Category: اسلام آباد

اسلام آباد: نائب وزیراعظم و وزیر خارجہ سینیٹر اسحاق ڈار نے ہفتہ کے روز کویت کے وزیر خارجہ شیخ جراح جابر الاحمد الصباح سے ٹیلیفونک رابطہ کیا۔
ترجمان دفتر خارجہ کے مطابق دونوں رہنماؤں نے خطے کی بدلتی ہوئی صورتحال اور اس کے وسیع تر معاشی اثرات پر تفصیلی تبادلۂ خیال کیا۔ نائب وزیراعظم و وزیر خارجہ نے پاکستان کی جانب سے خطے میں امن و استحکام کے فروغ کے لیے مسلسل تعمیری سفارت کاری اور مذاکراتی عمل کی حمایت پر زور دیا۔کویتی وزیر خارجہ نے پاکستان کی ان مخلصانہ کوششوں کو سراہا جن کا مقصد نہ صرف خطے بلکہ عالمی برادری اور امت مسلمہ میں پائیدار امن و سلامتی کو فروغ دینا ہے۔دونوں رہنماؤں نے پاکستان اور کویت کے درمیان برادرانہ تعلقات کو مزید مستحکم بنانے کے عزم کا اعادہ کیا اور آئندہ بھی قریبی رابطے میں رہنے پر اتفاق کیا۔

وفاقی وزیر اطلاعات عطا اللہ تارڑ نے کہا ہےکہ پاکستان اس وقت دنیا میں چمک رہا ہے جب کہ بھارت میں ناکامی اور رسوائی کے سوا کچھ نہیں۔

اسلام آباد میں ایک تقریب سے خطاب کرتے ہوئے عطا تارڑ نے کہا کہ دنیا میں سفارتی اور عسکری سطح پر پاکستان کا ایک مقام ہے، دنیا میں لوگ پاکستان سے اپنے تعلق پر فخر محسوس کرتے ہیں، مشرقی سرحد کے اس پار، تنہائی، ناکامی اور رسوائی ہے اس کے سوا کچھ نہیں، پاکستان اس وقت دنیا میں چمک رہا ہے اور مشرقی سرحد کے دوسری طرف تاریکی ہے، پاکستان میں ہونے والی دہشتگردی کی مشرقی سائیڈ سے کبھی مذمت تک نہیں کی گئی، پاکستان میں دہشتگردی میں ملوث کلبھوشن کو رنگے ہاتھوں پکڑا، معرکہ حق میں کامیابی کے بعد پاکستان دنیا بھر میں امن کا علمبردار بن کر ابھرا، معرکہ حق سفارتی سطح پر بھی لڑا گیا اور پاکستان کامیابی سے ہمکنار ہوا۔

عطا تارڑ نے مزید کہا کہ پہلگام واقعے کے ثبوت مانگے تو بھارت کے پاس خاموشی کے سوا کچھ نہیں تھا، بھارت دہشتگردی کو فروغ دیتا ہے اور پاکستان دہشتگردی کا مقابلہ کر رہا ہے، پاکستان نے ایک ذمہ دار ریاست کے طور پر پہلگام واقعے پر تشویش کا اظہار کیا، پاکستان کا ہر طبقہ دہشتگردی کے خلاف جنگ میں قربانیاں دے رہا ہے، اے پی ایس ہو یا جعفر ایکسپریس کا واقعہ، ہمارا ہر طبقہ دہشتگردی کی جنگ میں قربانیاں دے رہا ہے، دوسری جانب ایک ایسا ملک ہے جس کا کبھی کلبھوشن پکڑا جاتا ہے اور کبھی ابھینندن.

سعودی عرب نے حج کیلئے عمر کی نئی پابندی نافذ کرتے ہوئے 15 سال سے کم عمر بچوں کو ساتھ لے جانے پر پابندی عائد کر دی ہے

ترجمان پاکستان ایوی ایشن اتھارٹی (پی اے اے) کی جانب سے جاری بیان میں کہا گیا ہے نئی سعودی پالیسی کے مطابق اب 3 مئی 2026 سے 15 سال سے کم عمر عازمین کو حج پروازوں میں سفر کی اجازت نہیں ہوگی، اس پابندی کے نفاذ کے بعد 15 سال سے کم عمر تمام عازمین کے حج ویزے منسوخ قرار دے دیے گئے ہیں۔
ترجمان پی اے اے کے مطابق 27 مئی 2026 تک 15 سال کی عمر مکمل نہ کرنے والے عازمین حج سعودی عرب سفر کے اہل نہیں ہوں گے۔

سعودی حکومت نے نئی حج پالیسی سے متاثرہ تمام عازمین کو مکمل رقم کی واپسی کی یقین دہانی کرائی ہے۔سعودی امیگریشن حکام نے تمام ائیرپورٹس کو ہدایت کی ہے کہ 15 سال سے کم عمر عازمین کو ائیرپورٹ پر ہی حج پرواز میں سوار ہونے سے روک دیا جائے۔پاکستان ایوی ایشن اتھارٹی کا کہنا ہے نئی سعودی ہدایات کے بعد 3 مئی 2026 سے 15سال سے کم عمر عازمین کو حج پروازوں میں سفر کی اجازت نہیں ہوگی، سعودی حکام نے متاثرہ عازمین کو مکمل رقم کی واپسی کی یقین دہانی کرائی ہے۔

وفاقی وزیر داخلہ کا جامعہ ابو القاسم تبلیغی مرکز اسلام آباد کا دورہ، اکابرین سے ملاقات کی

جامعہ ابو القاسم اسلام آباد تبلیغی مرکز آمد پر وزیر داخلہ نے اسلام آباد مذاکرات کے دوران اجتماع ملتوی کرنے پر اکابرین اور منتظمین کا شکریہ ادا کیا۔ واضح رہے تین روزہ تبلیغی اجتماع اسلام آباد میں جاری ہے اور اڑھائی لاکھ نفوس کی شرکت کا امکان ظاہر کیا گیا ہے ۔ وزیر داخلہ نے تبلیغی جماعت کے منتظمین کو مثبت کردار ادا کرنے پر خراج تحسین پیش کیا ۔ محسن نقوی نے انہیں سیکیورٹی اور دیگر انتظامات سے بھی آگاہ کیا۔ وزیر داخلہ نے مذہبی ہم آہنگی اور قومی یکجہتی کے فروغ کے لئے تبلیغی اجتماع کے اکابرین کے کردار کو سراہا۔ اجتماع کا اختتام اتوار کی صبح خصوصی دعا کے بعد ہوگا۔

نادرا کے سابق چیئرمین اور ورلڈ بینک کے موجودہ مشیر پاکستانی نژاد طارق ملک کی ڈیجیٹل شناخت اور پبلک انفرا اسٹرکچر کے شعبے میں مہارت، خدمات اور صلاحیتوں کو عالمی سطح پر تسلیم کرتے ہوئے انہیں اس شعبے کے دنیا بھر میں ماہر ترین 25 افراد میں تسلیم کرلیا گیا ہے۔

ان 25 ماہرترین افراد کے نام اور تصاویر 4 مئی کی صبح عالمی شہرت یافتہ ٹائمز اسکوائر نیویارک کی اسکرین پر پیش کرکے اعلان کیا جائے گا۔ڈیجیٹل شناخت، آئی کلاؤڈ اور سائبر سکیورٹی کے عالمی شہرت یافتہ پلیٹ فارم (OKTA) نے دنیا بھر میں اس شعبے سے ایسے 25 افراد کا انتخاب کیا جن کی مہارت اور خدمات نے ڈیجیٹل شناخت، سکیورٹی اور ڈیجیٹل ٹرسٹ کے شعبے میں عالمی سطح پر اپنی مہارت کے اثرات مرتب کیے ہیں،نامور پاکستانی محقق اور دانشور پروفیسر فتح ملک کے صاحبزادے طارق ملک ورلڈ بینک کے موجودہ ٹیکنیکل ایڈوائزر کے عہدے سے قبل اقوام متحدہ میں بھی خدمات انجام دے چکے ہیں اور بے نظیر انکم سپورٹ کے ڈیجیٹل نظام کے خالق بھی ہیں۔

اپنے ایک نجی دورہ امریکا کے دوران بے نظیر بھٹو شہید کی ملاقات طارق ملک سے ہوئی تھی اور بے نظیر بھٹو نے طارق ملک کو پاکستان آنے اور ملک کی خدمت کرنے پر آمادہ کیا۔ پھر طارق ملک نے اپنی ماہرانہ صلاحیتوں کے ساتھ پاکستان میں اپنی خدمات انجام دیں، بے نظیر بھٹو کی شہادت کے بعد بھی نادرا، ڈیجیٹل شناخت اور سکیورٹی کے نظام کو موجودہ دور کے تقاضوں کے مطابق استوار کرنے میں پیش پیش رہے حتیٰ کہ نادرا کے چیئرمین بھی رہے۔

اسلام آباد: نائب وزیراعظم اور وزیر خارجہ اسحاق ڈار نے کہا ہے کہ سابق سینیٹر مشتاق احمد خان کی رہائی پر انہیں دلی خوشی ہوئی ہے، جنہیں اسرائیلی قابض افواج نے دیگر انسانی ہمدردی کے کارکنوں کے ہمراہ پر غیر قانونی طور پر حراست میں لیا تھا۔

اپنے ایک بیان میں اسحاق ڈار نے کہا کہ الحمدللہ، مشتاق احمد خان کی رہائی ایک خوش آئند پیش رفت ہے۔ انہوں نے یونانی حکام کا شکریہ ادا کیا جنہوں نے کریٹ، یونان میں ان کی سہولت کاری کی۔انہوں نے مزید کہا کہ وہ ترکیہ کی قیادت اور حکومت کے بھی شکر گزار ہیں جنہوں نے مشتاق احمد خان کی استنبول منتقلی اور وہاں سے پاکستان واپسی کے انتظامات میں بھرپور تعاون کیا۔وزیر خارجہ نے دفتر خارجہ اور ایتھنز میں پاکستانی سفارتخانے کی مؤثر کارروائی کو بھی سراہا، جن کی کوششوں سے یہ ممکن ہوا۔اسحاق ڈار نے انسانی ہمدردی کے کارکنوں کی غیر قانونی حراست اور غزہ کے محصور عوام کے لیے بھیجی جانے والی امداد میں رکاوٹ ڈالنے کی شدید مذمت کرتے ہوئے کہا کہ پاکستان اس عمل کی بھرپور مذمت کرتا ہے۔

انہوں نے اپنے بیان میں اس عزم کا اعادہ کیا کہ پاکستان ہمیشہ فلسطینی عوام کے ساتھ کھڑا رہا ہے اور آئندہ بھی اپنے فلسطینی بھائیوں اور بہنوں کی غیر متزلزل حمایت جاری رکھے گا۔