Category: گوجرانوالہ

گوجرانوالہ (باغی ٹی وی،نامہ نگارمحمدرمضان نوشاہی) ڈپٹی کمشنر نوید احمد نے چارج سنبھالنے کے دوسرے روز بھی شہر کے مختلف علاقوں کا ہنگامی دورہ کیا۔ سیٹلائٹ ٹاؤن سے ملحقہ روڈز، گلی محلوں، لیاقت پارک اور گلشن اقبال پارک میں صفائی کی صورتحال کا جائزہ لیا۔ انہوں نے پارکس میں صفائی کے معیار کو بہتر بنانے، واکنگ ٹریک اور بینچوں کی فوری مرمت اور واٹر فلٹریشن پلانٹس کی دیکھ بھال کی ہدایات جاری کیں۔

دورے کے دوران ڈپٹی کمشنر نے گلشن اقبال پارک میں جھیل کے اردگرد بینچوں اور داخلی گیٹس کی مرمت اور فواروں کو ڈینگی کے خطرے کے پیش نظر بند رکھنے کی ہدایات دیں تاکہ ڈینگی کا لاروا افزائش نہ کر سکے۔

بعد ازاں، ڈپٹی کمشنر نوید احمد نے ایک اجلاس میں وزیراعلیٰ پنجاب مریم نواز شریف کے گورننس انیشی ایٹیوز (KPIs) پر محکموں کی کارکردگی کا جائزہ لیا اور ہدایات جاری کیں کہ ہر محکمہ اپنی ذمہ داریاں پوری کرے۔ انہوں نے کہا کہ محکمے کی بہتر کارکردگی کے لیے صفائی ستھرا پنجاب اور عوامی خدمت کے لیے متعین اہداف پر عمل درآمد ضروری ہے۔

اجلاس میں پرائس کنٹرول میکنزم اور پرائس مجسٹریٹس کی کارکردگی کا فرداً فرداً جائزہ لیا گیا۔ ڈپٹی کمشنر نے تمام پرائس مجسٹریٹس کو ہدایت کی کہ ناجائز منافع خوری کی روک تھام کے لیے فیلڈ میں متحرک رہیں اور عملی اقدامات اٹھائیں۔

ڈپٹی کمشنر نے گوجرانوالہ ویسٹ مینجمنٹ کمپنی اور میونسپل کارپوریشن کے افسران کو ہدایت کی کہ شہر کے تمام علاقوں سے کوڑا کرکٹ بروقت اٹھایا جائے اور تجاوزات کا خاتمہ کیا جائے تاکہ وزیراعلیٰ پنجاب کے "ستھرا پنجاب” ویژن پر عمل درآمد ممکن ہو۔

انہوں نے عوام سے اپیل کی کہ وہ کوڑا کرکٹ مخصوص مقامات پر ڈالیں تاکہ شہر کی صفائی اور خوبصورتی برقرار رہ سکے اور بیماریاں نہ پھیلیں۔

گوجرانوالہ (باغی ٹی وی) وزیر اعلیٰ پنجاب محترمہ مریم نواز کے وژن "کھیلتا پنجاب” کے تحت گوجرانوالہ میڈیکل کالج میں منعقدہ سپورٹس فیسٹیول اختتام پذیر ہو گیا۔ اس موقع پر کمشنر گوجرانوالہ سید نوید حیدر شیرازی، ایم پی اے محمد نواز چوہان اور پرنسپل پروفیسر ڈاکٹر اقبال حسین ڈوگر نے نمایاں کارکردگی دکھانے والے طلباء و طالبات میں انعامات تقسیم کیے۔

تقریب سے خطاب کرتے ہوئے کمشنر سید نوید حیدر شیرازی نے پوزیشن ہولڈرز کو مبارکباد دی اور کہا کہ نوجوان نسل کو صحت مند سرگرمیوں میں شامل کرنے کے لیے سپورٹس کا فروغ وقت کی اہم ضرورت ہے۔ انہوں نے مزید کہا کہ وزیر اعلیٰ پنجاب کے وژن کے تحت پنجاب پرئمیر لیگ کا انعقاد بھی گوجرانوالہ میں کیا گیا ہے، جس میں صوبے بھر سے 8 ٹیمیں حصہ لے رہی ہیں۔

کمشنر نے گوجرانوالہ میڈیکل کالج کی انتظامیہ کی سپورٹس فیسٹیول کے کامیاب انعقاد پر تعریف کی اور آئندہ بھی ایسی سرگرمیوں کے انعقاد کی ہدایت کی۔ ایم پی اے محمد نواز چوہان نے کہا کہ وزیر اعلیٰ مریم نواز کی قیادت میں حکومت پنجاب ہر شعبے پر بھرپور توجہ دے رہی ہے، اور "کھیلتا پنجاب” پروگرام اسی سلسلے کا حصہ ہے۔

تقریب میں ایم ایس ڈاکٹر ارشاد اللہ گورائیہ، ڈاکٹر سید نوید احمد، ڈاکٹر عرفان قیوم سمیت طلباء و طالبات کی بڑی تعداد موجود تھی۔

گوجرانوالہ (باغی ٹی وی،نامہ نگارمحمدرمضان نوشاہی) بورڈ آف انٹرمیڈیٹ اینڈ سیکنڈری ایجوکیشن کے زیر اہتمام سالانہ محفل میلاد النبی صلی اللہ علیہ وسلم کا انعقاد مسجد سرور کونین صلی اللہ علیہ وسلم میں کیا گیا۔ اس بابرکت محفل کی صدارت چیئرمین تعلیمی بورڈ اور کمشنر گوجرانوالہ ڈویژن سید نوید حیدر شیرازی نے کی۔ محفل میں معروف عالم دین پروفیسر ڈاکٹر حافظ محمد شفیق تبسم نے سیرت النبی صلی اللہ علیہ وسلم کے مختلف پہلوؤں پر تفصیلی روشنی ڈالی۔

اپنے خطاب میں پروفیسر شفیق تبسم نے کہا کہ حضرت محمد صلی اللہ علیہ وسلم کی آمد نے دنیا سے جہالت کے اندھیرے مٹا دیے اور آپ صلی اللہ علیہ وسلم کی تعلیمات پر عمل پیرا ہونے سے دنیا و آخرت کی کامیابی کی ضمانت ہے۔ چیئرمین بورڈ سید نوید حیدر شیرازی نے اپنے خطاب میں کہا کہ حضور صلی اللہ علیہ وسلم سے محبت ہمارے ایمان کا حصہ ہے اور ہمیں سیرت النبی صلی اللہ علیہ وسلم کو اپنی زندگیوں میں عملی طور پر اپنانا چاہیے۔

محفل کے اختتام پر تعلیمی بورڈ کے ملازمین کے حج کی ادائیگی کے لیے قرعہ اندازی کی گئی جس میں 4 خوش نصیب ملازمین کا انتخاب ہوا۔ منتخب ہونے والوں میں ناصر سعید کھوکھر، محمد منصب، تنویر احمد اور محمد عمران شامل ہیں۔ اس تقریب میں پروفیسر گوہر الطاف، سیکرٹری بورڈ، پروفیسر محمد نعیم بٹ اور دیگر معزز شخصیات نے بھی شرکت کی۔

گوجرانوالہ (باغی ٹی وی نامہ نگارمحمدرمضان نوشاہی) ڈسٹرکٹ پاپولیشن ویلفیئر آفس گوجرانوالہ کے زیر اہتمام ورلڈ کنٹراسیپشن ڈے کے موقع پر ایک روزہ سیمینار کا انعقاد کیا گیا۔ اس سیمینار میں بڑھتی ہوئی آبادی کو پاکستان کے لیے ایک بڑا چیلنج قرار دیا گیا۔

اسٹنٹ کمشنر (سٹی) میڈم اقراء مبین نے کہا کہ پاکستان میں زچگی اور نوزائیدگی کی شرح بہت زیادہ ہے۔ فیملی پلاننگ کے ذریعے نہ صرف ماؤں اور بچوں کی صحت کو بہتر بنایا جا سکتا ہے بلکہ ملک کے وسائل پر بھی دباؤ کم کیا جا سکتا ہے۔

ڈسٹرکٹ پاپولیشن ویلفیئر آفیسر عدنان اشرف نے کہا کہ حکومت فیملی پلاننگ کے لیے مفت سہولیات فراہم کر رہی ہے لیکن لوگوں کو اس کی اہمیت کے بارے میں آگاہ کرنا ضروری ہے۔

سیمینار میں شرکت کرنے والے دیگر مقررین نے بھی فیملی پلاننگ کی اہمیت پر زور دیا اور لوگوں سے اپنا خاندان منصوبہ بندی کے مطابق رکھنے کی اپیل کی۔

سیمینار میں ڈاکٹر نرجس بتول، منور حسین، ڈاکٹر عدیلہ لیاقت، سجاد حسین نئیر (TCI- گرین سٹار)، ڈاکٹر سروش شبیر، محمد عمیر، علامہ اظہر حسین فاروقی، ثمر عباس نقوی، گلفام ریاض ہاشمی، مولانا عبدالقدوس اور ڈاکٹر عمارہ ناصر کے علاوہ لائن ڈیپارٹمنٹس کے سربراہاں اور نمائندگان نے بھی شرکت کی۔

سیمینار کے اختتام پر ورلڈ کنٹراسیپشن ڈے کے حوالے سے ایک واک کا بھی اہتمام کیا گیا۔

سیمینار میں شرکت کرنے والوں نے کہا کہ پاکستان کی بڑھتی ہوئی آبادی ملک کے معاشی ترقی اور سماجی بہبود کے لیے ایک بڑا چیلنج ہے۔ فیملی پلاننگ کے ذریعے اس چیلنج سے نمٹنے کی کوشش کی جا سکتی ہے۔

گوجرانوالہ کے ڈسٹرکٹ پاپولیشن ویلفیئر آفس نے فیملی پلاننگ کے بارے میں آگاہی بڑھانے کے لیے مختلف پروگراموں کا اہتمام کیا ہے۔ ان پروگراموں میں لوگوں کو فیملی پلاننگ کے طریقوں کے بارے میں بتایا جاتا ہے اور انہیں مفت کنٹراسیپٹو سہولیات فراہم کی جاتی ہیں۔

گوجرانوالہ (باغی ٹی وی،نامہ نگارمحمدرمضان نوشاہی)حکومت پنجاب کی ہدایات پر ڈسٹرکٹ پاپولیشن ویلفیئر آفس گوجرانوالہ کے زیر اہتمام ورلڈ کنٹراسیپٹو ویک 23 سے 28 ستمبر تک منایا جا رہا ہے۔ ڈسٹرکٹ پاپولیشن ویلفیئر آفیسر گوجرانوالہ، عدنان اشرف، نے بتایا کہ عوام کو مانع حمل ادویات کی اہمیت اور ضرورت سے آگاہ کرنے کے لیے مختلف سرگرمیاں منعقد کی جا رہی ہیں۔

ان سرگرمیوں کا مقصد ماں اور بچے کی صحت کے حوالے سے شعور اجاگر کرنا اور بچوں کی پیدائش میں مناسب وقفہ کے فوائد کو فروغ دینا ہے۔ ضلع اور تحصیل کی سطح پر کمیونٹی گروپ میٹنگز، آگاہی مہمات، خصوصی فری میڈیکل اور فیملی پلاننگ کیمپس، ورکشاپس، سیمینارز، واکس، اور جمعتہ المبارک کے خطبات شامل ہیں۔

عدنان اشرف نے مزید کہا کہ ان سرگرمیوں کی انجام دہی میں ضلعی انتظامیہ کی مکمل معاونت اور سرپرستی حاصل ہے، جس سے متوازن خاندان کا تصور بیدار کرنے میں مدد ملے گی۔