Category: کراچی

کراچی: فریئر کے علاقے میں پاکستانی نژاد امریکی ڈاکٹر کے ساتھ زیادتی کا واقعہ پیش آیا ، پولیس نے کارروائی کرتے ہوئے ملزم کو گرفتار کرلیا جبکہ متاثرہ لڑکی کا طبی معائنہ بھی کرایا گیا ۔

ذرائع کا کہنا ہے کہ ملزم کا تعلق بلوچستان کے ایک سیاسی بااثر گھرانے سے ہے ، فریئر تھانے میں متاثرہ لڑکی (ن) نے ایف آئی آر نمبر 290/2021 بجرم دفعہ 376/506/337 اے کے تحت درج کرائی جس میں اس نے بتایا کہ 14 اور 15 نومبر کی شب اس کا دوست یاسر شاہ اپنی ریوو گاڑی میں اسے اپنے گھر چوہدری خلیق الزماں روڈ پر قائم فلیٹ پر لے گیا اور اسے زبردستی زیادتی کا نشانہ بنا ڈالا ، بعد میں اسے وٹز گاڑی سے جان سے مارنے کی دھمکیاں دینے کے بعد ایک نامعلوم سڑک پر پھینک کر فرار ہوگیا ۔

ثانوی تعلیمی بورڈ کے چیئرمین سید شرف علی شاہ نے ان مشکل حالات میں والدین، اسکول مالکان اور اسکول انجمنوں کی سہولت کو مدنظر رکھتے ہوئے سال 2022کی امتحانی فیسوں میں کمی کا اعلان کردیا۔

ثانوی تعلیمی بورڈ کراچی کے چیئرمین سید شرف علی شاہ نے کہا ہے کہ کراچی میں کورونا وبا کے باعث بحران کی وجہ سے والدین، طلبہ و طالبات ،بورڈ سے الحاق شدہ اسکول مالکان اور اسکول انجمنوں کی طرف سے یہ مطالبہ سامنے آرہا تھا کہ ثانوی تعلیمی بورڈ سال 2022 کی امتحانی فیسوں میں کمی کا اعلان کرے تاکہ طلبہ و طالبات اور والدین کو کچھ حد تک ریلیف مل سکے۔

یہ اس لیے کیا گیا ہے کہ طلبا وطالبات اور والدین آسانی کے ساتھ امتحانی فیسیں ادا کر سکیں اور انھیں تعلیمی اخراجات پورا کرنے کیلیے کسی بھی مشکلات کا سامنا نہ ہو۔

انھوں نے کہا کہ ان حالات میں اسکول مالکان بھی طلبہ و طالبات اور والدین کو آسانی فراہم کرنے کیلیے فیسوں میں کمی کرنے پر نظرثانی کریں یا طلبہ وطالبات کو کچھ حد تک ریلیف فراہم کریں تاکہ ان کا کسی بھی طرح کا تعلیمی نقصان نہ ہو۔

کراچی : شرجیل میمن کا ای سی ایل سے نام نکالنے کی درخواست منظور ،10لاکھ روپے زر ضمانت جمع کرانے کا حکم
شرجیل میمن کے بیرون ملک جانے پر اعتراض نہیں، بیرون ملک سفر کرناان کا بنیادی حق ہے،زر ضمانت کے عوض اجازت دے دی جائے، نیب پراسیکیوٹر

سندھ ہائیکورٹ نے رہنما پیپلزپارٹی شرجیل میمن کانام عارضی طور پر ای سی ایل سے نکالنے کی درخواست منظور کرتے ہوئے 10 لاکھ روپے کے مچلکے جمع کرانے کا حکم دے دیا۔پیرکوسندھ ہائی کورٹ میں جسٹس کے کے آغا کی سربراہی میں بینچ نے پیپلز پارٹی کے رہنما شرجیل میمن کی ای سی ایل سے نام نکالنے کی درخواست پر سماعت کی۔
وکلا نے عدالت میں موقف دیا کہ وفاق اور نیب کو شرجیل میمن کے بیرون ملک جانے پر اعتراض نہیں۔ پراسیکیوٹر نیب نے موقف دیا کہ بیرون ملک سفر کرنا شرجیل میمن کا بنیادی حق ہے۔شرجیل میمن کو زر ضمانت کے عوض اجازت دے دی جائے۔ اسسٹنٹ اٹارنی جنرل ارشاد بندھانی نے موقف اپنایا کہ ہمارا بھی یہی کہنا ہے۔ عدالت نے شرجیل میمن کو دبئی جانے کی اجازت دے دی۔
عدالت نے ریمارکس دیئے شرجیل میمن یکم اپریل 2022 سے قبل واپس آجائیں۔ عدالت نے شرجیل میمن کو 10 لاکھ روپے بطور زر ضمانت جمع کرانے کا حکم دیدیا۔ درخواستگزار کے وکیل راج علی واحد ایڈوکیٹ نے موقف اپنایا تھا کہ شرجیل میمن کو حکومت سندھ نے عرب امارات میں ہونیوالے فیسٹول کیلیے فوکل پرسن مقرر کیا ہے۔ فوکل پرسن کی حیثیت سے شرجیل میمن کو 15 نومبر سے فیسٹول میں شرکت کرنی ہے۔ شرجیل میمن ایکسپو میں سندھ حکومت کی نمائندگی کریں گے۔ نیب کے مطابق شرجیل میمن کیخلاف 2 ریفرنسز دائر ہوچکے اور 4 انکوائریاں جاری ہیں۔

کراچی : کراچی میں صدر کی مشہور کوآپریٹو مارکیٹ میں آگ سے متاثر ہونے والی دکانوں کی تعداد تاجروں نے 500 بتائی ہے۔

تفصیلات کے مطابق کوآپریٹو مارکیٹ کے تاجروں نے دعویٰ کیا ہے کہ مارکیٹ میں جلنے والی دکانوں کی تعداد 500 تک پہنچ گئی ہے، فائر فائیٹرز چند مقامات پر مسلسل آگ بجھانے میں مصروف ہیں۔تاجروں نے بتایاکہ گودام بھی جلے ہیں، مارکیٹ 90 فیصد جل چکی ہے اب تاجر مارکیٹ سے اپنا بچا کھچا سامان نکال رہے ہیں۔

ایک مقامی تاجر نے شکوہ کرتے ہوئے کہا کہ بڑا نقصان ہوگیا،مگر کوئی پوچھنے نہیں آیا، عمارت کے اندر آگ بجھانے کا کام جاری ہے اور دھواں اب بھی موجود ہے۔تاجروں نے بتایا کہ 10 منٹ میں پوری مارکیٹ میں آگ لگنے کا امکان نہیں تھا، کیمیکل ڈال کر آگ لگائی گئی ہے۔کوآپریٹو مارکیٹ کے تاجروں نے بتایا کہ بلڈر نے 1990 سے عمارت مکمل نہیں کی تھی، عمارت میں پارکنگ پر بھی تنازعہ تھا۔تاجروں نے نقصان کا تخمینہ 5 سے 10 ارب روپے کا بتایا ہے ۔

کراچی : ڈینگی کیسز سے متاثر علاقوں میں فوری طور پر اسپرے کرایا جائے ۔
معروف سماجی رہنما و ماہر تعلیم حنید لاکھانی نے صوبہ سندھ میں ڈینگی کے مریضوں میں اضافے پر تشویش کا اظہار کرتے ہوئے کہا ہے کہ جن اضلاع میں ڈینگی کیسز زیادہ رپورٹ ہورہے ہیں وہاں مچھر مار اسپرے ہر دوسرے روز ہنگامی بنیادوں پر کروایا جائے ایک رپورٹ کے مطابق ماہ رواں میں ڈینگی وائرس سے متاثر ہونے والے مریضوں کی تعداد 700سے بھی زیادہ ہوچکی ہے جبکہ رواں سال ڈینگی سے ایک درجن سے زائد لوگ جانبحق ہوچکے ہیں، ان خیالات کا اظہار انہوں نے حنید لاکھانی سیکرٹریٹ سے جاری کردہ بیان میں کیا، حنید لاکھانی نے کہا کہ ڈینگی بخار ایک خاص قسم کے مچھر کے کاٹنے سے ہوتا ہے جس کے بروقت علاج سے سنگین صورتحال سے بچا جا سکتا ہے ڈینگی کی علامات میں تیز بخار، جسم درد اور بخار کا دو سے زائد دن تک رہنا شامل ہے کیونکہ اس وقت ڈینگی وائرس پورے پاکستان میں پھیلا ہوا ہے اس لیئے بخار ہونے کی صورت میں ہر شہری اپنے معالج سے رابطہ کرے اور فوری طور پر ڈینگی کا ٹیسٹ کروائیں، بروقت تشخیص ہوجانے سے بیماری کا علاج کرنے میں آسانی ہوتی ہے اوراب تو ڈینگی سے نجات کے ادویات کے علاوہ دیسی طریقہ علاج بھی دریافت ہوچکے ہیں ، انہوں نے کہا کہ ڈینگی کے مریض کے لیئے پیرا سیٹا مول گولی نہایت اہم کا م کرتی ہے لیکن ہمارے ملک میں ایسی بدقسمتی ہے کہ اگر کو ئی وائرل مرض آجائے تو منافع خور اس سے بھی منافع اٹھانے کی کوشش کرتے ہیں اور مارکیٹ میں مصنوعی قلت پیدا کر کہ ناجائز منافع خوری کرتے ہیں، جب تک حکومتیں ایسے معاملات سے نمٹنے کے لیئے موثر اورجامع حکمت عملی نہیں بنائیں گی تب یہ مسائل معاشرے میں جنم لیتے رہیں گے اور غریب لوگ لٹتے رہیں گے ، انہوں نے مزید کہا کہ ڈینگی سے پیدا ہونے والی صورتحال میں عوام احتیاطی تدابیر اپنائیں پورے آستینوں والی شرٹس پہنیں، کھلے برتن میں پانی نہ رکھیں اور اگر رکھنا مجبوری ہو تو اس کوکسی چیز سے ڈھانپ دیں اور مغرب کے وقت گھروں سے باہر جانے سے پرہیزکریں ۔

کراچی : دھماکا خیز مواد سے نسلہ ٹاور کے انہدام کی لاگت 22 کروڑ روپے ہے ۔

نسلہ ٹاور کو دھماکا خیز مواد سے گرانے کے لیے ایک کمپنی نے 22 کروڑ روپے طلب کیے ہیں جبکہ دوسری کمپنی نے روایتی ذرائع سے توڑنے کے لیے مفت خدمات کی پیشکش کی ہے۔چنانچہ شہری انتظامیہ نے نسلہ ٹاور کے انہدام سے متعلق حتمی فیصلہ کرنے کے لیے سپریم کورٹ سے ہدایات مانگ لی ہیں۔اس ضمن میں ذرائع نے بتایاکہ کمشنر کراچی محمد اقبال میمن نے عدالت عظمی میں ایک رپورٹ جمع کروائی ہے جس میں دونوں شارٹ لسٹ کی گئی کمپنیوں کے مجوزہ طریقوں کے فائدے اور نقصانات بتائے گئے ہیں۔
انہوں نے عدالت عظمی کو آگاہ کیاہے کہ کسی کمپنی یا تھارٹی کو شہری علاقے میں محدود دھماکے کے ذریعے عمارت گرانے کا کوئی تجربہ نہیں ہے۔انہوں نے کہا کہ مختلف کمپنیوں کی جانب سے اظہارِ دلچسپی کا جائزہ لینے اور جانچنے کے لیے تکنیکی ماہرین کی ایک کمیٹی تشکیل دی گئی ہے۔
سپریم کورٹ کو آگاہ کیا گیاہے کہ کمیٹی نے ہائی ٹیک الیکٹرانکس اینڈ مشینری /ڈی جی ڈیمولیشن کی سفارش کی ہے جس نے تمام تر حفاظتی اقدامات کے ساتھ عمارت گرانے کی پیشکش کی تھی جبکہ انہدام اور اس کے بعد کے کام کے لیے 60 روز کا وقت مانگا ہے۔

کمشنر کی رپورٹ میں کہا گیا ہے کہ کمپنی نے انہدام کے لیے 22 کروڑ روپے کی لاگت بتائی ہے جبکہ ملبے اور قیمتی سامان کے حقوق بھی مانگے ہیں۔رپورٹ میں کہا گیاہے کہ عمارت کا ڈیزائن کمپنی کے ساتھ شیئر کیا گیا تا کہ وہ انہدام کا منصوبہ تیار کرسکے۔ساتھ ہی رپورٹ میں یہ بھی بتایا گیا کہ کمیٹی نے مشینوں اور مزدوروں کے ذریعے روایتی طریقے سے عمارت گرانے کے لیے ایک اور کمپنی اے این آئی انٹرپرائزز کی بھی سفارش کی ہے۔
رپورٹ کے مطابق سپریم کورٹ کو بتایا گیاہے کہ اس کمپنی نے عمارت کے انہدام اور مقام سے ملبہ صاف کرنے کی مفت پیشکش کی ہے اور قیمتی سامان سمیت ملبے پر دعوی کیا ہے لیکن ساتھ ہی ڈیڑھ کروڑ روپے قومی خزانے میں جمع کروانے کی بھی پیشکش کی ہے۔علاوہ ازیں عدالت کو آگاہ کیا گیا کہ سندھ بلڈنگ کنٹرول اتھارٹی کو انہدام سے قبل کا کام جلد از جلد شروع کرنے کی ہدایت کردی گئی ہے جس میں کھڑکیاں نکالنا اور دیگر کام شامل ہیں اور روزانہ پیش رفت رپورٹ جمع کروانے کا حکم دیا گیا ہے۔

کراچی : ضلع شرقی کی 31 یوسیزسے گھرگھر سے کچرا اٹھایاجائے گا اور کچرے سے بجلی پیدا کرکے جلد کراچی والوں کو تحفہ دیں گے،ایڈمنسٹریٹرکراچی کا تقریب سے خطاب

ایڈ منسٹریٹر کراچی و ترجمان حکومت سندھ بیرسٹر مرتضی وہاب نے سندھ سالڈ ویسٹ مینجمنٹ بورڈ کی چائنیز کمپنی چھانگی کانجی کے زیراہتمام ضلع شرقی کی 31 یوسیز میں گھر گھر سے کچرااٹھانے کی افتتاحی تقریب سے خطاب کرتے ہوئے کہا کہ سندھ سالڈ ویسٹ شہر کی صفائی کے لئے اب روایتی طریقے سے کچرا اٹھانے کے سسٹم کا خاتمہ کرکے جدید طرز اور ٹیکنالوجی کو بروئے کارلاتے ہوئے شہریوں کو ریلیف فراہم کرے گا۔
اس سلسلے میں کچرا کنڈیوں کا خاتمہ یقینی ہوگا اور ہر گھر سے سینیٹری عملہ کچرااٹھائے گا۔انہوں نے کہا کہ ایس ایس ڈبلیوں ایم بی اس ماہ کے آخرمیں ضلع کورنگی میں آپریشن کا آغاز کرنے جا رہا ہے۔انہوں نے اس موقع پر ایم ڈی زبیر چنہ، چائنیز کمپنی چھانگی کانجی اور سینیٹری عملے کی کاوشوں کو خراج تحسین پیش کرتے ہوئے کہا کہ صفائی ستھرائی کے حالات بہت بہتر ہوتے جا رہے ہیں ۔

شہرکی صفائی ستھرائی میں سینیٹری ورکر ز کی خدمات بے مثال ہیں، انہوں نے مزید کہا کہ سندھ کابینہ نے کچرے سے بجلی بنانے کی پالیسی کی منظوری دے دی ہے یہ کراچی کے شہریوں کے لئے تحفہ ہے۔انہوں نے گھر گھر سے کچرااٹھانے میں رکاوٹ ڈالنے والے مافیا (informal Sector)کے بارے میں کہا کہ ہمیں انکا بہادری سے مقابلہ کرنا ہے اس سلسلے میں شہری، میڈیا اور قانون نافذ کرنے والے ادارے تعاون کریں۔
ایم ڈی سندھ سالڈ ویسٹ مینجمنٹ بورڈ،زبیراحمد چنہ نے کہا کہ جن اضلاع میں سالڈ ویسٹ کام کررہا ہے وہاں سے بیک لوگ مکمل صاف کیا جاچکا ہے اور اب ہم اگلے مرحلے کی طرف بڑھ گئے ہیں جس میں گھر سے کچرا لیا جائے گا انہوں نے کہا کہ ہماری ترجیح ہے کہ کچرا باہر سڑکوں پر نہ پھیلے اس کے لئے ضروری ہے کہ گھر گھر سے کچرا اٹھایا جائے اس سلسلے میں چائنیز کمپنی نے 200 سے زائدٹیپرگھر سے کچرا اٹھانے کے لئے مخصوص کئے ہیں انہوں نے مزید کہا کہ گھر گھر سے کچرا اٹھانے کا عمل اور شہریوں کو خدمات کی فراہمی میں سینیٹری عملہ پیش پیش ہیں لہذا ملازمین کی حوصلہ افزائی کے لئے انہیں تعریفی اسناد تقسیم کئے گئے ہیں۔
ایم ڈی زبیر چنہ نے تقریب میں اپنے خطاب میں ملازمین کو خراج تحسین پیش کرتے ہوئے کہا کہ میں نے ہمیشہ کہاہے کہ سینیٹری ورکرز ادارے کے لئے ریڑھ کی ہڈی کی حیثیت رکھتے ہیں۔انہوں نے کہا کہ آپکی محنت کا ثمر ہے کہ صفائی کی صورتحال میں بہت بہتری آئی ہے۔ آپ شہر صاف کرنے کا مشکل ترین کام کرتے ہیں آئندہ بھی ہمیں آپکا تعاون درکار رہے گا۔ تقریب میں ایگزیکٹو ڈائریکٹرطارق نظامانی، ڈائریکٹر شرقی مشیر احمدچھانگی کانجی کے سی ای اومسٹر خوان،چانیز کمپنی کے ایڈمن آفیسر مسٹرعزیز،مس جوائنا، مس خدیجہ و دیگر افسران و ملازمین اور میڈیا نے شرکت کی۔

کراچی : عشرت بھائی جلد میرے ساتھ سیاست میں اِن ہونگے ۔
تفصیلات کے مطابق ایم کیو ایم بحالی کمیٹی کے سربراہ ڈاکٹر فاروق ستار نے کہاہے کہ ملک میں تیزی سے سیاسی عدم استحکام پیدا ہورہا ہے ، ملکی و سیاسی صورتحال پر تبادلہ خیال کرنے اور عشرت العباد کی دعوت پر دبئی گیا ، عشرت بھائی جلد میرے ساتھ سیاست میں اِن ہونگے۔دبئی میں سابق گورنرسندھ ڈاکٹرعشرت العباد خان سے ملاقات کے بعد واپسی پرکراچی ایئرپورٹ پرمیڈیا سے گفتگو کرتے ہوئے انہوں نے کہاکہ عشرت العباد نے ملکی و سیاسی صورتحال پر تبادلہ خیال کرنے کے لئے مجھے دبئی بلایا ، عشرت العباد جلد میرے ساتھ سیاست میں اِن ہونگے ، کراچی میں نہ صرف بے چارگی ساتویں آسمان پر ہے ، بلکہ ملک میں تیزی سے سیاسی عدم استحکام بھی پیدا ہورہا ہے۔
ڈاکٹر فاروق ستار نے کہا کہ ڈاکٹر عشرت العباد انتہائی سیاسی سوجھ بوجھ والے آدمی ہیں، انہوں نے 14سال کی گورنری میں معاملہ فہمی کا مظاہرہ کیا۔

انہوں نے کہاکہ ملک میں قومی سطح کی قیادت کا بھی فقدان نظر آ رہا ہے، بے بسی اور مایوسی نے ماضی کے تمام ریکارڈ توڑ دیئے ہیں۔ڈاکٹر فاروق ستار نے کہا کہ کراچی و ملکی تعمیر و ترقی کے لئے عشرت العباد اور ہم نے چارٹر برائے استحکام اور تعمیرو ترقی نامی ایک پروگرام بھی واضح کیا ہے ، جس کے لئے سب کو سر جوڑ کر بیٹھنے کی ضرورت ہے ۔

انہوں نے کہاکہ ہم نے فیصلہ کیاہے کہ سیاسی اور مذہبی اکابرین سمیت سب کو دعوت دی جائے، کیونکہ ملک میں سیاسی عدم استحکام ہے، لوگ مایوس ہیں۔فاروق ستار نے کہا کہ عوام کو اب کسی جماعت سے کوئی توقع نہیں ، مسائل کے مستقل حل کے لئے اب ہمیں نوجوانوں کو سیاست میں لانا ہوگا ، امید ہے عشرت العباد بھی جلد واپس لوٹ آئیںگے۔