Category: اسلام آباد

پاکستان سے حج آپریشن کامیابی سے جاری ہے اور اب تک 207 پروازوں کے ذریعے 52 ہزار 195 سرکاری عازمین حج سعودی عرب پہنچ چکے ہیں۔ حکام کے مطابق سرکاری حج کوٹے کا 44 فیصد مکمل ہو چکا ہے جبکہ مختلف شہروں سے عازمین کی روانگی کا سلسلہ بدستور جاری ہے۔

پاکستان حج مشن کے مطابق حج انتظامات کی نگرانی اور عازمین کو سہولیات کی فراہمی کے لیے 1090 اہلکار فیلڈ میں متحرک ہیں۔ اب تک 135 پروازیں مدینہ منورہ جبکہ 72 پروازیں جدہ ایئرپورٹ پر لینڈ کر چکی ہیں۔حکام نے بتایا کہ پرائیویٹ حج اسکیم کے تحت بھی 12 ہزار 111 پاکستانی عازمین سعودی عرب پہنچ چکے ہیں۔ اس وقت 85 فیصد سرکاری عازمین مکہ مکرمہ جبکہ 15 فیصد مدینہ منورہ میں مقیم ہیں، جہاں انہیں رہائش، خوراک، ٹرانسپورٹ اور طبی سہولیات فراہم کی جا رہی ہیں۔پاکستان حج مشن کے تحت خدمات کی انجام دہی کے لیے 652 خدام الحجاج، 255 افراد پر مشتمل طبی عملہ اور 183 مذہبی امور کے اہلکار تعینات کیے گئے ہیں۔ اعداد و شمار کے مطابق مکہ مکرمہ میں 791، مدینہ منورہ میں 280 جبکہ جدہ میں 19 اہلکار عازمین کی خدمت پر مامور ہیں۔

عازمین حج کی حرمین شریفین آمد و رفت کو یقینی بنانے کے لیے 230 بسیں فعال رکھی گئی ہیں جبکہ حکام کا کہنا ہے کہ ٹرانسپورٹ پلان مکمل طور پر فعال ہے اور تمام انتظامات مؤثر انداز میں جاری ہیں۔

اسلام آباد، : وفاقی وزیر برائے اقتصادی امور احد چیمہ کی زیرِ صدارت ایک اعلیٰ سطح کا اجلاس منعقد ہوا جس میں آئندہ وفاقی بجٹ کے لیے برآمدات کے فروغ کی اسکیموں اور پالیسی آپشنز کا جائزہ لیا گیا۔ اجلاس کا بنیادی مقصد مؤثر اور ٹارگٹڈ مراعات کے ذریعے پاکستان کی برآمدات کو مضبوط بنانا اور ترجیحی شعبوں کی معاونت کرنا تھا۔

اجلاس میں وزیر مملکت برائے خزانہ بلال اظہر کیانی، گورنر اسٹیٹ بینک جمیل احمد، سیکرٹری خزانہ امداد اللہ بوسال، چیئرمین ایف بی آر راشد محمود لنگڑیال، اور سیکرٹری تجارت جواد پال نے شرکت کی۔ بین الاقوامی ماہرین ڈاکٹر اعجاز نبی اور اسٹیفن ڈیرکن نے بھی اجلاس میں شرکت کی اور برآمدی مسابقت اور اقتصادی پالیسی اصلاحات پر اپنے خیالات کا اظہار کیا۔شرکاء نے وفاقی وزیر برائے اقتصادی امور احد چیمہ کو آئندہ بجٹ کے لیے زیرِ غور برآمدی پالیسی کی تجاویز پر بریفنگ دی۔ اجلاس میں ترجیحی برآمدی شعبوں اور برآمدات میں اضافے، مسابقت میں بہتری، برآمدات میں چھوٹے اور درمیانے درجے کے کاروباری اداروں (ایس ایم ایز) کی شرکت بڑھانے، اور عالمی منڈیوں میں پاکستان کی موجودگی کو وسعت دینے کے لیے موزوں پالیسی اقدامات کی تشکیل پر تفصیلی تبادلہ خیال کیا گیا۔ اجلاس کے دوران مالیاتی تعاون، تجارتی سہولیات اور مخصوص شعبوں کے لیے مراعات سے متعلق مختلف تجاویز کا جائزہ لیا گیا۔ شرکاء نے مشاہدہ کیا کہ برآمدات بڑھانے کے لیے صرف ٹیکسوں میں کمی نہیں بلکہ پیداواری عوامل میں بہتری، انفراسٹرکچر، سہولت کاری کے اقدامات اور کاروبار میں آسانی بھی کلیدی کردار ادا کریں گے۔

وزیر برائے اقتصادی امور احد چیمہ نے ایک پائیدار اور کارکردگی پر مبنی برآمدی ترغیباتی فریم ورک اپنانے کی اہمیت پر زور دیا، جو زیادہ برآمدی حجم، ویلیو ایڈیشن ، برآمدی مصنوعات میں تنوع، اور عالمی سپلائی چینز میں ایس ایم ایز کے مضبوط انضمام کو فروغ دے سکے۔ اجلاس میں برآمدی مراعات کے حوالے سے مختلف آپشنز کا بھی جائزہ لیا گیا، جن میں کارکردگی پر مبنی ریبیٹس، برآمدات میں بتدریج اضافے سے منسلک مراعات، اور برآمدی اہداف کے حصول پر انعامی طریقہ کار کا تعارف شامل ہے۔ شرکاء نے اس بات پر اتفاق کیا کہ شفافیت، کارکردگی اور طویل مدتی اقتصادی فوائد کو یقینی بنانے کے لیے ترغیباتی اسکیموں کو پیمائش کے قابل نتائج سے ہم آہنگ کرنے کی ضرورت ہے۔ وفاقی بجٹ کو حتمی شکل دینے سے قبل متعلقہ اسٹیک ہولڈرز کی مشاورت سے مجوزہ اقدامات کو مزید بہتر بنایا جائے گا۔ حکومت عملی، شفاف اور دور اندیش پالیسی اقدامات کے ذریعے برآمد کنندگان کی مدد اور برآمدی بنیاد پر مبنی اقتصادی ترقی کے فروغ کے لیے پرعزم ہے

پاکستان پیپلز پارٹی کے مرکزی سیکریٹریٹ کی جانب سے ایک اہم اعلامیہ جاری کرتے ہوئے کہا گیا ہے کہ “بلاول بھٹو جیالا فورس پاکستان پیپلز پارٹی” کا پارٹی سے کوئی تعلق نہیں ہے اور نہ ہی یہ تنظیم کسی بھی سطح پر منظور شدہ یا الحاق یافتہ ہے۔

اعلامیے میں واضح کیا گیا ہے کہ پارٹی کے چیئرمین بلاول بھٹو زرداری کے نام سے منسوب اس نام نہاد گروپ کی تمام سرگرمیاں، تقرریاں اور نوٹیفکیشنز جعلی اور غیر قانونی ہیں۔پارٹی ترجمان کے مطابق رانا شبیر حسین ٹکہ اور ملک محمد یونس اعوان کی جانب سے جاری کیے گئے تمام عہدے، نامزدگیاں اور نوٹیفکیشنز کو مکمل طور پر غیر مجاز اور بے بنیاد قرار دیا گیا ہے۔اعلامیے میں کہا گیا ہے کہ پاکستان پیپلز پارٹی کے نام اور پلیٹ فارم کو استعمال کرتے ہوئے کسی بھی قسم کی جعلسازی، جھوٹی نمائندگی یا غیر قانونی تنظیمی سرگرمی ہرگز برداشت نہیں کی جائے گی۔مزید کہا گیا ہے کہ پارٹی نام کے غلط استعمال میں ملوث عناصر کے خلاف سخت قانونی کارروائی عمل میں لائی جائے گی، جبکہ ایسی تمام سرگرمیوں سے پاکستان پیپلز پارٹی نے مکمل لاتعلقی کا اعلان کر دیا ہے۔مرکزی سیکریٹریٹ نے خبردار کیا ہے کہ آئندہ بھی اگر کسی نے پارٹی کے نام پر کوئی غیر مجاز سرگرمی کی تو اس کی تمام تر ذمہ داری متعلقہ افراد پر عائد ہوگی۔

یہ اعلامیہ انچارج سینٹرل سیکرٹریٹ سید سبط الحیدر بخاری کی جانب سے جاری کیا گیا ہے، جس میں اس بات پر زور دیا گیا ہے کہ پارٹی کے نام اور تنظیمی ڈھانچے کے غلط استعمال کو کسی صورت برداشت نہیں کیا جائے گا۔

وزیراعظم پاکستان شہباز شریف 23 مئی کو ایک اہم سرکاری دورے پر چین روانہ ہوں گے جہاں وہ چینی قیادت کے ساتھ خطے کی بدلتی ہوئی صورتحال اور بالخصوص امریکا ایران کشیدگی کے ممکنہ اثرات پر تفصیلی مشاورت کریں گے۔

سفارتی ذرائع کے مطابق یہ دورہ ایسے وقت میں ہو رہا ہے جب مشرقِ وسطیٰ اور عالمی سطح پر جیو پولیٹیکل کشیدگی میں اضافہ دیکھا جا رہا ہے، جس کے تناظر میں پاکستان اور چین کی قیادت کے درمیان قریبی رابطہ انتہائی اہم قرار دیا جا رہا ہے۔وزیراعظم اس دورے کے دوران شی جن پنگ اور لی چیانگ سے علیحدہ علیحدہ ملاقاتیں کریں گے۔ ان ملاقاتوں میں دوطرفہ تعلقات، اقتصادی تعاون، علاقائی سلامتی اور اسٹریٹجک شراکت داری پر تفصیلی تبادلہ خیال کیا جائے گا۔

دورے کے دوران وزیراعظم شہباز شریف پاکستان اور چین کے درمیان دوستی کی 75 ویں سالگرہ کی تقریبات میں بھی شرکت کریں گے، جو دونوں ممالک کے دیرینہ اور آزمودہ تعلقات کی علامت سمجھی جاتی ہیں۔ذرائع کے مطابق اس اعلیٰ سطحی دورے میں پاکستان اور چین کے درمیان متعدد اہم معاہدوں اور مفاہمتی یادداشتوں (ایم او یوز) پر دستخط بھی متوقع ہیں، جن کا تعلق مختلف شعبوں میں تعاون کے فروغ سے ہوگا۔سرکاری حکام کا کہنا ہے کہ وزیراعظم کے ہمراہ اعلیٰ سطحی وزراء اور اہم سرکاری شخصیات کا وفد بھی ہوگا، جو مختلف اسٹریٹجک اور اقتصادی مذاکرات میں حصہ لے گا۔سفارتی ماہرین کے مطابق یہ دورہ نہ صرف پاک چین تعلقات کو مزید مستحکم کرے گا بلکہ خطے کی مجموعی جیو پولیٹیکل صورتحال پر بھی اہم اثرات مرتب کر سکتا ہے۔

نائب صدر پیپلز پارٹی سینیٹر شیری رحمان نے نو مئی کے واقعات کو پاکستان کی تاریخ کا سیاہ باب قرار دے دیا

شیری رحمان کا کہنا تھا کہ 9 مئی کے واقعات ملکی سالمیت اور قومی یکجہتی پر حملہ تھے، قوم ایسے عناصر کو کبھی فراموش نہیں کرے گی،بھٹو کی شہادت پر کارکنوں نے خود کو جلایا، حملہ نہیں کیا، شہید بی بی کی شہادت پر چاروں صوبوں میں کارکنوں کا احتجاج تھا، شہید بی بی کی شہادت پر جلاؤ گھیراؤ ہوا، لیکن ملٹری تنصیبات اور شہداء کی یادگاروں پر حملہ نہیں ہوا،پاکستان کھپے کا نعرہ لگایا گیا،9 مئی کو فوجی تنصیبات، شہداء کی یادگاروں اور قومی اداروں پر حملے دراصل پاکستان پر حملہ تھے،9 مئی کے منصوبہ سازوں اور سہولت کاروں کو قانون اور آئین کے مطابق درست سزائیں دے کر مثال قائم کی گئی،پاکستان کی تاریخ میں پہلی بار سیاسی انتقام میں قومی دفاعی تنصیبات کو نشانہ بنایا گیا،جو عناصر نوجوانوں کو ریاستی اداروں کے خلاف اکساتے ہیں وہ قوم کے خیر خواہ نہیں ہوسکتے،

شیری رحمان کا کہنا تھا کہ قوم اپنی افواج، شہداء اور قومی اداروں کے ساتھ کھڑی ہے اور ہر سازش کو ناکام بنائے گی،معرکۂ حق میں افواجِ پاکستان نے اپنی قربانیوں اور پیشہ ورانہ مہارت سے دشمن کو واضح پیغام دیا، پاکستان عالمی سطح پر مضبوط اور باوقار ملک بن کر ابھرا ہے، اس میں افواجِ پاکستان کا کلیدی کردار ہے،افواجِ پاکستان ہمارے قومی وقار، سلامتی اور استحکام کی علامت ہیں،

امریکی اخبار وال اسٹریٹ جرنل کا کہنا ہے کہ پاکستان امریکا اور ایران کے درمیان جاری سفارتی رابطوں میں ایک معتبر ثالث کے طور پر سامنے آیا ہے، جبکہ دونوں ممالک کے درمیان مذاکرات میں اہم پیشرفت بھی رپورٹ کی گئی ہے۔ رپورٹ کے مطابق بات چیت کا اگلا دور اسلام آباد میں ہونے کا امکان ہے۔

اخبار نے اپنی رپورٹ میں کہا ہے کہ ممکنہ طور پر اگلے ہفتے اسلام آباد میں مذاکرات منعقد ہو سکتے ہیں، جہاں امریکی اور ایرانی حکام ایک عارضی مفاہمتی معاہدے پر غور کر رہے ہیں۔ اس عمل میں ثالث ممالک کے ساتھ مل کر ایک مشترکہ دستاویز پر کام بھی جاری ہے۔رپورٹ کے مطابق 14 نکات پر مشتمل ایک مفاہمتی یادداشت تیار کی جا رہی ہے جس میں خطے میں کشیدگی میں کمی، خاص طور پر آبنائے ہرمز میں صورتحال کی بہتری اور بحری راستوں کی سیکیورٹی جیسے اہم امور شامل ہوں گے۔ مذاکرات کا بنیادی ایجنڈا خطے میں بڑھتی ہوئی کشیدگی کو کم کرنا اور سمندری تجارتی راستوں کو محفوظ بنانا بتایا گیا ہے۔

تحریک انصاف کے رہنما اسد قیصر نے کہا ہے کہ عالمی منڈی میں پیٹرولیم مصنوعات کی قیمتوں میں نمایاں کمی کے باوجود شہباز شریف کی ناکام حکومت کی جانب سے پیٹرولیم مصنوعات کی قیمتوں میں اضافہ انتہائی قابلِ مذمت اور عوام دشمن اقدام ہے۔

اپنے ایک بیان میں اسد قیصر کا کہنا تھا کہ حکومت نے پیٹرولیم لیوی میں بے پناہ اضافہ کرکے اسے ملکی تاریخ کی بلند ترین سطح پر پہنچا دیا ہے۔ حکومت اپنی نااہلی اور ناکام معاشی پالیسیوں کی سزا غریب عوام کو دے رہی ہے۔ عوام پہلے ہی مہنگائی، بے روزگاری اور غربت کی چکی میں پس رہے ہیں۔ ایک طرف سی این جی بند ہے، دوسری جانب پیٹرولیم مصنوعات کی قیمتیں آسمان سے باتیں کر رہی ہیں، جبکہ ایل پی جی سلنڈر عام آدمی کی پہنچ سے باہر ہو چکا ہے۔ بجلی کی قیمتوں میں ہوشربا اضافہ عوام کے لیے مزید مشکلات پیدا کر رہا ہے۔ عوام مہنگائی کے اس طوفان میں شدید پریشانی کا شکار ہیں اور یہ سوال کرنے پر مجبور ہیں کہ آخر وہ جائیں تو کہاں جائیں۔

پاکستان اور بنگلادیش کے درمیان منشیات کی اسمگلنگ اور نشہ آور اشیاء کی روک تھام کے لیے اہم معاہدے پر دستخط کر دیے گئے۔ دونوں ممالک نے منشیات کی غیر قانونی نقل و حرکت اور اسمگلنگ کے خلاف مشترکہ اقدامات اور بھرپور تعاون پر اتفاق کیا ہے۔

وفاقی وزیر داخلہ محسن نقوی نے ڈھاکا میں بنگلادیش کے وزیر داخلہ صلاح الدین احمد سے ملاقات کی، جس میں دوطرفہ تعلقات، داخلی سلامتی اور سکیورٹی تعاون کے مختلف امور پر تفصیلی تبادلہ خیال کیا گیا۔ملاقات کے دوران سیکرٹری سطح پر جوائنٹ ورکنگ گروپ قائم کرنے پر بھی اتفاق کیا گیا تاکہ انسدادِ منشیات، داخلی سکیورٹی اور دیگر باہمی امور پر رابطوں کو مزید مؤثر بنایا جا سکے۔وزیر داخلہ محسن نقوی نے بنگلادیشی حکام کو سیف سٹی منصوبے میں مکمل تعاون کی پیشکش کرتے ہوئے کہا کہ پاکستان جدید سکیورٹی اور نگرانی کے نظام کے حوالے سے اپنے تجربات بنگلادیش کے ساتھ شیئر کرنے کے لیے تیار ہے۔

دونوں ممالک نے سول آرمڈ فورسز کی ٹریننگ اور داخلی سکیورٹی کے شعبوں میں تعاون بڑھانے کے عزم کا بھی اظہار کیا۔ اس موقع پر محسن نقوی نے اپنے بنگلادیشی ہم منصب کو پاکستان کے دورے کی دعوت بھی دی۔