Category: کراچی

سندھ ہائی کورٹ نے اِی چالان کے خلاف درخواست پر حکم امتناع کی استدعا مسترد کردی

جسٹس عدنان اقبال نے ریمارکس دیے کہ حکومت ایسے کام کرتے وقت کم از کم لیگل ٹیم سے ہی مشاورت کرلیتی، رات کے چار بجے بھی شہری سگنل کھلنے کا انتظار کرے گا تو دائیں بائیں سے پستول والا آجائے گا،جسٹس عدنان اقبال نے ریمارکس دیتے ہوئے کہا کہ رات کے وقت ایئر پورٹ جانے والے شہری کا پرس، فون اور جان بھی جاسکتی ہے، حکومت کو قانون سازی کرتے وقت تمام پہلوؤں کو دیکھنا چاہیے،سرکاری وکیل نے عدالت میں کہا کہ اِی چالان کے بعد شہر بھر میں حادثات میں 50 فیصد کمی آئی ہے،

عدالت نے ریمارکس دیتے ہوئے کہا کہ اِی چالان سے متعلق نوٹیفکیشن آپ کی فائل میں کہاں ہے؟ آپ نے خبر بنوانی ہے تو بنوالیں لیکن وہ نوٹیفکیشن تو منسلک کریں جو چیلنج کیا ہے،عدالت نے سندھ حکومت سے اِی چالان اور جرمانوں کے نوٹیفکیشن سے متعلق رپورٹ 15 جنوری تک پیش کرنے کا حکم دے دیا۔

ایم کیو ایم پاکستان کے رہنما اور ممبر قومی اسمبلی فاروق ستار نے کہا ہےکہ 7 دسمبر کو سندھی کلچر ڈے کے نام پر کراچی کی شاہراؤں پر ریاست کے اندر ریاست قائم کی گئی۔

اپوزیشن لیڈر سندھ اسمبلی علی خورشیدی اور دیگر پارٹی رہنماؤں کے ہمراہ پریس کانفرنس کرتے ہوئے فاروق ستار کا کہنا تھا کہ سندھی کلچر ڈے کے نام پر کراچی کی شاہراہوں اور مختلف مقامات پر ہنگامہ آرائی، بلوہ اور تشدد کے واقعات ہوئے، سرکاری اور نجی املاک کو نقصان پہنچایا گیا، ملک دشمنی کا اظہار کیا گیا، اسلحہ لہرا لہرا کر دکھایا گیا، یہ افسوسناک اور شرمناک عمل تھا، جس کی جتنی مذمت کی جائے کم ہے،7 دسمبر کو کلچر ڈے کے نام پر ریاستی قانون کو پامال کیا گیا، ثابت کیا گیا کہ سات دسمبر کو سندھو دیش قائم کیا گیا، کئی لوگوں کو زخمی کیا گیا، وہاں پولیس مقابلہ ہوا، پولیس نے جب روکنے کی کوشش کی تو پولیس پر بھی حملے کیا گیا، یہ خوفناک اور خطرناک عمل تھا، جو مقدمہ بنایا گیا اس میں دہشتگردی، اقدام قتل اور دیگر دفعات شامل ہیں،سارے سانحے پر حکومت سندھ کے رد عمل کو دیکھنا تھا، ترجمان سندھ حکومت کی جانب سے چھوٹی چھوٹی چیزوں پر ردعمل دیا جاتا ہے لیکن اس پر کوئی رد عمل نہیں آیا، رنگے ہاتھوں گرفتار ملزمان کے حوالے سے عدالت کا رویہ بھی دیکھا، جن گرفتار ملزمان کو عدالت میں پیش کیا گیا تو عدالت نے خود ان کا مقدمہ لڑا، انہیں وکیل کی ضرورت ہی نہیں رہی، گرفتار اکثریت کو چھوڑ دیا گیا۔

فاروق ستار کا کہنا تھا ریلی کے شرکا نے گورنر کے خلاف غلیظ زبان استعمال کی، گورنر ہاؤس پہنچ کر ریلی کے شرکاء کا اصل مقصد گورنر سندھ کو حدف تنقید بنانا تھا، گورنر سندھ کی عزت کے ساتھ کھلواڑ کیا گیا، گورنر سندھ کی نسلوں کو تباہ کرنے کی دھمکی دی گئی مگر عدالتیں خاموش ہیں، اس پر بھی ہماری عدالتیں یہ رویہ اختیار کریں، پاکستان کی سالمیت کو چیلنج کیا گیا، کراچی کے امن کو تباہ کرکے فساد کی سازش کی گئی، ایک بار پھر بھائی سے بھائی کو لڑانے کی سازش ہو رہی ہے، کیا عدالت کسی دہشتگردی کے واقعے کے انتظار میں تھے، عدالت کہتی ہے معصوم لوگوں کی ریلی تھی، ہماری عدلیہ شاہ سے زیادہ شاہ کی وفادار ہوگئی، عدالت میں مقدمہ چلنے سے پہلے ہی دم توڑ گیا، شہر میں تشویشناک صورتحال ہے، حکومت سندھ سے وزیراعلیٰ اور ان کی کابینہ سے کہتے ہیں کسی کو قانون ہاتھ میں نہیں لینے دیں، جو شہر میں چین و سکون سے رہ رہے ہیں انہیں بے سکون نہ کیا جائے، سندھ ہائیکورٹ کو سارے واقعے کا سوموٹو نوٹس لینا چاہیے، ہائیکورٹ کو کوئی کمیشن قائم کرنی چاہیے اور اس واقعے کی تحقیقات ہونی چاہیے۔

سندھ کے سینئر وزیر شرجیل انعام میمن کی جانب سے خواتین کے لیے ای وی اسکوٹیز کی تقسیم کا دوسرے مرحلہ فوری شروع کرنے کا حکم دے دیا گیا

سینئر وزیر شرجیل انعام میمن کی زیر صدارت اہم اجلاس ہوا جس میں سیکریٹری ٹرانسپورٹ اسد ضامن، ایم ڈی ایس ایم ٹی اے کنول نظام بھٹو اور دیگر حکام شریک ہوئے،اجلاس میں صوبے بھر میں جاری اور آئندہ شروع ہونے والے ٹرانسپورٹ اور موبیلیٹی منصوبوں پر تفصیلی تبادلہ خیال کیا گیا،شرجیل میمن کا کہنا تھا کہ پنک اسکوٹیز اسکیم کے تحت بڑی تعداد میں خواتین کو جدید اور ماحول دوست سفری سہولت فراہم کی جائے گی،پنک اسکوٹیز کی سہولت سے خواتین کی آمد و رفت میں آسانی اور خودمختاری کو فروغ ملے گا، نئی الیکٹرک بسیں کراچی پہنچ چکی ہیں، جو جلد شہر کے مختلف روٹس پر چلائی جائیں گی، خیرپور، شکارپور اور حیدرآباد کے چار نئے روٹس پر سروے مکمل کر لیا گیا ہے، ان روٹس پر جلد بسیں چلائی جائیں گی، تمام نئے روٹس رواں ماہ ہی فعال کر دیے جائیں گے تاکہ ان اضلاع کے شہری بھی جدید سفری سہولت سے مستفید ہو سکیں، شہر کی مرکزی شاہراہوں پر مزید ڈبل ڈیکر بسوں کو شامل کیا جائے تاکہ ٹریفک کے دباؤ میں کمی لائی جا سکے ،

شرجیل انعام میمن کا مزید کہنا تھا کہ سندھ حکومت جدید، ماحول دوست اور پائیدار ٹرانسپورٹ نظام کے فروغ کے لیے سنجیدہ اقدامات کر رہی ہے، ای وی بسیں، ای وی اسکوٹیز، ڈبل ڈیکر بسیں اور ای وی ٹیکسی سروس کراچی اور دیگر شہروں کو ایک نئے دور میں داخل کریں گی، تمام منصوبے براہ راست عوامی سہولت سے جڑے ہوئے ہیں، ان کو مقررہ وقت میں مکمل کیا جائے ،

کراچی: شہرِ قائد کے علاقے گلشن اقبال کے ایک فلیٹ سے 3 خواتین کی لاشیں ملنے کے ہولناک واقعے کی تحقیقات میں نئے انکشافات سامنے آ رہے ہیں۔ پولیس کے مطابق واقعہ نہایت پیچیدہ نوعیت کا ہے اور تاحال خواتین کی موت کی حتمی وجہ سامنے نہیں آ سکی۔

پولیس کی ابتدائی تفتیش کے مطابق گھر کے سربراہ محمد اقبال نے خود پولیس ہیلپ لائن پر اطلاع دی تھی کہ گھر میں گیس بھر جانے سے خواتین کی حالت خراب ہے۔ تاہم پوسٹ مارٹم رپورٹ کے بعد اس ابتدائی مفروضے پر شکوک پیدا ہو گئے۔پولیس سرجن کا کہنا ہے کہ پوسٹ مارٹم کے دوران انکشاف ہوا کہ تین میں سے ایک خاتون کی لاش کم از کم دو روز پرانی تھی، جو اس بات کی طرف اشارہ کرتی ہے کہ خواتین کی موت ایک ہی وقت میں واقع نہیں ہوئی۔فلیٹ سے یاسین نامی نوجوان بھی نیم بے ہوشی کی حالت میں ملا جسے اسپتال منتقل کیا گیا۔ پولیس کے مطابق یاسین گھر کے سربراہ کا بیٹا ہے۔ اس سے جب پوچھ گچھ کی گئی تو وہ بیان دینے میں شدید تذبذب کا شکار رہا، جس کے باعث مزید شبہات پیدا ہوئے۔پولیس سرجن کا یہ بھی کہنا ہے کہ نوجوان کے خون میں مشکوک عناصر پائے گئے جو خواتین کی موت سے مماثلت رکھتے ہیں اور یہ معاملہ مزید پیچیدہ بناتا ہے۔

تحقیقات میں مشکوک حقائق سامنے آنے پر پولیس نے محمد اقبال اور ان کے بیٹے یاسین کو حراست میں لے لیا ہے۔ حکام کے مطابق دونوں سے تفتیش جاری ہے اور معاملے کے تمام پہلوؤں کا بغور جائزہ لیا جا رہا ہے۔پولیس کا کہنا ہے کہ دورانِ تفتیش یہ بات بھی سامنے آئی ہے کہ گھر کا سربراہ محمد اقبال مبینہ طور پر جادو ٹونے کا کام کرتا تھا۔ اس دعوے کی مزید چھان بین کی جا رہی ہے۔تحقیقات میں یہ بھی سامنے آیا ہے کہ متاثرہ خاندان نے ڈیڑھ کروڑ روپے سے زائد قرض لے رکھا تھا، جبکہ گھر اور ایک گاڑی بھی کرائے پر لی گئی تھی۔ یاسین کا تعلق پراپرٹی کے شعبے سے بتایا جاتا ہے۔پولیس نے مزید بتایا کہ گھر سے ایک خط بھی برآمد ہوا ہے جس کی جانچ پڑتال جاری ہے اور جو ممکنہ طور پر معاملے کی گتھی سلجھانے میں اہم کردار ادا کر سکتا ہے۔

پولیس کے مطابق خواتین کی مکمل پوسٹ مارٹم رپورٹ آنے کے بعد ہی موت کی اصل وجہ سامنے آ سکے گی۔ تاہم یہ بات واضح ہو چکی ہے کہ تینوں خواتین کی اموات ایک ہی وقت میں نہیں ہوئیں۔یاد رہے کہ تین روز قبل گلشن اقبال کے ایک فلیٹ سے ماں، بیٹی اور بہو کی لاشیں برآمد ہوئی تھیں۔ گھر کے سربراہ محمد اقبال نے ہی اطلاع دی تھی، مگر ابتدائی تحقیقات میں ہی معاملہ مشکوک قرار دیا گیا تھا۔