گوجرانوالہ: وزیرِ اعظم پاکستان کے مشیر برائے سیاسی امور، رانا ثناء اللّٰہ کے خلاف ناقابلِ ضمانت وارنٹِ گرفتاری جاری کر دیے گئے ہیں۔ یہ وارنٹ گوجرانوالہ کی جوڈیشل مجسٹریٹ، سدرہ گل نواز کی عدالت سے جاری ہوئے، جنہوں نے رانا ثناء اللّٰہ کو 12 دسمبر تک گرفتار کر کے پیش کرنے کا حکم دیا ہے۔
رانا ثناء اللّٰہ کے خلاف یہ مقدمہ گوجرانوالہ کے تھانہ سیٹلائٹ ٹاؤن میں درج کیا گیا تھا۔ یہ کیس 16 اکتوبر 2020 کو پی ڈی ایم کے جلسے کے دوران پیش آنے والے واقعات سے متعلق ہے۔ ایف آئی آر میں رانا ثناء اللّٰہ پر الزام عائد کیا گیا ہے کہ انہوں نے کنٹینر ہٹانے اور پولیس اہلکاروں پر گاڑی چڑھانے کی کوشش کی۔مقدمے میں دیگر ملزمان، خرم دستگیر، عمران خالد اور سلمان خالد بٹ پہلے ہی بری ہو چکے ہیں، تاہم رانا ثناء اللّٰہ کے معاملے میں پولیس نے تاخیر سے چالان پیش کیا۔ پولیس کی ابتدائی رپورٹ میں رانا ثناء اللّٰہ کو بے گناہ قرار دیا گیا تھا، لیکن عدالت نے اس رپورٹ کو مسترد کرتے ہوئے انہیں طلب کیا تھا۔
رانا ثناء اللّٰہ کی مسلسل غیر حاضری اور عدالتی طلبی کے باوجود پیش نہ ہونے پر عدالت نے ناقابلِ ضمانت وارنٹ گرفتاری جاری کیے ہیں۔ اب عدالت نے پولیس کو حکم دیا ہے کہ وہ رانا ثناء اللّٰہ کو 12 دسمبر تک گرفتار کر کے پیش کرے۔
