Category: فیصل آباد

فیصل آباد(محمد اویس)ڈپٹی کمشنر محمد علی نے کہا ہے کہ صحت مند معاشرے کے قیام کے سلسلے میں بچوں کو مہلک بیماریوں سے محفوظ رکھنے کے لئے حفاظتی ٹیکوں کو کورس ناگزیر ہے۔اس سلسلے میں حکومتی سطح پر موثراقدامات کئے جارہے ہیں تاہم والدین کو بچوں میں بیماریوں کے خلاف قوت مدافعت میں اضافہ کے لئے ویکسینیشن لازمی کرانے کا پیغام عام کیا جائے تاکہ قوم کے مستقبل کی صحت کا تحفظ یقینی ہوسکے۔انہوں نے یہ بات ایک اجلاس کے دوران ضلع میں توسیعی پروگرام برائے حفاظتی ٹیکہ جات پر عملدرآمد کی پیشرفت کا جائزہ لیتے ہوئے کہی۔ایڈیشنل ڈپٹی کمشنر(فنانس)عاصمہ اعجاز چیمہ،سی ای او ہیلتھ ڈاکٹر مشتاق سپرا،ڈسٹرکٹ ہیلتھ آفیسر ڈاکٹر محمد آصف شہزاد،ضلعی کوآرڈینیٹر برائے انسداد وبائی امراض ڈاکٹر بلال احمد کے علاوہ محکمہ صحت سمیت دیگر محکموں کے افسران بھی موجود تھے۔ڈپٹی کمشنر نے کہا کہ والدین میں ان کے بچوں کو حفاظتی ٹیکوں کی افادیت اور اہمیت کے بارے میں شعور اجاگر کرنے کے لئے آگاہی پروگرامز کا دائرہ وسیع کیا جائے تاکہ والدین میں 15ماہ تک کے بچے کی 10مختلف بیماریوں سے بچاؤ کے لئے ویکسینیشن کرانے کا احساس برقرار رہے۔انہوں نے کہا کہ بچوں کو حفاظتی ٹیکوں کا کورس مکمل کرانا ایک قومی فرض ہے۔اس ضمن میں معاشرے تک یہ ذمہ داری ادا کرنے کا پیغام اجاگر کریں تاکہ سو فیصد بچوں کی ویکسینیشن ہوسکے۔ڈپٹی کمشنر نے محکمہ صحت کے افسران سے کہا کہ وہ بچوں کو حفاظتی ٹیکہ جات لگانے کے مقررہ ٹارگٹس کو شیڈول کے تحت مکمل کریں اور کارکردگی رپورٹ سے انہیں بھی آگاہ رکھا جائے۔ڈسٹرکٹ ہیلتھ آفیسر نے بتایا کہ پیدائش سے پندرہ ماہ تک بچوں کو حفاظتی ٹیکے لگوا کر تپ دق،پولیو،خناق،نمونیا،کالی کھانسی،کالا یرقان،گردن توڑ بخار،اسہال،تشنج اور خسرہ جیسی مہلک بیماریوں سے بچایا جاسکتا ہے اور ہر یونین کونسل میں مرکز صحت سے یہ سہولت مفت دستیاب ہے۔انہوں نے بتایا کہ ای پی آئی پروگرام کے تحت سالانہ 2لاکھ 70ہزاربچوں کو حفاظتی ٹیکے لگانے کا ہدف جبکہ ماہانہ 22ہزار500کا ٹارگٹ مقرر ہے جس کے حصول کے لئے تمام وسائل بروئے کار لائے جارہے ہیں۔

فیصل آباد (محمد اویس)انسداد پولیو کی آئندہ قومی مہم 16سے 18دسمبر تک جاری رہے گی جبکہ مزید دودن بھی پولیوٹیموں کو متحرک رکھا جاے گاتاکہ کسی وجہ سے رہ جانے والے بچوں کو پولیوویکسین دی جاسکے۔اس مہم کے دوران پانچ سال تک کی عمر کے 13لاکھ 78ہزار1سو بچوں کو پولیو کے قطرے پلاے جائیں گے جس کے لیے مجموعی طور پر 3323ٹیمیں مامور ہوں گی۔یہ بات ڈپٹی کمشنرمحمد علی کی ہدایت پر ڈسٹرکٹ پولیو ایریڈیکشین کمیٹی کے اجلاس کے دوران بتائی گئی جو ایڈیشنل ڈپٹی کمشنر(ہیڈ کوارٹر)عفیفہ شاجیہ کی صدارت میں منعقد ہوا۔ایڈیشنل ڈپٹی کمشنر (ہیڈکوارٹر) نے ہدایت کی کہ انسدادپولیوکی آئندہ قومی مہم سے قبل تمام تر ضروری تیاریوں کو ہر لحاظ سے مکمل کیا جاے اور سابقہ مہم کی خامیوں اور کمزوریوں کا بھی ازالہ ہونا چاہیے۔انھوں نے مزید کہا کہ گزشتہ مہم کی رپورٹوں کو سامنے رکھتے ہوئے آئندہ کے لیے جامع حکمت عملی وضع کی جاے تاکہ ضلع بھر میں کسی جگہ پانچ سال کی عمر کا کوئی بھی بچہ حفاظتی ویکسین کے بغیر نہ رہے۔اس حوالے سے ڈسٹرکٹ ہیلتھ آفیسر نے بتایا کہ مہم کے سلسلے میں بچوں کو قطرے پلانے کے لیے ضروری انتظامات کو مکمل کیا جارہا ہے۔ ایڈیشنل ڈپٹی کمشنر(ہیڈ کوارٹر) نے مزید کہا کہ ٹرانسپورٹ اڈوں کے نمایاں مقامات پر بینرز آویزاں کرنے سمیت اہم عوامی مقامات پر پولیوٹیموں کی موجودگی کو یقینی بنانے کی بھی تاکید کی۔

فیصل آباد (محمد اویس) غلام محمود ڈوگر ریجنل پولیس آفیسر فیصل آباد نے کینسر کے مریض ڈرائیورکانسٹیبل ناہید اسلم کو 2لاکھ 50ہزار روپے بطور مالی امداد دئیے۔ڈرائیور کانسٹیبل ناہید اسلم چک نمبر 257ر۔ب جہانگیر خوردکا رہائشی ہیاور چند سال سے گلے کے کینسر میں مبتلا ہے جس کا علاج معالجہ جاری ہے۔ناہید اسلم پولیس لائن ایم ٹی برانچ میں تعینات ہے اور بیماری کی وجہ سے میڈیکل رخصت پر ہے۔اس موقع پر آرپی او فیصل آبادنے کہا کہ پولیس اہلکاروں کی فلاح وبہبودکے لیے تمام ممکنہ اقدامات کیے جائیں گے۔بیمارپولیس ملازمین کے لیے پولیس ویلفیئر فنڈسے مالی امداد جاری کی جاے گی۔محکمہ پولیس اپنے ملازمین کو تنہا نہیں چھوڑے گا۔