کراچی میں بادلوں نے ڈیرے ڈال دیئے ہیں اور مختلف علاقوں میں بوندا باندی شروع ہوگئی ہے۔

تفصیلات کے مطابق کراچی میں اسکیم 33 اور اطراف، لسبیلہ، گرومندر، ایم اے جناح روڈ پر ہلکی بوندا باندی ہورہی ہے۔

محکمہ موسمیات کے مطابق کراچی میں آج سے ہلکی بارش کا سلسلہ کل رات تک وقفے وقفے سے جاری رہ سکتا ہے۔
محکمہ موسمیات کا کہنا ہے کہ کراچی میں 28 دسمبر سے سردی کی نئی لہر آنے کی توقع ہے، سردی کی نئی لہر کے اثرات 5 جنوری تک برقرار رہ سکتے ہیں، سردی کی لہر میں درجہ حرارت 10 ڈگری سے نیچے بھی جاسکتا ہے۔

محکمہ موسمیات کے مطابق آج دن بھر مطلع ابر آلود رہنے کا امکان ہے، کراچی میں آج کم سے کم درجہ حرارت 17 ڈگری سینٹی گریڈ ریکارڈ ہوا، آج کم سے کم حدِ نگاہ ایک کلومیٹر رہی جب کہ آج ذیادہ سے ذیادہ درجہ حرارت 26 ڈگری سینٹی گریڈ رہنے کی توقع ہے۔

کراچی : شہرقائد میں جمعےکو مہاجر کلچر ڈے منایا گیا، اور شہر کے مختلف علاقوں سے ریلیاں نکالی گئیں ۔

نوجوان مہاجر کے تحت کریم آباد سے مزار قائد تک ریلی نکالی گئی ، ریلی کی قیادت آرگنائزر زوہیب اعظم، حسن خان، عمیر مصودی نے کی،شر کا نے مہاجر ڈے کی مناسبت سے لباس زیب تن کئے ہوئے تھے، مزار قائد پر خطاب کرتے ہوئے ایم کیو ایم کے رہنما اور رکن سندھ اسمبلی محمد حسین نے کہا کہ مہاجر حقوق کے لئے ایک ہونا ہوگا 2 سال سے نوجوان کامیاب مہا کلچر ڈے منا رہے ہیں ان کومبارک دیتا ہوں ، پی ٹی آئی کے رکن قومی اسمبلی ڈاکٹر عامر لیاقت حسین نے کہا کہ تمام مہاجروں کو مبارکباد پیش کرتا ہوں ہمیں اقلیت کا طعنہ دینے والے سن لیں ہم نے تمہیں بولنا سکھایا ہم نے تمہیں سندھ میں رہنا سکھایا جب طالبان سے بات ہوسکتی تو ایم کیو ایم قائد سے بھی بات ہوسکتی ہے، ڈاکٹر سلیم حیدر نے کہا کہ نوجوان قوم کہ سپاہی ہے مہاجر قوم سب سے تعلیم یافتہ ہیں مہاجر سب سے زیادہ طاقتور ہے سپر پاور مہاجر پاور مہاجر کلچر ہمیشہ زندہ رہے گا، ایم کیو ایم بحالی کمیٹی کے سر براہ ڈاکٹر فاروق ستار آج ایک رہنا بولتا ہے گھبرانا نہیں ہے ہمارے آباواجداد نے ملک بنانا شروع کیا تو کہا تھا گھبرانا نہیں اور ملک بنادیا جو ملک کے حالات ہے اس میں ہمارا کوئی ہاتھ نہیں ہے، دوسری جانب ٹیم مہاجر پاکستان کے زیر اہتمام کراچی پریس کلب پر مہاجر ڈے کی تقریب کا انعقاد کیا گیا جس سے مختلف رہنمائوں نے خطاب کیا، آرگنائزر احسن قریشی نے کہا کہ مہاجر ڈے پر مہاجروں کو متحد کرنے کی کوشش کررہے ہیں، ہر قوم اپنی ثقافت کا دن مناتی ہے،ہمارا مقصد بھی اپنی ثقافت کو اجاگر کرنا ہے۔

کراچی : ڈی ایم سی کورنگی کی جانب سے کرسمس پر مسیحی بستیوں اور گرجا گھروں پر مثالی بلدیاتی انتظامات ،مسیحی رہنمائوں اور عوام کو انتظامات پر ایڈمنسٹریٹر اور میونسپل کمشنر DMC کورنگی سے اظہار تشکر ،ضلع کورنگی کی حدود میں شاہ فیصل ،ملیر ماڈل ،کورنگی اور لانڈھی کے گرجا گھروں اور مسیحی آبادیوں میں کرسمس کے موقع پر صفائی وستھرائی ،روشنی کے انتظامات کی بہتری کے حوالے سے انتظامات منتظمین کی باہمی مشاورت کے ساتھ انجام دیا گیا ۔

ایڈمنسٹریٹر ڈی ایم سی کورنگی ساجدہ قاضی نے میونسپل کمشنر ارشاد احمد کے ہمراہ ضلع کورنگی کا تفصیلی دورہ کرکے گرجا گھروں کے اطراف ڈی ایم سی کورنگی کی جانب سے کرسمس کے حوالے سے جاری انتظامات کا معائنہ کیا اس موقع پر ڈائریکٹر ہیلتھ سروسز سلیم رضا ،XENایم اینڈ ای جاوید بھائیو ،ڈائریکٹر انفارمیشن ایاز محمد خان اور دیگر بھی موجود تھے ،ایڈمنسٹریٹر ساجدہ قاضی نے مسیحی رہنمائوں سے ملاقات کی اور اُن سے انتظامات پر تبادلہ خیال کیا اس موقع پر مسیحی رہنمائوں اور عوام نے ڈی ایم سی کورنگی کی جانب سے انتظامات پر اطمینان کا اظہار کیا ۔

کراچی : پاکستان کے عالمی شہرت یافتہ کراچی کے فنکار، میزبان اور مزاحیہ اداکار موئن اختر کی 72 ویں سالگرہ پر گوگل نے اپنے خاکے (ڈوڈل) سے انہیں ایک شاندار خراجِ تحسین پیش کیا ہے۔

جیسے ہی 23 دسمبر کا دن ختم ہوا رات بارہ بجے کےبعد گوگل کے اسکرین پر موئن اختر کا ڈوڈل نمایاں ہوگیا۔ گوگل نے کئی ماڈلوں کے ٹی وی پر اپنا نام اور موئن اختر کے کرداروں والی تصاویر دکھائی ہیں۔‎
موئن اختر اپنے زبردست مشاہدے ٹائمنگ، ذہانت اور برجستہ اداکار کی باعث نہ صرف پاک وہند بلکہ دنیا بھر میں عالمی شہرت رکھتے تھے۔ انہوں نے لاتعداد ڈراموں، اسٹیج شو، فلموں اور دیگر پلیٹ فارم پر اپنے فن کا جادو جگایا۔ انور مقصود کے لکھے ہوئے شاندار پروگرام لوز ٹاک میں انہوں ںے سینکڑوں کردار ادا کئے جو ایک سے بڑھ کر ایک تھے اور امر ہوگئے۔‎
24 دسمبر 1950 میں کراچی میں پیدا ہونے والے موئن اختر نے 14 برس کی عمر سے ہی تھیئٹر پر کام شروع کردیا تھا۔ انہوں نے شیکسپیئر کے ڈراموں میں اپنی شاندار اداکاری کی۔ پی ٹی وی پر انتظار فرمائیے میں موئن اخترکا کردار بہت سراہا گیا ۔

ان کے مشہور ڈراموں میں روزی، بکرا قسطوں پہ، کچھ کچھ سچ مچ، آنگن ٹیڑھا، بندرروڈ سے کیماڑی، مرزا اور حمیدہ، ہاف پلیٹ، اور لاتعداد اسٹیج پروگرام بھی قابلِ ذکر ہے۔ اس کے علاوہ موئن اختر بہت اچھے گلوکار بھی تھے۔‎
22 اپریل 2011 کو ہارٹ اٹیک سے موئن اختر اس جہانِ فانی سے رخصت ہوئے۔

کراچی: ‎کئی ممالک میں تیزی سے پھیلنے والے کورونا وائرس کے نئے ویرینٹ ’اومیکرون‘ کے کراچی میں مزید 6 مشتبہ کیسز سامنے آگئے۔‎

محکمہ صحت کے ذرائع کے مطابق شہر قائد میں کورونا وائرس کے نئے ویرینٹ ’اومیکرون‘ کے مزید 6 مشتبہ کیسز سامنے آگئے، تمام افراد کے نمونے نجی اسپتال پہنچا دیئے گئے ہیں اور تصدیق کے لئے جینوم سیکویسنگ شروع کردی گئی ہے۔‎
محکمہ صحت کا کہنا ہے کہ 4 افراد جنوبی افریقا اور 2 برطانیہ سے کراچی پہنچے ہیں اور تمام افراد میں کورونا کی تصدیق ہوگئی ہے ۔

واضح رہے کہ 9 دسمبر کوپاکستان میں کورونا وائرس کے نئے ویرینٹ اومیکرون کا پہلا کیس سامنے آیا تھا اور ادارہ صحت (این آئی ایچ) کی جانب سے تصدیق بھی کی گئی تھی جب کہ کچھ روز پہلے بھی ایک اور امیکرون کا کیس بھی رپورٹ ہوا تھا اور متاثرہ شخص اسپتال سے فرار ہوگیا تھا، بعد ازاں اسے دوبارہ قرنطینہ کر دیا گیا تھا ۔

کراچی: کے الیکٹرک کے ٹیرف میں 5 روپے 49 پیسے فی یونٹ اضافے کا امکان ہے۔

تفصیلات کے مطابق کراچی کے شہریوں کے لیے بری خبر ہے، کیوں کہ کے الیکٹرک کے ٹیرف میں 5 روپے 49 پیسے فی یونٹ اضافے کا امکان ہے، اس حوالے سے کے الیکٹرک نے نیپرا کو سمری بھجوا دی ہے۔ نیپرا کے الیکٹرک کی درخواست پر 3 جنوری 2022 کو سماعت کرے گا۔

کے الیکٹرک کی جانب سے بھیجی گئی سمری میں نومبر کے لیے فیول ایڈجسٹمنٹ کی مد میں 31 پیسے فی یونٹ اضافے کی درخواست کی گئی ہے، اور سہہ ماہی ایڈجسٹمنٹ کی مد میں 5 روپے 18 پیسے فی یونٹ اضافے کی سفارش کی گئی ہے، جب کہ جولائی سے ستمبر تک کی سہہ ماہی کے لیے بجلی کی قیمتوں میں اضافہ مانگا گیا ہے۔