شہر قائد کے علاقے گڈاپ تھانے کی حدود میں سپر ہائی وے کے قریب ایک نجی ہاؤسنگ سوسائٹی میں ڈکیتی کی سنگین واردات پیش آئی، جس میں مسلح ملزمان نے شہری کے گھر سے لاکھوں روپے مالیت کا سونا اور دیگر قیمتی سامان لوٹ کر فرار ہو گئے۔
پولیس کے مطابق یہ واردات ممتاز مولائی کے گھر میں ہوئی، جہاں دو موٹر سائیکل سوار ملزمان داخل ہوئے، جن میں سے ایک کے پاس پستول اور دوسرے کے پاس چھری تھی۔ ملزمان نے گھر والوں کو یرغمال بنا کر 15 تولہ سونا، نقدی اور موبائل فونز لوٹ لیے اور باآسانی فرار ہونے میں کامیاب ہو گئے۔
واقعے کی اطلاع ملتے ہی پولیس کی نفری موقع پر پہنچ گئی اور کرائم سین سے شواہد جمع کیے گئے۔ متاثرہ شہری کے بیان کی بنیاد پر ملزمان کی تلاش شروع کر دی گئی ہے جبکہ علاقے کی سی سی ٹی وی فوٹیجز کا بھی جائزہ لیا جا رہا ہے۔
Category: کراچی
-
کراچی میں ڈکیتی، 15 تولہ سونا اور نقدی لوٹ کر ملزمان فرار
-
پاکستان میں سونے کے ذخائر کی مالیت کتنی؟
اسٹیٹ بینک نے پاکستان میں سونے کے ذخائر کی مالیت کے بارے میں تفصیلات جاری کر دیں۔
ملک کے مرکزی بینک کے مطابق پاکستان میں موجود 64.76 ٹن سونے کے ذخائر کی مالیت 10.374 ارب ڈالر ہو گئی ہےجنوری 2026 میں ملکی سونے کے ذخائر کی مالیت 1.279 ارب ڈالر بڑھی ہے اس کے علاوہ رواں مالی سال کے ابتدائی 7 ماہ میں ملک میں سونے کے ذخائر کی مالیت 3.5 ارب ڈالر کا اضافہ ہوا۔
اسٹیٹ بینک کے اعداد و شمار کے مطابق جون 2025 میں ملکی سونے کے ذخائر کی مالیت 6.84 ارب ڈالر تھی، ملک میں سونے کے ذخائر 20 لاکھ 82 ہزار اونس یا 55 لاکھ 52 ہزار تولے ہیں۔
-
سونے اور چاندی کی قیمتوں میں کمی
عالمی ومقامی مارکیٹوں میں سونے اور چاندی کی قیمتوں میں کمی ریکارڈ کی گئی۔
بین الاقوامی بلین مارکیٹ میں فی اونس سونے کی قیمت 32 ڈالر کی کمی سے 5 ہزار 10 ڈالر کی سطح پر آگئی،عالمی مارکیٹ میں کمی کے بعد ملک میں فی تولہ سونے کی قیمت 3 ہزار 200 روپے کی کمی ہوئی جس کے بعد 5 لاکھ 23 ہزار 762 روپے کی سطح پر آگئی فی دس گرام سونے کی قیمت 2 ہزار 743 روپے کمی کے بعد 4لاکھ 49 ہزار 41 روپے کی سطح پر آگئی۔
جبکہ فی تولہ چاندی کی قیمت 55 روپے کی کمی سے 8 ہزار 164 روپے کی سطح پر آگئی، فی 10 گرام چاندی کی قیمت بھی 47 روپے کی کمی سے 6 ہزار 999 روپے کی سطح پر آگئی۔
-
ملک کے بیشتر علاقوں میں بارش اور گرج چمک کی پیشگوئی
ملک کے بیشتر علاقوں میں بارش کی پیشگوئی کی گئی ہے۔
محکمہ موسمیات کے مطابق بلوچستان، زیریں خیبرپختونخوا اور تھل کے علاقوں میں شام اور رات کے اوقات میں تیز ہواؤں اور گرج چمک کے ساتھ بارش متوقع ہے،صوبہ بلوچستان کے شہروں کوئٹہ، پشین، مسلم باغ، ژوب، زیارت، بارکھان، سبی اور قلات میں تیز ہواؤں اور گرج چمک کے ساتھ بارش کی پیش گوئی کی گئی ہے ساحلی اضلاع کیچ، پنجگور، واشک، خاران، خضدار اور گوادر میں بھی طوفانی ہواؤں اور بارش کا امکان ظاہر کیا گیا ہے۔
محکمہ موسمیات کے مطابق 17 فروری کو مغربی ہواؤں کا ایک سلسلہ ملک میں داخل ہونے کا امکان ہے، جس کے باعث سندھ بالخصوص کراچی میں بھی گرج چمک کے ساتھ بارش اور معمول سے تیز گرد آلود ہوائیں چل سکتی ہیں۔
دوسری جانب پی ڈی ایم اے کے مطابق خیبرپختونخوا کے جنوبی اضلاع میں آج رات سے بارش کا امکان ہے اور گرج چمک کے ساتھ بارش کا سلسلہ منگل تک جاری رہ سکتا ہے۔ اعلامیے کے مطابق کرم، بنوں، شمالی و جنوبی وزیرستان، لکی مروت، ٹانک اور ڈیرہ اسماعیل خان میں بارش متوقع ہے، جبکہ ڈیرہ اسماعیل خان میں ژالہ باری کا بھی امکان ظاہر کیا گیا ہے۔
-
نوشہرو فیروز میں ٹریفک حادثہ، ایک ہی خاندان کے 6 افراد جاں بحق
نوشہرو فیروز کے قریب قومی شاہراہ پر تیز رفتار کار اور ٹریلر کے درمیان شدید تصادم کے نتیجے میں کار میں سوار چھ افراد موقع پر ہی جاں بحق ہو گئے۔
ابتدائی معلومات کے مطابق جاں بحق ہونے والے تمام افراد کا تعلق سولنگی برادری سے بتایا جا رہا ہے حادثے کی شدت کا اندازہ اس بات سے لگایا جا سکتا ہے کہ کار مکمل طور پر تباہ ہو گئی جبکہ ٹریلر سڑک کے کنارے جا رکا، مقامی افراد نے فوری طور پر امدادی سرگرمیاں شروع کیں اور متعلقہ اداروں کو اطلاع دی۔
ریسکیو ٹیمیں موقع پر پہنچیں اور لاشوں کو گاڑی سے نکال کر ایدھی فاؤنڈیشن کی ایمبولینس کے ذریعے نوشہرو فیروز کے سرکاری اسپتال منتقل کیا گیا اسپتال ذرائع کے مطابق تمام افراد کو مردہ حالت میں لایا گیا ریسکیو حکام کا کہنا ہے کہ جاں بحق افراد لاڑکانہ سے کراچی جا رہے تھے حادثے کے بعد کچھ دیر کے لیے قومی شاہراہ پر ٹریفک کی روانی متاثر رہی، جسے پولیس کی مدد سے بحال کر دیا گیا۔
پولیس نے ٹریلر کو تحویل میں لے کر ڈرائیور سے تفتیش شروع کر دی ہے جبکہ حادثے کی وجوہات جاننے کے لیے مزید تحقیقات جاری ہیں،حکام کے مطابق ابتدائی طور پر تیز رفتاری کو حادثے کی ممکنہ وجہ قرار دیا جا رہا ہے، تاہم حتمی رپورٹ تفتیش مکمل ہونے کے بعد سامنے آئے گی۔
-
کراچی میں دہشت گردی کا منصوبہ ناکام، فتنہ الہندوستان کے تین دہشت گرد گرفتار
کراچی میں قانون نافذ کرنے والے اداروں نے دہشت گردی کے ایک بڑے منصوبے کو ناکام بنا دیا ہے۔
ترجمان رینجرز کے مطابق رینجرز اور سی ٹی ڈی نے چکراگوٹھ کورنگی میں مشترکہ کارروائی کرکے فتنہ الہندوستان کے تین انتہائی مطلوب سہولتکاروں کوگرفتار کرلیا گرفتار ملزمان کی شناخت یاسر عرفات، خدا بخش اور زاہد حسین عرف بارکزئی کے نام سے ہوئی ہے۔ کارروائی کے دوران ملزمان کے قبضے سے پانچ کلو بارو دی مواد، دس میٹر پرائما کارڈ، تین ڈیٹونیٹر اور ایک کلو بال بیرنگ برآمد کی گئی، اس کے علاوہ انتہاپسندی پر مبنی لٹریچر کے تقریباً 250 بکس اور ایک لیپ ٹا پ بھی تحویل میں لیا گیا۔
ترجمان نے بتایا کہ ابتدائی تفتیش میں انکشاف ہوا ہے کہ ملزمان طلبا کو ایک کالعدم تنظیم میں شمولیت کے لیے ذہن سازی کرتے تھے اور تعلیمی اداروں میں انتہاپسندی پر مبنی مواد کی فراہمی میں بھی ملوث رہے ہیں ملزمان نے کراچی کے حساس مقامات کو نشانہ بنانے کے لیے بارودی مواد خفیہ ٹھکانوں پر چھپا رکھا تھا، جسے بروقت کارروائی کے ذریعے برآمد کر لیا گیا۔
سیکیورٹی ذرائع کا کہنا ہے کہ یہ کارروائی خفیہ اطلاع کی بنیاد پر کی گئی، جس کا مقصد شہر میں کسی بڑے نقصان کو روکنا تھا گرفتار افراد کو مزید قانونی کارروائی کے لیے پولیس کے حوالے کر دیا گیا ہے، جبکہ تفتیش کا دائرہ وسیع کر دیا گیا ہے تاکہ ممکنہ نیٹ ورک اور دیگر سہولت کاروں تک بھی پہنچا جا سکے۔
-
19 سالہ نوجوان ذوہیب شاہ کے قتل کا معمہ حل، مقتول کے 3 دوست گرفتار
تھانہ صدر کی حدود سے ملنے والی 19 سالہ نوجوان ذوہیب شاہ کی لاش کے کیس میں پولیس نے بڑی کامیابی حاصل کرتے ہوئے قتل میں ملوث تین مرکزی ملزمان کو گرفتار کر لیا ہے۔
پولیس کے مطابق گرفتار ملزمان مقتول کے دوست ہیں، جنہوں نے ذوہیب شاہ کو چائے پینے کے بہانے اپنے ساتھ لے جا کر بے دردی سے قتل کیا۔ ملزمان نے مقتول کی لاش کو ٹکڑوں میں تقسیم کیا اور زمین میں چھپا دیا۔ 10 فروری کو علاقے کے مکینوں نے لاش کے ٹکڑے دیکھ کر پولیس کو اطلاع دی، جس پر تحقیقات کا آغاز کیا گیا۔
ترجمان پولیس نے بتایا کہ نوجوان کے قتل کا مقدمہ کل 9 افراد کے خلاف درج کیا گیا، جن میں 7 نامزد ملزمان شامل ہیں۔ گرفتار افراد کے قبضے سے آلہ قتل برآمد ہوا ہے، جس میں دو کلہاڑیاں اور ایک ڈنڈا شامل ہیں۔ پولیس ملوث دیگر ملزمان کی گرفتاری کے لیے چھاپے جاری رکھے ہوئے ہے۔ -
کراچی: جناح ایئرپورٹ کے دوبارہ تعمیر شدہ مین رن وے کا افتتاح
سیکریٹری دفاع لیفٹننٹ جنرل ریٹائرڈ محمد علی نے کراچی کے جناح انٹرنیشنل ایئرپورٹ کے دوبارہ تعمیر شدہ مین رن وے کا باقاعدہ افتتاح کر دیا۔ دوبارہ تعمیر شدہ رن وے پر پہلی کمرشل پرواز 19 فروری کو لینڈ کرے گی۔
پاکستان ایئرپورٹس اتھارٹی کے ہیڈکوارٹرز پہنچنے پر ڈائریکٹر جنرل ایئر وائس مارشل ذیشان سعید نے سیکریٹری دفاع اور ایڈیشنل سیکریٹری دفاع میجر جنرل قیصر سلیمان کا استقبال کیا۔
اس موقع پر سیکریٹری دفاع کو ڈی جی پاکستان ایئرپورٹس اتھارٹی نے رن وے اور ایئرپورٹ کے دیگر جدید سہولیات کے حوالے سے تفصیلی بریفنگ دی۔ ڈی جی سی اے اے نادر شفیع ڈار اور ڈپٹی ڈائریکٹر جنرل لقمان رشید بھی اس تقریب میں موجود تھے۔ -
سندھ متحد رہے گا، صوبہ بنانے کی بات کرنے والے خاموش رہیں: مراد علی شاہ
وزیر اعلیٰ سندھ مراد علی شاہ نے کہا ہے کہ سندھ متحد رہے گا اور جو لوگ صوبہ بنانے کی بات کر رہے ہیں، وہ چپ رہیں۔ انہوں نے کہا کہ اگر کوئی سندھ کو تقسیم کرنے کے بارے میں سوچ رہا ہے تو وہ پاکستان کے لیے نہیں سوچ رہا۔
مراد علی شاہ نے یہ بات کراچی کے علاقے ملیر میں خالد بن ولید فلائی اوور کے افتتاح کے موقع پر کہی۔ انہوں نے کہا کہ وہ بلدیاتی اداروں کو مضبوط کرنا چاہتے ہیں، اور یہ وزیراعظم کا کام نہیں کہ گلیوں میں گٹر کے ڈھکن لگائے جائیں۔
وزیر اعلیٰ سندھ نے مزید کہا کہ میئر کراچی کو 100 روز میں پل بنانے کا چیلنج دیا گیا تھا، اور اب عظیم پورہ فلائی اوور کے قیام کا ایک اور چیلنج دے رہے ہیں۔ انہوں نے یقین دلایا کہ کراچی کو وہ انفراسٹرکچر فراہم کیا جائے گا جس کا شہر حقدار ہے۔ -
ترقیاتی منصوبوں میں تاخیر اور سستی اب قبول نہیں ،مراد علی شاہ
وزیراعلیٰ سندھ مراد علی شاہ نے کراچی میں ایک تقریب سے خطاب کرتے ہوئے واضح کیا ہے کہ ترقیاتی منصوبوں میں تاخیر اور سستی اب قبول نہیں کی جائے گی۔
وزیراعلیٰ سندھ مراد علی شاہ نے کہا کہ کراچی میں تعمیر ہونے والا نیا برج مقررہ مدت یعنی 100 دن میں مکمل کیا جائے اور اضافی 5-4 دن کا بہانہ اب نہیں چلے گا جس دن سے کام شروع ہوگا، اسی دن سے گنتی ہوگی اور انہیں یقین ہے کہ میئر کراچی مرتضیٰ وہاب اور ان کی ٹیم دن رات اس منصوبے کی نگرانی کریں گے تاکہ کسی قسم کی تاخیر نہ ہو۔
انہوں نے کہا کہ اس برج سے مقامی آبادی کو خاص فائدہ ہوگا، خصوصاً کیٹل کالونی اور ایکسپورٹ پراسیسنگ زون کے لوگوں کو سہولت ملے گی۔ وزیراعلیٰ نے بتایا کہ حال ہی میں کورنگی کاز وے کا تقریباً ساڑھے چھ ارب روپے کا منصوبہ مکمل کیا گیا، جبکہ اس سے پہلے پرانا پل خستہ حال ہونے کے باعث گرایا گیا تھا۔
مراد علی شاہ نے کہا کہ شارع بھٹو کا منصوبہ بھی تیزی سے مکمل کیا جا رہا ہے اور آئندہ چار سے چھ ہفتوں میں اسے کیماڑی سے کاٹھور تک مکمل کر لیا جائے گا انہوں نے دوبارہ ہنستے ہوئے کہا کہ وہ تاریخ اس لیے نہیں دیتے کیونکہ کبھی کبھار مرتضیٰ وہاب کی جانب سے سستی ہو جاتی ہے، تاہم کام ہر صورت مکمل ہوگا۔
انہوں نے مزید بتایا کہ شارع بھٹو کو قیوم آباد سے کراچی پورٹ تک توسیع دینے کے منصوبے کی بنیاد بھی جلد رکھی جائے گی، صرف چند این او سی باقی ہیں دو سے تین سال میں یہ منصوبہ مکمل کر لیا جائے گا جس سے بھاری ٹریفک شہر سے باہر منتقل ہوگی اور ٹریفک جام اور حادثات میں کمی آئے گی۔
وزیراعلیٰ سندھ نے اعلان کیا کہ رواں سال کراچی میں تقریباً 300 ارب روپے کے ترقیاتی منصوبے شروع کیے جائیں گے۔ انہوں نے بتایا کہ لوکل گورنمنٹ، کے ایم سی، کے ڈی اے، ٹرانسپورٹ، واٹر کارپوریشن اور سالڈ ویسٹ مینجمنٹ سمیت مختلف ادارے ان منصوبوں پر کام کریں گے۔
انہوں نے کہا کہ بلدیہ کو سڑکوں کی مرمت کے لیے اضافی فنڈز فراہم کیے جا رہے ہیں کابینہ نے آٹھ ارب روپے اور تیرہ ارب روپے کے دو بڑے منصوبوں کی منظوری دے دی ہے تاکہ شہر کی بڑی اور چھوٹی سڑکوں کی حالت بہتر بنائی جا سکے کراچی کی ترقی حکومت کی اولین ترجیح ہے اور کسی بھی منصوبے میں غیر ضروری تاخیر یا سستی برداشت نہیں کی جائے گی۔