Category: فیصل آباد

فیصل آباد(محمد اویس)ڈپٹی کمشنر محمد علی نے کہا ہے کہ جشن عیدمیلادالنبیؐ کا تقاضا ہے کہ ہم سنت نبویؐ پر صدق دل سے عمل پیرا ہونے کا پختہ عہد کریں کیونکہ اسی سے ہماری دنیاوی واخروی زندگی سنور سکتی ہے۔انہوں نے یہ بات چوک گھنٹہ گھر میں سی پی اظہر اکرم اور مرکزی میلادکمیٹی کے ممبران کے ہمراہ جشن عیدمیلادالنبیؐ کا کیک کاٹنے کی تقریب سے خطاب کرتے ہوئے کہی۔ایڈیشنل ڈپٹی کمشنر جنرل میاں آفتاب احمد،ایس ایس پی اپریشنز سید علی رضا،اسسٹنٹ کمشنر سٹی زوہا شاکر،منیر احمد نورانی اورمیلادکمیٹی کے دیگر ارکان کے علاوہ عاشقان رسولؐ کی بہت بڑی تعداد موجود تھی۔ڈپٹی کمشنر نے کہا کہ سیرت مبارکہ سے ہمیں احترام انسانیت،صبروتحمل،امن و آشتی اور پیار ومحبت کا درس ملتا ہے ایسے اسلامی اقدار کو فروغ دیکر ہم ہر طرح مسائل پر قابو پاسکتے ہیں اور ایک فلاحی معاشرہ تشکیل پاسکتا ہے۔انہوں نے عیدمیلادالنبیؐ کے موقع پر مثالی اتحادو اتفاق کو سراہتے ہوئے کہا ہمیں قرآن وسنت کا دامن ہاتھ سے نہیں چھوڑنا چاہیے جو کہ حب رسولؐ کا اہم ترتین تقاضا ہے۔انہوں نے کہا کہ ضلعی انتظامیہ معاشرتی امن وسلامتی کو برقرار رکھنے کے لئے عام حالات اور خصوصاً مذہبی ایام اور تہواروں پر بھی انتظامی وحفاظتی اقدامات کے لئے ہمہ تن پرعزم ہے تاہم اس سلسلے میں کمیونٹی کا کردار انتہائی اہمیت کا حامل ہے۔انہوں نے میلادکمیٹی کے زیراہتمام جشن عیدمیلادکی تقریب کے انعقاد پر منتظمین کی کاوشوں کو سراہا۔سی پی او اظہر اکرم نے کہا کہ نبی آخرالزمانؐ سے گہری محبت ہمارا ایمان ہے اورہمیں سیرت النبی کو اپنی زندگیوں کا اوڑھنا بچھونا بنانا چاہیے۔انہوں نے کہا کہ ضلعی پولیس نے عیدمیلادالنبیؐ کو شایان شان طریقے سے منانے کے لئے سخت ترین سیکورٹی انتظامات پر عملدرآمد کیا جا رہا ہے۔منیر احمد نورانی نے کہا کہ عشق رسولؐ ہمارے ایمان کا حصہ ہے اورہم آپس میں مثالی اتحاد واتفاق ویگانگت کے ذریعے حضرت محمدؐ سے گہری عقیدت کا اظہار کررہے ہیں۔ میلادکمیٹی کے دیگرارکان نے جشن عیدمیلادالنبیؐ کے جلوسوں کی بہترین سیکورٹی اوردیگر انتظامات پرعمدہ انداز میں عملدرآمد کے سلسلے میں ضلعی انتظامیہ وپولیس کی موثر اورجامع حکمت عملی کو سراہا اور تقریب میں شرکت پر ڈپٹی کمشنر،سی پی او اور دیگر کا شکریہ ادا کیا۔تقریب کے اختتام پر ملک وقوم کی ترقی وسربلندی اورامن وآشتی کی خصوصی دعا بھی کی گئی۔
۔۔۔///۔۔۔

فیصل آباد(محمد اویس)ضلع میں جشن عید میلاد النبیؐ پر امن ماحول میں بھر پور مذہبی عقیدت و احترام اور جوش و جذبے سے منایا گیا اس موقع پر ضلعی انتظامیہ اور پولیس کی طرف سے جامع حفاظتی و انتظامی اقدامات کئے گئے تھے۔ڈپٹی کمشنرمحمد علی اور سی پی او اظہر اکرم عید میلاد النبیؐ کے جلوسوں،ریلیوں اور محافل میلاد کے سیکیورٹی انتظامات پر عملدرآمد کیلئے سارا دن شہر بھر میں متحرک رہے۔انہوں نے عید میلاد النبیؐ کے مرکزی جلوسوں کے منتظمین سے بھی ملاقات کی اور گول جامع مسجد غلام محمد آباد سمیت جلوسوں کے بعض دیگر حساس مقامات پر موجود رہے اور تمام تر سیکیورٹی کو ہائی الرٹ رکھا۔انہوں نے تمام مکاتب فکر کے علماء کرام اور جلوسوں کے منتظمین کا شکریہ ادا کیا اور کہا کہ امن و امان قائم رکھنے کیلئے سیکیورٹی انتظامات کو فول پروف بنانے کے سلسلے میں ان کی طرف بھر پور تعاون قابل ستائش ہے اور اتحاد و اتفاق کی یہ شاندار روایات آئندہ بھی قائم و دائم رکھی جائیں گی۔انہوں نے دائمی اور پائیدار امن و سلامتی کیلئے علماء کرام سے اپیل کی کہ وہ اسی طرح اپنے پیروکاروں میں صبر و تحمل،برداشت،پیار و محبت،باہمی احترام،اتحاد و اتفاق اور مذہبی رواداری کو مزید فروغ دینے کا سلسلہ جاری رکھیں تاکہ سماجی ترقی اور فلاحی معاشرے کے قیام میں کوئی رکاوٹ نہ رہے۔ ڈپٹی کمشنر اور سی پی او نے ڈی سی آفس میں قائم مرکزی کنٹرول روم کا بھی دورہ کیا اور سی سی ٹی وی کیمروں کے ذریعے عید میلاد النبیؐ کے جلوسوں کی سیکیورٹی کی مانیٹرنگ کے عمل کا معائنہ کیا۔عید میلاد النبیؐ کے مرکزی جلوس جامع مسجد سنی رضوی جھنگ بازار اور جامع قاسمیہ غلام محمد آباد سے برآمد ہوئے اور مختلف راستوں سے گزرتے ہوئے انہی مقامات پر پہنچ کر اختتام پذیر ہوئے۔مختلف علاقوں سے جشن عید میلاد النبیؐ کے جلوس مرکزی جلوسوں میں شامل ہوتے رہے۔جہاں شرکاء پر پھولوں کی پتیاں بھی نچھاور کی گئیں۔جلوسوں کو سیکیورٹی اہلکاروں نے اپنے حصار میں لیا ہوا تھا جبکہ سول ڈیفنس،ریسکیو 1122 اور محکمہ صحت کی موبائل میڈیکل سروسز کا بھی جلوسوں کے ہمراہ بندوبست موجود تھا۔عید میلاد النبیؐ کے موقع پر گلی کوچوں،بازاروں،شاہراؤں،چوکوں اور مساجد کو رنگ برنگی جھنڈیوں، بینروں اور دیگر آرائشی اشیاء و لائٹس سے سجایا گیا تھا جبکہ رات کے وقت مساجد،نجی و سرکاری عمارتوں پر رنگ برنگی لائٹنگ خوبصورت منظر پیش کر رہی تھی۔قبل ازیں دن کا آغاز مساجد میں نماز فجر کے بعد خصوصی دعاؤں،ذکر الٰہی اور درود و سلام سے ہوا۔عاشقان رسولؐ سائیکلوں،موٹرسائیکلوں،کاروں،ٹرالیوں،اونٹ ریڑھیوں اور دیگر گاڑیوں کو روضہ رسولؐ اور خانہ کعبہ کے ماڈلز سے سجا کر کلمہ طیبہ اور درود سلام کا ورد کرتے جلوسوں میں شریک ہوئے اور جگہ جگہ لوگوں میں نیاز تقسیم کرنے کا سلسلہ دن بھر جاری رہا۔جشن عید میلاد النبیؐ کے موقع پر ہسپتالوں،یتیم خانوں،دارالامان،ایس او ایس ویلج اور دیگر فلاحی اداروں میں کھانا اور پھل بھی تقسیم کیا گیا۔
۔۔۔///۔۔۔

فیصل آباد (محمد اویس)عید میلاد النبیؐ کے موقع پر الائیڈ ہسپتال کے مختلف وارڈز میں مریضوں میں مٹھائی تقسیم کی گئی۔ ڈپٹی میڈیکل سپرنٹنڈنٹ ڈاکٹر اکرم چیمہ،انچارج آئسولیشن وارڈڈاکٹر معصومہ سردار، میڈیکل سوشل آفیسرزعنبرین اقبال اورثناء اللہ نے الائیڈ ہسپتال کے چلڈرن وارڈ،ڈینگی آئسولیشن اور دیگروارڈ میں زیر علاج مریضوں کو عید میلاد النبیؐ کی مبارکباد دی اور ان میں مٹھائی تقسیم کی۔ڈپٹی میڈیکل سپرنٹنڈنٹ اور میڈیکل سوشل آفیسرز نے کہا کہ نبی آخرالزمان ؐ سے گہری محبت ہمارا ایمان ہے اور ہمیں سیرت مبارکہ کو اپنی زندگیوں کا اوڑھنا بچھونا بنانا چاہئے۔انہوں نے کہا کہ نبی کریم صلی اللہ علیہ والہ وسلم نے دکھی انسانیت کی خدمت کا درس دیا ہے لہذا آقائے دوعالم کے فرمان کے مطابق مشکل کی گھڑی میں مبتلا انسانوں کی دلجوئی کی جائے۔انہوں نے مریضوں کی جلد صحت یابی کی دعا بھی کی۔
۔۔۔///۔۔۔

فیصل آباد (محمد اویس)صوبائی وزیر پبلک پراسیکیوشن چوہدری ظہیر الدین نے کہا ہے کہ آقا کریم کی حیات طیبہ ایک کامل نمونہ اور آپؐ کی ذات اطہر ہمارے لئے رہنمائی اور دنیا و آخرت کی نجات کا ذریعہ ہے۔انہوں نے یہ بات جشن عید میلاد النبی صلی اللہ علیہ والہ وسلم کے موقع پر میونسپل کمیٹی جڑانوالہ کے زیر اہتمام کمیٹی باغ میں منعقدہ محفل میلاد میں شرکت کرتے ہوئے کہی۔اسسٹنٹ کمشنر جڑانوالہ عمر دراز گوندل،ایس پی طارق سکھیرا،چوہدری تیمور علی خان،چوہدری عمران یوسف،حاجی نصر اللہ،مولانا یونس رضوی،مفتی سلیم چشتی،مولانا ناصرکے علاوہ میونسپل کمیٹی کے افسران،سٹاف ممبران اورنعت خوان حضرات بھی موجود تھے۔صوبائی وزیر نے کہا کہ عشق رسولؐ کے بغیر ہمارا ایمان مکمل نہیں اور نبی کریم صلی اللہ علیہ وآلہ وسلم سے محبت کے لئے ضروری ہے کہ سچے اور پکے مسلمان بن جائیں۔ انہوں نے کہا کہ اگر ہم اپنی زندگی سیرت طیبہ کے مطابق گزارتے ہیں تو یہی ہمارے لئے حقیقی نجات ہے۔ انہوں نے کہا کہ بہترین مسلمان وہ ہے جس کے ہا تھ اوار زبان سے دوسرے محفوظ رہیں لہذا ہمیں اسلام کے سنہری اصولوں پر صدق دل سے عمل پیرا ہونا چاہئے۔ انہوں نے کہا کہ صبر و تحمل‘ رواداری اور برداشت جیسے اوصاف حمیدہ کو اپنی زندگی کا شعار بنائیں۔انہوں نے کہا کہ جشن عیدمیلادالنبیؐ کا تقاضا ہے کہ ہم اپنی زندگیوں کو اسوہ حسنہؐ کے مطابق گزارنے کا عزم کر لیں جس میں ہمارے سماجی مسائل کا حل موجود ہے۔انہوں نے محفل میلاد کے بابرکت انعقاد کو سراہا اور کہاکہ آپؐ نے دشمنی کو محبت اور بیگانگی کو یگانگت میں تبدیل کرنے کی تعلیم دی۔اسسٹنٹ کمشنر،ایس پی اور دیگر نے بھی سیرت النبی صلی اللہ علیہ والہ وسلم پر روشنی ڈالتے ہوئے کہا کہ نبی کریم کی تعلیمات پر صدق دل سے عمل پیرا ہوکر ہم ہر موڑ پر کامیابی حاصل کر سکتے ہیں۔اس موقع پر نعت خواں حضرات نے خوش الہانی سے سرور کائنات کے حضور گلہائے عقیدت اور حاضرین نے درود و سلام پیش کیا۔
۔۔۔///۔۔۔

فیصل آباد (محمد اویس)ڈپٹی کمشنر محمد علی کی ہدایت پر انسداد گداگری کی جاری مہم کے سلسلے میں محکمہ سماجی بہبود کی ٹیموں نے گزشتہ روز شاہرات پر کارروائی کرتے ہوئے مزید 35 بھکاریوں کو تحویل میں لے لیا جس میں پندرہ مرد‘ 19 خواتین اور ایک بھکاری بچہ شامل ہے جن کی اصلاح کے لئے انہیں اولڈ ایج ہوم‘ دارالامان اور چائلڈ پروٹیکشن بیورو منتقل کر دیا گیا ہے۔

فیصل آباد(محمد اویس)جشن عید میلاد النبی کے حوالے سے ریڈیو پاکستان کے زیر اہتمام خواتین کی محفل میلاد منعقد ہوئی جس کی صدارت پروفیسر طلعت صفدر نے کی جبکہ ڈپٹی ڈسٹرکٹ ایجوکیشن آفیسر ڈاکٹرحنا ریاض مہمان خصوصی تھیں نعت خوانی کی اس محفل میں نقابت کے فرائض ثناریاض نے ادا کئے۔پروفیسر طلعت صفدر نے سیرت النبی صلی اللہ علیہ وآلہ وسلم کے حوالے سے اظہار خیال کرتے ہوئے کہا کہ رسول کریم صلی اللہ علیہ وآلہ وسلم کی زندگی ہمارے لئے مشعل راہ اور باعث سعادت وشفاعت بھی ہے لہذا ہمیں اپنی زندگیاں سیرت النبیؐ کے مطابق گزاری چاہیے۔عائشہ بتول ٹمن،معشوق خشنود زہرہ اور دیگرخواتین نے نعت خوانی کر کے نبی کریمؐ کے حضور نذرانہ عقیدت پیش کیا۔
۔۔۔///۔۔۔

فیصل آباد(محمد اویس)ڈویژن بھر میں جشن عیدمیلادالنبیؐ مذہبی عقیدت واحترام اورشایان شان طریقے سے منانے کیلئے تمام تر انتظامی وحفاظتی تیاریاں مکمل کر لی گئی ہیں تاہم مذہبی ہم آہنگی،اتحادواتفاق اوربھائی چارے کی فضاء کو قائم ودائم رکھنے کے لئے امن کمیٹیز کے ارکان کا تعاون ہمیشہ قابل ستائش رہاہے۔یہ بات ڈویژنل کمشنر محمود جاوید بھٹی نے سرکٹ ہاؤس میں منعقدہ ڈویژنل امن کمیٹی کے ارکان سے خطاب کرتے ہوئے کہی۔آر پی او غلام محمود ڈوگر،ڈپٹی کمشنرمحمد علی،سی پی او اظہر اکرم،ارکان قومی وصوبائی اسمبلی نواب شیر وسیر،لطیف نذر،شکیل شاہد،فردوس رائے کے علاوہ ایڈیشنل کمشنرز ملک خادم جیلانی،محبوب احمد،ایڈیشنل ڈپٹی کمشنر (جنرل)میاں آفتاب احمد،اسسٹنٹ کمشنر جنرل مصور خان نیازی،ایڈمن آفیسر ریاض انجم،ایس پی سپیشل برانچ انجم کمال اوردیگر افسران بھی موجود تھے جبکہ اجلاس میں ڈویژن کے چاروں اضلاع سے تعلق رکھنے والے علماء کرام اور مذہبی رہنماؤں نے شرکت کی جن میں مفتی ضیاء مدنی،پیر ابراہیم سیالوی،اسلم بھلی،سعید بٹ قادری،مولانا محمد حفیظ،قاری محمد جاوید اختر قادری،قاری محمد عاعف سیالوی،خواجہ معین الدین،خلیل احمد اشرفی،ممتاز حسین گوندل،حافظ نعیم الحق ودیگر شامل تھے۔ڈویژنل کمشنر نے ڈویژن بھر سے امن کمیٹی کے ارکان کا خیر مقدم کرتے ہوئے کہا کہ معاشرتی امن اورمذہبی رواداری کی فضاء برقرار رکھنے کے لئے ان کی شاندارخدمات قابل ستائش ہیں۔انہوں نے کہا کہ ربیع الاول کا مبارک مہینہ تمام مسلمانوں کے لئے یکساں عقیدت واحترام کا حامل ہے جس کے تقدس کو ہر صوت برقرار رہنا چاہیے۔انہوں نے کہا کہ حفاظتی وانتظامی امور کے استحکام کے لئے تمام مکاتب فکر کے علماء کرام ومذہبی رہنماؤں کی مشاورت کو مقدم رکھا جاتا ہے جس سے امن وسلامتی کی ضمانت ملتی ہے۔ڈویژنل کمشنر نے خوشی اوراطمینان کا اظہار کرتے ہوئے کہا کہ فیصل آباد ڈویژن میں تمام مکاتب فکر کے علماکرام آپس میں متحد ومتفق ہیں تاہم اس نوعیت کے اجلاس خیروبرکت اورباہمی رابطے کے استحکام کے لئے منعقد کئے جاتے ہیں۔انہوں نے بھارتی سپریم کورٹ کی طرف سے تاریخی بابری مسجد کی جگہ رام مندر تعمیر کرنے کے کے فیصلے کی شدید مذمت کرتے ہوئے کہا مودی کا یہ اقدام امن کی فضا کو برباد کرنے کی گھناؤنی سازش ہے لیکن علماء کرام اپنے محراب ومنبر سے مذہبی رواداری،پیارومحبت اور قانون کی پاسداری کا درس دیں اور اسوہ حسنہ پر صدق دل سے عمل پیرا ہونے،آپس میں متحد رہنے اورجشن عیدمیلادالنبیؐ کو مذہبی جذبے سے مناتے ہوئے ہر قسم کی خرافات سے اجتناب کرنے کی تلقین کریں جو کہ عشق رسولؐ کا تقاضا ہے۔ آر پی او غلام محمودڈوگر نے امن کمیٹیوں کے ارکان کے مثالی تعاون اورفعال کردار کو خراج تحسین پیش کرتے ہوئے کہا کہ ماہ ربیع الاول کے حوالے سے منعقدہ تمام تر تقریبات کی مکمل سیکورٹی کویقینی بنایا جارہا ہے تاہم ان تقریبات کے منتظمین بھی مشکوک افراد پر نظر رکھیں تاکہ اسلام وملک دشمن عناصر کو تخریب کاری کا موقع نہ ملے۔انہوں نے کہا کہ نبی کریمؐ سے گہری محبت ہمارے ایمان کا اہم حصہ ہے جس کے اچھے انداز میں اظہار کے لئے نظم وضبط،قانون کی پابندی اوردیگر اخلاقی تقاضوں کو مدنظر رکھنا چاہیے۔اس ضمن میں علماکرام اپنے پیروکاروں کو عیدمیلادالنبیؐ کے موقع پر بغیرسائیلنسر موٹرسائیکل چلانے،آتش بازی اورہلڑ بازی سے گریز کرنے کی تاکید کریں۔انہوں نے کہا کہ آپس میں رابطوں کو مضبوط کرنے سے ضابطہ کی ضرورت نہیں رہتی اسی لئے علما کرام سے گہرا تعلق برقرار رکھا جائے گا۔ارکان اسمبلی نے امن کمیٹیوں کے ارکان کی شاندار خدمات اور فعال کردار کو خراج تحسین پیش کرتے ہوئے کہا کہ سرور کونین حضرت محمد صلی اللہ علیہ وآلہ وسلم سے گہری محبت و عقیدت تمام مسلمانوں کے ایمان کا جزو ہے جس میں کوئی اختلاف نہیں ہو سکتا تاہم شرارتی عناصر سے ہوشیار رہنے کی ضرورت ہے۔انہوں نے کہا کہ بھارت ہمارے خلاف پراپیگنڈا میں مصروف ہے لیکن قومی یکجہتی سے سیسہ پلائی دیوار ثابت ہو کر دشمن کے ناپاک عزائم کو خاک میں ملانا ہے۔انہوں نے بھارتی سپریم کورٹ کے فیصلے کی مذمت کرتے ہوئے کہا کہ ہمیں اس موقع پر جذبات کو قابو اور امن کی فضا کو قائم رکھنے کی ضرورت ہے۔انہوں نے کہا کہ فرقہ وارانہ ہم آہنگی‘ بھائی چارے اور اتحاد و اتفاق کے ایسے شاندار ماحول میں امن کا قیام قابل بھروسہ ہے۔اجلاس کے دوران علماکرام ودیگر اراکین نے اپنے بھرپور تعاون کا یقین دلاتے ہوئے کہا کہ آقائے دو عالمؐ کی ولادت باسعادت کا دن ہمارے لئے باعث برکت ہے جسے بھرپور انداز میں عقیدت واحترام کے ساتھ منایاجائے گا اور اس دن کی حرمت پر آنچ نہیں آنے دیں گے۔انہوں نے عید میلاد النبیؐ جلوسوں کے راستوں پر صفائی ستھرائی اورتجاوزات کے خاتمہ کی ضرورت پر زور دیا۔آخرمیں ملک وقوم کی ترقی وخوشحالی،امن وسلامتی،اتحاد ویکجہتی،خیروبرکت، شہدا کشمیر اور مفکر پاکستان ڈاکٹر علامہ محمد اقبال کی روح کے ایصال ثواب کے لئیدعا کی گئی۔

فیصل آباد(محمد اویس)وزیر اعظم پاکستان کے زرعی ایمرجنسی پروگرام کے تحت گندم کی پیداوار میں اضافہ کے قومی منصوبہ کے تحت گندم کے کاشتکاروں کو سبسڈی پر تصدیق شدہ بیج فراہم کئے جا رہے ہیں اس سلسلے میں ڈویژن بھر میں 59269 اور ضلع فیصل آباد میں 17600 تھیلوں کی تقسیم کا کوٹہ مختص کیا گیا ہے۔اس ضمن میں ضلع فیصل آباد سے تعلق رکھنے والے کسانوں میں 200 تھیلے تقسیم کرنے کی تقریب محکمہ زراعت کے آفس میں منعقد ہوئی۔ایم پی اے عادل پرویز گجر اس موقع پر مہمان خصوصی تھے جبکہ ڈائریکٹر زراعت چوہدری عبدالحمید اور محکمہ زراعت کے دیگر افسران بھی موجود تھے۔ڈائریکٹر زراعت نے بتایا کہ کسانوں میں گندم کے تصدیق شدہ بیج اجالا2006،فیصل آباد 2008،اناج،فخر اور دیگر اقسام کے بیج تقسیم کئے جارہے ہیں۔انہوں نے بتایا کہ ایک بیگ کی قیمت 2700 روپے ہے جبکہ حکومت بذریعہ ووچر 1200روپے کی سبسڈی دے رہی ہے۔انہوں نے بتایا کہ گندم کے کسانوں کے مابین پیداواری مقابلوں کے علاوہ ضلع میں 123نمائشی پلاٹ بھی لگائے جائیں گے جس کے لئے بھی سبسڈی دی جائے گی۔انہوں نے کاشتکاروں کو سبسڈی کے حصول کے لئے طریقہ کار سے بھی آگاہ کیا۔ تقریب سے خطاب کرتے ہوئے ایم پی اے عادل پرویز گجر نے کہا کہ وزیر اعظم پاکستان عمران خان اور وزیر اعلیٰ پنجاب سردار عثمان بزدار کی قیادت میں موجودہ حکومت شعبہ زراعت کی ترقی اور کسانوں کی فلاح و بہبود کیلئے دن رات کوشاں ہے۔انہوں نے بیج حاصل کرنے والے گندم کے کسانوں کو مبارکباد دی اور کہا کہ وہ گندم کی پیداوار میں اضافے کیلئے بھرپور محنت کریں۔
۔۔۔///۔۔۔

فیصل آباد( محمد اویس)جشن عید میلاد النبیؐ کے حوالے سے گورنمنٹ ووکیشنل ٹریننگ انسٹی ٹیوٹ سمن آباد میں محفل میلاد کا انعقاد کیا گیا جس میں پرنسپل کالج میڈم عائشہ اسلم، پرنسپل گورنمنٹ کالج آف ٹیکنالوجی برائے خواتین میڈم زری سعید اور میڈم کشمالہ ودیگر اساتذہ وطالبات نے حضور نبی کریم ؐ کی شان اقدس میں گلہائے عقیدت پیش کئے۔پرنسپل کالج نے اظہار خیال کرتے ہوئے کہا کہ نبی کریم ؐ کی زندگی ہمارے لیے مشعل راہ ہے ہمیں اپنی زندگیوں کو سنت نبوی ؐ کے مطابق ڈھالنا چاہیے کیونکہ یہی اعمال دنیاوی زندگی اور اخروی زندگی میں کامیابی کا واحد ذریعہ ہیں اس موقع پر طالبات کی کثیر تعداد نے نعت رسول مقبول بھی پڑھی محفل میلاد میں طالبات کے والدین اور اہل علاقہ کی خواتین نے بھی شرکت کی۔
۔۔۔///۔۔۔