Category: کراچی

سیکریٹری بلدیات کی 328 کرپٹ افسران کو کلین چٹ دینے کے بعد کرپٹ مافیا کے حوصلے مزید بلند ہوگئے۔
بلڈرز کا لبادہ اوڑھ کر ٹھیکیدار مافیا نے پوری ہائوسنگ انڈسٹری اور اصل بلڈرز کو بدنام کرکے رکھ دیا۔
نارتھ ناظم آباد بلاک آئی کے پلاٹ نمبر ایس سی 1 کی خستہ حال اولڈ بلڈنگ پر تیسرے غیر قانونی فلور کی تعمیرات شہریوں کی جانوں کیلئے خطرہ بن گئیں۔
ایس بی سی اے افسران نے کارروائی کے بجائے مبینہ کروڑوں نزرانے کے عیوض انسانی جانو کا سودا کرڈالا
ایس بی سی اے کے کرپٹ افسران اور ٹھیکیدار مافیا کی ملی بھگت سے شہر قائد میں غیرقانونی تعمیرات کا سونامی آگیا،گلی گلی پورشنز کی بڑے پیمانے پر جاری تعمیرات کے ساتھ ساتھ خستہ حال اورخطرناک عمارتوں پر جاری اضافی فلورز کی تعمیرات سندھ حکومت اور تحقیقاتی اداروں کیلئے سوالیہ نشان بن گئی،نارتھ ناظم آباد بلاک آئی کے پلاٹ نمبر ایس سی1 سیلانی مارکیٹ نامی کئی سال پرانی خستہ حال اولڈ بلڈنگ پر اضافی تیسرے فلور کی جاری تعمیرات سے شہریوں کی زندگیوں کو شدید خطرات لاحق ہوگئے، خطرناک تعمیرات کیخلاف کارروائی کے بجائے افسران بھاری نذرانے وصول کرکے سرپرستی کرنے لگے، ایس بی سی اے کے 328 کرپٹ افسران کیخلاف تحقیقات بند کرکے کلین چٹ دینے والے سیکریٹری بلدیات نجم شاہ پر سہولت کاری کے الزامات عائد کئے جانے لگے،شہری حلقوں کا عدالت عظمی اور وزیر اعلی سندھ سمیت وفاقی تحقیقاتی اداروں سے فوری کارروائی کا مطالبہ ۔تفصیلات کے مطابق سندھ حکومت محکمہ بلدیات اور ڈی جی ایس بی سی اے کی مبینہ آشیرباد سے شہر قائد میں غیرقانونی تعمیرات کا 20 سالہ ریکارڈ توڑ دیا گیا ہے،ذرائع کا کہنا ہے کہ سیکریٹری بلدیات نجم شاہ کی جانب سے ایس بی سی اے کے328کرپٹ افسران کیخلاف تحقیقات بند کرکے انہیں کلین چٹ دیئے جانے کے بعد شہر میں غیر قانونی تعمیرات میں مزید تیزی آگئی ہے اور کرپٹ افسران کے حوصلے مزید بلند ہوگئے ہیں،ذرائع کے مطابق تمام ٹاﺅنز میں گلی گلی غیر قانونی تعمیرات کا سونامی آیا ہوا ہے اور شہر کا انفراسٹرکچر تباہ ہونے کے ساتھ ساتھ کرپٹ افسران اور ٹھیکیدار مافیا شہریوں کی قیمتی جانوں سے بھی کھیلنے لگے ہیں،نارتھ ناظم آباد کے بلاک آئی پلا ٹ نمبر ایس سی1 پر کئی سال قبل تعمیر کی گئی سیلانی مارکیٹ نامی خستہ حال اور خطرناک اولڈ بلڈنگ پر اضافی تیسرے فلورز کی تعمیرات تیزی سے شروع کردی گئی ہیں ،ذرائع کا کہنا ہے کہ کروڑوں روپے نذرانوں کے عیوض مذکورہ کمرشل بلڈنگ پر ایک درجن سے زائد فلیٹس تعمیر کئے جارہے ہیں جبکہ مذکورہ بلڈنگ کی بنیادیں اپنی پرانی تعمیرات کو بمشکل سنبھالے ہوئے ہیں اس پر اضافی فلورز کی تعمیرات انسانی جانوں کیلئے انتہائی خطرناک ہوکر رہ گئی ہیں،علاقہ مکینوں کے مطابق اس سلسلے میں ایس بی سی اے حکام کو آگاہ کیا گیا تاہم کارروائی کرنے کے بجائے کرپٹ افسران نے شہریوں کی درخواست ردی کی نذر کردی ہیں،مذکورہ سیلانی مارکیٹ نامی خستہ حال بلڈنگ پر کھلے عام جاری غیر قانونی تعمیرات سندھ حکومت اور تحقیقاتی اداروں سمیت ایس بی سی اے حکام کیلئے سوالیہ نشان بن گئی ہیں ،واضح رہے کہ شہر میں غیر قانونی تعمیرات کرنے والی ٹھیکیدار مافیا نے بلڈرز کا روپ دھار کراصل تعمیرات کرنے والے بلڈرز اور ہاﺅسنگ وتعمیرات سے وابستہ انڈسٹری کو بدنام کرکے رکھ دیا ہے،اس سلسلے میں ایسوسی ایشن بلڈرز اینڈ یولپرز کے نمائندوں نے واضح کیا ہے کہ گلی گلی پورشن اور غیرقانونی تعمیرات کرنے والی مافیا کا بلڈرز سے کوئی تعلق نہیں بلکہ یہ ٹھیکیدار مافیا ہے جو کہ کرپٹ افسران کے ساتھ مل کر شہرکے انفراسٹرکچر کی تباہی اور شہریوں کی جانوں سے کھیلنے میں مصروف ہے۔

کراچی کے علاقے شرافی گوٹھ میں تیز رفتار گاڑی رینجرز موبائل سے ٹکرا گئی، جس کے نتیجے میں ایک رینجرز اہلکار جاں بحق ہو گیا پولیس کے مطابق تیز رفتار گاڑی نے شرافی گوٹھ پل پر رینجرز موبائل کو ٹکر ماری، حادثے میں رینجرز کے دیگر اہلکار اور کار میں سوار 4 افراد زخمی ہوئے پولیس کے مطابق رینجرز اہلکار کو طبی امداد کے لیے اسپتال منتقل کیا گیا جہاں وہ دوران علاج دم توڑ گیا پولیس حکام کا کہنا ہے کہ واقعے سے متعلق تحقیقات کر رہے ہیں۔

گجر نالہ سے غیر پختہ تجاوزات ہٹانے کا عمل جمعہ کو مکمل ہوگیا، کے ایم سی کے سینئر ڈائریکٹر بشیر صدیقی نے سماء ڈیجیٹل سے گفتگو کرتے ہوئے تصدیق کردی کے ایم سی کے سینئر ڈائریکٹر نے بتایا کہ انسداد تجاوزات ٹیموں نے خاموش کالونی سے حاجی مرید گوٹھ تک 4 کلو میٹر کے فاصلے پر غیر پختہ تجاوزات ہٹادیں، جو گجر نالے کا اختتامی مقام ہے کے ایم سی محکمہ انسداد تجاوزات کا شعبہ کچی آبادی اور ضلعی انتظامیہ ہفتہ کو غیرپختہ تجاوزات کی موجودگی کا جائزہ لینے کیلئے گجر نالے کے تمام راستوں کا سروے کریں گے کے ایم سی کی ٹیمیں کل مشینری کے ساتھ ساتھ سائٹ پر سروے کریں گی اور گجر نالے کے راستے میں جہاں ضرورت ہو وہاں موجودگ تجاوزات کو مسمار کردیں گے بشیر صدیقی کا کہنا ہے کہ کے ایم سی ٹیموں نے گجر نالہ کے دونوں اطراف سے غیر پختہ تجاوزات میں جھونپڑیوں، مویشیوں کے فارمز، لکڑی کے گوداموں اور غیر کنکریٹ ڈھانچوں کو ہٹادیا انہوں نے کہا کہ انسداد تجاوزات ٹیمیں گجر نالے میں متعلقہ محکمے کی جانب سے لگائے گئے نشانات کے مطابق کنکریٹ مکانات (پختہ تجاوزات) کو مسمار کرنے کیلئے اپنا کام شروع کریں گی این ای ڈی کی تکنیکی رپورٹ کے مطابق برساتی نالے کے دونوں اطراف 4 ہزار کے قریب غیر قانونی مکانات موجود ہیں، جنہیں گجر نالے کو وسعت دینے کیلئے منہدم کیا جارہا ہے
کے ایم سی کے سینئر ڈائریکٹر نے کہا کہ کا رپوریشن نے گجر نالے پر انسداد تجاوزات کے تیز رفتار آپریشن کیلئے حکمت عملی تیار کرلی ہےابتدائی طور پر کے ایم سی نے نالے کے دونوں سروں سے پختہ تجاوزات کے خاتمے کیلئے دو ٹیمیں تشکیل دی ہیں، ٹیموں کی تعداد میں 4 سے 6 تک بڑھائی جائے گی گجر نالے پر انسداد تجاوزات آپریشن 8 فروری کو شروع کیا گیا تھا، 5 دن کے دوران کے ایم سی نے نالہ سے غیر پختہ تجاوزات کو ہٹا دیا گجر نالے کی کل لمبائی تقریباً 13 کلومیٹر ہے، جو دونوں اطراف 26 کلو میٹر بنتی ہے، یہ کراچی کا سب سے طویل برساتی پانی کا نالہ ہے جو نیوکراچی نالہ اسٹاپ کے قریب نورانی محلہ سے شروع ہوکر لیاقت آباد ٹاؤن کے عقب میں حاجی مرید گوٹھ پر ختم ہوتا ہے اس سے قبل کے ایم سی نے محمود آباد میں منظور کالونی سے غیر قانونی تجاوزات کا خاتمہ کیا تھا، آپریشن میں تقریباً ایک ماہ کا عرصہ لگا، اس نالے کی لمبائی 8 کلو میٹر کے قریب ہے۔

کراچی: ایم کیوایم کی جانب سے تاحال سینیٹ ٹکٹس کا فیصلہ نہ ہوسکا، متحدہ قومی موومنٹ (ایم کیو ایم) پاکستان کی جانب سے تاحال سینیٹ انتخابات میں ٹکٹ دینے کا فیصلہ نہیں ہو سکا۔

ذرائع کا کہنا ہے کہ سینیٹ انتخابات میں ایم کیو ایم پاکستان 10 امیدواروں کے کاغذات نامزدگی جمع کروائے گی۔ جنرل نشست پر فیصل سبزواری، عامر خان، رؤف صدیقی، کاعذات جمع کروائیں گے۔

مزید تفصیلات کے مطابق عبدالقادر خانزادہ اور ظفر جمالی کے کاغذات بھی جنرل نشست پر جمع کروائے جائیں گے۔

خواتین کی مخصوص نشست پر نسرین جلیل اور خالدہ طیب کے فارم جمع کروائے جائیں گے۔ جبکہ ٹیکنوکریٹ کی نشست کے لئے شہاب امام، اقبال قادری اور رؤف صدیقی کے فارم جمع کروائے جائیں گے۔

کاغذات نامزدگی جمع کروانے کا فیصلہ متحدہ رابطہ کمیٹی کے اجلاس میں کیا گیا، سندھ اسمبلی میں متحدہ اراکین کی تعداد 21 ہے۔

کراچی: ایڈمنسٹریٹر کراچی لئیق احمدنے کہا ہے کہ شہاب الدین مارکیٹ کے داخلی راستے اور اطراف سے تمام تجاوزات ختم کردی ہیں جس سے یہاں کاروبار کی راہ میں حائل رکاوٹ دور ہوگئی ہے، شہاب الدین مارکیٹ یونین کے عہدیداران سے وعدے کے مطابق خصوصی آپریشن کیا گیا جس کے دوران مارکیٹ میں بنایا گیا غیرقانونی ہوٹل،تندور، ٹی شاپس اور دیواریں مسمار کردی گئیں اور ٹھیلے اور کیبن وغیرہ ضبط کرلئے گئے ہیں، تجاوزات کے خاتمے کے بعد مارکیٹ کی چار دیواری کو اونچا کرکے ایسے انتظامات کئے جائیں گے کہ یہاں دوبارہ تجاوزات قائم نہ ہوسکیں، ان خیالات کا اظہار انہوں نے جمعہ کے روز بلدیہ عظمیٰ کراچی کے محکمہ اسٹیٹ / اینٹی انکروچمنٹ کی جانب سے صدر میں شہاب الدین مارکیٹ میں کئے گئے انسداد تجاوزات کے آپریشن کا جائزہ لیتے ہوئے کیا، ایڈمنسٹریٹر کراچی نے کہا کہ شہاب الدین مارکیٹ کی تعمیر کے پہلے مرحلے میں 425 دکانیں شاپ کیپرز کو الاٹ کی گئی تھیں تاہم تجاوزات اور دیگر وجوہات کے باعث یہ لوگ یہاں کاروبار نہیں کر پارہے تھے، ان دکانداروں کو 2007ء میں مارکیٹ کی ازسرنو تعمیر کے لئے لائنز ایریا میں عارضی طور پر منتقل کیا گیا تھا جہاں سے انہیں مارکیٹ میں واپس لانے کے لئے دکانیں الاٹ کی گئی تھیں، تجاوزات کے خاتمے سے مارکیٹ کے داخلی راستے پر قائم ہر قسم کی رکاوٹیں دور ہوگئی ہیں اور اب امید ہے کہ شہاب الدین مارکیٹ کے الاٹیز یہاں آکر اپنا کاروبار اطمینان سے کرسکیں گے،ایڈمنسٹریٹر کراچی نے کہا کہ شہاب الدین مارکیٹ بلدیہ عظمیٰ کراچی کے زیر انتظام ایک اہم کاروباری جگہ ہے جو شہر کے قلب صدر میں واقع ہے اس مارکیٹ کو کاروبار کے لئے دوبارہ فعال بنانے کی ہرممکن کوشش کی جا رہی ہے جس کے لئے تمام ضروری اقدامات عمل میں لائے جائیں گے، انہوں نے کہا کہ شہریوں اور کاروباری برادری کو سہولیات فراہم کرنا بلدیہ عظمیٰ کراچی کی بنیادی ذمہ داری ہے لہٰذا ایسا ماحول بنایا جا رہا ہے جس میں دکانداروں اور خریداروں دونوں کے لئے سہولیات اور آسانیاں موجود ہوں، دریں اثناء جمعہ کی صبح ایڈمنسٹریٹر کراچی لئیق احمد کی خصوصی ہدایت پر سینئر ڈائریکٹر انسدادتجاوزات بشیر صدیقی کی نگرانی اور ڈائریکٹر انسداد تجاوزات ضلع جنوبی و ڈائریکٹر اسٹیٹ عمران صدیقی کی سربراہی میں شہاب الدین مارکیٹ صدر کے داخلی راستوں اور اطراف میں قائم غیرقانونی تجاوزات کے خلاف ایک بڑا آپریشن کیا گیا جس میں ہر قسم کی تجاوزات کو ختم کرکے مارکیٹ میں آمدورفت کے راستوں کو تجاوزات سے پاک کردیا گیا، اس آپریشن میں ڈپٹی ڈائریکٹر انسداد تجاوزات آصف جیٹھا، نعمان احمد، پولیس اور رینجرز کے اہلکاروں کے علاوہ محکمہ اسٹیٹ و انسدادتجاوزات کے عملے نے شرکت کی۔