Category: اسلام آباد

آن لائن بینک فراڈ کیس میں وفاقی آئینی عدالت نے نجی بینک کو شہری کی رقم واپس کرنے کی ہدایت کردی ،

جسٹس عامر فاروق نے ریمارکس دیئے کہ سارے ہیکرز بینکوں کے سسٹم کے اندر ہی موجود ہوتے ہیں،اکاؤنٹ بعد میں کھلتا ہے ہیکرز کے پاس ڈیٹا پہلے پہنچ جاتا ہے، جسٹس عامر فاروق نے بھی فراڈیوں کی کالز آنے کا انکشاف کرتے ہوئے کہاکہ کہا گیا او پی ٹی آیا ہے وہ شیئر کریں ورنہ اکاؤنٹ بلاک کرجائے گا، کچھ سال سے کوئی ٹرانزیکشن نہیں ہوئی تھی، کہہ دیا اکاؤنٹ بند کردیں،جسٹس عامر فاروق نے کہاکہ میں تو آن لائن بینکنگ استعمال ہی نہیں کرتا، بینکوں کا فرض ہے سسٹم مضبوط بنائیں،لوگ بیچارے کدھر جائیں، اکاؤنٹ سے پیسے کیسے نکل گئے، وکیل نجی بینک نے کہاکہ شہری نے ایپ سے خود ٹرانزیکشن کی،شہری کا موقف ہے ان کا نمبرچوری ہو گیاتھا،عدالت نے کہاکہ صدر مملکت، بینکنگ محتسب اور ہائیکورٹ نے بینک کیخلاف فیصلہ دیا، وفاقی آئینی عدالت نے نجی بینک کی اپیل خارج کردی،جسٹس عامر فاروق کی سربراہی میں 2رکنی بنچ نے سماعت کی،

اسلام آباد ہائیکورٹ نے بانی پی ٹی آئی کے وکالت نامے پر دستخط نہ کرانے کیخلاف کیس میں نوٹس جاری کرکے سپرنٹنڈنٹ جیل سے جواب طلب کرلیا۔

جسٹس خادم حسین سومرو نے وکیل خالد یوسف کی درخواست پر سماعت کی،جسٹس خادم حسین سومرو نے استفسار کیا کہ اس میں قانونی طریقہ کار کیا ہے؟وکیل خالد یوسف چودھری نے کہاکہ اس حوالے سے قانونی پراسس موجود ہے، جیل پالیسی کا ذکر ہے،وکیل کی جانب سے لاہور ہائیکورٹ کا فیصلہ بطور نظیر پیش کیا گیا،قیدی تک رسائی کے حوالے سے جیل رولز بڑے واضح ہیں،قیدیوں سے متعلق نیلسن منڈیلا رولزبھی بین الاقوامی سطح پر موجود ہیں۔ وکیل خالد یوسف چودھری نے کہاکہ پانچ بار میں اڈیالہ جیل گیا لیکن مجھ سے دستاویزات وصول تک نہیں کی گئیں،وکالت نامے کوریئر سے بھیجے تو کہا گیا کہ ہمیں ملے ہی نہیں،مجھے جیل حکام نے کہاکہ اجازت نہیں ہے، ملے گی تو آپ کو بتا دیں گے،اسلام آباد ہائیکورٹ نے نوٹس جاری کرکے سپرنٹنڈنٹ جیل سے جواب طلب کرلیااورکیس کی مزید سماعت 25مئی تک کیلئے ملتوی کردی

سپریم کورٹ آف پاکستان نے حق مہر میں دی گئی جائیداد کی منتقلی سے متعلق قانونی اصول طے کر دیے۔

جسٹس شکیل احمد نے تحریری فیصلہ جاری کرتے ہوئے کہا ہے کہ مشترکہ جائیداد کا کوئی بھی حصہ دار اپنے موروثی حصے سے زیادہ جائیداد منتقل نہیں کر سکتا،تحریری فیصلے میں کہا گیا ہے کہ شوہر مشترکہ جائیداد میں صرف اپنے حصے کی حد تک حق مہر دے سکتا ہے، پورے گھر کو حق مہر میں دینے کا دعویٰ دیگر قانونی ورثاء کے حقوق پر اثر انداز نہیں ہو سکتا،سپریم کورٹ نے نکاح رجسٹرار اور نکاح خواں کو حق مہر میں درج جائیداد کی ملکیت کی تصدیق کرنے کی ہدایت اور غیرضروری قانونی چارہ جوئی سے بچنے کے لیے نکاح نامہ میں جائیداد کی ملکیت سے متعلق علیحدہ کالم شامل کرنے کا حکم دے دیا۔

عدالت نے پشاور ہائی کورٹ کے فیصلے کے خلاف سول پٹیشن خارج کرتے ہوئے فیصلے کی کاپی تمام صوبوں کے چیف سیکریٹریز کو ضروری کارروائی اور عملدرآمد کے لیے بھیجنے کی ہدایت کر دی

روس جنگ کیلئے پاکستانی نوجوانوں کی مبینہ بھرتی کا انکشاف ہوا ہے جنہیں ہیومن ٹریفکنگ نیٹ ورک کے ذریعے روس لے جا کر یوکرین کے خلاف لڑنے پر مجبور کیا جاتا ہے۔

اطلاعات کے مطابق پاکستان میں مبینہ طور پر سرگرم ایک خطرناک ہیومن ٹریفکنگ نیٹ ورک نوجوانوں کو روس میں پرکشش ملازمتوں کا جھانسہ دے کر یوکرین کے خلاف جنگ میں زبردستی شامل کرتا ہے۔جیو ٹی وی کی ویب سائٹ پر شائع رپورٹ کے مطابق اس حوالے سے ایف آئی اے اینٹی ہیومن ٹریفکنگ راولپنڈی سرکل میں باضابطہ درخواست جمع کرا دی گئی ہے جبکہ معاملے کی تحقیقات بھی شروع کر دی گئی ہیں۔

درخواست گزار منصور اختر جمال نے ایف آئی اے کو دی گئی درخواست میں مؤقف اختیار کیا کہ خود ان کے ساتھ یہ واقعہ پیش آیا اور انہیں روس میں قانونی ورک پرمٹ، محفوظ ملازمت اور ماہانہ 5 سے6 لاکھ روپے تنخواہ کا لالچ دے کر “کک” کے ویزے پر روس بھجوایا گیا۔ درخواست کے مطابق اس سارے عمل کیلئے ان کے بڑے بھائی محمود اختر جمال کے اکاؤنٹ سے تقریباً 47 لاکھ 50 ہزار روپے ایجنٹ ہشام بن طارق کو ادا کیے گئے، درخواست میں الزام لگایا گیا ہے کہ ہشام بن طارق نامی شخص اور اس کے مبینہ ساتھی نوجوانوں کو بہتر مستقبل اور بھاری تنخواہوں کا خواب دکھا کر روس بھجواتے ہیں تاہم وہاں پہنچنے کے بعد صورتحال مکمل طور پر تبدیل ہو جاتی ہے۔ منصور اختر جمال کے مطابق روس پہنچنے کے بعد ان پر دباؤ ڈالا گیا کہ وہ روسی فوج میں شامل ہو کر یوکرین کے خلاف جنگی سرگرمیوں میں حصہ لیں، متاثرہ نوجوان کے مطابق انہوں نے خوفزدہ حالت میں اہل خانہ سے رابطہ کیا جس کے بعد گھر والے شدید ذہنی اذیت میں مبتلا ہوگئے۔

بعد ازاں پاکستانی سفارتخانے اور مختلف ذرائع کی مدد سے انہیں بڑی مشکل سے واپس پاکستان لایا گیا جبکہ اس سارے عمل میں مزید لاکھوں روپے خرچ کرنا پڑے۔درخواست گزار نے ایف آئی اے کو مختلف بینک ٹرانزیکشنز، آن لائن ادائیگیوں اور مالی ریکارڈ بھی فراہم کر دیا ہے۔ ایف آئی اے اینٹی ہیومن ٹریفکنگ راولپنڈی سرکل نے معاملے کی انکوائری نمبر 266/26 درج کر لی تھی جبکہ ابتدائی تحقیقات کی ذمہ داری انسپیکٹر زاہد بھٹی (SHO) کے سپرد کی گئی تھی۔اس حوالے سے جب انسپیکٹر زاہد بھٹی سے رابطہ کیا گیا تو انہوں نے بتایا کہ ان کا اس کیس سے ٹرانسفر کر دیا گیا ہے، کیس سے متعلق مزید تفصیلات اور موجودہ پیشرفت کیلئے محرم نامی متعلقہ افسر سے رابطہ کیا جائے۔

دوسری جانب درخواست گزار نے وزیر اعظم شہباز شریف اور وزیر داخلہ محسن نقوی سےمطالبہ کیا ہے کہ انسانی اسمگلنگ میں ملوث عناصر کے خلاف فوری کارروائی کی جائے تاکہ مزید نوجوانوں کو ایسے خطرناک جال میں پھنسنے سے بچایا جا سکے۔

قومی کرکٹ ٹیم کے سابق کپتان شاہد آفریدی نے بھارت کے خلاف پاکستانی افواج کے آپریشن کو ایک سال مکمل ہونے پر ٹوئٹ کی ہے۔

انہوں نے ایکس پر جاری بیان میں کہا کہ وہ صف جس میں دل ایک ہوں، قدم ایک ہوں اور ارادے پکے ہوں اللّٰہ اسے پسند کرتا ہے، آپریشن بنیان المرصوص کو ایک سال ہو گیا لیکن یہ جیت آج بھی قوم کے دلوں میں زندہ ہےیہ صرف ایک آپریشن نہیں تھا، یہ پاکستانی قوم کی غیرت، پاک فوج کی بہادری اور اللّٰہ کی مدد کی نشانی تھی۔انہوں نے کہا کہ دنیا کو آج نفرت نہیں امن، برداشت اور انسانیت کی ضرورت ہے، پاکستان نے ہمیشہ امن کی بات کی ہے مگر جب وطن کی حرمت پر آنچ آئے تو پوری قوم ایک دیوار بن جاتی ہے، آپریشن بنیان المرصوص نے دنیا کو یہ پیغام دیا کہ طاقت صرف ہتھیاروں میں نہیں بلکہ اتحاد، ایمان اور سچائی میں ہوتی ہے۔