Category: کراچی

کراچی سندھ پولیس نے قائد آباد میں کارروائی کرتے ہوئے چار رکنی انتہائی مطلوب گینگ گرفتار کرلیے۔تفصیلات کے مطابق شہر قائد کے علاقے قائد آباد میں سندھ پولیس کی جانب سے خفیہ اطلاع پر کارروائی کی گئی، جس میں اسٹریٹ کرائم اور ڈکیتی کی وارداتوں میں ملوث چار رکنی انتہائی مطلوب ملزمان گرفتار کرلیے۔ایس ایس پی ملیر نے کہا کہ ملزمان کو مہران ہائی وے کے قریب خفیہ معلومات پر گرفتار کیا، گرفتار ملزمان میں ریاض، حمید، امروز اور سیف اللہ شامل ہیں ایس ایس پی ملیر عرفان بہادر اسلحہ، چھینا ہوا سامان برآمد کرکے مقدمات درج کرلیے، مذکورہ ملزمان کے خلاف مختلف تھانوں میں 8 مقدمات درج ہیں۔

قائد حزب اختلاف حلیم عادل شیخ کو ایک اور جھوٹے کیس میں گرفتار کرنے پر ان کی بیٹی عائشہ حلیم کا وڈیو پیغام میرے والد حلیم عادل شیخ کو پیپلزپارٹی کے پریشر میں سندھ پولیس نے گرفتار کیا ہے۔ ایک ماہ سے زائد دن سے وہ اس لئے گرفتار نہیں ہیں کہ ان پر کوئی نیب یا کرپشن کیسز ہیں۔ میرے والد سندھ حکومت کی کرپشن کو بے نقاب کرنے کے جرم گرفتار ہیں۔ میرے والد اس لئے گرفتار ہیں وہ اسکولوں میں بھینسیں بندھی دکھاتے تھے۔میرے والد اس لئے گرفتار ہیں کیوں کہ وہ اسپتالوں میں دوائیوں نہ ملنے کی شکایات کرتے تھے۔ میرے والد تھر کے مسائل گندے پانی کی فراہمی سمیت دیگر عوامی مسائل کو اجاگر کرتے تھے۔ ان کا صرف یہ قصور تھا کہ وہ ہمیشہ مظلوموں کے ساتھ کھڑے ہوتے تھے حلیم عادل شیخ کو عوام کی حقیقی ترجمانی کرنے کی آج سزا دی جارہی ہے۔ ایک بار پھر سندھ حکومت نے انتقامی کارروائی کرتے ہوئے گھوٹکی الیکشن کے پرانے کیس میں گرفتار کروایا ہے۔

گھوٹکی الیکشن میں بلاول زرداری مراد علی شاہ سمیت دیگر وزراء نے بھی الیکشن مہم چلائی تھی۔ اگر حلیم عادل شیخ پر الیکشن مہم میں جانے پر ایف۔آئی آر درج کی جاتی ہے تو باقیوں پر کیوں نہیں ہوئی۔ ؟گھوٹکی الیکش میں مہم چلانے پر بلاول زرداری مراد علی شاہ سمیت تمام وزراء پر بھی ایف آئی آر درج کی جانی چاہیے۔ لیکن پیپلزپارٹی نے ہمیشہ انتقامی کارروائیوں کی سیاست کی ہے۔سندھ حکومت چاہتی ہے کہ ہر صورت میں حلیم عادل شیخ بند رہیں تاکہ وہ کرپشن کرتی رہے۔ سندھ حکومت چاہتی ہے کہ انکی کرپشن کو بے نقاب کرنے والا کوئی نہ ہو ۔

وفاقی وزیر برائے بحری امور علی حیدر زیدی نے کہا ہے کہ ماضی میں اس وزارت کو بے حد نظر انداز کیا گیا جس کے باعث اس شعبے کو بے شمار چیلنجز کا سامنا کرنا پڑا مگر اب موجودہ حکومت کی جانب سے کی گئی اصلاحات کی وجہ سے معاملات درست ہونا شروع ہو گئے ہیں۔ وہ لاہور چیمبر آف کامرس میں ایک اجلاس سے خطاب کر رہے تھے ۔ لاہور چیمبر آف کامرس کے صدر میاں طارق مصباح، سینئر نائب صدر ناصر حمید خان ، نائب صدر طاہر منظور چوہدری ، وزیر صنعت و تجارت و سرمایہ کاری میاں اسلم اقبال، سیکریٹری برائے وزارت بحری امور رضوان احمد ، ممبر کسمز (آپریشنز) سید محمد طارق ہدیٰ،چیئرمین پاکستان نیشنل شپنگ کارپوریشن شکیل احمد مانگنیجو، چیئر مین کراچی پورٹ ٹرسٹ نادر ممتاز وڑائچ ،چیئرمین پارٹ قاسم اتھارٹی ریئر ایڈمرل (ر) سید حسن ناصر شاہ اور لاہور چیمبر کے ایگزیکٹو کمیٹی ممبرا ن اور سابق صدور نے بھی اس موقع پر خطاب کیا،جبکہ دیگر چیمبرز آف کامرس کے صدور بھی ا س موقع پر موجود تھے ۔ اس موقع پر خطاب کرتے ہوئے وفاقی وزیر نے مزید کہا کہ اٹھارویں ترمیم کے تحت تمام اختیارات صوبوں کو منتقل کر دیئے گئے جس سے بہت سے مسائل پیدا ہو گئے ہیں ۔ ماہی گیری کی صنعت دنیا بھر میں تجارت کے اعتبار سے تیسری بڑی صنعت ہے مگر تمام تر وسائل کے باوجود اس شعبے کی برآمدات میں پاکستان کا حصہ نہ ہونے کے برابر ہے۔ انہوں نے کہا کہ سندھ میں اس شعبے کے لئے کراچی پورٹ ٹرسٹ پر جگہ لیز پر فراہم کی گئی ہے مگر پھر بھی اس سے خاص فرق نہیں پڑا۔ انہوں نے کہا کہ ایف بی آر کی 90فیصد کلیکشن بندرگاہوںسے ہی ہوتی ہے۔ انہوں نے کہا کہ چونکہ زیادہ ترتجارتی سامان کو پورٹ کے ذریعے ہینڈل کیا جاتا ہے،اسی لئے ان کی وزارت دیگر تمام وزارتوں سے منسلک ہے۔ انہوں نے کہا کہ ڈیمانڈ بڑھنے کی وجہ سے کنٹینرز کی قیمتوں میں بھی اضافہ ہو گیا ہے۔ انہوں نے کہا کہ پورٹ قاسم معاہدے پر مذاکرات جاری ہیں ، ایسی پالیساں ترتیب دی جارہی ہیں جوآنے والے وقت میں بھی جاری رکھی جا سکیں گیں۔ انہوں نے کہا کہ ہم اصلاحات کے ذریعے بڑی تیزی سے اس شعبے کی کارکردگی بہتر بنانے میں سرگرم عمل ہیں۔ وہ لاہور چیمبر میں منعقدہ اجلاس سے خطاب کررہے تھے۔ لاہور چیمبر کے صدر میاں طارق مصباح، سینئر نائب صدر ناصر حمید خان، نائب صدر طاہر منظور چودھری، ممبر کسٹم(پالیسی) سید حامد علی،چیئر مین کراچی پورٹ ٹرسٹ نادر ممتاز وڑائچ ،چیئر مین پورٹ قاسم اتھارٹی ریئر ایڈمرل (ر) سید حسن ناصر شاہ ، لاہور چیمبر کے سابق عہدیداروں اور ایگزیکٹو کمیٹی ممبران نے بھی اس موقع پر خطاب کیا۔ صدر لاہور چیمبر میاں طارق مصباح نے کہاکہ شپنگ کمپنیوںکی جانب سے قواعد و ضوابط کی خلاف ورزی کے نتیجے میں امپورٹرز کو کنٹینرز کی کلیئر نس میں تاخیر اور اضافی چارجز جیسے مسائل کا سامنا کرنا پڑتا ہے۔ انہوں نے ٹرمینل ہینڈلنگ چارجز، پورٹ اسٹوریج چارجز اور کنٹینر ڈیٹنشن چارجز کو بھی معقول بنانے کا مطالبہ کیا جن میں حالیہ کچھ عرصے میں ضرورت سے زیادہ اضافہ کیا گیا ہے۔انہوں نے کہا کہ شپنگ کمپنیاں ملک کے دیگر شہروں میں کنٹینرز کو بھیجنے کیلئے کنٹینر سکیورٹی چارجز کی وصولی میں غیر مساوی سلوک کرتی ہیںلہٰذا یکساں سکیورٹی چارجز مقرر کئے جائیں۔ انہوں نے گذشتہ دنوں میں لاہور چیمبر میں ہونے والی میٹنگ کے دوران ڈلیوری آرڈر کی کلیئرنس میں ایک سے دو روز کی تاخیر اور اضافی چارجز کے مسئلے پر علی حیدر زیدی کی جانب سے مثبت رد عمل کو سراہا۔انہوں نے شپمنٹ کلیئرنس کے فری ڈیز ،پلیس آف ڈلیوری اور پورٹ پر سٹاف کی جانب سے کنٹینرز کی جانچ کے نامناسب طریقہ کار سمیت دیگر متعلقہ مسائل چیئر مین کراچی پورٹ ٹرسٹ اور چیئر مین پورٹ قاسم اتھارٹی کے سامنے رکھے۔ صدر لاہور چیمبر نے حکومت کی جانب سے نئی شپنگ پالیسی متعارف کرانے پر مبارکباد پیش کی ،اس پالیسی کے مطابق پاکستان میں رجسٹرڈ ویسلز کو پہلے برتھ فراہم کرنے کی ترجیح دی جائے گی ، اس کے ساتھ ساتھ کسٹم ڈیوٹیز، سیلز ٹیکس ، انکم ٹیکس اور سٹیٹ بینک کی جانب سے3فیصد رعائیتی فنانسنگ کی فراہمی یقینی بنائی جائے گی۔ انہوںنے کہا کہ نجی شعبہ کو ان مراعات سے بھرپور فائدہ اُٹھانا چاہیے اور شپنگ بزنس کی طرف ضرور توجہ دینی چاہیے۔ انہوں نے کہاکہ ملک میں کاروباری سرگرمیوں کے فروغ کے لئے ٹرمینل آپریٹرز کو دی گئی مراعات اور معاہدوں کی شرائط پر نظر ثانی اور ان سے بات چیت کرنے کی ضرورت ہے۔ اس موقع پر صدر لاہور چیمبر میاں طارق مصباح نے پورٹ سے متعلق مسائل کے حل کے لئے مشاورتی کمیٹی تشکیل دینے اور اس میں لاہور چیمبر کو بھی مناسب نمائندگی دینے پر وفاقی وزیر برائے بحری امور کا شکریہ ادا کیا۔

‏پی ٹی آئی رہنماء خرم شیر زمان کا اپوزیشن لیڈر سندھ اسمبلی حلیم عادل شیخ کی ایک اور مقدمے میں گرفتاری پر مذمت،سندھ پولیس مکمل طور پیپلزپارٹی کا سیاسی ونگ بن چکی ہے، حلیم عادل شیخ سمیت اپوزیشن اور صحافیوں کی آواز دبانے کی کوشش کی جارہی ہے، پی پی کے سیاہ چہرے سے کرپشن بے نقاب کرنے کی سزا سندھ کے اپوزیشن لیڈر کو دی جارہی ہے،گھوٹکی کا مقدمہ پولیس کی بدیانتی اور غلامی کا کھلا ثبوت ہے، آء جی سندھ ریمورٹ کنٹرول پر چلنے والے کھلونے بن چکے ہیں ‏تحریک انصاف پی پی کے خاتمے تک سندھ کے حقوق کی جنگ جاری رکھے گی، چیف جسٹس سندھ میں جاری انتقامی کاروائیوں پر نوٹس لیا جائے۔

کراچی وفاقی حکومت نے کراچی کے تین بڑے اسپتالوں کو تحویل میں لینے کا عمل شروع کر دیا ہے جبکہ صوبائی وزیر صحت نے الزام عائد کیا ہے کہ اسلام آباد میں بیٹھ کر کراچی کے اسپتال نہیں چلائے جا سکتے۔ وفاقی حکومت نے کراچی کے تین بڑے اسپتالوں کو تحویل میں لینے کا عمل شروع کردیا ہے، وفاقی حکومت نے جناح، این آئی سی وی ڈی اور این آئی سی ایچ کے بورڈ آف گورنرز تشکیل دینا شروع کر دیئے ہیں وزیراعظم کے معاون خصوصی ڈاکٹر فیصل سلطان کا کہنا ہے کہ سندھ کی وزیر صحت سے بورڈ آف گورنرز کے لیے نام طلب کیے، ہم چاہتے ہیں کہ اسپتالوں کو چلانے کے لیے موزوں اور غیر متنازعہ لوگ تعینات کریں۔سندھ کی وزیر صحت ڈاکٹر عذرا پیچوہو نے اس اقدام کو کڑی تنقید کرتے ہوئے کہا کہ محکمہ صحت سندھ کو بورڈ آف گورنرز کے لئے دو لوگوں کے نام دینے کو کہا گیا، ہم یہ نام نہیں دیں گے کیونکہ ہم ان کی وفاقی تحویل کے خلاف ہیں، اسلام آباد میں بیٹھ کر کراچی کے اسپتال نہیں چلائے جا سکتے۔ صوبائی وزیر صحت ڈاکٹر عذرا پیچوہو کا کہنا تھا کہ وفاقی حکومت کا میڈیکل ٹیچنگ انسٹیٹیوٹ آرڈیننس ہر جگہ ناکام ہوا ہے، اس کے باوجود وفاقی حکومت اپنی مینجمنٹ لاکر کراچی کے اسپتالوں تحویل میں لینے جارہی ہے، وہ توہین عدالت کے خوف سے یہ کر رہے ہیں لیکن مریضوں کا نقصان ہوگا۔ محکمہ صحت سندھ کا کہنا ہے کہ تینوں اسپتالوں کا معاملہ سپریم کورٹ میں ہے، عدالتی فیصلے سے قبل اسپتالوں پر فیصلہ مؤثرنہیں ہوگا۔ وفاقی حکومت پر اسپتالوں کے100بلین روپے واجبات ہیں ، تینوں اسپتالوں پر سندھ حکومت نے اخراجات ادا کئے ہیں۔

کراچی شہر قائد کی ٹوٹ پھوٹ کا شکار سڑکیں، سیوریج کا تباہ حال نظام اور منہ کھلے مین ہول شہریوں کی زندگیاں نگلنے لگی لیکن حکمران غفلت کی نیند سے نہ جاگے۔یوں تو پورے شہر قائد کا نظام ہی بدحالی کا شکار اور شہری بدترین مشکلات سے دوچار ہیں لیکن سرکاری سطح پر کراچی کا ماڈل ضلع قرار دیا جانے والا ڈسٹرکٹ ساؤتھ (ضلع جنوبی) ہے، جہاں جگہ جگہ کچرا کنڈیاں بنی ہیں اور سیوریج کا پانی سڑکوں پر موجود ہے جبکہ سڑکیں چھ چھ پہینے سے کھدی پڑی ہیں۔ضلع جنوبی حال تمام ڈسٹرکٹ سے بدتر ہے جہاں مین ہول کے ڈھکن غائب ہیں، گندگی، مچھر، بیماریاں اور پریشانیاں ضلع جنوبی کے رہائشیوں سنگین مسئلہ بن گئی ہیں۔جہاں گورنر ہاؤس، وزیر اعلیٰ ہاؤس، سندھ اسمبلی سمیت ملک کو سب سے زیادہ ریونیو فراہم کرنے والا معاشی حب اور شہر کی تعمیر و ترقی کےلیے فیصلے کرنے کا مرکز سندھ سیکریٹریٹ بھی ہے سندھ سکریٹریٹ کے دامن میں موجود سڑک سڑکیں ٹوٹ پھوٹ کا شکار اور مکین پریشان حال ہیں، مکینوں کا کہنا ہے کہ کئی ماہ گزر گئے لیکن سڑک نہیں تعمیر ہوسکی جس کی وجہ سے کاروبار بھی تباہ ہوکر رہ گیا ہے۔

کچھ فاصلے پر شہر کی مشہور فورڈ اسٹریٹ ہے جہاں مرکزی سڑک تو صاف کردی جاتی ہے لیکن اندرونی گلیاں جیسے کسی کچرا کنڈی کا منظر پیش کرتی ہیں اور ٹوٹی پھوٹی سڑکوں پر بہتا سیوریج کا گندا پانی گلیوں کو نالوں میں تبدیل کرتا ہے۔ضلع جنوبی میں پی پی پی کا اہم گڑھ لیاری بھی ہے جہاں سے چیئرمین بلاول بھٹو زرداری نے 2018 کے عام انتخابات میں حصّہ لیا تھا کی داخلی سڑک بھی کئی مہینوں سے تباہ حالی کا شکار ہے جس کے باعث ٹریفک کی روانی بری طرح متاثر ہوتی ہے اور آئے روز یہ ٹوٹی ہوئی سڑکیں حادثات کا باعث بنتی ہیں۔