Category: کراچی

ایف پی سی سی آئی کے نیشنل بزنس گروپ کے چیئرمین، پاکستان بزنس مین اینڈ انٹلیکچولز فور م وآل کراچی انڈسٹریل الائنس کے صدر اورسابق صوبائی وزیر میاں زاہد حسین نے کہا ہے کہ ڈالر کے مقابلہ میں روپے کی قدر میں استحکام خوشگوار ہے تاہم اسکے اثرات غریب عوام تک منتقل کرنے کی ضرورت ہے۔روپے کی قدر بڑھانے میں ترسیلات نے بنیادی کردار ادا کیا ہے جس سے جاری حسابات کا خسارہ ختم تو نہیں ہوا مگراس کی صورتحال اطمینان بخش ہو گئی ہے۔
اس رجحان کو موجودہ مالی سال کے باقی ماندہ مہینوں اور اگلے مالی سال میں برقرار رکھنے کی ضرورت ہے۔ میاں زاہد حسین نے کاروباری برادری سے بات چیت کرتے ہوئے کہا کہ گزشتہ سال مارچ کے مقابلہ میں اس سال مارچ میں ڈالر کی قدر میں چودہ روپے سے زیادہ کی کمی آ چکی ہے۔انھوں نے کہا کہ ا سٹیٹ بینک نے روشن ڈیجیٹل اکاؤنٹس متعارف کروا کے احسن اقدام کیا ہے جس کے بعد سے دیار غیر میں مقیم پاکستانیوں کے لئے اپنے ملک میں سرمایہ کاری کے نئے راستے کھل گئے ہیں اور اس میں اب تک آٹھ سو چھ ملین ڈالرکی سرمایہ کاری ہو چکی ہے جس میں سے صرف مارچ کے مہینے میں 212 ملین ڈالر کی سرمایہ کاری ہوئی ہے جو خوش آئند ہے جس پر مرکزی بینک اورگورنرا سٹیٹ بینک ڈاکٹررضاباقر مبارکباد کے مستحق ہیں۔ اگرترسیلات میں اضافہ جاری رہا اور اس اکاؤنٹ میں اسی طرح سرمایہ کاری ہوتی رہی تو جلد ہی ڈالرکی قدر ایک سو پچاس روپے تک گھٹ سکتی ہے ۔

کراچی: جمشید روڈ پر  رواں سال کی سب سے بڑی ڈکیتی کی واردات کے دوران ملزمان بلڈر کے رائیڈر سے 3 کروڑ مالیت کے بونڈ لوٹ کر فرار ہوگئے۔ تفصیلات کے مطابق کراچی کے علاقے جمشیدروڈ پر رواں سال کی سب سے بڑی ڈکیتی کی واردات ہوئی ، جہاں مسلح ملزمان بلڈر کے رائیڈر سے 3 کروڑ مالیت کے بونڈ لوٹ کر فرار ہوگئے۔ڈکیتی کے دوران ملزمان کی سی سی ٹی وی فوٹیج سامنے آگئی، جس میں رائیڈر کے پیچھے ملزمان کو جاتے دیکھا جاسکتا ہے۔واردات جمشید روڈ نمبر 2 پر بینک کے باہر کی گئی ، پولیس کی جانب سے واقعے کی تفتیش کی جارہی ہے، پولیس کا کہنا ہے کہ 4 موٹرسائیکل پر 6 ملزمان موجود تھے۔ پولیس کے مطابق بلڈر کے پاس 3 روز قبل 3 کروڑ روپےکی پیمنٹ آئی، پیمنٹ 25 ہزار روپے کے بانڈ کی شکل میں تھی۔ یاد رہے گذشتہ ماہ نیو کراچی دو منٹ چورنگی کے قریب چار ملزمان نے نجی بینک میں داخل ہو کر اسلحے کے زور پر بینک اسٹاف اور سیکیورٹی عملے کو یرغمال بنایا اور نقدی لوٹ کر فرار ہوگئے تھے۔ اس موقع پر دو سیکیورٹی گارڈز نے مزاحمت کی کوشش کی تو ملزمان نے رائفل کے بٹ مار کر انھیں زخمی کردیا تھا۔

)

پچیس لاکھ کتے گلیوں میں گھوم رہے ہیں، تین ماہ میں پانچ ہزار سے زائد کتا کاٹنے کے کیسز رجسٹرڈ ہو چکے ہیں، یہ بات اپوزیشن لیڈر سندھ کی پریس کانفرنس کرتے ہوئے کہا۔ تفصیلات کے مطابق پاکستان تحریک انصاف کے رہنمااور سندھ اسمبلی میں اپوزیشن لیڈرحلیم عاد شیخ نے سندھ حکومت پر تنقیدکرتے ہوئے کہاہے کہ کتوں کے کاٹنے پر گوگل سرچ کریں سندھ ٹاپ پر ملے گا،پچیس لاکھ کتے گلیوں میں گھوم رہے ہیں، تین ماہ میں پانچ ہزار سے زائد کتا کاٹنے کے کیسز رجسٹرڈ ہو چکے ہیں۔سندھ اسمبلی میں پریس کانفرنس کے دوران انہوں نے کہا کہ نیویارک ٹائمز کہتا ہے لاڑکانہ میں ایچ آئی وی کے پانچ ہزار مریض ہیں، ایڈز کے مریضوں کو خوراک اور مالی مدد دینی چاہیے، سندھ کو ترقیاتی اسکیموں میں گوگل پر سرچ کریں نہیں ملے گا۔ انہوں نے پی ڈیم ایم سے متعلق کہا کہ اپوزیشن میں بھی اپوزیشن کی جنگ تھی، یہ این آر او لینے کے خواہشمند ہیں، پاپا ڈیڈی مولانا بچائو موومنٹ کے غبارے سے ہوا نکل گئی۔ انہوں نے کہا کہ نواز شریف لندن جاتے ہی ٹھیک ہوگئے، مریم صاحبہ کو بھی بیماری لگ گئی ہے، مریم کا علاج بھی لندن میں ہی ہوگا، مریم کا علاج ان اسپتالوں میں ہونا چاہیے جو انہوں نے بنوائے ہیں۔

کراچی: جامعہ کراچی نے 2 سالہ ڈگری پروگرام جاری رکھنے کا فیصلہ کرلیا تاہم پروگرام جاری رکھنے کی منظوری اکیڈمی کونسل سے لی جائے گی۔ تفصیلات کے مطابق جامعہ کراچی نے 2سالہ ڈگری پروگرام  برقرار  رکھنے کا فیصلہ کرلیا ، 2 سالہ ڈگری پروگرام کو برقرار رکھنے کی منظوری اکیڈمی کونسل سے لی جائے گی۔ اس سلسلے میں جامعہ کراچی کی اکیڈمک کونسل کا اجلاس 12 اپریل کوطلب کرلیا ہے ، وائس چانسلرجامعہ کراچی اجلاس کی سربراہی کریں گے۔ یاد رہے ہائر ایجوکیشن کمیشن نے 2سالہ ڈگری پروگرام ختم کرنے کااعلان کرتے ہوئے جامعات کو 2 سالہ ڈگری پروگرام سےروک دیا تھا اور کہا تھا کہ اب کسی بھی کالج سےبی اے،بی کام، بی ایس ای کی ڈگری نہیں ملےگی۔ ایچ ای سی نے 2018 کے بعد دو سالہ ڈگری پروگرام غیر قانونی قرار دیتے ہوئے کہا تھا 2018 میں پابندی کے باوجود غیرقانونی پروگرام کا اجرا تشویشناک ہے، یونیورسٹیاں فوری طور پر ایسے پروگرامز میں داخلےبند کر دیں، ایچ ای سی 31دسمبر2018 کے بعد ایسی کسی ڈگری کو تسلیم نہیں کرے گی۔ بعد ازاں خیبر پختون خواہ میں کالجوں سے 2 سالہ بیچلر آف آرٹس(بی اے) اور بیچلر آف سائنس(بی ایس سی) پروگرام ختم کردیا گیا تھا، ہائیر ایجوکیشن ڈیپارٹمنٹ کا کہنا تھا کہ طلبا اب صرف 4 سالہ بی ایس میں داخلے لیں گے۔

شہر قائد سے دو ماہ میں 30 سے زائد کار چوری کی وارداتوں میں ملوث انتہائی مطلوب گروہ کے 5 کارندے گرفتار، اے وی ایل سی نارتھ ناظم آباد ڈویژن نے انٹیلیجنس کی بنیاد پر چھاپہ مار کارروائی کے دوران ملزمان کو گرفتار کیا، ایس ایس پی اے وی ایل سی گرفتار ملزمان میں رستم، ندیم، نوید، نعمان اور ریاض شامل ہے۔ملزمان کا یہ گروہ کراچی کے مختلف مقامات سے گاڑیاں چوری کر کے بلوچستان، پنجاب اور کے پی کے میں اپنے مخصوص خریداروں کو فروخت کرتا ہے، دوران تفتیش ان گاڑیوں کے خریداروں اور اس نیٹ ورک کے دیگر کار چوروں کے متعلق بھی معلومات حاصل کی گی۔
.گرفتار ملزمان میں سے دو کار چوری کرنے والے جبکہ تین کیریئرز کار کو کراچی سے دیگر صوبوں میں پہنچانے والے شامل ہیں، ملزمان سے 1-تھانہ سمن آباد سے چوری ہوئی ہنڈا سِوک کار نمبری 816۔AHK، برآمد۲-تھانہ عزیزآباد سے چوری ہوئی سوزوکی خیبر کار نمبر 2728-N برآمد، ۳- تھانہ عزیزآباد سے چوری ہوئی سوزوکی آلٹو کار نمبر 273-AEG برآمد اور ۴-تھانہ حیدری مارکیٹ سے چوری ہوئی سوزوکی FX کار نمبر 5011-M برآمد .ملزمان کو ایف آئی آر نمبر 208/2021 تھانہ شریف آباد، ایف آئی آر نمبر209/2021 تھانہ شریف آباد، ایف آئی آر نمبر174/2021 تھانہ سمن آباد، ایف آئی آر نمبر342/2021 تھانہ عزیزآباد، ایف آئی آر نمبر347/2021 تھانہ عزیزآباد، ایف آئی آر نمبر157/2021 تھانہ حیدری مارکیٹ میں گرفتار کیا .ملزمان سے دو عدد پستول بھی برآمد ملزمان کی جانب سے کار چوری کے لیے استعمال کی جانے والی ٹویوٹا کرولا بھی برآمد جس پر ملزمان ADVOCATE کی پلیٹ لگا کر استعمال کرتے تھےملزمان کے گروہ کی دو کار چوری کی سی سی ٹی وی فوٹیج بھی حاصل کرلیں گئیں،ملزمان کے دیگر ساتھیوں کی گرفتاری کے لئے چھاپے مارے جا رہے ہیں۔

معروف سماجی رہنما و گلوکار شہزاد رائے نے کہاہے کہ میں سمجھتا ہوں کہ سندھ میں دو ہفتوں کے لیے اسکول بند کرنے کا فیصلہ ایک اچھا اقدام ہے۔ خصوصی گفتگو کرتے ہوئے شہزاد رائے نے کہا کہ بچوں کی صحت سے زیادہ اور کیا چیز اہم ہوسکتی ہے۔انہوں نے کہاکہ لوگوں کو یہ بات سمجھنا چاہیے کہ بچوں کی زندگی ان کی تعلیم سے زیادہ اہم ہے۔واضح رہے کہ سندھ میں آج (منگل) سے دو ہفتوں کے لیے مڈل کلاس تک اسکول بند کرنے کا فیصلہ کیا گیا ہے۔

کراچی سے اسلام آباد جانے والی پرواز میں فنی خرابی، وفاقی وزیر اسد عمر بھی سوار تھے۔تفصیلات کے مطابق وفاقی وزیر اسد عمر کراچی سے نجی ایئرلائن کی پرواز کے ذریعے اسلام آباد جارہے تھے کہ طیارے میں اچانک فنی خرابی پیدا ہو گئی۔ سول ایوی ایشن ذرائع کے مطابق فلائٹ 502 میں روانگی کے چالیس منٹ کے بعد تکنیکی خرابی پیدا ہوئی۔ ائیربس 330 میں وفاقی وزیر اسد عمر سمیت 120 سے زائد مسافر سوار تھے۔سیرین ائیرلائن کے کراچی سے اسلام آباد جانے والے طیارے میں تکنیکی خرابی پر پائلٹ نے ایمرجنسی لینڈنگ کی کال دی۔طیارہ دوبارہ کراچی ایئرپورٹ پر لینڈ کرگیا۔مسافروں کو متبادل پرواز کے ذریعے اسلام آباد روانہ کیا جائے گا۔

باغی ٹی وی کی رپورٹ کے مطابق نجی ایئر لائن کے طیارے میں خرابی پیدا ہونے کے بعد طیارے کی کراچی کے جناح انٹرنیشنل ایئرپورٹ پر تکنیکی لینڈنگ ہوگئی،تفصیلات کے مطابق نجی ایئر لائن کے طیارے ، سیرن ایئرز کی کراچی اسلام آباد کی پرواز ER-502 نے آج کراچی ایئرپورٹ پر تکنیکی لینڈنگ کی۔ خرابی پیدا ہونے کے فوراً بعد ، طیارے کے کپتان نے کنٹرول ٹاور سے رابطہ کیا اور ہوائی اڈے پر بحفاظت لینڈنگ کیا۔ایئر لائن انتظامیہ نے تصدیق کی ہے کہ طیارہ تکنیکی خرابی کی وجہ سے کراچی پہنچا تھا۔انتظامیہ نے مزید بتایا کہ مسافروں کو ہوائی اڈے کے لاؤنج میں منتقل کردیا گیا ہے اور جلد سے جلد ان کی روانگی کے انتظامات کیے جارہے ہیں۔ہوائی اڈے کے ذرائع نے بتایا کہ یہ خرابی ہوائی جہاز کے انجن میں پیدا ہوگئی تھی اور اب انجینئر اس کو دور کرنے کے لئے کام کر رہے ہیں۔

بلوم برگ کی رپورٹ کے مطابق تین ماہ کے دوران ڈالر کے مقابلہ میں پاکستانی کرنسی کی قدر میں 4.09 فیصد اضافہ ہوا ہے۔یکم جنوری تا 31 مارچ 2021 کے دوران امریکی ڈالر کے مقابلہ میں پاکستانی روپے کی قدر میں سب سے زیادہ 4.09 فیصد اضافہ ہوا ہے جس کے نتیجہ میں پاکستانی روپیہ دنیا کی بہترین کرنسی بن گیا۔ رپورٹ کے مطابق اس عرصہ کے دوران مختلف ذرائع سے وصول ہونے والے زرمبادلہ اور ڈالرز کی انتہائی کم بیرون ملک منتقلی کے نتیجہ میں پاکستانی کرنسی کی قدر میں نمایاں استحکام ریکارڈ کیا گیا ہے۔یکم جنوری تا 31 مارچ 2021 کے دوران پاکستان کی کرنسی کی قدر میں 4.09 فیصد اضافہ کے باعث ڈالر کی قیمت 153.55 روپے تک کم ہوگئی۔بلوم برگ کے مطابق کرنسی کی قدر میں اضافہ کے حوالہ سے کینیڈا دوسرا ملک ہے اور اسی عرصہ کے دوران کینیڈین ڈالر کی قدر میں 1.09 فیصد اضافہ کے نتیجہ میں 1.25 کینیڈین ڈالر ایک امریکی ڈالر کے مساوی ہوگئے ہیں۔ اسی طرح برطانیہ کے پائونڈ کی قیمت میں امریکی ڈالر کے مقابلہ میں 0.64 فیصد اضافہ ہوا ہے جس کی وجہ سے برطانیہ کی کرنسی میں استحکام کے نتیجہ میں برطانوی پائونڈ تیسرے نمبر پر رہا ہے۔عارف حبیب لمیٹڈ کے شعبہ تحقیق کے سربراہ طاہر عباس نے اس حوالہ سے توقع ظاہر کی ہے کہ رواں مالی سال کے اختتام تک پاکستانی روپے کی قدر میں مزید اضافہ ہوگا اور امریکی ڈالر کی قیمت 152 تا 155 روپے کے درمیانی رہنے کا امکان ہے.