Category: کراچی

کراچی معروف اداکارہ بشریٰ انصاری کووڈ 19 کی ویکسین لگانے پہنچیں تو دلچسپ انداز میں تبصرے کیے اور کہا کہ لوگ اب مزید نہیں چھپا سکیں گے کہ وہ 60 سال کے ہیں۔تفصیلات کے مطابق معروف پاکستانی اداکارہ بشریٰ انصاری کرونا وائرس ویکسین لگوانے پہنچیں انہیں ویکسین لگائی جارہی ہے۔ اس دوران وہ کہتی نظر آرہی ہیں کہ میں یہ سب کو بتانا چاہتی ہوں کہ یہ ویکسین ہم سب کے لیے بے حد ضروری ہے بشریٰ دلچسپ انداز میں کہتی ہیں کہ آج سے پہلے سینیئر سٹیزن ہونے کا اتنا مزہ کبھی نہیں آیا جتنا اب آرہا ہے۔وہ مزید کہتی ہیں کہ اب تک جو لوگ مان نہیں رہے تھے کہ وہ 60 سال کے ہوگئے انہیں اب ماننا پڑے گا، لوگ اب دوڑ دوڑ کر مان رہے ہیں کہ تاکہ ویکسین لگوائی جاسکے۔

کراچی سندھ پبلک سروس کمیشن کےامتحانی پیپرمیں غلطیوں کاانکشاف سامنے آیا ، اسلامک اسٹیڈیز کے امتحان میں آٹھ سوالات کے لئے جوابات کے آپشنز غلط دیے گئے۔تفصیلات کے مطابق سندھ پبلک سروس کمیشن کے سرکاری کالجز کے لیکچررز کے امتحانی پیپر میں غلطیوں کا انکشاف ہوا ہے۔سندھ پبلک سروس کمیشن کا سولہ مارچ کو اسلامک اسٹیڈیز کا امتحان ہوا، جس نے امیدواروں کو مشکل میں ڈال دیا، پرچے میں دیے گئے پچاس سوالات میں سے آٹھ سوالات کے جوابات کے لئے جو آپشنز دیے گئے سارے ہی غلط نکلے۔سندھ پبلک سروس کمیشن کے تحت دیے گئے سوالات میں رواں اسلامی سال کا پوچھا گیا، جب کہ جواب میں درست آپشن ہی نہیں دیا گیا، اسی طرح یمن میں گورنر لگائے جانے والے صحابی کے نام کے سوال پر بھی غلط آپشنز تھے۔امیدواروں نے حکام بالا سے اپیل کی ہے اس فاش غلطی کرنے والوں کے خلاف کاروائی کی جائے اور الزام لگایا کہ یہ غلطیاں جان بوجھ کر کی گئی تاکہ من پسند امیدواروں کو فائدہ پہنچایا جاسکے۔.سندھ میں سرکاری کالجز کے لیکچرار کی پچاس اسامیوں کے لئے نو ہزار امیدواروں نے امتحان دیا.

پی آئی اے کی پرواز کے دوران طیارے کے انجن سے پرندہ ٹکرا گیا۔ترجمان پی آئی اے کے مطابق قومی ائیر لائن کی پرواز پی کے 368 کے دائیں انجن سے پرندہ ٹکرایا تاہم جہاز کو باحفاظت کراچی ائیرپورٹ پر اتار لیا گیا۔پی آئی اے ترجمان کے مطابق پرندہ جہاز کے ٹیک آف کے بعد بلند ہوتے ہوئے ٹکرایا۔ پرواز میں 162 مسافر سوار تھے، مسافروں کو لاؤنج میں منتقل کرکے جہاز کے نقصان کا جائزہ لیا جائے گا۔ترجمان پی آئی اے کا کہنا ہے کہ مسافروں کو متبادل جہاز یا پرواز کے ذریعے اسلام آباد لے جایا جائے گا۔پی آئی اے کے ترجمان کا بتانا ہے کہ ائیرپورٹ کے اطراف آبادی، آلودگی اور پرندوں کو روکنےکا مؤثر نظام نہ ہونا ایسے واقعات کا سبب ہے۔

کراچی میں بینک ڈکیتی کی واردات میں 10 لاکھ روپے سے زائد رقم لوٹ لی گئی۔بدھ کی صبح کراچی کےعلاقے نارتھ کراچی دومنٹ چورنگی کے قریب بینک ميں ڈکیتی کی واردات ہوئی۔پولیس کے مطابق شلوارقمیض میں ملبوس 4 ڈاکو بینک کےاندرداخل ہوئےاور عملے کو یرغمال بنایا۔اس دوران ڈاکوؤں نےبینک کےاندرگھستے ہی2فائر بھی کیے۔ ملزمان نےمزاحمت پر 2 سيکيورٹی گارڈزکوبٹ مارکرزخمی کردیاجن کی شناخت خیال خان اور شیر علی کے نام سے ہوئی ہے۔ واردات کے وقت بینک میں2سیکیورٹی گارڈزتعینات تھے۔پولیس نےبتایا کہ بینک ڈکیتی کےدوران 10 لاکھ روپے کی رقم لوٹی گئی۔ ڈاکوؤں نے شناخت چھپانے کےلیےچہرے پر ماسک لگائے ہوئے تھے اور فرار ہوتے ہوئے بھی انھوں نے ہوائی فائرنگ کی.

سعید غنی نے کہا ہے کہ سندھ حکومت ہیڈ ماسٹرز کو نکالنا نہیں چاہتی، وہ پبلک سروس کمیشن کے ذریعے خود کو ریگولر کرالیں، ہیڈ ماسٹرز کو سمجھنا چاہیے کہ صوبائی حکومت عدالتی حکم پر عملدرآمد کی پابند ہے۔

وزیر تعلیم سندھ سعیدغنی نے وزیر اطلاعات سندھ ناصر حسین شاہ کے ہمراہ کراچی میں پریس کانفرنس کرتے ہوئے کہا کہ کراچی بنچ سندھ حکومت کو کہہ رہا ہے اساتذہ کو نوکری سے نکال دیں، اساتذہ کے کنٹریکٹ کی مدت میں 6 ماہ اضافہ کر دیا، حیدرآباد بنچ کہہ رہا ہے اساتذہ کی تنخواہیں جاری رکھیں، سندھ حکومت کسی ملازم کو فارغ کرنا نہیں چاہتی، تمام ہیڈ ماسٹر اپنے فرائض بہتر انداز میں پورے کر رہے ہیں۔

پی ڈی ایم کی سیاسی صورتحال پر پی ٹی آئی رہنماء خرم شير زمان کا بیان انجمن پی ڈی ایم سے افسوس کا اظہار کرتے ہیں، اقتدار کیلئے پی پی پی کا ماضی پوری قوم جانتی ہے، پیپلزپارٹی کے نیلسن منڈیلا ایک بار پھر گنگو تیلی ثابت ہوچکے، عوام اس عالمی شہرت یافتہ 10 پرسنٹ کو پہچانے، یہ اپنے مفاد کے لیے کسی کی بھی بلی چڑھا سکتے ہیں،مولانا، مریم کی مایوسی ماتم میں تبدیل ہوچکی ہے.

کراچی چیئرمین سینیٹ صادق سنجرانی نے ایوان میں موجود تمام جماعتوں کو ایک ساتھ لیکر چلنے کے عزم کا اعادہ کیا ہے۔تفصیلات کے مطابق دوسری بار چیئرمین سینیٹ منتخب ہونے کے بعد صادق سنجرانی کراچی پہنچے ، جہاں انہوں نے مزار قائد پر حاضری دی اس موقع پر ڈپٹی چیئرمین سینیٹ مرزا محمد آفریدی بھی ان کے ہمراہ تھے۔مزار قائد آمد پرچیئرمین اور ڈپٹی چیئرمین سینیٹ نے فاتحہ خوانی کی اور ملک کی سلامتی کی دعائیں مانگی، بعد ازاں دونوں شخصیات نے مہمانوں کی کتاب مین اپنے تاثرات درج کئے۔مزار قائد پر حاضری کے بعد میڈیا سے گفتگو کرتے ہوئے چیئرمین سینیٹ صادق سنجرانی نے کہا کہ ایک بار پھر ایوان بالا کا چیئرمین منتخب کرانے پر تمام اراکین کا تہہ دل سے شکریہ ادا کرتا ہوں میڈیا سے گفتگو میں صادق سنجرانی نے کہا کہ جیسے سہل انداز میں ایوان بالا کو چلایا، ویسے ہی چلاؤں گا اور ایوان میں موجود تمام جماعتوں کو ساتھ لیکر چلوں گا۔
ایک سوال کے جواب پر چیئرمین سینیٹ صادق سنجرانی نے کہا کہ نتائج پر پریزائڈنگ آفیسر نے رولنگ دے دی ہے، اپوزیشن کو اعتراض ہے تو عدالت جائے۔اس موقع پر ڈپٹی چیئرمین مرزا محمد آفریدی کا کہنا تھا کہ آزاد حیثیت میں سینیٹر بنا تھا اب پی ٹی آئی میں شمولیت اختیار کرچکا ہوں، یہ بات طے ہے کہ ایوان کی کارروائی کسی بھی جگہ چیلنج نہیں ہوسکتی۔یاد رہے کہ رواں ماہ کی بارہ تاریخ کو تحریک انصاف کے صادق سنجرانی 48 ووٹ لے کر مسلسل دوسری بار چیئرمین سینیٹ منتخب ہوئے تھے جب کہ ‏پاکستان ڈیموکریٹ موومنٹ پی ڈی ایم کے یوسف رضا گیلانی 42 ووٹوں کے ساتھ شکست کھا گئے تھے ان کے 7 ووٹ مسترد ہوئے.بعد ازاں چیئرمین کے بعد ڈپٹی چیئرمین سینیٹ کا انتخاب بھی حکومت نے جیتا، حکومتی امیدوار ‏مرزا محمد آفریدی 54 ووٹ لے کر ڈپٹی چیئرمین منتخب ہوئے جب کہ ان کے مدمقابل عبدالغفور حیدری نے 44 ووٹ‌حاصل کیے اور کوئی ووٹ مسترد نہیں ہوا.

سو سالہ اسرائیل احمد مینائی شاید پاکستان کے معمر ترین فرد ہوں گے جنہوں نے گزشتہ روز کراچی میں کورونا ویکسین لگوا کر معمر افراد کو یہ پیغام دیا ہے کہ ابھی جینے کے لیے ایک عمر پڑی ہے۔گزشتہ روز آغا خان کے ایڈَلٹ ویکسینیشن سینٹر میں وہیل چیئر پر لائے جانے والے اسرائیل احمد مینائی کا دعویٰ تھا کہ ان کی عمر سو سال ہے، جب ان کا شناختی کارڈ لے کر ان کی تاریخ پیدائش چیک کی گئی تو معلوم ہوا کہ وہ اپنی زندگی کی سو بہاریں دیکھ چکے ہیں۔آغا خان کے ایڈَلٹ ویکسینیشن سینٹر کے اسٹاف کے مطابق اسرائیل احمد مینائی کہیں سے سو سال کی عمر کے فرد نہیں لگتے تھے،

ان کا اندازہ تھا اسرائیل احمد مینائی کی عمر زیادہ سے زیادہ ستر پچھتر سال کے لگ بھگ ہوگی۔ کراچی کے علاقے ڈیفنس ہاؤسنگ سوسائٹی کے رہائشی اسرائیل احمد مینائی کے بلڈ پریشر شوگر اور دیگر ٹیسٹ کیے گئے اور پوری طرح مطمئن ہونے کے بعد ان کو کورونا سے بچاؤ کی ویکسین لگائی گئی۔ اسرائیل احمد مینائی کو تقریباً آدھے گھنٹے تک آبزَروییشن میں رکھا گیا لیکن ان کی حالت ٹھیک رہی اور سر میں ہلکے سے بھاری پن کے علاوہ انہیں کوئی شکایت نہیں تھی

جس کے بعد انہیں گھر جانے کی اجازت دے دی گئی۔اسرائیل احمد مینائی کے مطابق وہ ابھی مزید جینا چاہتے ہیں، اللّٰہ تعالی نے انہیں ابھی تک کورونا وائرس سے محفوظ رکھا ہے اور وہ چاہتے ہیں کہ اس مرض کی ویکسین لگوا کر صحت مند زندگی گزاریں۔انہوں نے اس موقع پر معمر افراد کو پیغام دیا کہ وہ اپنے آپ کو نیشنل ایمیونائزیشن مینجمنٹ سسٹم یا 1166 پر رجسٹر کروائیں اور وہ تمام افراد جو کہ 70 سال یا اس سے زائد کی عمر کے ہیں اور رجسٹریشن کے بعد جوابی میسج حاصل کرنے کے فوراً بعد کسی بھی ویکسینیشن سینٹر پر جا کر اپنے آپ کو کورونا وائرس سے بچاؤ کی ویکسین لگوا لیں۔کراچی میں اس وقت 28 ایڈَلٹ ویکسینیشن سینٹرز قائم کر دیئے گئے ہیں جہاں پر کورونا وائرس سے بچاؤ کی ویکسین لگوائی جاسکتی ہے۔

کراچی آرٹس کونسل میں استاد راحت فتح علی خان کے اعزاز میں تقریب کا انعقاد کیا جس میں انہیں آرٹس کونسل کراچی کی اعزازی ممبر شپ کے ساتھ لائف ٹائم اچیومنٹ ایوارڈ دیا گیا، اس موقع پر وزیر ثقافت سید سردار علی شاہ اور ادیب و دانشور انور مقصود بھی موجود تھے راحت فتح علی خان کا کہنا تھا کہ آرٹس کونسل نے مجھے بہت بڑے ایوارڈ سے نوازا ہے، میرے کندھے مضبوط تھے لیکن اب حساس ہو گئے ہیں، یہ بہت بڑی ذمے داری ہے۔گلوکار نے کہا کہ جو بھی بچے موسیقی سیکھنا چاہتے ہوں انہیں پیغام دینا چاہتا ہوں کہ انہیں اس سرزمین کیلئے محنت کرنی ہوگی دنیا بھر میں پاکستان کا نام روشن کرنا ہوگا۔تقریب میں انور مقصود نے استاد راحت فتح علی خان سے دلچسپ و مزاحیہ سوالات بھی کئے جس سے حاضرین بے پناہ محظوظ ہوئے ۔انور مقصود کی فرمائش پر راحت فتح علی نے مشہور کلام رنگ بھی گایا جسے گاتے ہوئے انہوں نے اپنے ساتھی قوال شہید امجد صابری کو بھی یاد کیا ۔تقریب سے خطاب میں وزیر ثقافت سید سردار علی شاہ نے کہا کہ لوک اور کلاسیکل موسیقی کا جو امتزاج نصرت فتح علی خان نے بنایا راحت فتح علی خان نے اس روایت کو قائم رکھا ہے انہوں نے یہ بھی اعلان کیا کہ بہت جلد کراچی شہر میں عابدہ پروین اور راحت فتح علی خان کا مشترکہ کانسرٹ منعقد کرکے پوری دنیا کو امن اور محبت کا پیغام دیں گے۔اس موقع پر صدر آرٹس کونسل احمد شاہ نے حکومت پاکستان سے درخواست کی کہ اس سال سب سے بڑے اعزاز ستارہ امتیاز کے لیے استاد راحت فتح علی کو نامزد کیا جائے۔آرٹس کونسل کی جانب سے دیا جانے والا یہ ایوارڈ اس سے قبل ضیاء محی الدین انور مقصود اور افتخار عارف امر جلیل کو ملا ہے تاہم موسیقی کی دنیا میں راحت پہلے گلوکار ہیں جنہیں یہ ایوارڈ دیا گیا۔اس سے قبل استاد راحت فتح علی خان ،ادیب و دانشور انور مقصود اور وزیر ثقافت سردار علی شاہ نے آرٹس کونسل میں پودا لگا کر شجر کاری مہم میں بھی حصہ لیا.