اسلام آباد: ایران اور امریکا کے درمیان متوقع مذاکرات کے پیش نظر وفاقی دارالحکومت میں سیکیورٹی ہائی الرٹ کر دی گئی ہے اور غیر معمولی حفاظتی انتظامات کیے جا رہے ہیں۔
ذرائع کے مطابق مجموعی طور پر 18 ہزار سے زائد سیکیورٹی اہلکار تعینات کیے جا رہے ہیں، جن میں اسلام آباد پولیس، پاکستان رینجرز، پنجاب پولیس اور فرنٹیئر کور شامل ہیں۔ اس کے علاوہ پاک فوج بھی پولیس کے ساتھ مشترکہ ناکوں پر ڈیوٹی انجام دے گی تاکہ کسی بھی ممکنہ خطرے سے نمٹا جا سکے۔
سیکیورٹی انتظامات کے تحت ڈیوٹی پر موجود پولیس اہلکاروں کے موبائل فون استعمال کرنے پر پابندی عائد کر دی گئی ہے، جبکہ تمام اہلکاروں کو اینٹی رائٹ کٹس استعمال کرنے کی ہدایت دی گئی ہے۔ ذرائع کا کہنا ہے کہ پنجاب سے تقریباً 7 ہزار اضافی اہلکار بھی اسلام آباد پہنچ چکے ہیں۔
اہم مقامات، خاص طور پر اسلام آباد انٹرنیشنل ایئرپورٹ سے سرینہ ہوٹل تک سیکیورٹی مزید سخت کر دی گئی ہے۔ حساس مقامات پر اسنائپرز تعینات کیے گئے ہیں جبکہ سرینہ ہوٹل کے اطراف میں مشترکہ طور پر 24 سیکیورٹی پکٹیں قائم کی گئی ہیں۔
حکام کے مطابق یہ اقدامات ممکنہ اعلیٰ سطحی وفود کی آمد کے پیش نظر کیے جا رہے ہیں تاکہ مذاکرات کا عمل محفوظ ماحول میں مکمل ہو سکے۔
تجزیہ کاروں کا کہنا ہے کہ اسلام آباد میں اس سطح کی سیکیورٹی تیاری اس بات کی عکاسی کرتی ہے کہ مذاکرات کو انتہائی اہمیت دی جا رہی ہے اور پاکستان ایک بار پھر عالمی سفارتی سرگرمیوں کا مرکز بن رہا ہے۔
پنجاب سے تقریباً 7 ہزار اہلکار اسلام آباد پہنچ گئے
