Category: کراچی

شہر قائد کے گجر اور اورنگی ٹاؤن نالے کے اطراف لوگوں کو بے گھر کیے جانے پر اقوام متحدہ نے بھی تشویش کا اظہار کر دیا ہے۔

تفصیلات کے مطابق کراچی کے نالوں کے اطراف برسوں سے آباد لوگوں کے بے گھر ہونے کی گونج اقوام متحدہ تک بھی پہنچ گئی ہے، یو این سے وابستہ انسانی حقوق کے ماہرین کا کہنا ہے کہ اس اقدام سے ایک لاکھ لوگ بے گھر ہو سکتے ہیں اور غربت میں اضافہ ہوگا۔

اقوام متحدہ نے مطالبہ کر دیا ہے کہ کراچی کے برساتی نالوں کوچوڑا کرنے کے لیے لوگوں کی بے دخلی کو فوراً روکا جائے۔

یو این ماہرین نے کہا کہ کراچی میں گجر نالے اور اورنگی نالے پر تجاوزات کے خلاف آپریشن فوری روکا جائے، نالوں کو چوڑا کرنے کے لیے لوگوں کے مکانات توڑے جا رہے ہیں، اس سے ایک لاکھ افراد بے گھر ہو سکتے ہیں۔

بیان میں کہا گیا کہ نالوں کے اطراف بستیوں کو مسمار کرنے سے پہلے متاثرین سے نہ تو مشاورت کی گئی، نہ ہی انھیں متبادل دیاگیا، اور نہ معاوضہ۔

اقوامِ متحدہ کے ماہرین نے کہا کہ شہریوں کو اتنے بڑے پیمانے پر بے دخل کرنے کی قانونی وجہ بھی غیر واضح ہے، لوگوں کو بے گھر کرنے سے غربت میں مزید اضافہ ہوگا، نالوں کی صفائی سے اب تک 66 ہزار 500 افراد متاثر ہو چکےہیں۔

اقوامِ متحدہ کے ماہرین نے سپریم کورٹ کے فیصلے پر بھی تشویش کا اظہار کیا ہے، جس میں اینٹی انکروچمنٹ ٹربیونل میں اسٹے آرڈر کی درخواست مسترد کر دی گئی تھی۔

گورنر سندھ عمران اسماعیل سے پاکستان میں تعینات سعودی عرب کے سفیر نواف سعید المالکی کی گورنر ہاؤس میں ملاقات

دونوں شخصیات نے باہمی دلچسپی کے امور سمیت باہمی تجارت، سرمایہ کاری،ماحولیات، توانائی پر تبادلہ خیال کیا۔

گفتگو میں دوطرفہ تعاون و ہم آہنگی کے پہلوؤں کو مذید وسعت دینے اور مختلف شعبوں میں ان کو بڑھانے پر اتفاق ہوا۔

اس موقع پر گورنرسندھ نے اپنے خیالات کا اظہار کرتے ہوئے کہا کہ پاک سعودیہ دو طرفہ تعلقات کئی دہائیوں پر مشتمل ہیں ۔
پاک سعودیہ تعلقات وقت گزرنے کے ساتھ ساتھ مزید مستحکم و مضبوط ہوئے ہیں۔
دونوں ممالک مذہب اور بھائی چارے کے مضبوط بندھن میں بندھے ہوئے ہیں سعودی عرب نے ہر مشکل وقت میں پاکستان کا بھرپور ساتھ اور تعاون جاری رکھا۔ پوری پاکستانی قوم سعودی عرب کے تعاون کو قدر کی نگاہ سے دیکھتی ہے۔سعودی سرمایہ کار پاکستان کے مختلف شعبوں میں کام کررہے ہیں۔سعودی سرمایہ کاری سے روزگار ، غربت میں کمی اور معاشی خوشحالی میں مدد ملی ہے۔

سعودی سفیرنواف سعید المالکی نے کہا کہ سعودی عرب خطہ میں پاکستان کو مضبوط ملک دیکھنا چاہتا ہے۔اس ضمن میں سعودی عرب اپنا ہر ممکن تعاون جاری رکھے گا۔

شہر قائد میں محکمہ پولیس نے ماڈل تھانے ختم کرنے کا فیصلہ کر لیا ہے، فیصلے کے بعد کراچی کے پہلے ماڈل تھانے کو ختم کر دیا گیا۔

پولیس حکام کا کہنا ہے کہ اب ایڈیشنل آئی جی کراچی کی جانب سے زبانی احکامات جاری ہو گئے ہیں، پیر کے روز باقاعدہ آرڈر جاری کر دیا جائے گا۔

یاد رہے کہ سابق ایڈیشنل آئی جی کراچی نے یہ ماڈل تھانےقائم کرائے تھے، جب کہ موجودہ ایڈیشنل آئی جی کراچی کی جانب سے متعلقہ افسران سے اس پر مشاورت کی گئی، اس سلسلے میں زون اور ڈسٹرکٹ افسران سے سفارشات اور رپورٹ طلب کی گئی ہے۔

سابق اے آئی جی نے ماڈل تھانے قائم تو کر لیے تھے لیکن محکمہ داخلہ کی جانب سے ماڈل تھانوں کا نوٹیفکیشن جاری نہیں کیا گیا تھا۔

آج سے فیصلے پر عمل درآمد شروع کر دیا گیا ہے، ماڈل تھانہ لیاقت آباد اور سپر مارکیٹ کو الگ کر دیا گیا، کامران حیدر کو ایس ایچ او سپر مارکیٹ تعینات کیا گیا ہے، جب کہ ایس ایچ او لیاقت آباد رضوان پٹیل کو برقرار رکھا گیا۔

باقاعدہ فیصلہ کراچی پولیس چیف متعلقہ افسران کی رپورٹ آنے کے بعد جاری کریں گے، پیر کے روز ماڈل تھانے ختم کرنے کا نوٹیفکیشن جاری کر دیا جائے گا۔

اندرون سندھ کے علاقے ٹنڈو آدم کے قریب خدا آباد ریلوے پھاٹک پر ٹرین اور ایک گیس ٹینکر میں ٹکر ہو گئی، جس کے باعث کئی افراد زخمی ہو گئے۔

تفصیلات کے مطابق آج شام 5:30 بجے پر رحمان بابا ایکسپریس ٹنڈو آدم کے قریب خدا آباد پھاٹک پر سامنے سے آنے والے گیس ٹینکر سے ٹکرا گئی، حادثے کے باعث رحمان بابا ایکسپریس کی 3 بوگیاں پٹری سے اتر گئیں۔

حادثے میں رحمان بابا ایکسپریس کا ڈرائیور اور اسسٹنٹ ڈرائیور زخمی ہو گئے ہیں، ریل گاڑی پر سوار چند مسافر بھی معمولی زخمی ہو گئے، جب کہ گیس ٹینکر کا ڈرائیور اور کنڈیکٹر فرار ہوگئے۔

حادثے کے بعد اپ اینڈ ڈاؤن دونوں ٹریک بند ہو گئے، ٹرینوں کی آمد و رفت بھی معطل ہو گئی ہے، اطلاعات کے مطابق ٹینکر پھاٹک کراس کرتے ہوئے خراب ہونے سے ٹریک پر رک گیا تھا، حادثے میں ٹینکر مکمل طور پر تباہ ہوگیا، تاہم حادثے میں تاحال کسی جانی نقصان کی اطلاع نہیں ملی۔

روپورٹس کے مطابق رحمان بابا ایکسپریس کراچی سے پنجاب جا رہی تھی، عینی شاہدین کا کہنا ہے کہ خدا آباد ریلوے پھاٹک کھلا رہنے کے باعث حادثہ پیش آیا۔

حادثے میں ریل گاڑی کا ایک کوچ ڈی ریل ہو گیا ہے، رحمان بابا ایکسپریس کے انجن اور ایک بوگی کو شدید نقصان پہنچا۔

شہر قائد کے علاقے لانڈھی شیرپاؤ کالونی میں شوہر نے فائرنگ کرکے بیوی اور ساس کو قتل کردیا۔

کراچی کے علاقے لانڈھی شیرپاؤ کالونی میں اسحاق نامی شخص نے ذاتی رنجش پر فائرنگ کرکے بیوی اور ساس کو موت کے گھاٹ اتار دیا۔

پولیس کا کہنا ہے کہ جائے وقوعہ سے شواہد اکٹھے کیے جارہے ہیں اور گواہوں کے بیانات قلمبند کیے جارہے ہیں۔

پولیس کا کہنا ہے کہ جاں بحق خواتین کی لاشوں کو ضابطے کی کارروائی کے لیے اسپتال منتقل کردیا گیا ہے۔

مقامی پولیس کا کہنا ہے کہ قتل کے واقعے کے محرکات سے متعلق تحقیقات جاری ہیں جبکہ ملزم کی گرفتاری کے لیے چھاپے مارے جارہے ہیں۔

یہ پڑھیں: کراچی میں شوہر نے بیوی اور بیٹے کو قتل کرکے خودکشی کرلی

واضح رہے کہ گزشتہ سال نومبر میں لانڈھی کے علاقے قذافی ٹاؤن میں گھریلو تنازع پر شوہر نے فائرنگ کرکے بیوی اور بیٹے کو قتل کرکے خودکشی کرلی تھی۔

پولیس کا کہنا تھا کہ شوہر نے اپنی 40 سالہ بیوی اور 18 سالہ بیٹے کو قتل کیا، ملزم نے بیوی اور بیٹے کو قتل کرنے کے بعد خود کو گولی مار کر خودکشی کرلی۔

پولیس کا کہنا تھا کہ جاں بحق افراد کی شناخت 50 سالہ رضوان، 40 سالہ فاطمہ بیوی اور 18 سالہ وقاص کے ناموں سے ہوئی ہے۔

وزیر تعلیم و محنت سندھ و صدر پیپلز پارٹی کراچی ڈویژن سعید غنی وزیر اعلٰی سندھ کی معاون خصوصی نسیمہ ناز بلوچ کی رہائش گاہ لیاری پہنچ گئے۔

اس موقع پر پیپلز پارٹی ڈسٹرکٹ سائوتھ کے صدر خلیل ہوت، نعیم ملا سمیت پیپلزپارٹی ڈسٹرکٹ سائوتھ کے دیگر رہنماء بھی موجود تھے۔
سعید غنی نے نسیمہ ناز بلوچ کے انتقال پر ان کے اہلخانہ سے تعزیت کی اور فاتحہ خوانی کی۔

نسیمہ ناز ایک ایسی جیالی تھی جس نے پارٹی اور اس صوبے کے لئے جو خدمات دی ہیں وہ کبھی فراموش نہیں کی جاسکتی۔

نسیمہ ناز کے انتقال سے جو خلا پیدا ہوا ہے وہ کبھی پر نہیں ہوسکتا۔ اللہ تعالٰی مرحومہ کی مغفرت فرمائے اور انہیں جنت الفردوس میں اعلی مقام عطا فرمائے۔

وفاقی وزیر انسداد منشیات اعجاز احمد شاہ کا 26 جون 2021 انسداد منشیات کے عالمی دن کے موقع پر خصوصی پیغام

منشیات کے خلاف جنگ ایک کثیر الجہتی چیلنج ہے جس کے لئے وزارت منشیات کنٹرول اور اینٹی نارکوٹکس فورس مشترکہ کوششوں سے مقابلہ کرنے کی کوشش کر رہی ہے۔ اپنے موجودہ وسائل کا بہترین ممکنہ استعمال کرکے ، ہم نے اپنے معاشرے میں منشیات کے پھیلاؤ کو کنٹرول کرنے کے لئے حکمت عملی تیار کی ہے۔ اس حقیقت کو مدنظر رکھتے ہوئے کہ یہ ایک کثیرالجہتی چیلنج ہے اور یک طرفہ کوشش اس لعنت کو مکمل طور پر ختم نہیں کرسکتی ، ہماری آنے والی نسلوں کے مستقبل کو محفوظ بنانے کے لئےہر فرد کو منشیات کے خلاف اس جنگ میں اپنا کردار ادا کرنا ہوگا اور یہی واحد راستہ ہے جس کے ذریعہ ہم منشیات سے پاک معاشرے کے قیام کا مقصد حاصل کر سکتے ہیں۔ ہمیں سمجھنا چاہئے کہ یہ کسی فرد کی جنگ نہیں بلکہ ایک قومی جنگ ہے۔ منشیات نہ صرف ان افراد کو متاثر کرتی ہیں جو ان کا شکار ہوجاتے ہیں بلکہ ایک ہی وقت میں ان کے آس پاس کا پورا نظام بھی متاثر ہوتا ہے.

اسمگلنگ کی روک تھام کے لئے بین الاقوامی رابطہ کے ساتھ طلب اور رسد کو کم کرنے کی ہماری پالیسی کے مطابق ، وزارت منشیات کنٹرول اور انسداد منشیات فورس طے شدہ اہداف کو عملی جامہ پہنانے کے لئے دن رات کوشاں ہیں۔ قانون سازی سے لے کر متاثرہ افراد کی بحالی تک اے این ایف کی جانب سے کیے گئے تمام اقدامات قابل تحسین ہیں۔ مجھے یہ کہتے ہوئے بے حد فخر محسوس ہو رہا ہے کہ تمام اسٹیک ہولڈرز کی انتھک کوششوں کی وجہ سے ، پاکستان کو اقوام عالم میں پوست سے پاک درجہ مل گیا ہے۔میرا بنیادی مقصد ملک سے اس لعنت کی ڈیمانڈ کو ختم کرنا ہے اور میں امید کرتا ہوں کہ تمام متعلقہ حلقوں اور پاکستان کے ہر شہری کو اس وقت تک منشیات کے خاتمے کے عمل میں اپنا کردار ادا کرناہو گا جب تک ہم اپنے مقررہ ہدف کو حاصل نہیں کرلیتے ۔ ہم پر عزم ہیں کہ ہر طرح سے اپنے ملک ، اپنے لوگوں اور نوجوانوں کو اس خطرے سے بچائیں گے۔

پاکستان نے انفارمیشن ٹیکنالوجی کے میدان میں‌ ایک اور سنگ میل عبور کرلیا

کراچی: انفارمیشن ٹیکنالوجی کے میدان میں ہونے والی ترقی کے بعد پاکستان کی آئی ٹی برآمدات ملکی تاریخ کی بلند ترین سطح پر پہنچ گئی۔

باغی ٹیوی کی رپورٹ کے مطابق وفاقی وزیر برائے انفارمیشن ٹیکنالوجی (آئی ٹی) امین الحق نے عوام کو خوشخبری سنائی کہ پاکستان میں آئی ٹی برآمدات ملکی تاریخ کی بلند ترین سطح پر پہنچ گئیں ہیں۔انہوں نے بتایا کہ جولائی 2020 تا مئی 2021 تک پاکستان کی آئی ٹی برآمدات 47 اعشاریہ ایک فیصد رہی، جس کا حجم ایک ارب 90 کروڑ آٹھ لاکھ ڈالرز کے قریب رہا۔

امین الحق نے بتایا کہ گزشتہ برس پاکستان نے ایک ارب 29 کروڑ ڈالرز کی آئی ٹی پروڈکٹ کی برآمدات کی تھی۔ وفاقی وزیر نے اس عزم کا اظہار کیا کہ ’جون 2021 تک 2 ارب ڈالر کا ہدف بھی پورا کرلیں گے‘۔انہوں نے اہم سنگِ میل عبور کرنے اور تیز ترین برآمدی ترسیلات پر آئی ٹی کمپنیوں، سافٹ ویئر ایکسپورٹ بورڈ کو مبارک باد بھی پیش کی ہے۔

سندھ حکومت نے جننگ فیکٹریز پر لگائے گئے سیلزٹیکس واپس لینے کا مطالبہ کرتے ہوئے کہا جننگ اورکاٹن آئل سیڈپرسیلز ٹیکس لگانے سے انتہائی نقصان ہوگا۔

تفصیلات کے مطابق وزیرزراعت اسماعیل راہو کی جانب سے بیان میں کہا گیا ہے کہ وفاقی حکومت کی جانب سے کاٹن آئل سیڈ اور کپاس پر 17 فیصد سیلز ٹیکسز واپس لیا جائے، پہلے نالائق حکومت نے کپاس پر10 فیصد ٹیکس لگایا اور اب 17فیصدکر دیا۔

اسماعیل راہو کا کہنا تھا کہ نیازی سرکار کی غلط پالیسیوں نےپہلے ہی زراعت کوبہت نقصان پہنچایا ، جننگ فیکٹریز پر پہلے کبھی بھی سیلز ٹیکس نہیں رہا،یہ کارنامہ سلیکٹڈ کا ہے۔

صوبائی وزیر نے کہا کہ دنیا میں کپاس کی صنعت پرجننگ کےمرحلےتک ٹیکس نہیں ہے، جننگ کے بعدکےمراحل پرٹیکس عائدہوتاہے، 5سال پہلے کپاس کی پیداوارمیں پاکستان دنیامیں چوتھے نمبرپرتھا، 5 سال پہلے 1300 جننگ فیکٹریز تھیں اور اب 440 رہ گئی ہیں۔

ان کا کہنا تھا کہ جننگ اورکاٹن آئل سیڈپرسیلز ٹیکس لگانےسےانتہائی نقصان ہوگا، نالائق حکمرانوں کایہ فیصلہ بے روزگاری کا ایک اورسونامی لے آئے گا۔