Category: فیصل آباد

فیصل آباد(محمد اویس)وزیراعلیٰ پنجاب سردار عثمان بزدار کی ہدایت پر صارفین کو اشیائے ضروریہ سستے داموں فروخت کرنے کے لئے شہر میں چار ماڈل بازار اور23میگا سٹورز پر فیئرپرائس کاؤنٹرز کام کررہے ہیں جہاں پر روزمرہ استعمال کی اشیاء ڈی سی ریٹ سے بھی کم نرخوں پر دستیاب ہیں۔ماڈل بازار ریاض شاہد چوک اسلام نگر،کلیم شہید پارک غلام محمد آباد،ماڈل بازار جھنگ روڈ اور فیضان مدینہ چوک مدینہ ٹاؤن میں فنکشنل ہیں جبکہ شہر کے جن میگا سٹور/مالز پر فیئرپرائس کاؤنٹرز قائم کئے گئے ہیں ان میں ایس بی سٹورزڈی گراؤنڈ،جھنگ روڈ،سمندری روڈ،سرگودھا روڈ،غلام محمد آباد،بیسٹ ڈیپارٹمنٹل سٹور غلام محمد آباد،دینوب مارٹ ملت روڈ گلستان کالونی،فیملی مارٹ ملت روڈ گلستان کالونی،پٹھان مارٹ گلستان کالونی،رچنا سپر سٹورملت روڈ گلستان کالونی،بیمینو مارٹ ڈی گراؤنڈ،سٹی کیش اینڈ کیری کینال روڈ،سٹی میگا مارٹ ڈی گراؤنڈ،ای مارٹ سوساں روڈ مدینہ ٹاؤن،سلیمی ہوم پلس کوہ نورروڈ،لاثانی مارٹ مسجد اسماعیل روڑ(ڈائیوروڈ)،مرحبا مارٹ کینال روڈ،قطر سپر سٹور کینال روڈ،511کیش اینڈکیری سرگودھا روڈ،ٹیمپو سٹور پیپلز کالونی،ایچ کیز سٹور،سعید مارٹ جناح کالونی اور مکہ کیش اینڈ کیری کلبرگ روڈ شامل ہیں۔ڈپٹی کمشنر محمد علی نے بتایا کہ ضلعی انتظامیہ کا خود ساختہ مہنگائی اور اشیاء ضروریہ کی ذخیرہ اندوزی کے خلاف بھرپور کریک ڈاؤن جاری ہے اس سلسلے میں خفیہ گوداموں پر دو مختلف چھاپوں کے دوران مختلف دالوں،چاولوں اور سرخ مرچوں کی 44ہزاربوریاں برآمد کرکے انہیں قبضہ میں لیا گیا ہے۔انہوں نے بتایا کہ خود ساختہ مہنگائی کو روکنے کے لئے ضلع بھر میں پرائس کنٹرول مجسٹریٹس سرگرم عمل ہیں اور رواں ماہ کے دوران قیمتوں کو چیک کرتے ہوئے زائد قیمتیں وصول کرنے پر 1156گرانفروشوں کو 11لاکھ 25ہزارروپے کے جرمانے کئے گئے ہیں۔ڈپٹی کمشنر نے کہا کہ سبزی منڈیوں میں پھلوں اورسبزیوں کی نیلامیوں کے عمل کی بھی مسلسل نگرانی کی جارہی ہے تاکہ قیمتوں میں بلاجواز اضافہ کو روکا جاسکے۔ڈپٹی کمشنر نے کہا کہ آٹا،چینی،گھی اوردیگر اشیاء کی قیمتوں پر گہری نظر رکھی جارہی ہے لہذا مہنگائی مافیا کے ہاتھوں عوام کا استحصال نہیں ہونے دیں گے۔
۔۔۔///۔۔۔

فیصل آباد(محمد اویس)وزیر اعلی پنجاب سردار عثمان بزدار کی ہدایات پر عوامی مسائل سے آگاہی اور ان کے حل کے لئے میٹروپولیٹن میونسپل کارپوریشن ہال میں ہفتہ وار کھلی کچہری کا انعقاد کیا گیا۔ ڈپٹی کمشنرمحمد علی نے عوامی مسائل سنے اور موقع پر ہی افسران کو داد رسی کی ہدایت کی۔ڈپٹی کمشنر نے کہا ہے کہ وزیراعلی پنجاب سردار عثمان بزدار کی ہدایت پر کھلی کچہری کا انعقاد کرکے عوامی مسائل ان کی دہلیز پر حل کئے جارہے ہیں۔انہوں نے درخواست گزاروں کے مختلف محکموں سے متعلقہ مسائل سنتے ہوئے موقع پر موجودافسران کو نہ صرف داد رسی بلکہ تعمیلی رپورٹ سے بھی آگاہ کرنے کی ہدایت کی۔انہوں نے کہا کہ کھلی کچہریوں کو نتیجہ خیز بنانے کے لئے اقدامات جاری ہیں اس سلسلے میں محکموں کی کارکردگی کی کڑی مانیٹرنگ کی جا رہی ہے۔انہوں نے کہا کہ حکومت پنجاب کی ہدایات پر لوگوں کے مسائل سے آگاہی اور ان کے حل کے لئے اوپن ڈور پالیسی پر عملدرآمدبھی جاری ہے۔کھلی کچہری کے دوران شہریوں نے تجاوزات کے خاتمہ سمیت محکمہ مال،صحت،ویسٹ مینجمنٹ کمپنی،واسااوردیگر محکموں واداروں سے متعلقہ شکایات پیش کیں جن کے حل کے لئے موقع پر ہی احکامات جاری کئے گئے۔
۔۔۔///۔۔۔

فیصل آباد(محمد اویس)وزیراعلیٰ پنجاب سردار عثمان بزدار کی ہدایات پر ڈپٹی کمشنر محمد علی نے پھلوں وسبزیوں کی نیلامیوں کے عمل کا جائزہ لینے کے لئے علی الصبح سبزی منڈی سدھار کا دورہ کیا۔سی پی او اظہر اکرم بھی ان کے ہمراہ تھے۔اسسٹنٹ کمشنرز سٹی وصدر زوہا شاکر،نازیہ موہل،ایکسٹراسسٹنٹ ڈائریکٹر زراعت عبدالرحمن اور مارکیٹ کمیٹی کے افسران بھی موجود تھے۔ڈپٹی کمشنر اور سی پی او نے سبزی منڈی کے مختلف شیڈز میں جاکر بعض سبزیوں اور پھلوں کی دستیابی اور ان کے تھوک کے حساب سے فروخت کے لئے دی جانے والی بولیوں کو جائزہ لیا۔ڈپٹی کمشنر نے سبزی منڈی کے آڑھتیوں سے بھی ملاقات کی اورکہا کہ سبزیوں وپھلوں کی قیمتوں کو بلاجواز نہ بڑھنے دیں۔انہوں نے مارکیٹ کمیٹی کے افسران سے کہا کہ وہ سبزیوں وپھلوں کی سپلائی پر گہری نظر رکھیں اور کسی شے کی قلت کی صورت میں سپلائی کے فوری اقدامات کئے جائیں تاکہ قیمتیں بڑھنے کا اندیشہ نہ ہو۔انہوں نے شفاف اورمعقول بولیوں کے بعد جائز منافع کے ساتھ پرچون نرخ مقرر کرنے اور فوری طور پر پرائس لسٹ جاری کرنے کی بھی ہدایت کی۔ڈپٹی کمشنر سبزی منڈی میں صارفین کو پھل وسبزیاں رعایتی نرخوں پر فراہم کرنے کے لئے قائم کسان پلیٹ فارم پر بھی گئے اور کاشتکاروں کے لئے دستیاب سہولیات پر اطمینان کا اظہار کیا۔ڈپٹی کمشنر نے کسان پلیٹ فارم پر صارفین کو پھل اورسبزیوں کی براہ راست فروخت کے عمل کا بھی جائزہ لیا۔انہوں نے بتایا کہ ضلع بھر میں 12کسان پلیٹ فارم قائم ہیں جہاں کاشتکار کو اپنی اجناس کو آڑھتیوں کے ذریعے فروخت کے سلسلے میں کمشن یا مارکیٹ فیس ادانہیں کرنی پڑ رہی جس کی بدولت مڈل مین کا خاتمہ اور اخراجات کم ہونے سے صارفین تک سبزیاں اور پھل رعایتی نرخوں پر دستیاب ہو رہے ہیں۔سی پی او نے سبزی منڈی میں حفاظتی انتظامات کا تفصیلی جائزہ لیتے ہوئے ڈیوٹی افسران سے کہا کہ بولیوں کے اوقات میں سیکورٹی امور چوکس رہنے چاہیں۔
۔۔۔///۔۔۔

فیصل آباد(محمد اویس)ہائی لیول ڈیزائن کمیٹی نے مطلوبہ معیار اور قوانین پر پورا اترنے والے عمارتوں و کمرشل پلازوں کی تعمیر کے نقشوں کی 19درخواستوں کی منظوری دی ہے جن میں ایک میرج ہال اور باقی مختلف نوعیت کی کاروباری عمارتوں کی تعمیر شامل ہے۔یہ منظوری کمیٹی کے اجلاس کے دوران دی گئی جو ڈپٹی کمشنر محمد علی کی زیر صدارت منعقد ہوا۔اجلاس میں ایڈیشنل ڈپٹی کمشنر(جنرل)میاں آفتاب احمد سمیت میونسپل کارپوریشن،ایف ڈی اے،واسا،ہائی ویز،سول ڈیفنس،ریسکیو1122،ٹریفک پولیس اوردیگر متعلقہ محکموں کے افسران اور ماہر تعمیرات شاہ نواز نے شرکت کی۔اس موقع پر تجاورتی وکاروباری عمارتوں کی تعمیر کی منظوری کے لئے 28درخواستوں کا جائزہ لیا گیا اور ان کے طرز تعمیر،نقشہ جات ودیگر ضروری امور کی جانچ کرتے ہوئے 19درخواستوں کی منظوری جبکہ بلڈنگ بائی لازاور دیگرضروری شرائط پوری نہ کرنے پر بقیہ درخواستوں کو قانونی وتعمیراتی تقاضے پورے کرنے کے لئے موخر کردیا گیا۔ڈپٹی کمشنر نے اس خواہش کا اظہار کیا کہ بلند وبالا کمرشل عمارتوں وپلازوں کے منصوبے شہری خوبصورتی میں اضافہ کا باعث ہونے چاہیں جن کے نقشوں وڈیزائن میں مقامی ثقافت،طرز زندگی اوردلکش اچھوتی طرز تعمیر کا عنصر رکھا جائے تاکہ یہ عمارتیں آئندہ صدیوں تک شہر کی تہذیب وثقافت کو اجاگر کرسکیں۔انہوں نے واضح کیا کہ کاروباری عمارتوں میں مطلوبہ تقاضوں وشرائط کے مطابق گاڑیوں کی پارکنگ کے بندوبست کے بغیر کوئی نقشہ منظور نہیں کیا جائے گا۔انہوں نے پلازوں وکمرشل عمارتوں میں خصوصی افراد کے لئے ریمپ ودیگر سہولیات کا خیال رکھنے کی بھی ہدایت کی۔انہوں نے متعلقہ محکموں کو ہدایت کی کہ منظور شدہ نقشوں کی زیر تعمیر عمارتوں کی باقاعدگی سے انسپکشن کی جائے تاکہ تعمیراتی تصریحات کی خلاف ورزی نہ ہو۔ڈپٹی کمشنر نے کہا کہ منظور شدہ نقشوں کی خلاف ورزی یا تعمیراتی نقائص کی عمارتوں کو فوری سیل کردیا جائے تاکہ کسی ممکنہ حادثہ کا احتمال نہ ہو۔اجلاس کے دوران میونسپل آفیسر محمد فاروق نے نقشہ جات کی منظوری کے لئے زیرکارروائی درخواستوں کی تفصیلات سے آگاہ کیا۔

فیصل آباد (محمد اویس)وزیر اعلیٰ عثمان بزدار فیڈمک کے صنعتی زونز میں قائم کئے گئے ماڈل پولیس اسٹیشن، ڈیزاسٹر مینجمنٹ سنٹر، ون ونڈو سیل اور ویونگ سٹی کا افتتاح کر نے کے لئے جلد فیصل آباد کا دورہ کریں گے۔ انہوں نے یہ بات اپنے دفتر میں چیئرمین فیڈمک میاں کاشف اشفاق سے ملاقات میں کہی ہے۔ چیئرمین فیڈمک نے انہیں ادارے کی مجموعی کارکردگی اور سی پیک کے تحت قائم کئے جانے والے ترجیحی اکنامک زون ”علامہ اقبال انڈسٹریل سٹی“ پر ہونیوالی پیشرفت سے آگاہ کیا۔ وزیر اعلیٰ نے ا س پر اطمینان کا اظہار کرتے ہوئے کہا کہ اس منصوبے کو وقت پر مکمل کرنے کے لئے تمام وسائل بروئے کار لائے جائیں۔ انہوں نے اس حوالے سے پنجاب حکومت کے مکمل تعاون کی یقین دہانی بھی کروائی۔

فیصل آباد(محمد اویس)وزیراعلی پنجاب سردار عثمان بزدار کی ہدایت پر ماڈل بازاروں میں ضلعی انتظامیہ کی طرف سے مقررہ اشیائے ضروریہ عام مارکیٹ اور ڈی سی ریٹ سے بھی کم قیمتوں پر دستیاب ہیں۔تفصیلات کے مطابق شہرکے چار ماڈل بازاروں میں 20کلو گرام آٹے کا تھیلہ 800روپے جبکہ ڈی سی ریٹ 808اور عام مارکیٹ میں آٹے کے 20کلو گرام تھیلے کی قیمت 815روپے ہے۔اسی طرح چینی عام مارکیٹ میں 75،ڈی سی ریٹ 70اورماڈل بازاروں میں 69روپے میں فروخت کی جارہی ہے۔دال چنا اوپن مارکیٹ میں 120،ڈی سی ریٹ 105اورماڈل بازار میں 103روپے فی کلو گرام،دال مونگ ماڈل بازار میں 150روپے فی کلوگرام جبکہ اوپن مارکیٹ میں 200روپے اور ڈی سی ریٹ 152روپے ہے۔سفید چنے کی قیمت عام مارکیٹ میں 120روپے،ڈی سی ریٹ 100روپے اور فیئر پرائس شاپ پر 98روپے فی کلوگرام مقرر کی گئی ہے۔ٹماٹر ماڈل بازاروں میں 170،عام مارکیٹ میں 200اورڈی سی ریٹ 175روپے ہے۔پیاز عام مارکیٹ میں 80،ڈی سی ریٹ 73اورماڈل بازار میں 68روپے اور ماڈل بازاروں میں آلو کی فی کلوگرام قیمت 23روپے جبکہ ڈی سی ریٹ 25روپے اور عام مارکیٹ میں 30روپے فی کلوکے حساب سے فروخت ہورہا ہے۔ڈپٹی کمشنرمحمدعلی نے بتایا کہ ان اشیائے ضروریہ کی کنٹرول ریٹ پر فروخت کی کڑی مانیٹرنگ کی جارہی ہے اور ماڈل بازاروں میں صارفین کی سہولت کے لئے ضروری انتظامات کئے گئے ہیں۔
۔۔۔///۔۔۔