Category: فیصل آباد

فیصل آباد(محمد اویس)وزیراعلیٰ پنجاب سردار عثمان بزدار کی ہدایات پر ڈپٹی کمشنر محمد علی نے پھلوں وسبزیوں کی نیلامیوں کے عمل کا جائزہ لینے کے لئے علی الصبح سبزی منڈی سدھار کا دورہ کیا۔سی پی او اظہر اکرم بھی ان کے ہمراہ تھے۔اسسٹنٹ کمشنرز سٹی وصدر زوہا شاکر،نازیہ موہل،ایکسٹراسسٹنٹ ڈائریکٹر زراعت عبدالرحمن اور مارکیٹ کمیٹی کے افسران بھی موجود تھے۔ڈپٹی کمشنر اور سی پی او نے سبزی منڈی کے مختلف شیڈز میں جاکر بعض سبزیوں اور پھلوں کی دستیابی اور ان کے تھوک کے حساب سے فروخت کے لئے دی جانے والی بولیوں کو جائزہ لیا۔ڈپٹی کمشنر نے سبزی منڈی کے آڑھتیوں سے بھی ملاقات کی اورکہا کہ سبزیوں وپھلوں کی قیمتوں کو بلاجواز نہ بڑھنے دیں۔انہوں نے مارکیٹ کمیٹی کے افسران سے کہا کہ وہ سبزیوں وپھلوں کی سپلائی پر گہری نظر رکھیں اور کسی شے کی قلت کی صورت میں سپلائی کے فوری اقدامات کئے جائیں تاکہ قیمتیں بڑھنے کا اندیشہ نہ ہو۔انہوں نے شفاف اورمعقول بولیوں کے بعد جائز منافع کے ساتھ پرچون نرخ مقرر کرنے اور فوری طور پر پرائس لسٹ جاری کرنے کی بھی ہدایت کی۔ڈپٹی کمشنر سبزی منڈی میں صارفین کو پھل وسبزیاں رعایتی نرخوں پر فراہم کرنے کے لئے قائم کسان پلیٹ فارم پر بھی گئے اور کاشتکاروں کے لئے دستیاب سہولیات پر اطمینان کا اظہار کیا۔ڈپٹی کمشنر نے کسان پلیٹ فارم پر صارفین کو پھل اورسبزیوں کی براہ راست فروخت کے عمل کا بھی جائزہ لیا۔انہوں نے بتایا کہ ضلع بھر میں 12کسان پلیٹ فارم قائم ہیں جہاں کاشتکار کو اپنی اجناس کو آڑھتیوں کے ذریعے فروخت کے سلسلے میں کمشن یا مارکیٹ فیس ادانہیں کرنی پڑ رہی جس کی بدولت مڈل مین کا خاتمہ اور اخراجات کم ہونے سے صارفین تک سبزیاں اور پھل رعایتی نرخوں پر دستیاب ہو رہے ہیں۔سی پی او نے سبزی منڈی میں حفاظتی انتظامات کا تفصیلی جائزہ لیتے ہوئے ڈیوٹی افسران سے کہا کہ بولیوں کے اوقات میں سیکورٹی امور چوکس رہنے چاہیں۔
۔۔۔///۔۔۔

فیصل آباد(محمد اویس)ہائی لیول ڈیزائن کمیٹی نے مطلوبہ معیار اور قوانین پر پورا اترنے والے عمارتوں و کمرشل پلازوں کی تعمیر کے نقشوں کی 19درخواستوں کی منظوری دی ہے جن میں ایک میرج ہال اور باقی مختلف نوعیت کی کاروباری عمارتوں کی تعمیر شامل ہے۔یہ منظوری کمیٹی کے اجلاس کے دوران دی گئی جو ڈپٹی کمشنر محمد علی کی زیر صدارت منعقد ہوا۔اجلاس میں ایڈیشنل ڈپٹی کمشنر(جنرل)میاں آفتاب احمد سمیت میونسپل کارپوریشن،ایف ڈی اے،واسا،ہائی ویز،سول ڈیفنس،ریسکیو1122،ٹریفک پولیس اوردیگر متعلقہ محکموں کے افسران اور ماہر تعمیرات شاہ نواز نے شرکت کی۔اس موقع پر تجاورتی وکاروباری عمارتوں کی تعمیر کی منظوری کے لئے 28درخواستوں کا جائزہ لیا گیا اور ان کے طرز تعمیر،نقشہ جات ودیگر ضروری امور کی جانچ کرتے ہوئے 19درخواستوں کی منظوری جبکہ بلڈنگ بائی لازاور دیگرضروری شرائط پوری نہ کرنے پر بقیہ درخواستوں کو قانونی وتعمیراتی تقاضے پورے کرنے کے لئے موخر کردیا گیا۔ڈپٹی کمشنر نے اس خواہش کا اظہار کیا کہ بلند وبالا کمرشل عمارتوں وپلازوں کے منصوبے شہری خوبصورتی میں اضافہ کا باعث ہونے چاہیں جن کے نقشوں وڈیزائن میں مقامی ثقافت،طرز زندگی اوردلکش اچھوتی طرز تعمیر کا عنصر رکھا جائے تاکہ یہ عمارتیں آئندہ صدیوں تک شہر کی تہذیب وثقافت کو اجاگر کرسکیں۔انہوں نے واضح کیا کہ کاروباری عمارتوں میں مطلوبہ تقاضوں وشرائط کے مطابق گاڑیوں کی پارکنگ کے بندوبست کے بغیر کوئی نقشہ منظور نہیں کیا جائے گا۔انہوں نے پلازوں وکمرشل عمارتوں میں خصوصی افراد کے لئے ریمپ ودیگر سہولیات کا خیال رکھنے کی بھی ہدایت کی۔انہوں نے متعلقہ محکموں کو ہدایت کی کہ منظور شدہ نقشوں کی زیر تعمیر عمارتوں کی باقاعدگی سے انسپکشن کی جائے تاکہ تعمیراتی تصریحات کی خلاف ورزی نہ ہو۔ڈپٹی کمشنر نے کہا کہ منظور شدہ نقشوں کی خلاف ورزی یا تعمیراتی نقائص کی عمارتوں کو فوری سیل کردیا جائے تاکہ کسی ممکنہ حادثہ کا احتمال نہ ہو۔اجلاس کے دوران میونسپل آفیسر محمد فاروق نے نقشہ جات کی منظوری کے لئے زیرکارروائی درخواستوں کی تفصیلات سے آگاہ کیا۔

فیصل آباد (محمد اویس)وزیر اعلیٰ عثمان بزدار فیڈمک کے صنعتی زونز میں قائم کئے گئے ماڈل پولیس اسٹیشن، ڈیزاسٹر مینجمنٹ سنٹر، ون ونڈو سیل اور ویونگ سٹی کا افتتاح کر نے کے لئے جلد فیصل آباد کا دورہ کریں گے۔ انہوں نے یہ بات اپنے دفتر میں چیئرمین فیڈمک میاں کاشف اشفاق سے ملاقات میں کہی ہے۔ چیئرمین فیڈمک نے انہیں ادارے کی مجموعی کارکردگی اور سی پیک کے تحت قائم کئے جانے والے ترجیحی اکنامک زون ”علامہ اقبال انڈسٹریل سٹی“ پر ہونیوالی پیشرفت سے آگاہ کیا۔ وزیر اعلیٰ نے ا س پر اطمینان کا اظہار کرتے ہوئے کہا کہ اس منصوبے کو وقت پر مکمل کرنے کے لئے تمام وسائل بروئے کار لائے جائیں۔ انہوں نے اس حوالے سے پنجاب حکومت کے مکمل تعاون کی یقین دہانی بھی کروائی۔

فیصل آباد(محمد اویس)وزیراعلی پنجاب سردار عثمان بزدار کی ہدایت پر ماڈل بازاروں میں ضلعی انتظامیہ کی طرف سے مقررہ اشیائے ضروریہ عام مارکیٹ اور ڈی سی ریٹ سے بھی کم قیمتوں پر دستیاب ہیں۔تفصیلات کے مطابق شہرکے چار ماڈل بازاروں میں 20کلو گرام آٹے کا تھیلہ 800روپے جبکہ ڈی سی ریٹ 808اور عام مارکیٹ میں آٹے کے 20کلو گرام تھیلے کی قیمت 815روپے ہے۔اسی طرح چینی عام مارکیٹ میں 75،ڈی سی ریٹ 70اورماڈل بازاروں میں 69روپے میں فروخت کی جارہی ہے۔دال چنا اوپن مارکیٹ میں 120،ڈی سی ریٹ 105اورماڈل بازار میں 103روپے فی کلو گرام،دال مونگ ماڈل بازار میں 150روپے فی کلوگرام جبکہ اوپن مارکیٹ میں 200روپے اور ڈی سی ریٹ 152روپے ہے۔سفید چنے کی قیمت عام مارکیٹ میں 120روپے،ڈی سی ریٹ 100روپے اور فیئر پرائس شاپ پر 98روپے فی کلوگرام مقرر کی گئی ہے۔ٹماٹر ماڈل بازاروں میں 170،عام مارکیٹ میں 200اورڈی سی ریٹ 175روپے ہے۔پیاز عام مارکیٹ میں 80،ڈی سی ریٹ 73اورماڈل بازار میں 68روپے اور ماڈل بازاروں میں آلو کی فی کلوگرام قیمت 23روپے جبکہ ڈی سی ریٹ 25روپے اور عام مارکیٹ میں 30روپے فی کلوکے حساب سے فروخت ہورہا ہے۔ڈپٹی کمشنرمحمدعلی نے بتایا کہ ان اشیائے ضروریہ کی کنٹرول ریٹ پر فروخت کی کڑی مانیٹرنگ کی جارہی ہے اور ماڈل بازاروں میں صارفین کی سہولت کے لئے ضروری انتظامات کئے گئے ہیں۔
۔۔۔///۔۔۔

فیصل آباد(محمد اویس)ڈپٹی کمشنر/ڈائریکٹر جنرل ایف ڈی اے محمد علی کی ہدایات پر غیر منظور شدہ ہاؤسنگ کالونیز کے خلاف آپریشن کے سلسلے میں ایف ڈی اے کی ٹیم نے کارروائی کرتے ہوئے جڑانوالہ روڈ پر سرکاری طور پر منظوری کے بغیر تعمیر ہونے والی ایک ہاؤسنگ کالونی کی تعمیرات کو مسمار کردیا۔ڈائریکٹر ٹاؤن پلاننگ اور اسٹیٹ آفیسر کی سربراہی میں ایف ڈی اے کی ٹیم نے ضروری مشینری کے ساتھ جڑانوالہ روڈپر چک نمبر121گ ب کی زمین پر تعمیر ہونے والی غیر منظور شدہ ہاؤسنگ کالونی ایڈن ویو کے خلاف آپریشن کیا اور کالونی کے مرکزی گیٹ اور چار دیواری سمیت دیگر غیر قانونی تعمیرات کو گرادیا۔غیر قانونی اورغیر منظور شدہ ہاؤسنگ سکیم کی انتظامیہ سے کہا گیا ہے کہ وہ متعلقہ قواعدوضوابط،شرائط اور قوانین کے مطابق ہاؤسنگ کالونی کے قیام کے لئے باقاعدہ منظوری حاصل کریں۔ایڈیشنل ڈائریکٹر جنرل عامر عزیز نے کہا ہے کہ ڈپٹی کمشنر/ڈائریکٹر جنرل ایف ڈی اے محمد علی کی ہدایت پر غیر قانونی اور غیرمنظور شدہ ہاؤسنگ کالونیز کے خلاف بلاامتیاز آپریشن کیا جارہا ہے لہذا شہری بھی پلاٹس خریدتے وقت ہاؤسنگ کالونی کی قانونی حیثیت کے بارے میں دریافت کرلیں تاکہ انہیں بعدازاں پریشانی کا سامنا نہ کرنا پڑے۔انہوں نے بتایا کہ ایف ڈی اے کی طرف سے غیر قانونی ہاؤسنگ کالونیز کی فہرست بھی جاری کی گئی ہے جسے ملاحظہ کیا جاسکتا ہے۔انہوں نے کہا کہ ہاؤسنگ کالونی کی منظوری کے امور کو تیز رفتاری سے نمٹانے کے لئے ایف ڈی اے کے دفتر میں ون ونڈوکاؤنٹر کام کررہا ہے تاکہ درخواست گزاروں کو بہترین اور تیزرفتار محکمانہ سروسز فراہم کی جاسکیں۔
۔۔۔///۔۔۔

فیصل آباد(محمد اویس)لیڈیز کلب پروین شاکر کمپلیکس کے زیراہتمام جشن عیدمیلادالنبیؐ کی تقریبات کے سلسلے میں پروین شاکر کمپلیکس میں خواتین کی محفل میلاد منعقد ہوئی۔بیگم ڈپٹی کمشنر اس موقع پر مہمان خصوصی تھیں جبکہ ایڈیشنل ڈپٹی کمشنر فنانس عاصمہ اعجاز چیمہ،ایم پی اے فردوس رائے،روبینہ امجد،پرنسپل گرلز ڈگری کالج ایوب ریسرچ ڈاکٹر سائرہ خانم،دیگر تعلیمی اداروں کی پرنسپلز،طالبات اور مختلف شعبوں سے تعلق رکھنے والی خواتین بھی محفل میلاد میں شریک تھیں۔محفل میلاد کے دوران ذکر الہی،نعت خوانی اور درودوسلام پیش کیا گیا۔محفل میلاد سے اظہار خیال کرتے ہوئے بیگم ڈپٹی کمشنر نے کہا کہ عشق رسولؐ ہمارے ایمان کا حصہ اورہم سے تقاضا کرتا ہے کہ آپؐ کے فرامین کو کما حقہ مانیں اور ان پر عمل پیرا بھی ہوں۔انہوں نے کہا کہ آقائے دوعالم حضرت محمدؐ کی زندگی ہمارے لئے مشعل راہ اور باعث سعادت وشفاعت بھی ہے لہذا ہمیں اپنی زندگیاں سیرت النبیؐ کے مطابق گزارنی چاہیں۔انہوں نے محفل میلاد میں خواتین کی بھرپور شرکت کو سراہا اور کہا کہ ایسی بابرکت محافل میں شرکت کرکے دلی اطمینان اور روح تازہ ہوتی ہے۔ایڈیشنل ڈپٹی کمشنر فنانس نے کہا کہ نعت گوئی عشق رسولؐ سے محبت کا بہترین اظہار ہے اور آپؐ کی تعلیمات پر صدق دل سے عمل پیرا ہو کر ہی ہم مسائل پر قابو پاسکتے ہیں۔انہوں نے محفل میلاد میں شرکت پر بیگم ڈپٹی کمشنر،ایم پی اے اور دیگر خواتین کا شکریہ ادا کیا۔ایم پی اے فردوس رائے نے کہا کہ نبی کریمؐ اعلیٰ اقدار،حسن اخلاق،امانت وصداقت کے پیکر ہیں ضرورت اس امر کی ہے کہ ہم نبی کریمؐ کے طرز عمل پر اپنی زندگی کو سانچے میں ڈھالنے کی کوشش کریں۔آخر میں ملک وقوم کی ترقی وخوشحالی،امن وسلامتی اوربھائی چارے کی دعا بھی کی گئی۔
۔۔۔///۔۔۔

فیصل آباد(محمد اویس)ڈپٹی کمشنر محمد علی نے عام مارکیٹ میں چینی کی قیمت پر نظر ثانی کرتے ہوئے ضلع بھر میں ایک کلوگرام چینی کی قیمت 70روپے مقرر کی ہے اس سلسلے میں جاری ہونے والے نوٹیفکیشن کے مطابق دکانداروں /ڈیلرز کو چینی کی مقررہ قیمت پر عملدرآمد کی ہدایت کی گئی ہے جبکہ دکانوں پر نرخ نامہ بھی نمایاں جگہ پر آویزاں ہونا چاہیے۔خلاف ورزی کی صورت میں پرائس کنٹرول ایکٹ کے تحت قانونی کارروائی عمل میں لائی جائے گی۔