Category: کراچی

وفاقی وزیرِ صحت مصطفیٰ کمال کا کہنا ہے کہ ہمارے دور میں کراچی دنیا کے تیزی سے ترقی کرنے والے 12 ممالک میں شامل ہوگیا تھا، آج شہر تباہ حال ہے، ہم اچھے نہیں مگر بروں میں کم برے ہیں،

شہر قائد کراچی میں پریس کانفرنس کرتے ہوئے وفاقی وزیر صحت مصطفیٰ کمال کا کہنا تھا کہ کراچی کو درست کرنے کا وقت آ چکا ہے کیونکہ اس شہر کی ترقی براہِ راست پاکستان کی معاشی مضبوطی سے جڑی ہوئی ہے،چھ ماہ قبل وزارتِ صحت کی ذمہ داری سنبھالی اور انہیں متعدد انتظامی و پالیسی چیلنجز کا سامنا ہے، تاہم خدمتِ خلق ہی ان کی سیاست کا بنیادی مقصد رہا ہے۔ ماضی میں کیے گئے ترقیاتی منصوبے کسی دباؤ یا مطالبے کے نتیجے میں نہیں بلکہ شہری ضروریات کو مدنظر رکھ کر مکمل کیے گئے،کراچی دودھ دینے والی گائے ہے، اسے چارہ تو کھلاؤ، آپ کو معاشی بحران سے آئی ایم ایف نہیں کراچی نکال سکتا ہے، پاکستان کی 50 فیصد سے زیادہ برآمدات کراچی سے ہوتی ہیں، کراچی کی افادیت سے کوئی انکار نہیں کرتا۔

مصطفیٰ کمال کا مزید کہنا تھا کہ کراچی کے 90 فیصد علاقوں میں پینے کا صاف پانی نہیں ہے، ہماری لائنوں کا پانی ہمیں ہی فروخت کر دیا جاتا ہے، کراچی کو ٹھیک کرنے سے کوئی انکار بھی نہیں کرتا، لیکن کراچی کب ٹھیک ہو گا یہ کوئی نہیں بتاتا،کراچی چلے گا تو پاکستان چلے گا، ہمیں نظام ٹھیک کرنا ہے اور نظام ملک کا آئین ہے، ترقی یافتہ ملکوں میں مقامی حکومتوں کا نظام ہے، ہمارے ہاں مقامی حکومتوں کا نظام فراڈ ہے،کوئی اپنے لیڈر کے خلاف نہیں جاتا، ہماری واحد پارٹی ہے جس نے اپنے لیڈر کو فارغ کیا،میرے پاس کام کرنے کے لیے 12 نہیں 24 گھنٹے ہیں۔ میں آج بھی اپنے افسروں کو سُلا کر سوتا ہوں ۔

سندھ کے سینئر صوبائی وزیر،شرجیل میمن نے کہا ہے کہ کراچی کے لئے ڈبل ڈیکر بسیں بندرگاہ پر پہنچ گئی ہیں، محکمہ ٹرانسپورٹ حکومت سندھ کی جانب سے ڈبل ڈیکر بسیں جلد سڑکوں پر لائی جائیں گی،

شرجیل میمن کا کہنا تھا کہ سندھ حکومت عوام کو جدید، آرام دہ اور باوقار سفری سہولیات فراہم کرنے کے اپنے عزم کی جانب ایک اور اہم قدم بڑھا رہی ہے،کراچی کے لیے ڈبل ڈیکر بسیں بندرگاہ پر پہنچ چکی ہیں اور انشاءاللہ بہت جلد شہر کی سڑکوں پر نظر آئیں گی، ڈبل ڈیکر بسوں کی آمد کراچی کے پبلک ٹرانسپورٹ نظام میں ایک مثبت اور تاریخی اضافہ ہے، جو شہریوں کے لیے سفر کو نہ صرف سہل بلکہ خوشگوار بھی بنائے گا۔ یہ بسیں جدید سہولیات سے آراستہ ہوں گی اور بڑھتی ہوئی آبادی و ٹریفک کے دباؤ کو کم کرنے میں اہم کردار ادا کریں گی،محکمہ ٹرانسپورٹ حکومتِ سندھ تمام انتظامی اور تکنیکی مراحل مکمل کر رہا ہے، تاکہ یہ ڈبل ڈیکر بسیں جلد از جلد سروس میں لائی جا سکیں۔ سندھ حکومت کا مقصد کراچی کو ایک جدید، منظم اور ماحول دوست شہر بنانا ہے، جہاں عوام کو عالمی معیار کی سفری سہولیات میسر ہوں

وزیراعلیٰ سندھ مراد علی شاہ نے صوبے میں 7 روزہ پولیو مہم کا افتتاح کردیا۔

کراچی میں پولیو مہم کے افتتاح کے موقع پر مرادعلی شاہ نے کہا کہ 15 دسمبر سے شروع ہونے والی 7 روزہ مہم سندھ کے 30 اضلاع کی ایک ہزار 345 یوسیز میں چلائی جائے گی جس دوران ایک کروڑ 6 لاکھ بچوں کو پولیو سے بچاؤ کے قطرے پلائے جائیں گے،پوری دنیا نے اسی طرح اس مرض سے چھٹکارا پایا ہے، یہ شرمندگی کاباعث ہے کہ دنیا میں صرف پاکستان اور افغانستان میں پولیو ہے، اس کا صرف ایک علاج ہے کہ ہم پولیو سے بچاؤ کے قطرے پلائیں، دیگر مسلم ممالک اسلامی نے بھی بچوں کو پولیو کے قطرے پلا کر یہ مرض ختم کیا، پچھلے سال بھی 30 بچوں میں پولیو وائرس کی تصدیق ہوئی جن میں سے 9 کا تعلق سندھ سے تھا، یہ مرض کم ہوگیا تھا مگر کچھ سالوں سے دوبارہ بڑھا ہے، اس مہم میں 80 ہزار سے زائد فرنٹ لائن ورکرز حصہ لیں گے جن کی حفاظت کے لیے 21 ہزار اہلکار تعینات ہوں گے، والدین سے عوام سے اپیل ہے کہ وہ بچوں کو پولیو قطرے ضرور پلائیں،پولیو کے قطرے ہر بچے کے محفوظ اور روشن مستقبل کی ضمانت ہیں۔آئیے مل کر اپنے بچوں کو معذوری سے بچا کر صحت مند پاکستان بنائیں۔ پولیو ایک ایسا مرض ہے جو بچوں کے روشن مستقبل کو متاثر کر سکتا ہے۔ حکومت سندھ اس کے مکمل خاتمے کے لیے پُرعزم ہے اور ہر چند ماہ بعد انسداد پولیو مہم جاری رکھتی ہے تاکہ ہر بچہ محفوظ رہے آیئے مل کر پولیو کا خاتمہ کریں،ملک کی پہلی خاتون وزیراعظم شہید بے نظیر بھٹو نے بی بی آصفہ بھٹو زرداری کو پولیو کے قطرے پلائے، آج وہ خاتونِ اوّل اور ایم این اے ہیں یہ تسلسل ہے قیادت، خدمت اور عوامی اعتماد کا

ایس آئی یو نے کراچی میں بڑی کارروائی کی، 3 ہائی پروفائل ملزمان اور 3 شوٹرز سمیت 9 ملزمان کو گرفتار کرلیا گیا۔

ایس ایس پی ایس آئی یو عمران خان کے مطابق گرفتار ملزمان کا تعلق وصی لاکھو اور عبدالصمد کاٹھیاواڑی نیٹ ورک سے ہے۔عمران خان کا کہنا ہے کہ ملزمان بھتہ خوری کا نیٹ ورک چلا رہے تھے، وصی اللہ لاکھو اور عبدالصمد بیرون ملک چھپے ہوئے ہیں۔ایس ایس پی کے مطابق گرفتار ملزم ریحان الدین کار شو روم پر فائرنگ کے مقدمے میں ملوث تھا، ایک ماہ قبل جمشید کوارٹر تھانے میں بھتے کا مقدمہ درج ہوا تھا۔عمران خان نے بتایا کہ مجموعی طور پر 17 افراد کو حراست میں لیا گیا تھا، ابتدائی تفتیش میں گرفتار 8 افراد کا کریمنل ریکارڈ ملا ہے۔

کراچی، وفاقی تحقیقاتی ادارے (ایف آئی اے) امیگریشن نے جناح انٹرنیشنل ایئرپورٹ کراچی پر بروقت کارروائی کرتے ہوئے دبئی میں ملازمت دلانے کے نام پر لڑکیوں کو بیرون ملک اسمگل کرنے والے گروہ کے ایک اہم کارندے کو گرفتار کرلیا۔

ایف آئی اے حکام کے مطابق گرفتار ملزم کی شناخت شاہ زیب کے نام سے ہوئی ہے، جسے امیگریشن کلیئرنس کے دوران حراست میں لیا گیا۔ کارروائی اس وقت عمل میں لائی گئی جب وزٹ ویزے پر دبئی جانے والی ایک لڑکی نے امیگریشن عملے کو آگاہ کیا کہ اسے ہوٹل میں ملازمت دلانے کا جھانسہ دے کر بیرون ملک بھیجا جا رہا ہے۔لڑکی کی بروقت نشاندہی پر ایف آئی اے نے فوری تحقیقات کا آغاز کیا، جس کے نتیجے میں انسانی اسمگلنگ میں ملوث شاہ زیب کو گرفتار کرلیا گیا۔ ابتدائی تفتیش میں انکشاف ہوا ہے کہ شاہ زیب نے مرکزی اسمگلر ندیم سے ملنے والی رقم کے عوض لڑکی کے وزٹ ویزے، ہوائی ٹکٹ اور دیگر سفری دستاویزات (شومنی) کا انتظام کیا تھا۔رپورٹ کے مطابق ملزم شاہ زیب نے مجموعی طور پر 4 لاکھ 20 ہزار روپے وصول کیے، جن میں سے 40 ہزار روپے ایئرپورٹ پر کلیئرنس کے لیے اسلم نامی ایجنٹ کو دیے گئے۔ ایف آئی اے حکام کا کہنا ہے کہ اس نیٹ ورک میں مزید افراد کے ملوث ہونے کا بھی شبہ ہے، جن کی گرفتاری کے لیے چھاپے مارے جا رہے ہیں۔

ایف آئی اے کے مطابق گرفتار ملزم کو مزید قانونی کارروائی اور تفتیش کے لیے اینٹی ہیومن ٹریفکنگ سرکل منتقل کردیا گیا ہے، جہاں اس سے اسمگلنگ نیٹ ورک، سہولت کاروں اور بیرون ملک روابط کے حوالے سے تفصیلی پوچھ گچھ کی جا رہی ہے۔حکام نے عوام سے اپیل کی ہے کہ بیرون ملک ملازمت کے لیے صرف قانونی اور مستند ذرائع اختیار کریں اور کسی بھی مشکوک سرگرمی یا انسانی اسمگلنگ سے متعلق فوری طور پر ایف آئی اے کو اطلاع دیں۔