اسلام آباد میں جدید ترین سکائی 47 ڈیٹا سینٹر "قراقرم ون” کی افتتاحی تقریب منعقد ہوئی، جس میں وزیراعظم محمد شہباز شریف اور فیلڈ مارشل سید عاصم منیر نے شرکت کی۔ دونوں رہنماؤں نے مشترکہ طور پر ڈیٹا سینٹر کا افتتاح کیا اور منصوبے کی مختلف سہولتوں کا جائزہ لینے کے ساتھ تفصیلی بریفنگ بھی حاصل کی۔
تقریب کے دوران بریفنگ میں بتایا گیا کہ قراقرم ون ڈیٹا سینٹر کلاؤڈ کمپیوٹنگ، ڈیٹا ہوسٹنگ اور جدید ڈیجیٹل خدمات کے لیے مضبوط اور محفوظ انفراسٹرکچر فراہم کرے گا۔ منصوبہ مصنوعی ذہانت (AI)، مشین لرننگ (Machine Learning) اور ہائی پرفارمنس کمپیوٹنگ کی بڑھتی ہوئی ضروریات کو پورا کرنے کی صلاحیت رکھتا ہے، جبکہ حساس قومی اور تجارتی معلومات کے محفوظ ذخیرے کے لیے بھی اہم کردار ادا کرے گا۔افتتاحی تقریب سے خطاب کرتے ہوئے وزیراعظم محمد شہباز شریف نے جدید ترین ڈیٹا سینٹر کو متاثر کن اور قابلِ تحسین قرار دیتے ہوئے کہا کہ اس عظیم منصوبے کو دیکھ کر بے حد خوشی ہوئی ہے۔ انہوں نے کہا کہ منصوبہ انتہائی مختصر مدت میں غیر معمولی عزم، پختہ یقین اور اعلیٰ پیشہ ورانہ مہارت کے ساتھ مکمل کیا گیا، جو قومی صلاحیتوں کا منہ بولتا ثبوت ہے۔
وزیراعظم نے فیلڈ مارشل سید عاصم منیر کی بصیرت افروز قیادت اور منصوبے کے شراکت دار ادارے زیڈ ٹی ای (ZTE) کو خراجِ تحسین پیش کرتے ہوئے کہا کہ ایسے منصوبے پاکستان کو ٹیکنالوجی کے میدان میں خودانحصاری کی جانب لے جا رہے ہیں۔انہوں نے کہا کہ "معرکۂ حق” میں کامیابی ملکی تاریخ کا ایک عظیم لمحہ تھا، جس نے ثابت کیا کہ قوم اگر امید، حوصلے اور اتحاد کے ساتھ مشکلات کا سامنا کرے تو تاریخی کامیابیاں حاصل کی جا سکتی ہیں۔ ان کا کہنا تھا کہ مسلسل محنت اور قومی عزم ہی ایسے عظیم منصوبوں کو حقیقت کا روپ دیتے ہیں۔وزیراعظم شہباز شریف نے کہا کہ سکائی 47 جیسے منصوبے پاکستان کے روشن مستقبل کی ضمانت ہیں اور یہ ملک کو جدید ٹیکنالوجی کے ساتھ ناقابلِ تسخیر سکیورٹی فراہم کرنے میں اہم کردار ادا کریں گے۔ انہوں نے قوم کو یہ تحفہ دینے پر تمام اسٹیک ہولڈرز کا شکریہ ادا کرتے ہوئے اس عزم کا اظہار کیا کہ اگر پوری قوم متحد ہو کر کام کرے تو کوئی بھی ہدف ناقابلِ حصول نہیں رہتا۔