کا نوٹس،جاں بحق ہو نے والے تینوں افراد کی دس،دس لاکھ مالی امدا د کی ہدایت، جاں بحق ہونے والے مزدور نجی کمپنی کے ملازم تھے جنہیں محکمہ پبلک ہیلتھ نے تمام شہر کی سیوریج لائنوں کی صفائی کا ٹھیکہ دیا تھا اس سلسلہ میں مزید تفصیلات کے مطابق گزشتہ روز تھانہ بی ڈویژن کی حدود بلاک Zگورنمنٹ کمپری ہنسوہائی سکول کے قریب علی الصبح نجی کمپنی کے مزدور مین ہول کی صفائی کررہے تھے پہلے محمد حیدر ماچھی مین ہول میں اترا جو کچھ ہی دیر میں زہریلی گیس سے بے ہوش ہو گیا اس کو بچانے کے لئے اسکا بھائی محمد رمضان مین ہول میں چلا گیا وہ بھی ڈوب گیا پھر اسکا چچا زاد محمد ندیم مین ہول میں چلا گیا اس طرح یکے بعد دیگرے تینوں افراد دم گھٹنے اور ڈوبنے سے جاں بحق ہوگئے اطلاع ملتے ہی کمشنر مدثر ریاض ملک،چیف آفیسر اقبال فریداور ریسکیو1122 کی ٹیمیں موقع پر پہنچ گئی ریسکیو ٹیموں نے جاں بحق افراد کو نکال کر ٹیچنگ ہسپتال منتقل کردیا تھانہ بی ڈویژن پولیس نے نعشیں قبضہ میں لیکر واقعہ پر کاروائی شروع کردی جاں بحق ہونے والے مزدوروں میں محمد رمضان اور محمد حیدر سگے بھائی جبکہ محمد ندیم چچا زاد تھے جاں بحق مزدوروں کا تعلق فیصل آباد کے گاوں جمشیر چک 92 سے ہے تینوں کی نعشیں نجی کمپنی کے سپر وائزر کے ہمراہ ٹیچنگ ہسپتال سے انکے گھروں کو فیصل آباد روانہ کردی گئی جبکہ علاقہ مکینوں کے مطابق مزدوروں نے دوران صفائی کوئی حفاظتی آلات نہیں پہنے ہوئے تھے اس موقع پر کمشنر ڈیرہ غازی خان مدثر ریاض ملک نے بتایا کہ سیوریج لائنوں کی صفائی کا کام پرائیویٹ کمپنی کر رہی تھی جو کہ محکمہ پبلک ہیلتھ نے انہیں دو ہفتے قبل ٹھیکے پر دیا تھا کمشنر نے بتایا کہ معاملہ کی انکوائری کے لئے ایڈیشنل کمشنر ریونیو سمیع اللہ فاروق کی سربراہی میں چیف آفیسر میونسپل کارپوریشن ملک اقبال فرید اور ڈائریکٹر ڈویلپمنٹ پر مشتمل انکوائری کمیٹی تشکیل دے دی گئی ہے جو فوری طور پر انکوائری کر کے رپورٹ دیں گے جس پر ذمہ داری کا تعین ہو نے پر کاروائی ہو گی کمشنر نے بتایا کہ وزیر اعلیٰ پنجاب سردار محمد عثمان بزدار نے تینوں جاں بحق افراد کے لواحقین کی قواعد و ضوابط کے مطابق دس،دس لاکھ روپے مالی امداد کے لئے ڈپٹی کمشنر فیصل آباد کو ہدایت کر دی ہے جنہوں نے متاثرہ خاندان کو مالی امداد کے لئے قانونی کاروائی بھی شروع کر دی ہے۔

ڈیرہ غازیخان(تنویر احمد) پولیس لائن میں یوم دفاع کے حوالے سے یاد گار شہداء پر اعلی افسران کی حاضری،6 ستمبر افواج پاکستان سے اظہار یکجہتی کے دن پولیس کے چاق و چوبند دستے نے سلامی دی ترجمان پولیس کے مطابق پولیس لائن میں یوم دفاع کے حوالے سے یاد گار شہداء پر کمشنر مدثر ریاض ملک اور آر پی او عمران احمر، ڈی سی ڈی جی خان وقاص رشید اور ڈی پی او اسد سرفراز نے حاضری دی پولیس کے چاق و چوبند دستے نے سلامی دی کمشنر مدثر ریاض ملک، آر پی او عمران احمر، ڈی سی ڈی جی خان وقاص رشید اور ڈی پی او اسد سرفرازنے یاد گار پر پھول پیش کیے بعد ازاں افواج پاکستان سندھ رجمنٹ کے حوالدار خرم علی اور پولیس کے شہید نور محمد کی قبر پر پھولوں کی چادر چڑھائی اور شہداء کے لواحقین کو پھولوں کا گلدستہ دیا لواحقین سے خطاب کر تے ہو ئے اعلیٰ افسران کا کہنا تھا کہ شہداء کی قربانیوں کو ہم بھلا کیسے بھول سکتے ہیں جنہوں نے اپنی جان قربان کر کے عوام کے تحفظ کو یقینی بنایاآج کے دن پاکستان کی فورسز اور قوم نے بے دریغ قربانیاں دیں پوری قوم افواج پاکستان کے شانہ بشانہ ہے کشمیریوں کے ساتھ آج کے روز یکجہتی کا اظہار کیا جارہا ہے آج کے روز دشمن کے لیے پیغام ہے کہ ہم کسی بھی صورت دشمن سے کم نہیں۔

ڈیرہ غازیخان(تنویر احمد)ڈی پی او ڈی جی خان اسد سرفراز کی خیابان سرور کی جامع مسجد میں نماز جمعہ کے بعد کھلی کچہری، مسجد میں آئے نمازیوں سے خطاب کیا تفصیلات کے مطابق ڈی پی او ڈی جی خان اسد سرفراز نے خیابان سرور کی جامع مسجد میں نماز جمعہ کے بعد کھلی کچہری لگائی مسجد میں آئے نمازیوں سے خطاب کر تے ہو ئے ان کا کہناتھا کہ ڈی جی خان کے شہریوں کے مسائل حل کرنا میری واحد ترجیح ہے اور حکومت پنجاب کی ہدایت پر اوپن ڈور پالیسی پر عمل درآمد کیا جا رہا ہے عوام کے جان و مال کا تحفظ ہماری ذمہ داری ہے تاکہ شہریوں کے مسائل سن کر حل کر سکوں ڈی جی خان کے شہریوں کو امن و امان کے قیام میں پولیس کا ساتھ دینا ہو گا۔گھر گھر تک انصاف کی فراہمی کو یقینی بنایا جا رہا ہے ڈی پی او نے کہا کہ ہر شہری ذاتی طور پر اچھے شہری ہونے کا کردار ادا کرے محرم الحرام کے احساس ایام میں اشتعال انگیزی اور سنی سنائی باتوں پر کان نہ دھریں بلکہ ایک دوسرے سے محبت اور بھائی چارے سے ملکر رہنا چاہیے۔

ڈیرہ غازیخان(تنویر احمد)حکومت پنجاب کی ہدایت پر آرٹس کونسل ڈیرہ غازی خان میں یوم دفاع پاکستان کے حوالے سے مرکزی تقریب کا انعقاد کیا گیا.کمشنر ڈیرہ غازی خان ڈویژن مدثر ریاض ملک، وفاقی وزیر مملکت برائے موسمیاتی تبدیلی زرتاج گل وزیر، مشیر وزیر اعلی پنجاب محمد حنیف خان پتافی، ایم پی اے ڈاکٹر شاہینہ نجیب کھوسہ، آر پی او عمران احمر،ڈپٹی کمشنر وقاص رشید، ڈی پی او اسد سرفراز،ضلعی صدر پاکستان تحریک انصاف ملک محمد اقبال ثاقب سمیت دیگر افسران، سماجی شخصیات اور زندگی کے ہر شعبے سے تعلق رکھنے والے افراد موجود تھے، طلباؤطالبات نے ملی نغمے اور قومی ترانے کے ذریعے افواج پاکستان اور کشمیر کے شہداء کو خراج عقیدت پیش کیا تقریب میں صوبیدار ریٹائرڈ حاجی سلطان احمد کو تمام شرکاء نے کھڑے ہوکر خراج عقیدت پیش کیا شرکاء نے آرٹس کونسل میں قائم کی گئی یادگار شہدا پر بھی سلامی دی اور شہداء کو خراج عقیدت پیش کیا یوم دفاع پاکستان کی تقریب کو کشمیریوں کے ساتھ یک جہتی کے طور پر منایا گیا بارہ بجے سائرن بجا کر ایک منٹ کی خاموشی اختیار کی گئی،قومی اور کشمیر کا ترانہ پیش کیا گیا،کشمیریوں سے یکجہتی اور شہداء کو خراج عقیدت پیش کرنے کیلئے ریلی کا انعقاد کیا گیا شرکاء نے قومی اور کشمیر کے پرچم اٹھائے ہوئے تھے.کمشنرمدثر ریاض ملک نے خطاب کرتے ہوئے کہا کہ جنگیں افواج سے نہیں قوموں سے لڑی جاتی ہیں اور ملک پاکستان کو جب ضرورت پڑے گی تو بیس کروڑ عوام افواج پاکستان کے ساتھ کھڑی ہو گی انہوں نے کہا کہ پاکستانی قوم نے ملک کے اندر جاری سب سے مشکل گوریلا جنگ جیتی ہے اس جنگ میں 80 ہزار معصوم لوگوں کو شہید کیا گیا کمشنر نے کہا کہ 6ستمبر 1965کو بھارتی فوج نے انٹرنیشنل بارڈر کو کراس کرکے پاکستان کے اندر گھسنے کی کوشش کی جس کو افواج پاکستان اور پوری قوم نے ناکام بنا کر ملک کے دفاع کو ناقابل تسخیر بنا دیا کمشنر مدثر ریاض ملک نے کہا کہ کارگل سمیت چار جنگیں لڑی گئیں اور بنیادی وجہ کشمیر ہی تھی کشمیر پاکستان کی شہ رگ ہے کشمیریوں کا ہر صورت ساتھ دیا جائے گا.وفاقی وزیر مملکت برائے موسمیاتی تبدیلی زرتاج گل وزیر نے کہا کہ پاکستان کو آج بھی 6ستمبر 1965 کے جذبہ اور اتحاد کی ضرورت ہے اور قوی امید ہے کہ ملک پاکستان کو جب بھی ضرورت ہوگی تو پوری قوم افواج پاکستان کے ساتھ کھڑی ہوگی. مشیر وزیر اعلی پنجاب محمد حنیف خان پتافی نے کہا کہ ملک پاکستان کی طرف اٹھنے والی ہر میلی آنکھ نکال دیں گے انہوں نے کہا کہ کشمیر کے بغیر پاکستان نامکمل ہے کشمیر کی آزادی کے لیے ہر پلیٹ فارم استعمال کیا جائے گا ایم پی اے ڈاکٹر شاہینہ نجیب کھوسہ نے کہا کہ جب بھی ضرورت پڑی پوری قوم افواج پاکستان کے ساتھ بارڈر پر کھڑی ہوگی تقریب میں سٹیج سیکرٹری کے فرائض خادم حسین شہزاد راجپوت نے انجام دیے.

ڈیرہ غازیخان(تنویر احمد)ڈسٹرکٹ ایمرجنسی آفیسر ریسکیو1122ڈیرہ غازیخان ڈاکٹر ناطق حیات غلزئی نے کہا ہے کہ شہداء نے اپنی جانوں کی قربانی دے کر مادرِ وطن کے چمن کو سیراب کیا۔انہوں نے کہا کہ چھ ستمبر کو ریسکیوسٹیشنز پر شہداء کی بلندی درجات اور وطن کی ترقی و کامرانی کیلئے دعائیہ تقاریب منعقد کی جائیں گی جہاں پاک فوج اور پولیس کے شہداء کو خراج عقیدت پیش کیا جائے گا. انہوں نے یہ بات اس سلسلے میں سنٹرل سٹیشن پر منعقدہ اجلاس سے خطاب کرتے ہوئے کہی جس میں ایمرجنسی آفیسر ڈاکٹر حسین میاں، ریسکیو اینڈ سیفٹی آفیسرز محمد اختر بھٹہ، حسنین رضا،کنٹرول روم انچارج میاں عبدالرؤف اورسٹیشن کوارڈینیٹرز نے شرکت کی۔

ڈیرہ غازیخان(تنویر احمد) وزیر اعلی پنجاب سردار عثمان احمد خان بزدار کی ہدایت پر ضلع ڈیرہ غازیخان میں چھ ستمبر کو یوم دفاع پاکستان ملی جوش و جذبے سے منایا جائے گا. مرکزی تقریب آرٹس کونسل میں دس بجے دن شروع ہو گی جو واک پر اختتام پذیر ہو گی. انتظامات کی نگرانی او رحتمی شکل دینے کیلئے چار رکنی کمیٹی تشکیل دے دی گئی ہے جس کے کنوینر و فوکل پرسن اسسٹنٹ کمشنر صدر عثمان جلیس ہوں گے. انتظامات کا جائزہ لینے کیلئے ڈپٹی کمشنر آفس میں اجلاس منعقد ہوا جس کی صدارت ایڈیشنل ڈپٹی کمشنر ریونیو سمیع اللہ فاروق نے کی. انہوں نے کہاکہ چھ ستمبر کو یوم فتح کے طو رپر منایاجائے گا پاک فوج نے چھ ستمبر کو لازوال کامیابی حاصل کی او رملک کو ناقابل تسخیر بنا دیا پاک فوج کی قربانیو ں کو ہمیشہ یاد رکھا جائے گا. چھ ستمبر کو پوری قوم فوج کے شانہ بشانہ کھڑی تھی اور آج ملک کو اسی جوش و جذبے کی ضرورت ہے. اے ڈی سی آر نے کہاکہ آرٹس کونسل میں پاک فوج کی تیار کردہ دستاویزی فلم "آئیں ہر شہید کے گھر چلیں "بھی دکھائی جائے گی. تقریب میں پاک فوج او ررینجرز کے ساتھ ساتھ افسران اور ہر شعبہ سے متعلق افراد شریک ہوں گے انتظامی کمیٹی میں سی ای او تعلیم، ڈپٹی ڈائریکٹر کالجز اور پروگرام آفیسر آرٹس کونسل کو شامل کیاگیاہے. اجلا س میں متعلقہ افسران شریک تھے.

ڈیرہ غازیخان(تنویر احمد )آرپی او عمران احمر کا دورہ تھانہ روجھان، پولیس پکٹ پتن گڑھ، کچی کالونی اور ایس ڈی پی او آفس کا دورہ، تھانہ روجھان کے روٹس برائے مجالس کا بھی معائنہ کیا تفصیلات کے مطابق آر پی او عمران احمر نے ضلع راجن پور تحصیل روجھان کا دورہ کیااپنے دورے کے دوران انھوں نے کچی کالونی میں قتل کیس کے حوالے سے ایک جگہ کا معائنہ کیا اور ایس ڈی پی او آفس روجھان میں کیسز کی براہ راست خود سماعت کی علاوہ ازیں انہوں نے کچے کے علاقے میں پولیس پکٹ پتن گڑھ کا معائنہ کیا اور اس کے ساتھ ساتھ روجھان میں مجالس کے روٹس کا بھی دورہ کیااور ہدایات جاری کیں۔

ڈیرہ غازیخان(تنویر احمد)پراپرٹی ٹیکس نادہندگان حکومتی رعایت سے فائدہ اٹھاتے ہو ئے 30ستمبر تک رعایت کے ساتھ اپنے ذمے ٹیکس ادا کر دیں ورنہ 30ستمبر کے بعد ان کے وارنٹ گرفتاریاں جاری کرتے ہو ئے ان کی جائیدادوں کو سیل کر دیا جا ئے گا نادہندگان کو جیل کی ہوا بھی کھانا پڑے گی ان خیالات کا اظہارڈائریکٹر ایکسائز اینڈ ٹیکسیشن ڈیرہ غازی خان ڈویژن عبد اللہ خان جلبانی نے کیا انہوں نے کہا کہ حکومت نے پراپرٹی ٹیکس نادہندگان کو 30ستمبر تک چھوٹ دی ہے کہ وہ یکمشت ٹیکس جمع کرا کر 5%رعایت سے فائدہ اٹھائیں اور کاروائی سے بھی بچ جائیں 30ستمبر آخری تاریخ کے بعد خصوصی ٹیمیں پراپرٹی ٹیکس نادہندگان کے خلاف سخت قانونی کاروائی کریں گی اس سلسلہ میں ان کی جائیدادوں کو سیل کیا جا ئے گا اور نادہندگان کے وارنٹ گرفتاری جار ی کر کے ان کی گرفتاریاں بھی عمل میں لائی جا ئیں گی اس سلسلہ میں سروے بھی مکمل کر لیا گیا ہے انہوں نے مزید کہا کہ حکومتی ریکوری کی پائی پائی وصول کر نا ہمارے اولین فرائض میں شامل ہے اس سلسلہ میں ترجیحی بنیادوں پر اقدامات کئے گئے ہیں انہوں نے بتایا کہ ڈویژن بھر میں پراپرٹی ٹیکس،موٹر ٹیکس،پروفیشنل ٹیکس کی مد میں پانچ کروڑ روپے ریکوری کر کے سرکاری خزانہ میں جمع کرا ئے گئے ہیں ریکوری کا سلسلہ جاری رہے گا اس سلسلہ میں غفلت اور کوتاہی برتنے والے اہلکاروں کے خلاف سخت کاروائی عمل میں لائی جا ئے گی انہوں نے آخر میں کہا کہ حکومت پنجاب کی پالیسی کے مطابق اپنے فرائض منصبی احسن طریقہ سے سر انجام دے رہے ہیں تاکہ حکومتی خزانہ میں خاطر خواہ اضافہ ممکن ہو سکے۔

ڈیرہ غازیخان(تنویراحمد)ڈسٹرکٹ ایمرجنسی آفیسر ریسکیو 1122ڈیرہ غازیخان ڈاکٹر ناطق حیات نے کہا ہے کہ کمیونٹی میں آگاہی مہم کے مثبت نتائج برآمد ہو رہے ہیں اور مختلف ایمرجنسیوں میں کمی آ رہی ہے. انہوں نے کہاکہ حفاظتی اقدامات او راحتیاطی تدابیر کو اپناتے ہوئے حادثات اور ایمرجنسیوں میں مزید کمی لائی جاسکتی ہے. کمیونٹی سیفٹی ٹیمیں اور ریسکیورز اس سلسلے میں آگاہی دے رہے ہیں. انہوں نے یہ بات سنٹرل سٹیشن چوک چورہٹہ پر ایک اجلاس کے دوران کہی جس میں گزشتہ ماہ کی ایمرجنسیوں کا جائزہ لیاگیا. اجلا س میں ایمرجنسی آفیسر ڈاکٹر حسین میاں، ریسکیواینڈ سیفٹی اّفیسرز محمد اختر بھٹہ، حسنین رضا، کنٹرول روم انچارج میاں عبدالروف اور سٹیشن کوآرڈینیٹرز نے شرکت کی. اجلاس میں بتایاگیاکہ اگست کے دوران کل 4954ایمرجنسیوں سے 4992افراد متاثر ہوئے جن میں ٹریفک حادثات 782، میڈیکل کے 3286، آتشزدگی کے 18، جرائم کے 117، ڈوبنے کے آٹھ، عمارات منہدم ہونے کے 14اور مختلف نوعیت کے 729واقعات شامل ہیں اور 1795افراد کو ابتدائی طبی امداد دی گئی اور 3127افراد کو ہسپتال منتقل کیاگیا. ریسکیو کا اوسط ریسپانس وقت سات اعشاریہ صفر چھ منٹ رہا.