Category: کراچی

کراچی : سندھ بھر میں سی این جی اسٹیشنز (کل) جمعہ سے دوبارہ بند کرنے کا فیصلہ سوئی سدرن گیس کمپنی کے فرانچائز صوبہ سندھ کے تمام سی این جی اسٹیشنز بشمول آر ایل این جی پمپز کو جمعہ 25 مارچ صبح 8 بجے سے پیر 28 مارچ صبح 8 بجے تک 72 گھنٹوں کے لیے گیس کی فراہمی بند رہے گی ۔

ایس ایس جی سی کے مطابق گیس بند کرکے گھریلو صارفین کی گیس کی ضروریات کو پورا کرنا ہے۔ایس ایس جی سی کا کہنا ہے کہ تمام جنرل انڈسٹری اور کیپٹو پاور کو اتوار 27 مارچ صبح 8 بجے سے اگلے 24 گھنٹے کیلئے گیس کی ترسیل بند رہے گی۔خیال رہے کہ اس سے قبل 11 مارچ کو ایس ایس جی سی نے سندھ بھر میں سی این جی 72 گھنٹوں کے لیے بند کی تھی۔

کراچی : کراچی میں گورنر سندھ عمران اسماعیل اور وزیراعلیٰ سندھ مراد علی شاہ نے مزار قائد پر حاضری دی، فاتحہ خوانی کی اور پھول بھی رکھے، صوبائی وزراء بھی اٴْن کے ہمراہ موجود تھے۔
وزیراعلیٰ سندھ نے کہا 23 مارچ 1940 کے بعد ملک کے حصول کے لئے ایک منظم جدوجہد کی گئی تھی، یہ ملک بڑی جدوجہد کے بعد حاصل کیا اور اس کی حفاظت ہمارا فرض ہے ۔

انہوں نے کہاکہ ہم سب کو ملک اور جمہوریت کی مضبوطی کے لئے کام کرنا چاہیے۔وزیراعلیٰ نے کہا کہ ہمیں اپنے ملک میں تمام مذاہب اور عقائد کے لوگوں کا احترام اور عزت کرنی چاہیے،آج کے دن ہمیں پاکستان کی سلامتی کا عہد کرنا چاہیے، ہمارا ملک کافی مشکلات سے گزرا ہے اور اب بھی مسائل کا سامنا ہے۔انہوں نے کہا کہ آج کے دن ہمیں اپنے کشمیری بھائیوں کو یاد رکھنا چاہیے،کشمیر میں ظلم اور بربریت جاری ہے،ہم مل کر اپنی سرحدوں اور آئین کا تحفظ کریں گے۔

کراچی : گورنر سندھ عمران اسماعیل نے کہا ہے کہ اگر صدر مملکت کہیں گے تو پھر مجھے گورنر راج لگانا ہو گا۔

کراچی میں مزار قائد پر حاضری کے موقع پر میڈیا سے گفتگو کرتے ہوئے عمران اسماعیل نے کہا کہ آج کل ضمیر کے جاگنے اور سونے کا سیزن آیا ہوا ہے۔ایک سوال کے جواب میں عمران اسماعیل کا کہنا تھا کہ اتحادیوں کا حق ہے وہ جس طرف بھی کھڑے ہوں، ہر ایک نے اپنی پارٹی کے فیصلے پر عمل کرنا ہے۔

سندھ میں گورنر راج سے متعلق سوال پر عمران اسماعیل نے کہا کہ صدر مجھے کہیں کہ آپ گورنر راج لگا دیں تو مجھے لگانا ہو گا تاہم فی الحال گورنر راج کے حوالے سے ایسی کوئی صورت حال نہیں ہے۔خیال رہے کہ چند روز قبل وزیر داخلہ شیخ رشید نے اپنے ایک بیان میں کہا تھا کہ میں نے وزیراعظم عمران خان کو مشورہ دیا ہے کہ وہ سندھ میں گورنر راج نافذ کر دیں تاہم وزیراعظم کی قانونی ٹیم نے سندھ میں گورنر راج کی مخالفت کر دی تھی جس کے بعد عمران خان نے سندھ میں گورنر راج نافذ کرنے کے مشورے کو مسترد کر دیا تھا۔

کراچی : پاکستان تحریک انصاف کے رکن قومی اسمبلی عامر لیاقت نے کہا ہے کہ جو ہونے والا ہے وہ نہیں ہونے والا، جو نہیں ہونے والا وہ ہونے والا ہے، عمران خان نے مجھے نہیں میں نے ان کو قائل کیا، عمران خان تحریک عدم اعتماد کی ناکامی کیلئے پرامید تھے۔

تفصیلات کے مطابق وزیراعظم عمران خان سے رکن قومی اسمبلی عامر لیاقت نے اپنی اہلیہ کے ہمراہ ملاقات کی، ملاقات میں وفاقی وزیر اسد عمر اور علی زیدی بھی شریک تھے۔

انہوں نے کہا کہ وزیراعظم سے ملاقات میں ملک و قوم کے حوالے سے بہت باتیں ہوئیں، عمران خان پرامید ہیں کہ تحریک عدم اعتماد ناکام ہو گی۔

عامر لیاقت نے مزید کہا کہ عمران خان نے مجھے شادی کی مبارکباد دی، اہلیہ کے ہمراہ ان سے ملاقات کی۔ انہوں نے سیاسی صورتحال پر مزید کہا کہ جو ہونے والا ہے وہ نہیں ہونے والا، جو نہیں ہونے والا وہ ہونے والا ہے، عمران خان نے مجھے نہیں میں نے ان کو قائل کیا، مجھے کوئی نہیں میں قائل کرتا ہوں۔

قبل ازیں دو روز پہلے عامر لیاقت نے اپنے ٹویٹر پروزیراعظم عمران خان کے نام اپنے ویڈیو پیغام میں کہا کہ سندھ ہاؤس پر جو حملہ ہوا ہے اس نے پی ٹی آئی کی ساکھ کی دھجیاں بکھیر رکھ دی ہیں، ہم جمہوریت کے پاسدار نہیں رہے، ہم شدت پسند ہوگئے ہیں، جن کو جانا ہے ان کو جانے دیجئے،جو آپ کے ہیں وہ آپ کے ساتھ ہیں، آپ نے خود کہا تھا کہ اپوزیشن میں بیٹھنا پڑا تو بیٹھوں گا، کوئی بات نہیں اپوزیشن بھی اچھی چیز ہوتی ہے، وزیراعظم کو چاہیے سندھ ہاؤس میں جو ہوا اس کی مذمت کی جانی چاہیے۔
سندھ ہاؤس میں جو بھی ارکان اسمبلی تھے وہ منحرف تھے لیکن وہ ہمارے اپنے تھے۔ یہ مولاجٹ جو آئے ہیں جن کے ہاتھوں میں گنڈاسے ہیں، ان کو ذرا بٹھائیں اور ان کو کہیں جن کے پاس تیر ہیں اگر انہوں نے برسانے شروع کردیے تو بڑا مسئلہ ہوجائے گا۔ ہمیں تو کبھی آپ نے پوچھا ہی نہیں، آپ نے رحمت اللعالمین ﷺ ٹرسٹ بنایا لیکن اس میں ہمیں پوچھا نہیں۔ ایک بات میں آپ سے اورکہنا چاہتا ہوں کہ آپ اگر یہ کام کرنے جا رہے ہیں تو مت کیجئے گا، اطلاع ہے کہ آپ لیفٹیننٹ جنرل شاہین محمود کو آرمی چیف بنانا چاہتے ہیں ، اگر آپ جاتے جاتے ایسا کریں گے تو سب زیادہ خطرناک آواز عامر لیاقت کی اٹھے گی۔

کراچی : پاکستان تحریک انصاف کے رکن قومی اسمبلی عامر لیاقت نے آج وزیراعظم عمران خان سے ملاقات کی ۔

عامر لیاقت نے اہلیہ کی وزیراعظم کے ساتھ ملاقات کی تصویر بھی شئیر کر دی۔تصویر میں وفاقی وزیر اسد عمر اور وفاقی وزیر علی زیدی بھی موجود تھے۔عامر لیاقت نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ وزیراعظم عمران خان سے ملاقات کے دوران کچھ دیر کے لیے میری اہلیہ سیدہ دانیہ عامر بھی شریک ہوئیں،انہوں نے کہا کہ وزیراعظم نے شادی کی مبارک باد دی اورپوچھا “عامر خیال رکھتا ہے یا نہیں” دانیہ نے مسکرا کر کہا “بہت خیال رکھنے والے ہیں، آپ کا بھی رکھتے ہیں۔

وزیراعظم سے ملاقات کے بعد عامر لیاقت نے صحافیوں سے بھی گفتگو کی۔

صحافی نے سوال کیا کہ بھابھی نے عمران خان سے آپ کی دوستی کروا دی ہے ؟ جس کا جواب دیتے ہوئے انہوں نے کہا کہ عمران خان سے پہلے بھی دوستی تھی،دوستی ختم نہیں ہوئی تھی لیکن ابھی ووٹ سے متعلق کوئی فیصلہ نہیں ہوا۔انہوں نے کہا کہ وزیراعظم سے ملاقات میں ملک و قوم کے حوالے سے بہت باتیں ہوئیں،عمران خان پرامید ہیں کہ تحریک عدم اعتماد ناکام ہو گی۔

عامر لیاقت نے مزید کہا کہ عمران خان نے مجھے شادی کی مبارکباد دی، اہلیہ کے ہمراہ ان سے ملاقات کی۔انہوں نے سیاسی صورتحال پر مزید کہا کہ جو ہونے والا ہے نہیں ہونے والا ،جو نہیں ہونے والا تھا وہ ہونے والا ہے۔

کراچی : چیئرمین پیپلزپارٹی بلاول بھٹو نے کہا ہے کہ وزیراعظم کو ہٹانے کے لیے میں گیٹ نمبر 4 کو نہیں کھٹکھٹاوں گا بلکہ اس غیر جمہوری شخص کا مقابلہ جمہوری طریقے سے کریں گے۔

مالاکنڈ میں عوامی جلسے سے خطاب کرتے ہوئے چیئرمین پیپلزپارٹی نے کہا کہ ہم وقت کے ظالم، فرعون اور یزید کا مقابلہ کر رہے ہیں، پہلے دن سے کٹھ پتلی اور سلیکٹڈ کا مقابلہ کر رہے ہیں۔ انہوں نے کہا کہ عوام کو مبارکباد دیتا ہوں کہ عمران خان اپنی اکثریت کھو چکے ہیں اور سابق وزیراعظم بن چکے ہیں، عمران خان بزدل ہیں اور مقابلے سے بھاگ رہے ہیں۔

بلاول بھٹو نے کہا کہ خود کو خان کہلاتا ہے لیکن یہ کہاں کا خان ہے، خان تو عزت، غیرت اور بہادر ہوتے ہیں لیکن یہ صرف بنی اور فنی گالہ کا خان ہوسکتا ہے۔ انہوں نے کہا کہ ہم نے 8مارچ کو عدم اعتماد جمع کروائی لیکن بزدل نے پہلے پارلیمنٹ لاجز پر حملہ کروایا اور اجلاس بلانے میں تاخیر کروائی، ہم بزدل کو بھاگنے نہیں دیں گے۔
چیئرمین پی پی نے کہا کہ میری اردو زبان پر تنقید کرنے والے اور مجھے زبان سیکھانے والے وزیراعظم پہلے اپنے بچوں کو اردو سیکھائیں جبکہ مولانا فضل الرحمان سے متعلق برے القابات کہنا وزیراعظم کے شایان شان نہیں۔ مولانا فضل الرحمان کو ڈیزل کہنے والے نے ملک میں پیٹرول اور ڈیزل کی قیمتیں آسمان تک پہنچا دیں جبکہ ملک میں ہونے والی مہنگائی کی کوئی فکر نہیں۔

فارن فنڈنگ کیس سے متعلق انہوں نے کہا کہ الیکشن کمیشن نے کہہ دیا ہے کہ عمران خان کو اسرائیل اور بھارت نے فنڈنگ کی اور الزام دوسروں پر فارنگ فنڈنگ کا لگاتے ہیں، وزیراعظم بیرونی سازش کا سب سے بڑا حصہ ہے۔

کشمیر پر عمران خان نے جو سودا کیا وہ سازش نہیں تو کیا ہے، وزیراعظم کہتے ہیں کہ مودی کا کامیاب ہوگا اور کشمیر کا مسئلہ حل ہوگا۔ عوام کو جلد اس وزیراعظم سے نجات دلائیں گے، آئندہ انتخابات میں سلیکشن نہیں ہوگا۔