Category: کراچی

سندھ سرکار نے کرونا کیسز میں کمی کے بعد صوبے بھر میں سیکنڈری کلاسز کو ایس او پیز کے تحت کھولنے کا فیصلہ کیا ہے۔

تفصیلات کے مطابق سماجی رابطے کی ویب سائٹ ٹوئٹر پر کئے گئے ٹوئٹ میں وزیر تعلیم سندھ سعید غنی نے کہا کہ وزیراعلیٰ سندھ مرادعلی شاہ کی زیرصدارت سندھ کرونا ٹاسک فورس کا اجلاس ہوا.

اہم اجلاس میں فیصلہ کیا گیا کہ چھٹی سےآٹھویں کلاسز کل سے50فیصدحاضری کیساتھ کھول دی جائیں گی۔

سعید غنی نے اپنے ٹوئٹ میں کہا کہ صورتحال میں مزید بہتری پر پرائمری کلاسز21جون سےشروع کردی جائےگی، کلاسز کےآغاز کیلئے اسکول عملےکا ویکسی نیشن لگوانا لازمی ہوگا۔

پاکستان پیپلزپارٹی کی جانب سے وفاقی وزیر فواد چوہدری کی پریس کانفرنس پر شدید ردِعمل دیا گیا ہے۔ترجمان سندھ حکومت بیرسٹر مرتضیٰ وہاب کہتے ہیں کہ فواد چوہدری کو لوٹائے اعظم کہا جائے تو غلط نہ ہوگا ، جناب نے ملک کی کوئی پارٹی نہیں چھوڑی جس کی ترجمانی نہ کی ہو،تفصیلات کے مطابق وفاقی وزیر برائے اطلاعات و نشریات کی پریس کانفرس کے جواب میں بیرسٹر مرتضیٰ وہاب نے کہا کہ پی ٹی آئی نے جو ملک اور عوام کی حالت کی وہ کسی سے ڈھکی چھپی نہیں ، آپ کی نااہل حکومت نے حقیقت میں عوام کی چیخیں نکال دی ہیں، محب وطن پیپلزپارٹی نے جمہوریت کیلئے قیادت کی قربانیاں دیں، آصف زرداری اور بلاول کے خلاف بات کرکے نوکری پکی نہیں ہونی، سلیکٹڈ حکومت کی منافقانہ ، غیر منصفانہ پالیسیاں عوام جانتے ہیں، عوام جان چکے کہ آپ کی نااہل حکومت جھوٹ اور یوٹرن کے سہارے کھڑی ہے۔
علاوہ ازیں وزیراطلاعات ناصر حسین شاہ نے الزام عائد کیا کہ فواد چوہدری پنجاب کے وزیراعلیٰ کے خلاف سازشیں کرتے ہیں کیوں کہ وہ خود وزیراعلیٰ بننا چاہتے ہیں،فواد چوہدری سندھ کی نگرانی کے خواب دیکھنا بند کردیں ، وفاقی حکومت براہ راست ایم پی ایزکے ذریعے کرپشن کررہی ہے، جو فنڈز اپنے سندھ کےایم پی ایزکو دیئے ان کا حساب دیں، کیوں کہ اس کرپشن کا حساب وفاقی حکومت کو دینا ہوگا۔
اس سے قبل وفاقی وزیر اطلاعات فواد چوہدری نے کہا تھا کہ لوگ مطالبہ کرتے ہیں سندھ میں گورنر راج لگادیں لیکن آئین میں اس کی کوئی گنجائش نہیں ، آرٹیکل 140اے کا نفاذ ہی واحد راستہ ہے جس کے ذریعے سندھ کو اس کا حق مل سکتا ہے ، کراچی میں صحافیوں سے گفتگو میں انہوں نے کہا کہ یہ کسی ایک فردکو ربڑ اسٹمپ کے طور پر وزیراعلیٰ سندھ بنا دیتے ہیں اور زرداری فیملی اسے اپنی مرضی سے چلاتی ہے ، کراچی کو پیسہ مل نہیں رہا ہے لیکن سندھ کے مسائل حل ہونہیں رہے تو یہ پیسہ جا کہاں رہا ہے؟کراچی میں پولیس کی اتنی اہلیت بھی نہیں کہ وہ امن وامان کی بنیادی ذمے داری نبھاسکے، کراچی جیسا شہر آج تک اپنی پولیس نہیں بناسکا ، لاڑکانہ ، گھوٹکی ، بدین اور دیگر اضلاع کا حال دیکھ لیں، صوبے میں صحت کا نظام برباد ہوچکا ہے۔

پاکستان پیپلزپارٹی کے چیئرمین بلاول بھٹو زرداری نے کہا ہے کہ آئی ایم ایف کے ملازموں نے بجٹ تیار کرکے عمران خان کو دیا جسے کسی بھی غور کے بغیر جوں کا توں پیش کردیا گیا جبکہ عوام دشمنی کی بنیاد پر بنائے گئے اس سلیکٹڈ بجٹ کے ہر صفحے پر عوام کے معاشی قتل عام کی ترکیبیں لکھی ہیں، میڈیا سیل بلاول ہاؤس سے جاری اپنے ایک بیان میں چیئرمین بلاول بھٹو زرداری نے کہا کہ بلاواسطہ ٹیکس کے بجائے اربوں روپے کے بالواسطہ ٹیکس لگانے کی عمران خان کی چوری پکڑی گئی ہے، پی ٹی آئی نے عام آدمی کے استعمال کی ہر شے پر اربوں روپے کا بالواسطہ ٹیکس لگادیا جس کے بعد ملک میں مہنگائی کا ایک نیا سونامی آنے والا ہے، انہوں نے کہا کہ پیٹرول پر 20 روپے فی لیٹر اور چینی پر سات روپے فی کلو کا اضافہ بالواسطہ ٹیکس کی وجہ سے ہونے والا ہے جسے ہم ناکام بنائیں گے، چیئرمین بلاول بھٹو زرداری نے اس موقع پر بتایا کہ جب کمپنیاں خام تیل اور ایل این جی پر 17 فیصد سیلز ٹیکس دیں گی تو پیٹرول اور گیس کی قیمتیں بڑھیں گی اور اس بالواسطہ ٹیکس کا بوجھ عوام بھگتیں گے، انہوں نے یہ بھی بتایا کہ کرونا وائرس سے بچنے کیلئے عوام نے آن لائن خریداری شروع کی تو عمران خان نے اس پر بھی سیلزٹیکس لگادیا، عام آدمی آخر جائے تو کہاں جائے، چیئرمین بلاول بھٹو زرداری نے آخر میں ایک موازنہ کرتے ہوئے کہا کہ یہ المیہ نہیں تو کیا ہے کہ وطن سے دور پاکستانی روزگار سے محروم پاکستانیوں کو ملکی برآمد سے زیادہ ترسیلاتِ زر بھیج رہے ہیں۔

چیئرمین ریلویز حبیب الرحمان گیلانی نے اتوارکوکے سی آر 3 اپ پراورنگی سے کراچی سٹی اسٹیشن تک سفر کیا۔سی ای او ریلویزنثار احمد میمن، ڈی ایس کراچی محمد حنیف گل، پی ڈی کے سی آر امیر محمد دائودپوتہ اور تمام متعلقہ ڈویژنل افسران بھی ان کے ہمراہ ہیں۔چیئرمین ریلویز نے کے سی آر ٹریک اور روزانہ کی آمدنی اور اخراجات پر مختلف سوالات کیئے۔
چیئرمین ریلویز نے پورے ٹریک پر رائٹ آف وے زمین کا تفصیلی معائنہ بھی کیا اور ان کو وہاں سے تجاوزات کے خاتمے کے بارے میں آگہی دی گئی۔چیئرمین ریلویز نے کے سی آر ٹرین کی رفتار بڑھانے کے بارے میں پراجکٹ ڈائرکٹر کے سی آر امیر محمد دائودپوتہ سے سوال کیا جس پر پراجکٹ ڈائرکٹر نے کہا کہ کے سی آر بحالی مختلف مرحلوں میں کی جارہی ہے جن کے مکمل ہونے پر کے سی آر ایک الٹرا ماڈرن سروس کی شکل اختیار کر لے گی۔واضح رہے کہ رواں سال 10 فروری کو اورنگی سے سٹی تک ٹریک بحال ہونے کے بعد چیئرمین ریلویزحبیب الرحمان گیلانی کا یہ کے سی آر پر دوسرا سفر ہے۔ اس سے قبل چیئرمین ریلویز 18 فروری کو ڈائون میں کراچی سٹی سے اورنگی تک کے سی آر پر سفر کر چکے ہیں۔