محکمہ موسمیات کا کہنا ہے کہ کراچی سمیت پاکستان کے کسی ساحلی علاقے کو سمندری طوفان سے براہِ راست کوئی خطرہ نہیں۔ کراچی میں ممکنہ طوفان کا خطرہ ٹل گیا ہے اور محکمہ موسمیات نے کہا ہے کہ طوفان زورپکڑ رہا ہے لیکن پاکستان کی ساحلی پٹی سے دور ہوکر گزرے گا، جس کے بعد پاکستان میں سمندری طوفان’ توکتے‘کاخطرہ کم ہونے لگا ہے۔محکمہ موسمیات کے مطابق کراچی سمیت پاکستان کے کسی ساحلی علاقے کو سمندری طوفان سے براہِ راست کوئی خطرہ نہیں، لیکن اس کے اثرات ہیٹ ویو اور گرد آلود ہواؤں کی شکل میں سامنے آنے لگے ہیں، سمندری طوفان کا کراچی سے فاصلہ اب 1210 کلومیٹر ہے، اور طوفان کے دور ہونے کے باعث کراچی میں بارش کا امکان کم ہوگیا ہے، اور آئندہ دو روز تک کراچی کا موسم شدید گرم رہ سکتا ہے، جب کہ جنوب مشرقی سندھ میں بارش ہوسکتی ہے،محکمہ موسمیات نے بتایا ہے کہ بحیرہ عرب میں بننے والا طوفان اگلے چند گھنٹوں میں شدید ترین سمندری طوفان میں تبدیل ہوسکتا ہے، اور سمندری طوفان کے تیور بتارہے ہیں کہ سندھ کے متعدد اضلاع میں 17 سے 20 مئی تک 70 سے 90 کلو میٹر کی رفتار سے گرد آلود ہوائیں چلنے کے ساتھ تیز آندھی اوربارش کا امکان ہے، جب کہ چند روز کے دوران کراچی سمیت سندھ میں طوفانی بارشیں ہوسکتی ہیں۔محکمہ موسمیات کے مطابق ’توکتے‘ انتہائی شدت کے طوفان کی شکل اختیار کرسکتا ہے، اور اس کا رُخ بتدریج شمال مغرب میں بھارتی گجرات کی جانب رہے گا، اُدھر سمندری طوفان کے اثرات سامنے آنے لگے ہیں اور محکمہ موسمیات کے مطابق کراچی میں جُزوی ہیٹ ویو کا آغاز ہوگیا ہے، شہر میں سمندری ہوائیں چلنا بند ہوگئی ہیں، یہ سمندری ہوائیں 2 سے 3 روز تک بند رہ سکتی ہیں۔البتہ شہر میں گرد آلود ہوائیں چل رہی ہیں ۔ضلعی انتظامیہ نے ہیٹ ویو سے بچنے کے لئے شہریوں سے احتیاط کرنے، زیادہ سے زیادہ پانی پینے اور بلاوجہ دھوپ میں جانے سے گُریز کرنے کی اپیل کی ہے۔

صحافی عرفان پیرزادو کی پراسرار موت کی فوری طور پر تحقیقات کی جائے،

کراچی یونین آف جرنلسٹس نے جناح اسپتال میں آپریشن کے دوران جاں بحق ہونےوالے صحافی عرفان پیرزادہ کی پراسرار موت پرانتہائی افسوس کا اظہار کرتے ہوئے لواحقین سے تعزیت کا اظہار کیا ہے اور حکومت سندھسے مطالبہ کیا ہے کہ صحافی کی پر اسرار موت کی فوری طور پر تحقیقات کی جائے اور غفلت کے مرتکب ڈاکٹروں کےخلاف کاروائی کی جائے۔

کراچی یونین آف جرنلسٹس کے صدر اعجاز احمد۔ جنرل سیکریٹری عاجز جمالی،جوائنٹ سیکریٹری طلحہ ہاشمی، رفیق بلوچ اور ایگزیکٹو کونسل کے تمام ارکان نے مقامی ٹیوی چینل کی اسکرپٹ ایڈیٹر صحافی عرفان پیرزادو کی جناح اسپتال میں آپریشن کے دوران جاں بحق ہونے والے واقعے پر تشویش کا اظہار کیا ہے۔ کے یو جے نے کہا کہ عرفان پیرزادو کے والدین کےمطابق صحافی عرفان پیرزادو کے چند دنوں میں تین الگ الگ آپریشن کیئے گئے اور جب انتقال ہوا تو ڈاکٹروں نے اپنی جان چھڑانے کے لئے کرونا کامریض قرار دے دیاجب کہ عرفان پیرزادو کے لواحقین کے مطابق اس کاکرونا کا کوئی ٹیسٹ ہی نہیں ہوا تھا۔عرفان پیرزادو کے بھائی صحافی احمد نواز پیرزادو نے الزام عائد کیا ہے کہ عرفان کی موت جناح اسپتال کےڈاکٹروں کی غفلت کی وجہ سے ہوئی ہے،کے یو جے نے حکومت سندھ۔ محکمہ صحت سندھ اور جناح اسپتال کی انتظامیہ سے مطالبہ کیا ہے کہ اس واقعے کی فوری طور پر تحقیقات کرائی جائے ملوث کرداروں کے خلاف فوری کاروائی کی جائے۔ کے یو جے نے حکومت سندھ سے مطالبہ کیاہےکہ عرفان پیرزادو کے پسماندگان کی مالی مدد کی جائے وہ اپنے خاندان کا واحد کفیل تھا۔وہ گذشتہ بارہ برسوں سےشعبہ صحافت سےوابستہ رہےمختلف سندھی چینلزمیں سب ایڈیٹر،شفٹ انچارج، اسکرپٹ ایڈیٹر کی ذمے داریاں ادا کر چکا ہے۔

کراچی میں 18سے 20 مئی تک ممکنہ طوفانی ہواؤں اور بارشوں کی پیشگوئی کے بعد سول ایوی ایشن اتھارٹی نے جناح انٹر نیشنل ایئرپورٹ پرہائی الرٹ کردیا گیا، اس سے متعلق سول ایوی ایشن نے سرکلر بھی جاری کردیا۔سرکلر کے مطابق چھوٹے سائز کے فکس ونگ طیاروں، روٹری ونگ ہیلی کاپٹرز کے ساتھ اضافی وزن لگایا جائے، کچھ طیاروں کو ہواؤں کی شدت سے بچانے کے لیے ہینگر میں منتقل کیا جائے۔سرکلر میں تیز ہواؤں سے فضائی سفر محفوظ بنانے کے لئے اقدامات کی ہدایت بھی کی گئی ہے۔سی اے اے کا کہنا ہے کہ طوفان اور بارشوں کے دوران مختلف اقسام کے پرندوں کی تعداد بڑھ جاتی ہے۔ لہٰذا ایئر پورٹس کی حدود اور اطراف میں برڈ شوٹرز کی تعیناتی یقینی بنائی جائے اور فیومیگیشن کی جائے۔

رشوت لےکر امتحان میں پائلٹس کو پاس قرار دینے والے اسسٹنٹ سے متعلق اہم انکشاف سامنے آیا ‏ہے۔رپورٹ کے مطابق سید عدیل آفتاب نے رشوت سےکراچی میں 2 جائیدادیں خریدیں، جائیدادیں ‏گلستان جوہراورنیو کراچی میں لی گئیں تحقیقاتی رپورٹ میں کہا گیا ہے کہ عدیل آفتاب کے اکاؤنٹ میں رقوم فرنٹ مین جمیل احمد نے ‏منتقل کیں۔عدیل آفتاب کیخلاف اینٹی منی لانڈرنگ کی دفعات کے تحت مقدمےکی سفارش کی گئی ہے۔ ‏عدیل آفتاب سول ایوی ایشن اتھارٹی میں گریڈ ٹو کے اسسٹنٹ ہیں۔سول ایوی ایشن اتھارٹی نےاپنی رپورٹ سپریم کورٹ میں جمع کرادی ہے۔ سول ایوی ایشن اتھارٹی ‏کی رپورٹ میں ایف آئی اے کی تحقیقاتی رپورٹ بھی شامل ہے۔

شہر قائد میں 20 ہزار روپے کے عوض تازہ قبر توڑ کر نئی میت دفنانے کا انکشاف ہوا ہے۔ کراچی کے اسماعیل گوٹھ قبرستان میں پرانی قبر توڑ کر نئی میت دفنانے والے گورکن کو شرافی گوٹھ پولیس نے گرفتار کرلیا۔پولیس کا کہنا ہے کہ ملزم کامران بیس ہزار روپے لے کر پرانی قبروں میں تدفین کروادیتا تھا، ملزم کے تین ساتھی فرار ہوگئے جس کی تلاش میں چھاپے مارے جارہے ہیں۔شہری نے پولیس کو دائر درخواست میں بتایا کہ دو دن پہلے والد کی قبر موجود تھی، عید والے دن قبرستان گیا تو نئی قبر بنائی جارہی تھی۔پولیس کا کہنا ہے کہ ملزم کو شہری کی شکایت پر گرفتار کیا گیا، گرفتار ملزم نے پرانی قبروں میں تدفین کرانے کا اعتراف کرلیا۔ واضح رہے کہ کراچی کے قبرستانوں میں گورکن ملازم کے بجائے مالک کا کردار ادا کرتے ہوئے قبر کی سرکاری قیمت کے بجائے ہزاروں روپے اضافی رقم وصول کرتے ہیں اور کسی پرانی قبر کو ختم کرکے وہاں نئی قبر بنا دی جاتی ہے۔
اب حالت یہ ہے کہ قبرستانوں کی کمی سنگین شکل اختیار کرچکی ہے،اعداد وشمار کے مطابق کراچی میں یومیہ ڈیڑھ ہزار کے قریب اموات رپورٹ ہوتی ہیں جن کی تدفین کیلئے لواحقین کو بہت ساری مشکلات کا سامنا کرنا پڑتا ہے۔اس حوالے سے ایڈمنسٹریٹر کراچی لئیق احمد کا بھی کہنا تھا کہ کے ایم سی کے قبرستانوں کی صورتحال افسوسناک حد تک خراب ہے اور ان پر قبرستان مافیا کا قبضہ ہے۔