پاکستان مسلم لیگ (ن) کی مرکزی سیکرٹری اطلاعات مریم اورنگزیب نے کہا ہے کہ سمندر سے تیل اور گیس کے ذخائر کی تلاش کا یہ منصوبہ سابق وزیر اعظم نواز شریف نے ملک کے روشن مستقبل کیلئے شروع کیا تھا. مسلم لیگ (ن) سمندر سے تیل و گیس کے ذخائر نہ ملنے پر دکھ اور افسوس کا اظہار کرتی ہے۔
باغی ٹی وی کی رپورٹکے مطابق مریم اورنگزیب کا کہنا تھا کہ انہیں اور مسلم لیگ (ن) کو رنج اور افسوس ہوا ہے کہ تیل کا ذخیرہ نہیں مل سکا کیونکہ پاکستان کی معیشت، روزگار اور اچھے مستقبل کے خواب اس منصوبے سے جڑے تھے. سابق وزیر اعظم نواز شریف نے جس منصوبے پہ ہاتھ رکھا، اللہ تعالیٰ کی برکت سے پورا ہوا کیونکہ وہ سچ بولتے ہیں اور نیت صاف ہے.
ان کا کہنا تھا کہ عمران خان جھوٹ بولنا، تہمت لگانا اور بہتان بازی چھوڑدیں تو اس ملک کی مشکلات کافی حد تک کم ہو جائیں گی. اللہ رب العزت جھوٹ کو پسند نہیں کرتا اور نہ ہی جھوٹ بولنے والوںکو کامیابیاں ملتی ہیں. وزیر اعظم عمران خان کے جھوٹ کا خمیازہ پوری قوم کو بھگتنا پڑرہا ہے اور جھوٹ سے ملک پر مسلط ہونے والے جھوٹوں کے آنے سے ملک سے برکت اٹھ گئی ہے۔
مریم اورنگ زیب کا کہنا تھا کہ جب سے عمران خان برسراقتدار آئے ہیں ملک کیلئے کوئی اچھی خبر نہیں آئی. یاد رہے کہ آج بلاول بھٹو کی افطار پارٹی میں سب اپوزیشن جماعتیں اکٹھی ہو رہی ہیں. مریم اورنگ زیب کا بھی مریم نواز کے ہمراہ شرکت کا امکان ہے.
