Category: کراچی

سندھ اسمبلی میں اپوزیشن لیڈر حلیم عادل شیخ ،خرم شیرزمان اور ایم کیو ایم کے رہنما خواجہ اظہار الحسن نے کہا ہے کہ آج سندھ اسمبلی میں کورم پورا نہ ہونے کے باوجود بل کی منظوری جمہوری اقدار کے منافی ہے ۔اسپیکر قومی اسمبلی ، چیئرمین سینیٹ سے مطالبہ کرتے ہیں کہ سندھ کی صورتحال دیکھتے ہوئے آپ بھی وہاں اپوزیشن کو بات کرنے سے پہلے پوچھیں۔
کراچی دشمنی کرنے والے سندھ اور پاکستان دشمنی کے مرتکب ہیں۔کراچی میں ٹینکر مافیا کے سربراہ مراد علی شاہ اور بلاول بھٹو زرداری ہیں ۔ان خیالات کا اظہار انہوںنے جمعہ کو سندھ اسمبلی اجلاس کے بعد میڈیا کارنر پر صحافیوں سے بات چیت کرتے ہوئے کیا ۔حلیم عادل شیخ نے کہا کہ کراچی دشمنی کرنے والے سندھ اور پاکستان دشمنی کے مرتکب ہیں۔
نلکے میں پانی آتا نہیں ٹینکر میں ختم نہیں ہوتا،کراچی میں ٹینکر مافیا کے سربراہ مراد علی شاہ اور بلاول زرداری ہیں۔ 90 فیصد پورے سندھ کا روینیو کراچی دیتا ہے۔اس شہر میں 250 ارب کی پانی چوری ہورہی ہے۔اگر آپ کا تعلق پی پی سے ہے تو زمینوں اور کراچی میں بھی پانی موجود ہے،میرے حلقے میں پانی فیکٹریوں میں فروخت کیا جارہا ہے ۔مرکز میں ہم سندھ کے نمائندے ہیں۔کراچی کو سیراب نہیں کیا گیا نہ سڑکیں بنائی گئیں اور نہ ہی کوئی دوسری سہولت دی گئی ہے ۔
پی پی نے آج ملک و جمہوریت دشمنی کا ثبوت دیا ہے۔خرم شیر زمان نے کہا کہ ناصر شاہ خود جلسے کررہے ہیں اور لوگوں کو ایس او پیز پر عملدرآمد کی تلقین کررہے ہیں۔سندھ حکومت کراچی کے تاجروں کو تنگ کررہی ہے۔بلوچستان پنجاب ترقی کررہے ہیں۔پیپلزپارٹی کے اپنے لوگ پانی چوری کررہے ہیں ۔ایم کیو ایم کے خواجہ اظہار الحسن نے کہا کہ صرف 23 ارکان نے آج بل منظور کیا ہے ۔
یہ غیر جمہوری اجلاس ہوا ہے۔اجلاس میں کورم تک پورا نہیں تھا۔اسپیکر قومی اسمبلی ، چیئرمین سینیٹ سے مطالبہ کرتا ہوںسندھ کی صورتحال دیکھتے ہوئے آپ بھی وہاں اپوزیشن کو بات کرنے سے پہلے پوچھیں۔انہوںنے کہا کہ سندھ میں اپوزیشن کی آواز کیوں دبائی جارہی ہے۔وہاں اپوزیشن لیڈر چمپئین کیوں بنا ہوا ہے۔امیر ہانی مسلم کمیشن بنا تھا۔اس کمیشن سے ایک بوند کا فائدہ نہیں ہوا۔
سندھ کے لوگ جائیں تو جائیں کہاں۔مراد علی شاہ کے حلقے کی خواتین چار کلومیٹر دور جدید ہیں پانی بھرنے جاتے ہیں ۔چیف جسٹس پانی پر جوڈیشل کمیشن بنائیں،کراچی کا ڈھائی سو ارب کا پانی بک رہا ہے۔وزیر اعظم نیب کو کاروائی کی ہدایت دیں۔انہوننے کہا کہ کے فور منصو بے کا روٹ 27مرتبہ تبدیل ہوا ہے ۔پیپلزپارٹی کراچی میں کے فور منصوبہ نہیں چاہتی تھی۔انہوںنے کہا کہ پبلک سروس کمیشن سندھ دشمن ادارہ ہے۔پبلک سروس کمیشن سے متعلق فیصلے پر کراچی میں مٹھائیاں بانٹی گئیں ۔سندھ پبلک سروس کمیشن سے متعلق عدالتی فیصلے پر ہم بھی اپیل میں جائیں گے۔

سندھ اسمبلی میں جمعہ کو اسپیکر آغا سراج درانی کی جانب سے ایم کیو ایم کے رکن محمد حسین کونکتہ اعتراض پر بولنے کی اجازت نہ دینے پر اپوزیشن ارکان سراپا احتجاج بن گئے اور ایوان ’’پانی دد‘‘کے نعروں سے گونج اٹھا۔ اپوزیشن ارکان پلے کارڈز کے کر اسپیکر ڈائس کے سامنے آگئے ،جس پر اسپیکر آغا سراج درانی نے اجلاس پہلے دس منٹ اور بعد ازاں 7جون تک کے لیے ملتوی کردیا۔
سندھ اسمبلی کی کارروائی کے دوران جمعہ کو وقفہ دعا کے بعدایم کیوایم پاکستان کے ارکان نشستوں سے کھڑے ہوگئے اور اسپیکر سے بولنے کی اجازت دینے کی درخواست کی ۔اسپیکر آغا سراج درانی نے محمد حسین کو بولنے کی اجازت نہیں دی،جس پر وہ مائیک بند ہونے کے باوجود خطاب کرتے رہے ۔
سپیکر آغا سراج درانی اپوزیشن ارکان کو انگریزی ،اردو اور سندھی زبان میں سمجھاتے رہے اور کہا کہ میں آپ کو وقفہ سوالات کے بعد وقت دوں گا تاہم ایم کیو ایم پاکستان اور پی ٹی آئی کے ارکان کراچی کو پانی دو کے نعرے لگاتے ہوئے اسپیکر کے ڈائس سامنے آگئے ۔

اپوزیشن لیڈر حلیم عادل شیخ نے کہا کہ پورے سندھ میں پانی کا ایشو ہے۔کراچی کے لوگ پانی کی بوند بوند کو ترس رہے ہیں۔کیا یہاں یزیدیوں کی حکومت ہے۔ پانی چوروں سے سندھ کو نجات دلائیں۔ایوان میں شوشرابہ بڑھنے پر اسپیکر نے اجلاس 10منٹ کے لیے ملتوی کردیا ۔ وقفے کے بعد اجلاس دوبارہ شروع ہوا تو ایم کیو ایم اور پی ٹی آئی کے ارکان نے ایک مرتبہ پھر احتجاج شروع کردیا ۔
اپوزیشن ارکان ایوان میں ’’ظالموں جواب دو پانی کا حساب دو‘‘ اور دیگر نعرے لگاتے رہے ۔اسپیکر سندھ اسمبلی نے کہا کہ اپوزیشن ارکان موبائل فون استعمال کررہے ہیں ۔میں ایوان میں موبائل فون پر پابندی عائد کردوں گا ۔اپوزیشن کے احتجاج کے باعث وقفہ سوالات چند منٹ میں ہی ختم ہوگیا جبکہ اسپیکر آغا سراج درانی نے کئی ارکان کے توجہ دلا ؤنوٹس بھی ختم کردیئے ۔بعد ازاں اسپیکر نے سندھ اسمبلی کا اجلاس 7جون تک ملتوی کردیا ۔

شہر قائد پریس کلب نے سابق ٹیسٹ کپتان راشد لطیف کے پریس کلب میں داخلے پر پابندی عائد کر دی ہے۔
کراچی پریس کلب کی مجلس عاملہ نے اپنے بیان میں کہا ہے کہ قومی ٹیم کے 52 سالہ سابق کپتان راشد لطیف کی جانب سے صحافیوں کے حوالے سے اختیار کیا جانے والا رویہ قابل مذمت ہے اور صحافیوں کے لیے نازیبا الفاظ کی ادائیگی پر صحافیوں میں شدید تشویش پائی جاتی ہے۔

;مجلس عاملہ کا اپنے بیان میں مزید کہنا تھا کہ اگر راشد لطیف کو کسی بھی صحافی سے ذاتی عناد ہے تو خود میں ہمت پیدا کرتے ہوئے اس صحافی کا نام لیں اور اس کے خلاف قانونی کارروائی کریں۔ مجلس عاملہ نے مزید کہا کہ پوری صحافی برادری کے لیے نازیبا الفاظ کسی صورت برداشت نہیں کیے جائیں گے۔

سابق صدر آصف زرداری نے سابق وفاقی وزیر حاجی ظفر علی لغاری کے انتقال پر گہرے افسوس کا اظہار کیا اور انہوں نے اپنے تعزیتی بیان میں کہا کہ حاجی ظفر علی لغاری پارٹی کے نظریاتی اور ثابت قدم ساتھی تھے ، حاجی ظفر علی لغاری کی پارٹی قیادت سے وفاداری ناقابل فراموش ہے ۔ دادو ضلع دادو کے عوام اور پارٹی کارکن حاجی ظفر لغاری کی خدمات ہمیشہ یاد رکھیں گے۔
آصف زرداری نے ایم این اے عرفان ظفر اور عمران ظفر سے گہری تعزیت کا اظہار کرتے ہوئے کہا کہ پیپلز پارٹی اور سندھ حکومت سوگواران ایم این اے عرفان لغاری، عمران لغاری , قمبر لغاری اور لواحقین کے دکھ میں برابر کی شریک ہے۔
آصف زرداری نے حاجی ظفر علی لغاری کیلیئے مغفرت اور بلند درجات کیلئے بھی دعا کی ۔

سربراہ تنظیم ایم کیو ایم پاکستان بحالی کمیٹی ڈاکٹر فاروق نے اپنے خلاف چلائی جانے والی بے بنیاد خبروں کی تردید کر دی.

ڈاکٹر فاروق ستار نے اپنے خلاف میڈیا پر چلنے والی جھوٹی اور بے بنیاد خبروں کی تردید اور وضاحت کر دی کہ نہ ہی میرے گھر کوئی سی ٹی ڈی سے آیا اور نہ میں گھر سے کہیں گیا۔

عارضی طور پر کسی ہوٹل میں رہائش اختیار نہیں کی گھر ہی پر ہوں۔میرے گھر کوئی نوٹس لے کر نہیں آیا اور اگر کوئی آئے گا تو چائے کی پیالی کے ساتھ ملاقات کرونگا۔میرے لئے میڈیا پر چلنے والے تمام باتیں جھوٹی اور بے بنیاد ہیں.

واضع رہے کہ اسطرح کے اوچھے ہتھکنڈے نہ ہی میرے حوصلے پست کر سکتے ہیں نہ ہی میری جدوجہد ختم ہو سکتی ہے۔

نوجوانوں کی بڑی تعداد میرے ساتھ شہری سندھ کے حقوق کی بازیابی کی جدوجہد میں شامل ہے اور اب کسی صورت اس سے دستبردار نہیں ہو سکتے۔

صوبائی وزیر اطلاعات و بلدیات ،مذہبی امور اور جنگلات سید ناصر حسین شاہ نے سابق وفاقی وزیر حاجی ظفر علی خان لغاری کے انتقال پر گہرے رنج وغم کا اظہارکیا ہے اپنے تعزیتی بیان میں انہوں نے کہا کہ پیپلز پارٹی اور سندھ حکومت سوگواران ایم این اے عرفان لغاری، عمران لغاری , قمبر لغاری اور لواحقین کے دکھ میں برابر کی شریک ہے۔
سید ناصر حسین شاہ نے کہا کہ حاجی ظفر لغاری پیپلزپارٹی کے سینئر رہنما تھے انکے انتقال سے پیپلزپارٹی ایک تجربہ کار اور مخلص سیاستدان سے محروم ہوگئی ان کے انتقال سے سیاست میں پیدا ہونے والا خلاء کبھی پر نہیں کیا جا سکے گا اور انکی خدمات کو ہمیشہ یاد رکھا جائیگا، صوبائی وزیر اطلاعات نے دعا کی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور لواحقین کو صبر جمیل عطا فرمائے ۔

صوبائی وزیر برائے معدنیات و معدنی ترقی،دیہی ترقی اور پبلک ہیلتھ انجینئرنگ میر شبیر علی بجارانی نے پاکستان پیپلزپارٹی کے سینئر رہنما اور سابق وفاقی وزیر الحاج ظفر علی خان لغاری کے انتقال پر اپنے گہرے دکھ اور افسوس کا اظہار کیا ہے اور کہا ہے کہ ظفر علی خان لغاری کے انتقال سے پاکستان پیپلز پارٹی ایک مخلص شخصیت اور بانی کارکن و رہنما سے محروم ہوگئی۔
انہوں نے کہا کہ مرحوم ظفر علی خان لغاری،پارٹی کے بانی چیئر مین شہید زوالفقار علی بھٹو اور شہید رانی محترمہ بے نظیر بھٹو کے دیرینہ رفیق تھے۔میر شبیر علی بجارانی نے مرحوم ظفر لغاری کے صاحبزادوں عرفان ظفر لغاری اور عمران ظفر لغاری سے ان کے والد کے انتقال پر تعزیت کی ہے اور دعا کی ہے کہ رب العالمین مرحوم کو اپنے جوارِ رحمت میں جگہ عنایت فرمائے اور لواحقین کو صبر جمیل عطا کرے۔

صوبائی وزیر ترقی نسواں سندھ سیدہ شہلا رضا کی ہدایت پر کمپلین سیل (شکایتی مرکز) محکمہ ترقی نسواں کے عملے کی تربیتی ورکشاپ منعقد کی گئی پروموشن آف دی رائٹس آف اولڈر پیپل ؤ سندھ رورل سپورٹ آرگنائزیشن کی فوکل پرسن عروسہ کھٹی نے تربیتی ورکشاپ میں شامل عملے کو سندھ سینیئر سیٹیزنز ویلفیئر ایکٹ 2014ئ سے متعلق آگہی فراہم کی۔
انہوں نے کہا کہ ایکٹ کو سات سال کا عرصہ گزر چکا ہے لیکن لوگوں کو اس ایکٹ کے بارے میں معلومات نہ ہونے کے برابر ہے ۔ انہوں نے کہا کہ یہ ایکٹ سندھ حکومت کی جانب سے سینئیر سیٹیزنز کی فلاح و بہبود اور انکے حقوق کے لیے ایک سنگ میل ہے اور سینئر سیٹیزنز کے بیشتر مسائل کے فوری حل میں اہم کردار ادا کرتا ہے تاہم ضرورت اس امر کی ہے کہ اس ایکٹ کے بارے میں عوام کو زیادہ سے زیادہ آگہی فراہم کی جائے۔

میزان بینک نے سندھ حکومت کے اشتراک سے اپنے ملازمین اور ان کے اہلِ خانہ کیلئے مفت کووِڈ ویکسینیشن مہم کاآغاز کردیاہے۔ اس سلسلے میں بینک کے صدر اور چیف ایگزیکٹو آفیسر عرفان صدیقی نے سینئر مینجمنٹ کی موجودگی میں ہیڈ آفس میں ویکسینیشن مہم کا افتتاح کیا۔اس موقع پر کمشنر کراچی نوید احمد شیخ اور ان کی ٹیم بھی موجود تھی۔
کووِڈ کے بعد معمولاتِ زندگی کونارمل کرنے کیلئے حکومتی کوششوں کوبینک معاونت فراہم کررہا ہے اور یہ مہم انہی کوششوں کا حصہ ہے۔کراچی سے شروع کی جانے والی اس ویکسینیشن مہم کو باآسانی چلانے اور اور ملک بھر میں اپنے ملازمین کیلئے ویکسین کے انتظام کیلئے بینک متعلقہ اداروں کے ساتھ شراکت کررہا ہے۔
اس مہم میں مستقل، کنٹریکٹ، تھرڈ پارٹی اسٹاف سمیت تمام ملازمین اور ان کے اہلِ خانہ کی ویکسینیشن کی جائے گی ۔

ویکسین کے خواہشمند افراد کو 1166پر ایس ایم ایس کے ذریعے رجسٹرڈ کیا جاتاہے ۔ کمشنر کراچی نے مہم کی افتتاحی کی تقریب سے خطاب کرتے ہوئے کہاکہ ہمیں اپنے آپ، اپنے گھر والوں اور ساتھیوں کو محفوظ رکھنے کیلئے ضرور ویکیسین لگانی چاہیے۔ اس موقع پر کمشنر نے میزان بینک کی جانب سے تمام ملازمین اور ان کے اہلِ خانہ کو ویکسینیشن لگانے کے اقدام کو سراہا۔ انہوں نے کہا کہ ا س سے ظاہر ہوتا ہے کہ بینک اپنے اسٹاف کی حفاظت اور فلاح و بہبود کو اہمیت دیتا ہے۔

آرٹس کونسل آف پاکستان کراچی فنون و لطیفہ کے فروغ کے لئے ہمیشہ سے کوشاں ہے ، اِسی ضمن میں آرٹس کونسل آف پاکستان کراچی میوزک پروڈکشن کی جانب سے گلوکاروں کو موقع دیا گیا کہ وہ اپنی صلاحیتوں کے جوہر دکھائیں ،
آرٹس کونسل میوزک اکیڈمی دی ایکما بینڈ کی جانب سے پہلا اوریجنل سانگ ”لاہوتی“ ریلیز کردیا گیا ،صوفی ازم اور راک میوزک کے زبردست امتزاج پر مبنی ”لاہوتی“ گانے نے ریلیز ہوتے ہی دھوم مچادی،لاہوتی گانا ”ایکما دی بینڈ“ کے گلو کار ارمان رحیم نے گایا ہے ،
گانے کی کمپوزیشن معروف گٹارسٹ عدنان آفاق نے کی ہے جبکہ تحریر ظہیر ظرف نے کیا ہے ۔
ایکما دی بینڈ کے دیگر ممبران میں مصطفی بلوچ ،شاہد رحمان،شمس العارفین ،مزمل عبدالصمداور ذیشان پرویز شامل ہیں ،واضح رہے کہ لاہوتی گانا آرٹس کونسل میوزک اکیڈمی دی ایکما بینڈ کی البم ”لاہوتی“ کا پہلا اوریجنل سانگ ہے۔