Category: کراچی

وزیر اطلاعات سندھ ناصرحسین شاہ نے کہا ہے کہ وزیر اعظم کے سندھ کے لیے اعلان کردہ منصوبے پرانے ہیں اور بجٹ بک میں پہلے سے شامل ہیں، وزیراعظم کو ایک اور تقریب میں آنا تھا یہ صرف بہانہ کیا گیا۔یہ بات انہوں نے صوبائی وزیر تعلیم سعید غنی کے ہمراہ پریس کانفرنس کرتے ہوئے کہی۔ اس موقع پر پیپلز پارٹی کراچی کے جنرل سیکریٹری جاوید ناگوری بھی موجود تھے۔ ناصر حسین شاہ نے کہا کہ سندھ حکومت کو وزیراعظم کے دورے کی آفیشلی اطلاع نہیں دی گئی اور ہم پر الزام لگایا جاتا ہے کہ ہم ان کا استقبال کرنے نہیں جاتے۔انہوں نے کہا کہ کل بہت سارے منصوبوں کااعلان کیا گیا جو کہ سب پرانے تھے، سکھر حیدرآباد موٹروے، نادرا آفس، ریلوے اسٹیشن، گاج ڈیم سب پرانے منصوبے تھے جو بجٹ میں پہلے سے شامل ہیں۔جزیروں سے متعلق انہوں نے کہا کہ جزیروں پر ایک خط کا جواب دیا تھا اور کہا تھا ماہی گیروں کو ساتھ ملا کر ترقی کے منصوبے بنائے جائیں لیکن وفاقی حکومت نے آرڈی ننس لا کر جزیرے ہڑپ کرنے کی کوشش کی، سخت آرڈی ننس لانا ان کی بدنیتی تھی، جزیروں کا معاملہ پارلیمنٹ میں لاتے، ان کی منافقانہ سیاست کو لوگ جان چکے ہیں۔صوبائی وزیر اطلاعات نے وفاقی کابینہ میں تبدیلی پر کہا کہ نااہل ترینوں کے ساتھ شوکت ترین کیا کرسکتے ہیں، وہ ان نااہل حکمرانوں کے ساتھ کیا کارکردگی دکھائیں گے؟ اصل میں یہ جو نااہل ترین ہیں ان سے جان چھڑانی ہے اس سے ملک میں بہتری آئے گی۔ایک سوال کے جواب میں انہوں کہا کہ سندھ پبلک سروس کمیشن میں نامزدگیاں میرٹ پر ہوتی ہیں، کچھ شکایتیں آتی ہیں، اس پر ایکشن لیا گیا ہے ہم لسانیت میں یقین نہیں رکھتے، جہاں حق تلفی ہوئی وہاں وزیر اعلیٰ سندھ نے ایکشن لیا، سندھ پبلک سروس کمیشن کے نتائج پر اعتراض کرنے والوں کی سیاست ہی یہی ہے وہ لوگوں کے جذبات سے کھیلتے ہیں، اردو بولنے والے قابل احترام ہیں پیپلز پارٹی نے کبھی تفریق کی سیاست نہیں کی۔انہوں نے کہا کہ کراچی کا یہ حال کس نے کیا؟ ٹی وی بیچ کر اسلحہ خریدنے کی بات کس نے کی؟ بوری بند لاشیں کس نے دیں؟ یہ عوامی جذبات سے کھیلتے رہے ہیں لیکن اب عوام انہیں جان چکی ہے۔صوبائی وزیر ناصر حسین شاہ نے مزید کہا کہ حکومتیں اثاثے بناتی ہیں اور اثاثوں کا تحفظ کرتی ہیں لیکن موجودہ وفاقی حکومت نے قومی اثاثوں کا جو حال کیا ہے وہ سب کے سامنے ہے، انہوں نے اسٹیٹ بینک کو گروی رکھ دیا ہے، اسٹیل مل کو بیچنے میں لگی ہے۔انہوں نے مزید کہا کہ عمران خان کی مانگے تانگے کی حکومت ہے جو جہانگیر ترین کی مہربانی سے بنی اب ان سے اپنے اتحادی ناخوش ہیں۔

انسداد دہشت گردی کی منتظم عدالت نے کالعدم تحریک لبیک کے 28 کارکنوں کو جسمانی ریمانڈ ختم ہونے پر جوڈیشل ریمانڈ پر جیل بھیج دیا کراچی کی انسداد دہشت گردی کی منتظم عدالت کے روبرو کالعدم تحریک لبیک کے 28 کارکنوں کو جسمانی ریمانڈ ختم ہونے پر پیش کیا گیا۔ عدالت نے تمام ملزمان کو 5 مئی تک عدالتی ریمانڈ پر جیل بھیجنے کا حکم دے دیا۔ عدالت نے تفتیشی افسر کو کیس کا چالان پیش کرنے کی ہدایت کردی۔واضح رہے کہ ملزموں کو 14 اپریل کو کھاردار پولیس نے گرفتار کیا تھا۔ ملزمان پر کار سرکار میں مداخلت، جلاؤ گھیراؤ اور دہشت گردی ایکٹ کے تحت مقدمہ درج کیا گیا تھا۔

ایڈیشنل آئی جی کراچی نے تھانوں سے ہٹائے جانے والے تمام انٹیلیجنس ملازمین کی اسکروٹنی کے احکامات جاری کردیئے ہیں۔
تفصیلات کے مطابق کراچی کے تھانوں سے انٹیلیجنس اہلکاروں اور افسران کے ہٹائے جانے کے معاملے پر ایڈیشنل آئی جی ہٹائے جانے والے تمام انٹیلیجنس ملازمین کی اسکروٹنی کے احکامات جاری کردیے ہیں۔ایڈیشنل آئی جی کراچی غلام نبی میمن نے تینوں زون کے ڈی آئی جیز کو احکامات جاری کرتے ہوئے کہا ہے کہ انٹیلیجنس افسران واہلکار تھانے کی خفیہ آنکھ ہوتے ہیں، ان کا کام جرائم پیشہ عناصراور منظم جرائم کی رپورٹ تیار کرنا ہوتا ہے۔غلام نبی میمن کا کہنا تھا کہ انٹیلیجنس افسرکی اطلاع پر تھانہ ملزمان کیخلاف کارروائی کرتا ہے، انٹیلیجنس افسر یا اہلکار جرائم پیشہ عناصر سے مل جائے تو کیسے کام ہوگا؟
ایڈیشنل آئی جی کراچی نے مزید کہا کہ مختلف شکایات پر تمام تھانوں کے انٹیلیجنس عملے کو ہٹایا تھا، اب ڈی آئی جیز کو اسکروٹنی کرنے کو کہا ہے، اچھے افسران و اہلکاروں کو سامنے لایا جائے۔ان کا کہنا تھا کہ دوبارہ سے تمام تھانوں میں انٹیلیجنس عملہ تعینات کریں گے، منظم جرائم چلانے والوں کوکسی صورت معاف نہیں کیا جائے گا۔

سندھ میں گزشتہ 24 گھنٹوں کے دوران عالمگیر وبا کورونا وائرس کے مزید 673 کیسز سامنے آئے ہیں جبکہ اس وائرس 7 افراد انتقال کرگئے وزیراعلیٰ سندھ مراد علی شاہ نے کورونا وائرس کی صورتحال سے متعلق بیان جاری کیا جس میں بتایا گیا کہ گزشتہ 24 گھنٹوں میں 12022 نمونوں کی جانچ کی گئی جس میں مزید 673 نئے کیسز رپورٹ ہوئے۔وزیراعلیٰ سندھ نے بتایا کہ صوبے میں گزشتہ 24 گھنٹوں کے دوران کورونا وائرس سے 7 اموات رپورٹ ہوئیں جس کے بعد صوبے میں اموات کی مجموعی تعداد 4551 ہوچکی ہے۔وزیراعلیٰ کا کہنا تھا کہ آج مزید 330 مریض صحتیاب ہوئے ہیں جس کے بعد صحتیاب افراد کی مجموعی تعداد 260122 ہوچکی ہے۔ انھوں نے بتایا کہ صوبے میں اب تک 3462158 نمونوں کی جانچ کی جاچکی ہے، جس میں سے 272196 کیسز رپورٹ ہوچکے ہیں۔ان کا کہنا تھا کہ صوبے میں اس وقت 7523 مریض زیرِ علاج ہیں جن میں 7143 گھروں میں، 10 آئسولیشن سینٹرز میں اور 370 مریض مختلف ہسپتالوں میں زیر علاج ہیں۔وزیراعلیٰ سندھ نے بتایا کہ 343 مریضوں کی حالت تشویشناک بتائی گئی ہے جبکہ 43 مریض وینٹی لیٹرز پر ہیں۔مراد علی شاہ نے بتایا کہ سندھ کے 673 نئے کیسز میں سے 408 کا تعلق کراچی سے ہے جن میں سے ضلع شرقی سے 290، ضلع جنوبی سے 67، ضلع وسطی سے 16، ملیر سے 25، ضلع غربی اور ضلع کورنگی سے 5-5 نئے کیسز رپورٹ ہوئے ہیں۔

کراچی : سول ایوی ایشن اتھارٹی (سی اے اے ) نے پی سی بی کی درخواست سابق کپتان رمیز راجہ کے پاکستان واپس آنے کا اجازت نامہ جاری کردیا۔ سی اے اے نے پاکستان کرکٹ ٹیم کے سابق کپتان رمیز راجہ کو وطن واپس آنے کا اجازت نامہ جاری کردیا۔ ذرائع کا کہنا ہے کہ اجازت نامہ پاکستان کرکٹ بورڈ کی درخواست پر جاری کیا گیا، جس کا نوٹیفکیشن ڈائریکٹر ایئر ٹرانسپورٹ عرفان صابر نے جاری کیا۔ رمیز راجہ پاک جنوبی افریقہ کرکٹ سیریز کےلیے 26 مارچ کو جنوبی افریقہ گئے تھے اور اب رمیز راجہ 18 اپریل کو قطر ایئرویز سے لاہور پہنچیں گے۔ سول ایوی ایشن اتھارٹی نے کہا ہے کہ وطن واپسی پر کرونا ایس او پیز پر عمل درآمد لازمی ہوگا، اس سلسلے میں کرونا ٹیسٹ اور گھر میں 7 سے 10 روز قرنطینہ کرنا ہوگا۔

ملک میں سونے کی فی تولہ قیمت میں اچانک بڑا اضافہ ہوگیا۔ سندھ صرافہ بازار ایسوسی ایشن کے مطابق سونے کی فی تولہ قیمت میں 1300 روپے کا اضافہ ہوا جس کے بعد ملک میں سونے کی فی تولہ قیمت ایک لاکھ 4 ہزار 300 روپے ہوگئی۔ 10 گرام سونے کی قدر 1115 روپے اضافے سے 89420 روپے ہے جبکہ عالمی صرافہ میں سونے کی قدر 30 ڈالر اضافے سے 1777 ڈالر فی اونس ہے۔

پاکستان پیپلز پارٹی کراچی ڈویژن کے صدر و وزیر تعلیم و محنت سندھ سعید غنی نے علامہ عرفان حیدر عابدی کے فرزند علامہ سید علی عرفان عابدی سے انکی رہائش گاہ پر ملاقات کی۔
ذرائع کے مطابق وزیر تعلیم سندھ سعید غنی نے اس موقع پر علامہ عرفان حیدر عابدی کے لئے فاتحہ خوانی کی۔ اور علامہ علی عابدی کو پاکستان پیپلز پارٹی میں متحرک ہونے کی دعوت دی۔ سعید غنی نے کہا کہ پاکستان پیپلز پارٹی اپنے پارٹی ورکرز کو کبھی فراموش نہیں کرتی۔ علی عابدی پاکستان پیپلز پارٹی کا اثاثہ ہیں۔ اور علامہ عرفان حیدر عابدی کے خاندان کا پیپلز پارٹی سے دیرینہ رشتہ ہے۔ اس موقع پر علامہ علی عابدی نے سعید غنی کے بازو پر امام ضامن باندھا۔ ملاقات میں ایس ایم نقی اور تحسین عابدی بھی موجود تھیں۔

کراچی: فیصل واوڈا کے سینیٹر بننے کے بعد کراچی کی این اے 249 پر ضمنی انتخاب کی تیاریاں تمام سیاسی جماعتوں نے شروع کر دی ہیں اور اس حوالے سے مریم نواز بھی متحرک ہو گئیں ہیں۔ مریم نواز شریف 24 اپریل کو کراچی کا دورہ کریں گی جس دوران وہ این اے 249 میں عوامی اجتماعات سے خطاب کریں گی اور ضمنی الیکشن میں انتخابی مہم چلائیں گی ۔ مریم نواز اپنے دورے کے دوران کراچی کی بزنس کمیونٹی سے بھی ملاقات کریں گی ، اس کے علاوہ ن لیگی رہنماؤں سے ملاقاتیں بھی کی جائیں گی ۔

کراچی : نیب نے وفاق کی جانب سے سندھ کے فلاحی کاموں کیلئے دیے گئے ساڑھے 3 سو ارب کی کرپشن کے معاملے کی تحقیقات کا آغاز کردیا ہے۔ تفصیلات کے مطابق وفاق کی سندھ کےفلاحی کاموں کیلئےدی گئی رقم کرپشن کی نذر ہونے کا انکشاف سامنے آیا ، ذرائع کا کہنا ہے کہ ساڑھے 3 سو ارب کی کرپشن معاملے پر نیب نے تحقیقات شروع کردی ہے۔ ذرائع نے بتایا کہ پیٹرول اور گیس کی پیداوار میں سے ساڑھے 11فیصد وفاق کوملتا ہے ، وفاق اپنے حصے کا ساڑھے 11فیصد کٹوتی کے بغیر سندھ کو واپس کرتاہے۔ وفاق پبلک ہیلتھ،تعلیم،دیگرفلاحی کاموں کےلیےرقم واپس کرتاہے اور سندھ کےعوام کوبنیادی سہولت فراہمی کے لیے رقم واپس دی جاتی ہے۔ رقم سندھ کےڈی سیزکےذریعے عوامی بنیادی حقوق پرخرچ ہوناتھی، ساڑھے 3سوارب روپےخرچ تو کردیےگئے مگرایک منصوبہ موجودنہیں۔ ذرائع نے مزید کہا کاغذوں میں اداروں کا اپناسالانہ بجٹ اور وفاقی رقم بھی منصوبوں پرلگادی گئی اور ان منصوبوں پرایک باربھی ترقیاتی کام نہیں کیا گیا۔

ایم کیو ایم پاکستان کے رہنماء خواجہ اظہار الحسن کہتے ہیں کہ سندھ حکومت صوبے کا کوئی ایک ایسا ہسپتال ہی بتادیں جو خالصتا صوبائی حکومت کے فنڈز سے چل رہا ہوں حکومت سندھ سوچی سمجھی سازش کے تحت کراچی والوں پر شب خون مار رہی ہے، سندھ حکومت نے کراچی کے مزید دو کالجز ہتھیانے کی تیاری کرلی ہے۔ایم کیو ایم پاکستان کے رہنما خواجہ اظہار الحسن نے میڈیا سے گفتگو میں کہا کہ پیپلز پارٹی ایم کیو ایم سے نفرت رکھے لیکن کراچی کو تباہ نہ کرے، اسپتالوں کے بعد اب سندھ حکومت کراچی کے مزید دو کالجز ہتھیانے کی تیاری کرلی ہے۔ ایم کیو ایم رہنما کا مزید کہنا تھا کہ سندھ حکومت صوبے کا کوئی ایک ایسا اسپتال بتادیں جو خالصتا صوبائی حکومت کے فنڈز سے چل رہا ہوں۔ سندھ کے سرکاری اسپتالوں میں ایمرجنسی سہولیات تک موجود نہیں ہیں۔خواجہ اظہار الحسن کا کہنا تھا کہ کراچی کی ترقی میں اٹھارویں ترمیم سب سے بڑی رکاوٹ ہے،حکومت سندھ چاہتی ہی نہیں کہ کراچی ترقی کرے میں سندھ پبلک کمیشن میں موجود اپنے ممبر سے کہتا ہوں کہ فوری ادارے کو لات مارکر عوام کے لئے باہر آجائے جلد اس معاملے پر بھی ہم عدالت میں آواز بلند کرینگے.