Category: کراچی

ایڈیشنل آئی جی کراچی پولیس عمران یعقوب منہاس نے شہر قائد میں قیام امن ،دہشتگردی کے خاتمے اور شہریوں کے جان و مال کے تحفظ کیلئے اپنی جانوں کا نذرانہ دینے والے پولیس کے شہداء کو خراج عقیدت پیش کیا۔

یوم شہداء پولیس کے افسران و جوانوں سے تجدید عہد کا دن ہے جنہوں نے اس شہر اور ملک کے چراغوں میں روشنی کیلئے اپنا لہو دیا۔

کراچی پولیس کے افسران و جوانوں نے دہشتگردی کے خاتمے اور امن و امان کے قیام کیلئے دیگر قانون نافذ کرنے والے اداروں کیساتھ ملکر اس شہر کی روشنیوں کی بحالی میں مرکزی کردار ادا کیا۔

عوام کی خدمت اور قانون کی بالا دستی کیلئے سرگرم کراچی پولیس کے افسران و جوانوں کے حوصلے بلند ہیں۔عوام کا اعتماد ہماری کامیابی کی ضمانت ہے۔

ہمارے شہیدوں نے اپنا لہو دیکر اس شہر کا امن بحال کیا ہے, آج ہم عہد کرتے ہیں کہ اس فورس کا ہر افسر اور سپاہی اپنے خون کے آخری قطرے تک عوام کے تحفظ اور خدمت کیلئے کوشاں رہیگا۔

کراچی پولیس کے سربراہ نے اس موقع پر کہا کہ شہید محکمے کا فخر ہیں اور شہداء کے خاندان کی فلاح بہبود ہماری اولین ترجیح ہے۔

کراچی پولیس کی تاریخ قربانیوں اور بہادری سے منسوب ہے، بحیثیت فورس کراچی پولیس کے افسران و جوانوں نے کبھی کسی بھی قربانی سے دریغ نہیں کیا۔

پولیس کے افسران و جوانوں کا لہو چاہے ملک و قوم کی سلامتی کیلئے بہے یا شہریوں کی زندگی کو بچانے کیلئے کام آئے ہم ہر دم تیار ہیں۔

متحدہ قومی موومنٹ (ایم کیو ایم) پاکستان نے سندھ میں نافذ ہونے والے لاک ڈاؤن پر اپنے تحفظات کا اظہار کرتے ہوئے کراچی اور حیدرآباد کو آف زدہ قرار دینے کا مطالبہ کردیا۔

ایم کیو ایم کے عارضی مرکز بہادرآباد میں تاجروں کے وفد سے ملاقات کے بعد میڈیا سے گفتگو ایم کیو ایم پاکستان کے کنونیئر ڈاکٹر خالد مقبول صدیقی نے کہا کہ ’تاجروں سے جتنی قربانی لے سکتے تھے لے چکے، اب وقت ہے تاجروں اور عوام کے نقصانات کا ازالہ کیا جائے‘۔

ایم کیو ایم سربراہ نے کراچی اور حیدر آبادکو آفت زدہ قرار دیتے ہوئے تاجروں کو بجلی کے بل اور ٹیکسز معاف کرنے، بنا سود قرض دینے سمیت دیگر معاملات میں ریلیف دینے کا مطالبہ کیا۔

اُن کا کہنا تھا کہ ’لاک ڈاؤن کے نام پر تاجروں سے ہر بار ہی قربانی لی گئی، انہیں ریلیف دینے کے بجائے بندش کے فیصلے لیے گئے، وزیراعلیٰ نے بے شرمی سے کہا کہ ویکسین لگوائیں ورنہ پولیس رشوت لے گی‘۔

خالد مقبول صدیقی نے کہا کہ ’کراچی کے فیصلے دادو کے رہنے والے نہیں کرسکتے، اسد عمر کراچی کی صورت حال کو دیکھ کر فیصلہ کریں، تاجر آئندہ کا لائحہ عمل جو بھی دیں گے ایم کیو ایم اُن کے ہر فیصلے کے ساتھ کھڑی ہوگی‘۔

ڈاکٹر خالد مقبول نے وزیر اعظم کو مخاطب کرتے ہوئے کہا کہ وزیراعظم اعلان کر کے کراچی کو کھولنے کا اعلان کریں، ایم کیو ایم تاجروں کی دکانیں کھلوائے گی، وزیر اعظم بتائیں کہ اگر کراچی کے حالات گورنر راج لگانے جیسے نہیں ہیں تو پھر یہ سب کیا ہے۔

پاکستان پیپلزپارٹی کے چیئرمین بلاول بھٹو زرداری نے سابق وزیراعلی سندھ سید قائم علی شاہ سے ٹیلی فونک رابطہ کیا اور کورونا وائرس کا شکارہونے پر سید قائم علی شاہ سے ان کی صحت سے متعلق دریافت کیا۔
چیئرمین بلاول بھٹو زرداری نے رکن پی پی پی سینٹرل ایگزیکٹیو کمیٹی سابق وزیراعلی سندھ سید قائم علی شاہ کی جلد صحت یابی کے لئے نیک تمناں کا اظہارکیا ہے۔

صوبائی وزیر اطلاعات و بلدیات سندھ سید ناصر حسین شاہ نے عزیز بھٹی پارک کا دورہ کیا،ایڈمنسٹریٹر کے ایم سی لئیق احمد، ڈی جی ورکس کے ایم سی شبیہ الحسن زیدی،ڈی جی پا رکس آفا ق مر زا و دیگر بھی موجود تھے۔اس مو قع پرایڈمنسٹریٹر کے ایم سی لئیق احمدنے بریفنگ دیتے ہو ئے کہا کہ پارک سے انٹرنل تجاوزات کا مکمل خاتمہ کردیا گیا ہے جبکہ کسٹمز کلب اور شادی ہال کو بھی مسمار کر دیا گیا ہے۔
انہو ں نے مزید کہا کہ 5 ایکڑ اراضی پر محیط پارک کی جھیل میں کچرے کی ڈمپنگ کو روکا گیا ہے جبکہ اربن فاریسٹ کے لئے ایک سماجی تنظیم نے ایک لاکھ پودے دینے کا وعدہ کیا ہے جس میں سے 50 ہزار پودے پہنچ چکے ہیں۔اس مو قع پر صوبا ئی وزیر اطلا عا ت و بلدیا ت سیدناصر حسین شاہ نے ایڈمنسٹریٹر کے ایم سی کو ہدایت دیتے ہو ئے کہا کہ عزیز بھٹی پارک سے متعلق چیف جسٹس آف پاکستان کے احکامات پر من و عن عمل درآمد کو جلد سے جلد یقینی بنایا جائے۔
نا صر حسین شا ہ نے کہا کہ شہریوں کی تفریح کے لیے عزیز بھٹی اہم پارک ہے اور اس کو اصل حالت میں بحال کیا جائے۔انہو ں نے مزید کہا کہ پارک کی جھیل کو خوبصورت بنا نے کے لئے اقدامات کئے جائیں، اور کناروں پر گھا س اور چیئر زلگائی جائیں۔صوبا ئی وزیر نے ہدایت دی کہ جھیل کے کنارے پر کچرا پھینکنے کے عمل کو سختی سے روکا جائے اور تجاوزات کے خاتمے کے بعد واگزار کرائی گئی اراضی پر اربن فاریسٹ لگایا جائے جبکہ اس ضمن میں محکمہ جنگلات سندھ سے بھی مدد لی جائے اورپارک کی دیوار کی تعمیر کے لیے اقدامات کو یقینی بنایا جائے۔
سید نا صر حسین شاہ نے کہا کہ پارک میں چیئرز، ہٹس اور بچوں کے جھولوں کی ضروری مرمت کی جائے اورشہریوں کی سہولت کے لئے ٹک شاپ و دیگر سہولیات کی قانون میں گنجائش کا جائزہ لیا جائے۔

سندھ پیرامیڈیکل اسٹاف ویلفیئر ایسوسی ایشن (رجسٹرڈ) نے ادویہ ، ویکسین چوری میں ملوث افراد کے خلاف آڈیو، وڈیو اور کاغذی ثبوت و شواہد کے ساتھ وائٹ پیپر کا اجراء کرنے کا اعلان، مرکزی صدر اخلاق احمد خان کی کردار کشی کرنے کی مذمت، تفصیلات کے مطابق سندھ پیرامیڈیکل اسٹاف کے مرکزی جنرل سیکریٹری سید اسلام الدین شاہ ،مرکزی چیئرمین ، عبدالطیف اوٹھو، مرکزی سینئر نائب صدر مظہر علی عباسی کی جانب سے جاری کئے گئے بیان میں کہا گیا ہے کہ جرائم پیشہ عناصر سستی شہرت حاصل کرنے کیلئے سندھ پیرامیڈیکل اسٹاف ویلفیئر ایسوسی ایشن (رجسٹرڈ) کی ساکھ کو بدنام کرنے اور مرکزی صدر اخلاق احمد خان کی کردار کشی کرنے پر تلے ہوئے ہیں اور اس کیلئے اوچھے ہتھکنڈے استعمال کررہے ہیں جس کی ہم بھرپور مذمت کرتے ہیں اور کرمنل ایلیمنٹ کا یہ خواب کبھی پورا نہیں ہوگا، سندھ پیرامیڈیکل اسٹاف ویلفیئر ایسوسی ایشن گزشتہ تین دہائیوں سے سندھ بھر کے ہیلتھ ملازمین کے حقوق کے حصول کی جنگ لڑرہی ہے اور اس تنظیم میں جرائم پیشہ افراد کیلئے کوئی گنجائش نہیں ہے، ماضی میں شرپسند عناصر نے تنظیم میں شامل ہو کر تنظیمی سائبان حاصل کرکے جرائم میں ملوث ہونا چاہا تو ایسوسی ایشن کی اعلیٰ قیادت نے ایسے جرائم پیشہ عناصر کو تنظیم کی بنیادی رکنیت سے خارج کردیا جس کے بعد وہ کالی بھیڑیں مختلف ٹولوں/ گروہوں میں شمولیت اختیار کرکے اسٹیبلشمنٹ کی آلہ کار بن گئیں اور آج بھی چند سکوں کی عوض اپنے حلف اور ضمیر کا سودا کررہی ہیں ۔
تاریخ کے اوراق گواہ ہیں کہ ماضی میں سیاسی مقامروں نے اپنی کٹھ پتلیوں کے ذریعے سندھ پیرامیڈیکل اسٹاف ویلفیئر ایسوسی ایشن (رجسٹرڈ) کے نمائندگان پر متعدد مرتبہ تہمتیں لگائیں لیکن انہیں منہ کی کھانی پڑی ، آج تاریخ اپنے آپ کو دہرارہی ہے ، سندھ پیرامیڈیکل اسٹاف سے نکالے گئے عناصر چہروں کی تبدیلی کے ساتھ پھر انتظامیہ اور سیاست کا حق نمک ادا کررہے ہیں، واضح رہے کہ اخباری تراشوں کے ذریعے سوشل میڈیا پر سندھ پیرامیڈیکل اسٹاف اور مرکزی صدر اخلاق احمد خان کے نام سے منسوب خبروں کا حقیقت سے کوئی تعلق نہیں ہے بلکہ انتظامیہ کی جانب سے ادویہ ، ویکسین کی چوری میں ملوث اعلیٰ افسران کو تبادلوں کا سائبان فراہم کرکے انہیں بچانے کا شاخسانہ ہے جو شدید قابل مذمت ہے کسی جرم میں ملوث فرد کے ذاتی معاملے کو ایسوسی ایشن یا ایسوسی ایشن کے کسی نمائندے سے منسوب کرنا قطعی غیر اخلاقی اور غیر قانونی عمل ہے سندھ پیرامیڈیکل اسٹاف ویلفیئر ایسوسی ایشن (رجسٹرڈ) کا ایسے عناصر سے کوئی تعلق نہیں ہے خواہ وہ ایسوسی ایشن کا نمائندہ ہی کیوں نہ ہو اگر وہ کرمنل ایکٹیوٹی کا حصہ ہے تو وہ سزا کا مستحق ہے کیوں کہ اس فلاحی نظریاتی ایسوسی ایشن میں مجرمانہ سرگرمیوں میں ملوث عناصر کیلئے کوئی گنجائش نہیں ہے ، سندھ پیرامیڈیکل اسٹاف کی اعلیٰ قیادت ان تمام محرکات کا جائزہ لینے کے بعد ادویہ ، ویکسین کی چوری اور خرد برد میں ملوث افراد کے خلاف آڈیو، وڈیو اور کاغذی ثبوت و شواہد کے ساتھ وائٹ پیپر کا اجراء کرے گی اور مرکزی صدر اخلاق احمد خان کی کردار کشی کرنے پر ذمہ داروں کیخلاف قانونی چارہ بھی کرے گی۔

تفصیلات کے مطابق اقبال مارکیٹ کے علاقے اورنگی ٹان سیکٹر ساڑھے گیارہ راجہ تنویر کالونی میں گھر میں پراسرار طورپر لگنے سے 24 سالہ جاوید ولد حبیب جاں بحق ہوگیا ،اطلاع ملتے ہی پولیس موقع پر پہنچ گئی اور لاش کو اپنیتحویل میں لیکر پوسٹ مارٹم کیلئے عباسی اسپتال پہنچایا ،ایس ایچ او اقبال مارکیٹ محمد خان کا کہنا ہے کہ ابتدائی تفتیش میں معلوم ہوتا ہے کہ جاوید نے خودکو گولی مار کر خودکشی کی ہے جبکہ متوفی کے اہلخانہ نے بھی پولیس کو یہی بیان دیا ہے کہ جاوید نے گھریلوں پریشانیوں سے تنگ آکر خودکو گولی ماری ہے ،تاہم پولیس واقعے کی مزید تفتیش کررہی ہے ،پولیس نے قانونی کارروائی کے بعد لاش کو ورثاکے حوالے کردیا ہے ۔

کسٹم انٹیلی جنس کے دفتر سے متعدد کیمروں اور درجنوں کسٹم اہکاروں کی موجودگی میں کروڑوں روپے کی شراب چوری ہو گئی، چوری شدہ شراب مبینہ طور پر فروخت کیے جانے کا انکشاف- تفصیلات کےمطابق کراچی میں کسٹم انٹیلی جنس کے دفتر سےکروڑوں روپے کی شراب چوری ہونے کا انکشاف ہوا ہے۔ ‏چوری کی گئی غیرملکی شراب کچھ عرصہ قبل کسٹم انٹیلی جنس نےپکڑی تھی حیرت انگیزطورپرشراب ‏کا سیزر میموبنا کر کیس عدالت میں پیش نہیں کیا گیا تھا۔
غیرملکی شراب کی چوری کا مقدمہ ٹیپوسلطان تھانےمیں درج کرا دیا گیا ہے ۔ کسٹم انٹیلی جنس ‏دفترمیں ہمہ وقت 10سےزائدعملہ اور چوکیدار موجود ہیں۔ ‏ دفترمیں کیمروں کی موجودگی کے باوجود شراب کی چوری حیران کن امر قرار دیا گیا ہے اور ذرائع ‏کا کہنا ہے کہ چوری شدہ شراب مبینہ طور پر ڈیفنس کےایک ڈیلر کو فروخت کی گئی ہے۔
چوری شدہ شراب غیرملکی سفارتخانے کے نام پر منگوائی گئی تھی۔

شراب کا کنٹینر پکڑے جانے ‏کے بعد سفارتخانے نے ملکیت سے انکار کیا تھا۔ واضح رہے کہ گزشتہ سے پیوستہ ماہ پاکستان کسٹمز نے کھلے سمندر میں اسمگلنگ کے خلاف کارروائی کرتے ہوئے غیر ملکی شراب کی تقریباً ساڑھے 9 ہزار بوتلیں برآمد کر لیں تھیں۔ چیف کلکٹر سیف الدین جونیجو اور کلیکٹر پریوینٹو ثاقب سعید نے کسٹمز کی کھلے سمندر میں اہم کارروائی پر پریس کانفرنس کی۔
کسٹمز حکام نے بتایا تھیا کہ کسٹمز نے پہلی بار کسی ایجنسی کے بغیر کھلے سمندر میں کامیاب آپریشن کیا اور دبئی سے شراب کی بڑی کھیپ پاکستان اسملگنگ کی کوشش ناکام بنا دی۔ حکام نے بتایا تھا کہ کراچی سے 70 ناٹیکل میل دور سمندر میں کسٹمز نے شراب سے لدی لانچ قبضے میں لے لی ہے، جس سے غیر ملکی شراب کی 9 ہزار 432 بوتلیں برآمد کی گئیں۔ کسٹمز حکام کے مطابق لانچ سے برآمد ہوئی شراب میں مہنگے برانڈ بھی شامل ہیں جبکہ پکڑی گئی شراب کی مالیت 17 کروڑ روپے ہے۔ کسٹم حکام نے شراب اسمگلنگ میں ملوث المدد بوٹ بھی ضبط کرلی ہے، اس بوٹ کی مالیت 2 کروڑ روپے ہے۔

قومی ائیرلائن پی آئی اے اور پاکستان کے سب سے بڑے بنک حبیب بنک کے در میان معائدہ طے پاگیا ۔معائدے کی رو سے پی آئی اے تمام حبیب بنک کے ڈیبڈ اور کریڈٹ کارڈ ہولڈرز کو اندرون ملک اور بین القوامی ٹکٹوں کی خریداری پر 20 فیصد تک خصوصی رعایت دے گا۔معائدے پر دستخط سی ای او پی آئی اے ائیر مارشل ارشد ملک اور صدر و سی ای او حبیب بنک اورنگزیب خان نے کئے جبکہ اس موقع پر معروف بنکار اور چئیرمین حبیب بنک سلطان علی الانا اور اعلی عہدیدار بھی موجود تھے ۔
پی آئی اے اور حبیب بنک کے تجارتی تعلقات دہائیوں پر محیط ہیں اور اس شراکت داری میں کئی طرح کے بنکنگ پراڈکٹس مثلا ملک بھر کی ترصیلات، ادائیگیاں، پے رول مینجمنٹ، پوائنٹ آف سیل مشینیں، اور تجارتی قرضہ جات شامل ہیں۔
ملک میں صارفین کے سب سے بڑے نیٹ ورک ہونے کے حامل حبیب بنک کی پی آئی اے کے ساتھ شراکت داری سے ملک میں سیاحت کو فروغ دینے میں بہت مدد ملے گی۔ حکومت پاکستان کے وژن سے مطابقت رکھتے ہوئے پی ائی اے بھی ملک میں سیاحت کے فروغ کیلئے ایک بڑا نیٹ ورک ترتیب دے رہا ہے اور اس سہولت سے ایک بہت بڑا طبقہ سیاحت کی طرف راغب ہوسکیگا۔ اس موقع پر اظہار خیال کرتے ہوئے ایئر مارشل ارشد ملک نے دونوں ٹیموں کو ملک میں فضائی سفر میں نئی جدت پیدا کرنے پر مبارکباد دی۔
اس موقع پر انہوں نے کہا کہ ہم حالیہ چیلنجز کے باوجود آگے بڑھ رہے ہیں اور یہ صرف حبیب بنک جیسے قومی نوعیت کے اداروں کے ساتھ تعاون اور اتحاد کے ذریعے ہی ممکن ہے۔ انہوں نے مزید کہا کہ پی آئی اے اور حبیب بنک فطری طور پر اتحادی ہیں اور اب وقت آگیا ہے کہ ہم ملک بھر میں سیاحت کو فروغ دینے کے لیے سا تھ کام کریں۔ انہوں نے HBL کے چیئرمین سلطان علی الانا کو پی آئی اے کا بہت مخلص دوست اور پاکستان کے کارپوریٹ و بنکاری سیکٹرز کا بڑا رہنما قرار دیا۔
محمد اورنگزیب، صدر اور سی ای او حبیب بنک نے اس موقع پراپنے خیالات کا اظہار کرتے ہوئے کہا کہ ہم پی آئی اے کے ساتھ اس اسٹریٹجک شراکت داری میں شامل ہونے پر بہت مسرور ہیں۔ حبیب بنک کے پی آئی اے کے ساتھ دیرینہ تعلقات ہیں۔ یہ شراکت داری ہمارے صارفین کے لیے سفری سہولیات کو مزید بہتر بنائے گا اور یہ پاکستان بھر میں سفر اور سیاحت کو فروغ دینے کے قومی ایجنڈے میں حبیب بنک کی طرف سے کاوش ہے۔