Category: کراچی

کراچی سی ٹی ڈی پولیس نے منگھوپیرروڈ پرکارروائی کرتے ہوئے متحدہ لندن کے اہم دہشتگرد کوگرفتار کرلیا۔سی ٹی ڈی پولیس نے منگھوپیرروڈ پرکارروائی کرتے ہوئے متحدہ لندن کے اہم دہشتگرد آصف بھایا کو گرفتار کر کے اس کے قبضے سے اسلحہ برآمد کرکے اسکے خلاف مقدمہ درج کر لیا۔سی ٹی ڈی حکام کے مطابق گرفتار ملزم دہشتگردی ،قتل اور اقدام قتل سمیت سنگین مقدمات میں مطلوب تھا۔ سی ٹی ڈی نے دہشتگردی کے مقدمات میں مفرورواشتہاری ملزمان کی گرفتاری کے لیے خصوصی ٹیمیں تشکیل دی ہیں۔

پی آئی اے بورڈ آف ڈائریکٹرز کا اجلاس کل(منگل)6اپریل صبح ساڑھے 11 بجے کراچی ہیڈ آفس میں ہوگا،نئے جہازوں کی خریداری،ملازمین کی رضاکارانہ ریٹائرمنٹ اسکیم اورپی آئی اے میں ہونے والے اصلاحات اور مالی معاملات بورڈ آف ڈائریکٹر اجلاس کا حصہ ہوں گے۔تفصیلات کے مطابق پی آئی اے بورڈ آف ڈائریکٹرز کا اجلاس آج صبح ساڑھے 11 بجے کراچی ہیڈ آفس میں ہوگا۔ ذرائع کے مطابق اجلاس میں طیارہ حادثہ کے شہداء کے لوحقین کو معاوضہ کی فوری ادائیگی اور نئے جہازوں کی خریداری کا معامل بھی زیرغور آئے گا۔ذرائع نے بتایا کہ پی آئی اے ملازمین کی رضاکارانہ ریٹائرمنٹ اسکیم وی ایس ایس سے متعلق بھی بورڈ کو آگاہی دی جائے گی جبکہ پی آئی اے میں ہونے والی اصلاحات اور مالی معاملات بھی بورڈآف ڈائریکٹرزاجلاس کا حصہ ہوں گے۔ ذرائع نے بتایا کہ قومی ایئرلائن کے 6جہازوں کی لیز ختم ہونے پر پی آئی اے نے متبادل انتظامات شروع کردیئے ہیں ۔ قومی ایئرلائن نے فیضائی بیڑے میں8نئے طیارے شامل کرنے کا فیصلہ کیاہے۔ ذرائع کے مطابق نئے فضائی بیڑے کے لیے پی آئی اے ایئربس320اوربوئنگ373طیارے حاصل کرے گی ۔

شہر قائد میں مساجد بھی چوروں سے محفوظ نہ رہ سکیں ۔کراچی میں مسجد کے چندہ بکس سے بھاری رقم چوری کرنے والے ملزم کو گرفتار کر لیا گیا۔پولیس کے مطابق مسجد کے چندہ بکس سے ایک لاکھ روپے چوری کرنے والے ملزم کو سی سی ٹی وی فوٹیج کی مدد سے گرفتار کیا گیا جبکہ ملزم کی نشاندہی پر منشیات فروش کو بھی گرفتار کر لیا گیا۔ملزم احمد 30 جنوری 2021 کو شاہ لطیف ٹاؤن کی حدود میں مسجد کے چندہ بکس کا تالا توڑ کر ایک لاکھ روپے سے زائد کی رقم چوری کر کے فرار ہو گیا تھا۔پولیس نے مسجد میں نصب سی سی ٹی وی کیمرے کی مدد سے 2 ماہ بعد ملزم کو گرفتار کر لیا اور ملزم نے تفتیش کے دوران اعتراف جرم کر لیا۔ پولیس کے مطابق ملزم نشے کا عادی ہے اور اس نے مسجد سے چوری کردہ رقم سے منشیات خریدی تھی۔ پولیس نے ملزم کی نشاندہی پر منشیات فروس عبدالجبار کو بھی گرفتار کر کے اس کے قبضے سے 3 کلو سے زائد اعلیٰ کوالٹی کی منشیات اور 40 ہزار روپے نقد برآمد کر لیے۔

کورونا وائرس کے پھیلاؤ کے خدشے کے پیش نظر صوبہ سندھ نے بین الصوبائی ٹرانسپورٹ کے بعد ٹرین اور ہوائی سفر بھی بند کرنے کا مطالبہ کردیا۔ تفصیلات کے مطابق صوبائی وزیر تعلیم سعید غنی نے کہا ہے کہ سندھ کے بارڈر پر لوگوں کی اسکریننگ کرنا مشکل کام ہوگا ، لوگ آتے جاتے رہیں گے تو وائرس لوگوں کو نقصان پہنچائے گا ، ا س لیے ضروری ہے کہ پنجاب اور خیبرپختونخوا سے بین الصوبائی ٹرانسپورٹ ، ٹرین اور ہوائی سفر بند کیا جائے۔
پریس کانفرنس میں انہوں نے کہا کہ کورونا کے حوالے سے ماہرین کی رائے لیتے ہیں ، کورونا صورتحال پر سندھ میں پنجاب اور خیبر پختونخوا والے حالات نہیں ، تاہم روزانہ ہزاروں کی تعداد میں لوگ سندھ آتے اورجاتے ہیں ، اگر لوگ ایسے ہی آتے جاتے رہیں گے تو وائرس لوگوں کو نقصان پہنچائے گا ، اور اگر صحیح اقدام نہ کیے گئے تو خدشہ ہے کہ سندھ میں بھی صورتحال خراب ہو سکتی ہے۔

وزیر تعلیم و محنت سندھ سعید غنی کی تعلیمی اداروں میں تعلیمی سرگرمیوں کے حوالے سے اہم پریس کانفرنس کی۔ اور کہا کہ کل ہم نے ایک نوٹیفکیشن جاری کیا تھا کہ صوبہ سندھ میں آٹھویں جماعت تک کی حاضری کو بند کیا جائے لیکن آن لائن کلاسز جاری رہیں گی۔ انہوں نے کہا کہ اسکولوں کی بندش سے تعلیم کا عمل ضرور متاثر ہو گا۔ انہوں نے کہا کہ دو دن سے میں نے میڈیا پر جو کچھ دیکھا ، مختلف چینلز نے مختلف خبریں چلائی ہیں ان کی وضاحت بہت ضروری ہے۔ کمیٹی کے اجلاس میں مختلف لوگوں نے مختلف آراء دی تھیں کی اسکولوں کو 15 دن کے لئے بند کر دیا جائے کچھ لوگوں کی آراء تھیں کہ آٹھویں جماعت تک کی کلاسز کو آف کیا جائے ہم نے یہ آراء حکومت سندھ کو پیش کیں اور پھر فیصلہ کیا کہ آٹھویں جماعت تک کے اسکول آف کئے جائیں۔ ہم نے وفاق کو درخواست کی ہے کہ پنجاب اور خیبر پختون خواہ کی پبلک ٹرانسپورٹ کا داخلہ سندھ میں بند کیا جائے لیکن وفاق نے ابھی تک کوئیفیصلہ نہیں کیا ہم نے اسی بات کو مدنظر رکھتے ہوئے فیصلہ کیا کہ اگر ہم نے مناسب اقدامات نہیں کئے تو کراچی میں بہت تیزی سے کرونا کی شرح میں اضافہ ہو گا ۔

کلفٹن کے معروف نجی اسکول میں رات گئے ڈکیتی کی واردات پیش آئی، ڈکیت چوکیدار کو یرغمال بنا کر اسکول کی الیکٹرونکس اشیا لے اڑے۔ پولیس کے مطابق تین مسلح ملزمان نے اسلحے کے زور پر اسکول میں داخل ہوکر چوکیدار کو یرغمال بنایا۔ چوکیدار کو تشدد کا نشانہ بنانے کے بعد کلاس روم میں بند کرکے اس سے اسلحہ بھی چھین لیا۔ ملزمان نے اسکول کی کلاسز سے7 کمپیوٹرلوٹے۔ ملزمان اسکول میں لگا اے سی اسپلٹ اور جنریٹر بھی لے گئے۔ زخمی سیکیورٹی گارڈ کو اسپتال منتقل کردیا گیا ہے۔ پولیس کی جانب سے مزید تفتیش کی جارہی ہے

سندھ حکومت نے کینسر کی شکار سینیئر اداکارہ نائلہ جعفری کی مدد کی اپیل کی ویڈیو وائرل ہونے کے بعد ان کی مالی معاونت کرنے کا اعلان کردیا۔ نائلہ جعفری 2016 سے بیمار ہیں اور ابتدائی طور پر ان میں اوورین کینسر کی تشخیص ہوئی تھی اور بعد ازاں ان میں معدے کے کینسر کی بھی تشخیص ہوئی۔ہسپتال میں کچھ عرصہ زیر علاج رہنے کے بعد نائلہ جعفری گلگت بلتستان چلی گئی تھیں، جہاں 2020 کے وسط میں ان کے کرائے کے گھر پر پتھروں سے مبینہ طور پر حملہ کیا گیا تھا اور بعد ازاں ان کا مختلف شہروں اور ہسپتالوں میں علاج ہوتا رہا۔حال ہی میں نائلہ جفری کی ایک ویڈیو وائرل ہوئی تھی، جس میں انہوں نے ٹی وی مالکان، ڈراما سازوں اور مخیر حضرات سے مدد کی اپیل کی تھی۔سید سردار شاہ نے اداکارہ کی ویڈیو پر کمنٹ کرتے ہوئے لکھا کہ محکمہ ثقافت نائلہ جعفری کے علاج کے تمام اخراجات برداشت کرے گا اور ساتھ ہی وزیر ثقافت نے فرقان صدیقی سے اداکارہ سے رابطے کرنے کے لیے فون نمبر اور دیگر ضروری معلومات بھی فراہم کرنے کی اپیل کی۔سندھ کے وزیر ثقافت سید سردار شاہ نے نائلہ جعفری کی ویڈیو شیئر کرنے والے اداکار و ٹی وی اسٹار فرقان صدیقی کی ٹوئٹ پر کمنٹس کرتے ہوئے اعلان کیا کہ سندھ حکومت اداکارہ کی تمام مالی معاونت کرے گی.

آرٹس کونسل آف پاکستان کی گورننگ باڈی نے دستور میں حاصل اختیارات کے تحت اتفاق رائے سے فلم و ٹی وی کے نامور فن کار منور سعید کو آرٹس کونسل آف پاکستان کراچی کا نائب صدر منتخب کیا ہے، واضح رہے کہ معروف ڈرامہ نویس حسینہ معین کے انتقال کے بعد یہ عہدہ خالی ہوا تھا۔ گورننگ باڈی کا اجلاس صدر آرٹس کونسل محمد احمد شاہ کی صدارت میں منعقد ہوا ۔ گورننگ باڈی نے حسینہ معین کی خدمات کو خراج تحسین پیش کرتے ہوئے کہا کہ ان کا انتقال ملک کا بڑا نقصان ہے تاہم آرٹس کونسل سمجھتی ہے کہ یہ آرٹس کونسل کا ناقابل تلافی نقصان ہے، اجلاس میں حسینہ معین کے تذکرے پر صدر محمد احمد شاہ سمیت گورننگ باڈی کے ممبران، قدسیہ اکبر، منور سعید، کاشف گرامی، محترمہ نورالہدی شاہ، اقبال لطیف اور دیگر آبدیدہ ہو گئے۔