Category: کراچی

O صدر مملکت ڈاکٹر عارف علوی کی زیرِ صدارت کراچی کی پانی کی صورتحال پر اجلاس ہوا جس میں کراچی میں پانی کی قلت کے حل کیلئے مختلف تجاویز کا جائزہ لیا گیا۔اجلاس کو پانی کے حوالے سے جاری منصوبوں پر ہونے والے پیشرفت پر بھی بریفنگ دی گئی ۔ صدر مملکت نے کہاکہ پانی کی قلت کی وجہ سے کراچی کے شہریوں کو مشکلات کا سامنا ہے، کراچی کو روزانہ 1100 سے 1200 ملین گیلن پانی کی ضرورت ہے۔
صدر مملکت نے کہاکہ کراچی کیلئے پانی کے منصوبے فاسٹ ٹریک بنیادوں پر مکمل کرنے کی ضرورت ہے، کراچی کو پانی کی فراہمی کے تمام منصوبے بروقت مکمل کیے جائیں۔ انہوںنے کہاکہ کراچی کے مسائل کا جلد حل اور شہریوں کی فلاح حکومت کی اولین ترجیح ہے، متعلقہ اسٹیک ہولڈرز کے تعاون اور مربوط کوششوں سے مسائل کا جلد حل ممکن ہے۔ اجلاس میں وفاقی وزیر برائے توانائی وپٹرولیم حماد اظہر، ممبر سندھ اسمبلی فردوس شمیم نقوی ،گورنر سندھ عمران اسماعیل اور ممبر سندھ اسمبلی سمر خان نے آن لائن شرکت کی ،سی ای او حبکو، کامران کمال اور دیگراعلیٰ حکام بھی اجلاس میں شریک ہوئے ۔

کراچی کے علاقے نارتھ ناظم آباد میں گولی لگنے سے خاتون زخمی ہو گئی۔پولیس کے مطابق نارتھ ناظم آبادکے علاقے بلاک پی عمر فاروق کالونی میں گولی لگنے سے ایک خاتون زخمی ہوگئی،جسے رکشہ میں عباسی شہید اسپتال لایا گیا،خاتون کی شناخت 50سالہ عزیزہ زوجہ عمر کے نام سے ہوئی،پولیس کے مطابق ابتدائی طور پر معلوم ہوا ہے کہ خاتون کو نامعلوم سمت سے گولی آکر لگی ہے۔
نارتھ کراچی سیکٹر 54 اے روشنی اسکول کے قریب ڈکیتی مزاحمت پر ملزمان کی فائرنگ سے 18 سالہ عمر ولد خلیل زخمی ہو گیا جسے عباسی شہید اسپتال منتقل کیا گیا.

معروف ڈرامہ سیریل خانی کی لکھاری خاتون مصنفہ اسمانبیل کینسرکے باعث زندگی کی بازی ہار گئیں،ا ن کا انتقال کراچی میں ہواہے۔40سالہ اسما نبیل بریسٹ کینسر کے مرض میں مبتلا تھیں، گزشتہ شب ان کی اچانک موت نے شوبز ستاروں کو غمزدہ کردیا۔اسمابریسٹ کینسر جیسے موذی مرض کیخلاف آگاہی مہم کا بھی حصہ رہیں۔
انہوں نے پاکستان کی ڈرامہ انڈسٹری کے لیے شاندار ڈرامے لکھے، جن میں خانی، خدا میرا بھی ہے، دمسہ، سرخ چاندنی اور باندی قابلِ ذکر ہیں۔
اسما نے بالی ووڈ فلم ہیلی کاپٹر ایلا جس میں اداکارہ کاجول بھی شامل تھیں،کیلئے فلمی گیت کے بول لکھ کر بالی ووڈ میں قدم رکھا۔ گانا شلپا رائو نے پیش کیا تھا۔اسما نے بہت سی کمپنیوں میں اشتہاری مشیر کی حیثیت سے بھی کام کیا ہے۔

وہ جے ڈبلیو ٹی میں چار سال تک تخلیقی ہدایت کار رہیں، اورینٹیم میں بھی تخلیقی سربراہ رہی ہیں۔ان کے لکھے ہوئے ڈراموں میں باندھی اور فلم مان جاو نا شامل ہیں۔ اسما نبیل بیس سال تک ایڈورٹائزنگ کے شعبے سے بھی منسلک رہیں۔اسما نبیل کا نام پاکستانی ٹی وی ڈرامہ کی صنعت میں تیزی سے مقبول ہوا ہے۔ ڈرامہ سرخ چاندنی بھی ان کی شاندار تحریروں میں شامل ہے۔

پاکستان رینجرز سندھ اور پولیس نے سرجانی ٹاؤن میں مشترکہ کارروائی کرتے ہوئے ایم کیو ایم لندن کا مطلوب ٹارگٹ کلر محمد اسد خان عرف عمر کو گرفتار کرلیا ہے ۔ترجمان سندھ رینجرز کے مطابق ملزم نے دوران تفتیش ٹارگٹ کلنگ کی وارداتوں میں ملوث ہونے کا اعتراف کیا ہے ۔
ملزم نے 24 دسمبر 2018 کو عثمانیہ کالونی گلبہار میں پاک سر زمین پارٹی کے ٹاؤن آفس پر فائرنگ کی تھی،جس کے نتیجے میں اظہر عرف سیاں اور نعیم ہلاک جبکہ دو کارکن فہد اور ناصر زخمی ہوئے تھے۔

ملزم 11 فروری 2019 کو نیو کراچی میں ایم کیو ایم پاکستان کے یو سی آفس پر فائرنگ میں ملوث ہے۔ملزم کی جانب سے فائرنگ کے دوران شکیل انصاری ہلاک اور اعظم نامی کارکن زخمی ہوا تھا۔ملزم کے دیگر 10 ساتھی پہلے ہی گرفتار ہو کر جیل جا چکے ہیں۔ملزم کو مزید قانونی کارروائی کے لئے پولیس کے حوالے کر دیا گیاہے ۔

وزیر تعلیم سندھ سعید غنی نے کہا ہے کہ نیب نے ایک پریس ریلیز جاری کی، جس کی وجہ سے میں ڈر گیا ہوں اور رات بھر نیند نہیں آئی لیکن جو مجھے بولنا ہے وہ میں بولوں گا آپ غلط آدمی سے پنگا لے رہے ہیں ، مجھے بھیجیں نوٹس یہ بدمعاشی نیب کی نہیں چلے گی۔ تفصیلات کے مطابق میڈیا سے گفتگو کرتے ہوئے انہوں نے کہا کہ نیب کی پریس ریلیز میں لکھا ہے کہ میں توہین نیب کا مرتکب ہوں، میرے بیان کا 31 اے کے تحت جائزہ لیا جارہا ہے، نیب کے قانون کا غلط استعمال سب سے زیادہ چیئرمین نیب کررہا ہے، نیب کو حکومت کے اشاروں پر استعمال کیا جا رہا ہے، نیب نے کہا حلیم عادل شیخ پر زمین پر قبضے کے الزام درست ہیں ، توقع نہیں تھی کہ حلیم عادل کی گرفتاری کے مطالبے پر نیب کے پیٹ میں درد ہوگا۔
وزیر تعلیم سندھ نے کہا کہ چیئرمین نیب اختیارات کا ناجائز استعمال کرتے ہیں، نیب اس ملک کے معزز لوگوں کے ساتھ زیادتی کررہی ہے، ظلم کرو اور لوگوں کامستقبل برباد کرو لیکن ہم بات بھی نہ کریں ایسا نہیں ہوسکتا ، جو مجھے بولنا ہے میں بولوں گا آپ غلط آدمی سے پنگا لے رہے ہیں ، چیئرمین نیب 80 سال کے ہوں گے، بد قسمتی سے ظالمانہ قانون نیب کا ہے، چئیرمین نیب بلیک میل ہورہے ہیں تو عہدہ چھوڑ دیں۔
انہوں نے کہا کہ میں کہتا ہوں پہلی پیشی پرپورے سال کا ریمانڈ لے لو میرا، مجھے نوٹس بھیجیں بلائیں میں ضمانت بھی نہیں کراؤں گا ، حلیم عادل شیخ نے غلط طریقے سے لوگوں کو زمینیں بیچی ہیں، حلیم عادل شیخ پر زمین پر قبضے کے الزام درست ہیں ، توقع نہیں تھی کہ حلیم عادل کی گرفتاری کے مطالبے پر نیب کے پیٹ میں درد ہوگا، میں کہہ رہا ہوں ان کا نام ای سی ایل میں ڈالو تو ان کوتکلیف ہورہی ہے۔

پاکستان پیپلز پارٹی کے شریک چئیرمین اور سابق صدر آصف علی زرداری کی طبیعت ناساز ہوئی جس کے بعد انہیں ڈاکٹرز کی ہدایات پر اسپتال منتقل کر دیا گیا ۔ والد کی طبیعت نا سازی پر ان کی صاحبزادی بختاور بھٹو زرداری بھی شوہر کے ہمراہ فوراً دبئی سے کراچی پہنچ گئیں۔ جبکہ بلاول بھٹو زرداری بھی آصف علی زرداری کو اسپتال منتقل کیے جانے پر اسلام آباد سے فوری طور پر کراچی پہنچ گئے ہیں۔
واضح رہے کہ سابق صدر پاکستان آصف زرداری کی طبیعت گذشتہ رات اچانک خراب ہوئی، جس کے بعد انہیں ہسپتال منتقل کر دیا گیا تھا۔ پارٹی ذرائع کے مطابق پاکستان پیپلز پارٹی کے شریک چئیرمین اور سابق صدر آصف علی زرداری کی اچانک طبیعت خراب ہونے پر انہیں ضیاء الدین ہسپتال لایا گیا جہاں سابق صدر آصف علی زرداری کا طبعی معائنہ کیا گیا ۔
میڈیا رپورٹ کے مطابق ضیاء الدین اسپتال میں سابق صدر آصف علی زرداری کے ایک مرتبہ پھر سے مختلف ٹیسٹ لیے جا رہے ہیں جبکہ اسپتال انتظامیہ نے اسپیسشلسٹ ڈاکٹرز کو بھی طلب کر لیا ہے

کراچی تاجر الائنس کے چیئر مین ایازمیمن موتی والا نے کہا ہے کہ وزارت خزانہ نے آئندہ پندرہ یوم کے لیئے پٹرولیم مصنوعات کی نئی قیمتوں کا جو اعلان کیا ہے وہ غریب لوگوں کے لیئے جان لیوا ہے، پاکستان میں پٹرولیم مصنوعات کی قیمتیں پہلے ہی آسمان سے باتیں کر رہی ہیں عوام کو ریلیف دینے کی وعدے کر کہ اقتدار حاصل کرنے والوں نے عوام کا خون چوس لیا ہے، ان خیالات کااظہارا نہو ں نے تاجر الائنس کے دفتر سے جاری کردہ بیان میں کیا، ایاز میمن موتی والا نے کہا کہ حالیہ اضافے کے بعد پاکستان میں پٹرول کی قیمت 112روپے 69پیسے ہے جبکہ عالمی منڈی کے حساب سے اگر دیکھا جائے تو پاکستان میں پٹرول بہت مہنگا ہے، حکومت ہر چیز پر ٹیکس لگائے جارہی ہے پاکستان کی تاریخ کی یہ پہلی حکومت ہے جس کی پالیسیاں عام آدمی کی زندگی میں روزانہ کی بنیادوں پر مشکلات اور مسائل بڑھا رہی ہیں، انہوں نے کہا کہ پٹرولیم مصنوعات کی قیمتوں میں اچانک کیا جانے والا اضافہ ناقابل قبول ہے حکومت کے اس عوام دشمن فیصلے نے لوگوں کو نئی مشکل میں ڈال دیا ہے، تاجرا لائنس پٹرولیم مصنوعات کے نرخوں میں اضافہ کومسترد کرتے ہوئے اس ظالمانہ فیصلے کو واپس لینے کا مطالبہ کرتی ہے، انہوں نے کہا کہ پٹرولیم مصنوعات کی قیمتوں میں اضافے سے مہنگائی میں اضافہ ہوتاہے ایک شہر سے دوسرے شہر میں سامان لیکرجانے والی گاڑیوں کو جب پٹرول مہنگاملتا ہے تو وہ لوگ کرائے بڑھا دیتے ہیں اور جیسے ہی کرائے بڑھتے ہیں تو لوگ اشیاء کے نرخ بڑھا دیتے ہیں جس سے عوام متاثر ہوتے ہیں، انہوں نے کہا کہ اب تو لوگ تبدیلی حکومت کے واپس چلے جانے کی دعائیں کر رہے ہیں وزیراعظم عمران خان عوام کے مسائل کو حل کرنے کے لیئے سنجیدہ اقدامات کریں ورنہ وہ دن دور نہیں جو ان کی حکومت کو لے ڈوبے گا۔

ٹی وی کے معروف اور ہر دلعزیز فنکار انور اقبال بلوچ کا سوئم آج( ہفتہ) 3 جولائی 2021 کو بعد نماز ظہر تا مغرب ایوان اقبال 83 مسلم آباد حاجی محمد اقبال بلوچ روڈ کراچی میں رکھا گیا ہے، اس موقع پر مرحوم کے ایصال ثواب کے لئے قرآن خوانی اور خصوصی دعا کا اہتمام کیا گیا ہے۔
خواتین وحضرات سے شرکت کی درخواست کی گئی- واضح رہے کہ معروف ٹی وی اداکار انور اقبال بلوچ جمعرات یکم جولائی 2021 کو طویل علالت کے بعد مقامی اسپتال میں وفات پاگئے تھے۔