Category: کراچی

کراچی: ناظم جوکھیو قتل کیس میں جام اویس کے گارڈز کے بیانات سامنے آگئے، ملزمان نے مقتول پر تشدد کا اعتراف کیا اور موت کی ممکنہ وجہ بھی بتائی۔

تفصیلات کے مطابق تفتیشی ذرایع نے بتایا ہے کہ جام اویس کے گارڈز منیر اور حیدر سب سے پہلے گرفتار ہوئے۔ ناظم کو ڈیرے پر لانے کے بعد جام اویس نشے میں دھت تھا۔

ملزمان نے اپنے بیان میں کہا کہ جام اویس نے ناظم جوکھیو سے معافی مانگنے کا کہا تھا مگروہ نہ مانا، ناظم جوکھیو کو تشدد کا نشانہ بنایا گیا، جام اویس نے ناظم جوکھیو کو ڈیرے پر رکھنے اور معاملہ صبح دیکھنے کا کہا تھا۔

گارڈرز کا کہنا ہے کہ رات 3 بجے ناظم جوکھیو نے بھاگنے کی کوشش کی، کچھ فاصلے پر ناظم جوکھیو کو پکڑ کر مار پیٹ کی وہ مزاحمت کرتا رہا۔

گرفتار ملزمان نے مزید کہا کہ مارپیٹ کے دوران ہی ناظم جوکھیو کی موت واقع ہوگئی۔

دوسری جانب تفتیشی حکام کے مطابق تحقیقات کرنے والی ٹیم کو مقتول کا موبائل فون اور کپڑے کنویں سے ملے ہیں، تحقیقاتی ٹیم نے موبائل ڈیٹا کی مدد سے تفتیش تیز کردی۔

کراچی : پاکستان شوبز انڈسٹری کے سینئر اداکار سہیل اصغر کے انتقال پر ہمایوں سعید نے اظہار افسوس کیا ہے۔

اداکار نے سماجی رابطے کی ویب سائٹ ٹوئٹر پر اپنے پیغام میں کہا کہ سہیل اصغر صاحب کے انتقال کے بارے میں جان کر دکھ ہوا۔

انہوں نے سہیل اصغر کے اہل خانہ سے اظہار تعزیت کرتے ہوئے کہا کہ اللّٰہ مرحوم کی مغفرت فرمائے۔

خیال رہے کہ اداکار سہیل اصغر ہفتے کے روز بیماری کے باعث انتقال کرگئے تھے ۔

اہل خانہ کے مطابق سہیل اصغر ڈیڑھ سال سے بیمار تھے اور گزشتہ ایک ہفتے سے اسپتال میں زیرِ علاج تھے ،ان کی نماز جنازہ آج بعد نماز عصر ادا کی جائے گی۔

سہیل اصغر نے لاہور سے اپنے کریئر کا آغاز کیا تھا، 1978 سے 1988 تک ریڈیو میں کام کیا اور پھر ریڈیو کے بعد تھیٹر پر اداکاری شروع کی اور لاہور میں مزاحیہ اسٹیج ڈراموں سے بنیادی شہرت حاصل کی۔

تازہ ترین: افغانستان کی ایئرلائنز نے کراچی کیلئے فضائی آپریشن شروع کرنے کا فیصلہ کرلیا ہے۔

تفصیلات کے مطابق افغانستان کی ایئرلائنز نے کراچی سے فلائٹ آپریشن کیلئے سول ایوی ایشن اتھارٹی سے اجازت طلب کرلی ہے۔

ذرائع کے مطابق افغانستان کی ایئرلائن کراچی سے کابل اور قندھار کیلئے اپنا فلائٹ آپریشن شروع کرنا چاہتی ہے۔

ذرائع نے بتایا ہے کہ فضائی آپریشن شروع کرنے کا مقصد افغان شہریوں کو کراچی میں طبی سہولیات کے حوالے سے بہتر انتظامات ہونے کی وجہ سے دلچسپی کا اظہار کیا ہے۔

ذرائع کا کہنا ہے کہ پاکستان سول ایوی ایشن نے پروازوں کی اجازت پاکستان اور افغانستان کے مفاہمتی یاداشت کی منظوری سے مشروط کردیا ہے۔

سی اے اے کے ذرائع کا کہنا ہے کہ سول ایوی ایشن اتھارٹی نے افغانستان کی 2 ایئرلائنوں کو اسلام آباد سے کابل فلائٹ آپریشن کی اجازت پہلے سے ہی دی ہوئی ہے۔

تازہ ترین : آئی سی سی مینز ٹی ٹوئنٹی ورلڈ کپ میں نیوزی لینڈ اور آسٹریلیا کی ٹیمیں آج فائنل میں مدمقابل آئیں گی۔

آسٹریلیا اور نیوزی لینڈ کے درمیان فائنل آج پاکستانی وقت کے مطابق شام 7 بجے دبئی اسٹیڈیم میں کھیلا جائے گا۔

نیوزی لینڈ کی ٹیم مایہ ناز بلے باز کین ولیمسن کی کپتانی میں میدان میں اترے گی جبکہ کینگروز کی قیادت آرون فنچ کریں گے۔

یاد رہے کہ بھارت نے 2007 میں ،پاکستان نے 2009میں ،انگلینڈ نے 2010میں ،ویسٹ انڈیز 2012 میں ،سری لنکا نے 2014 میں

جبکہ ویسٹ اندیز نے دوسری مرتبہ 2016 کا ٹائٹل اپنے نام کیا تھا۔

خیال رہے کہ نیوزی لینڈ اور آسٹریلیا کی ٹیموں میں سے جو بھی جیتا وہ پہلی مرتبہ آئی سی سی مینز ٹی ٹوئنٹی کرکٹ ورلڈکپ کا ٹائٹل اپنے نام کرنے کا اعزاز حاصل کرےگی۔

واضح رہے کہ نیوزی لینڈ انگلینڈ کو سیمی فائنل میں زیر کر کے فائنل میں پہنچی جب کہ آسٹریلیا نے پاکستان کو شکست دی تھی۔

سینئر اداکار منظر صہبائی نے کہا ہے کہ جب انہوں نے ثمینہ احمد کو شادی کی پیش کش کی تو انہوں نے حیرانگی کا اظہار کیا تھا ۔

ایک نجی چینل کو دیے گئے انٹرویو میں منظر صہبائی اور ثمینہ احمد نے بتایا کہ دونوں کی پہلی ملاقات دھوپ کی دیوار کی شوٹنگ کے دوران ہوئی تھی۔

منظر صہبائی نے بتایا کہ انہوں نے شوٹنگ کے دوران ثمینہ احمد کو دیکھتے ہی ان سے پوچھا تھا کہ وہ یہاں ادھر کیا کر رہی ہیں؟ یہاں کیا ہے؟ منظر صہبائی کی جانب سے ایسا کہنے پر وہ ان سے متعلق سوچنے لگیں کہ ’عجیب انسان ہیں‘۔

منظر صہبائی نے بتایا کہ اس کے بعد ہی انہوں نے ثمینہ احمد کو شادی کی پیش کش کی، جس پر وہ حیران رہ گئیں اور ان سے تعجب سے پوچھا کہ وہ کیا کہ رہے ہیں ؟

ثمینہ احمد کے مطابق پہلی ملاقات کے بعد ان دونوں کا موبائل فون پر رابطہ رہا، جس کے بعد ہی انہوں نے شادی کا فیصلہ کیا۔

منظر صہبائی کا کہنا تھا کہ انہوں نے تین بار ثمینہ احمد سے شادی سے متعلق پوچھا، جس پر انہوں نے ان سے سوال کیا کہ ’کیا کہ رہے ہو؟ جس پر انہوں نے انہیں جواب دیا کہ نکاح کے لیے پوچھنا پڑتا ہے۔

منظر صہبائی نے مزید بات کرتے ہوئے کہا کہ دونوں نے دنیا اور لوگوں کا نہیں بلکہ صرف اپنا سوچا اور اسی لیے ہی انہوں نے شادی کی اور شادی کے فیصلے پر نہ صرف ان کے دوست اور جاننے والے بلکہ ان کے بچے بھی خوش ہوئے۔

یاد رہے کہ منظر صہبائی اور ثمینہ احمد نے زائدالعمری میں اپریل 2020 میں کورونا لاک ڈاؤن کے دوران لاہور میں سادگی سے نکاح کیا تھا۔

کراچی : کراچی کی سینٹرل جیل سے 20 بھارتی ماہی گیروں کا رہا کردیا گیا ہے۔ قیدیوں کی واپسی کیلئے سفری اخراجات ریسکیو ادارے نے اٹھائے۔

جیل حکام کے مطابق بھارتی ماہی گیروں کو کراچی کی لانڈھی ڈسٹرکٹ جیل ملیر سے سزا مکمل ہونے پر رہا کیا گیا۔ جیل حکام کے مطابق محکمہ داخلہ سندھ کے جاری کردہ احکامات کے بعد ان ماہی گیروں کی گرفتاری کے 4 سال بعد رہائی عمل میں آئی ہے۔

جیل سپرنٹنڈنٹ کے مطابق بھارتی حکام نے رہائی پانے والوں کی بھارتی شہریت کی تصدیق کی ہے، قیدیوں کو جذبہ خیر سگالی کے تحت رہا کیا گیا ہے۔ ماہی گیروں کی کراچی سے ٹرین کے ذریعے لاہور روانگی کا شیڈول ہے، جہاں سے بس کے ذریعے انہیں واہگہ بارڈر پہنچایا جائے گا۔

جیل حکام کے مطابق واہگہ بارڈر پر پاکستانی حکام پیر کو ان ماہی گیروں کو بھارتی حکام کے حوالے کریں گے۔

واضح رہے کہ جیل حکام کے مطابق لانڈھی جیل میں اب بھی 588 بھارتی قیدی موجود ہیں، جس میں سے زیادہ تر ماہی گیر ہیں۔ جیل میں موجود قیدیوں کی تمام قانونی کارروائی پوری ہوچکی ہے۔

کراچی : ناظم جوکھیو قتل؛ مقتول کا موبائل فون اور کپڑے مل گئے ۔
تفصیلات کے مطابق کراچی پولیس کو مقتول ناظم جوکھیو کا موبائل فون اور کپڑے جام ہاؤس کے قریب کنویں سے مل گئے ہیں۔ معاملے کی تفتیش کرنے والے پولیس حکام کا کہنا ہے کہ گرفتار ملزمان کی نشاندہی پر تفتیشی ٹیم جام ہاؤس کے قریب ایک متروک کنویں پر پہنچی، جہاں سے مقتول کا موبائل فون اور کپڑے ملے ہیں، مبینہ طور پر شواہد مٹانے کے لیے قتل کے بعد مقتول کا موبائل فون اور کپڑے کنویں میں پھینک کر اسے آگ لگا دی گئی تھی۔

تفتیشی حکام کا مزید کہنا ہے کہ موبائل فون کافی حد تک جل چکا ہے، موبائل اور کپڑے فارنزک کے لئے پنجاب لیبارٹری بھیجے جارہے ہیں، لیبارٹری رپورٹ آنے پر تفتیش میں پیش رفت کا امکان ہے۔

ناظم جوکھیو نے اپنے قتل سے پہلے فیس بک پر ایک وڈیو اپ لوڈ کی تھی جس میں ان کا کہنا تھا کہ ایک گاڑی میں بیٹھے افراد ہمیں دھمکیاں دے رہے ہیں۔ ہماری سڑک بلاک کر کے کھڑے ہوئے ہیں۔ ہم نے ان سے پوچھا کہ وہ اس علاقے میں کیا کر رہے ہیں، یہ ہمارا علاقہ ہے، تو وہ ہم نے بد سلوکی کر رہے ہیں۔ ہمیں پولیس کی دھمکیاں دے رہے ہیں۔ ودیو کے دوران ہی گاڑی سے اترنے والے افراد نے ناظم کا موبائل فون لینے اور وڈیو روکنے کی کوشش کی۔

ناظم جوکھیو کے بھائی افضل جوکھیو کا کہنا ہے کہ واقعے کے بعد پیپلزپارٹی کے ایم پی اے جام اویس نے اپنے پرسنل سیکریٹری کے نمبر سے کال کی اور کہا کہ اپنے بھائی کو سمجھاؤ ورنہ میں کچھ بھی کرسکتا ہوں۔ اپنے بھائی کو میرے پاس پیش کرو اور اس سے کہو کہ یہ وڈیو سوشل میڈیا سے ہٹائے۔ میرے بھائی نے یہ کرنے سے منع کردیا۔

افضل جوکھیو کا کہنا ہے کہ جس روز ان کے بھائی کا قتل ہوا، اس رات 11 بجے جام سومرو کے لوگ آئے اور زبردستی مجھے اور میرے بھائی کو ملیر میمن گوٹھ میں فارم ہاؤس لے گئے۔ انہوں نے میرے سامنے میرے بھائی پر تھوڑا تشدد کیا اور رات 3 بجے مجھ سے کہا کہ میں اپنے بھائی کو ان کے پاس چھوڑ کر چلا جاؤں کیونکہ وہ ہماری اور شکار کے لیے آنے والے افراد کی صلح کروائیں گے۔ میں مجبورا اپنے بھائی کو ان کے بھروسے چھوڑ کر گیا مگر پھر مجھے اطلاع ملی کہ انہوں نے صبح چھ بجے میرے بھائی پر بہت تشدد کرکے قتل کردیا اور اس کی لاش کو میم گوٹھ میں کہیں پھینک دیا ۔

ناظم جوکھیو قتل کیس میں پیپلز پارٹی کے رکن سندھ اسمبلی جام اویس اور ان کے دو ملازمین سمیت 5 افراد نامزد ہیں۔

کراچی: پاکستان پیپلزپارٹی کے چیئرمین بلاول بھٹو زرداری کا کہنا ہے کہ گھٹتی آمدنی اور بڑھتی مہنگائی کے بحران کو روکنے کے لئے عمران خان عملی اقدامات کریں یا گھر جائیں۔

اپنے بیان میں چیئرمین پیپلز پارٹی کا کہنا تھا کہ بڑی بڑی باتیں کرکے اقتدار حاصل کرنے والے عمران خان کے پاس بحرانوں کے حل کے لیے نہ کوئی وژن ہے اور نہ کوئی منصوبہ، عمران خان ہر بحران پر نوٹس لے کر آخر میں “میں کیا کروں” کا اعلان کرکے نئے بحرانوں کو پیدا کرنا شروع ہوجاتے ہیں۔

بلاول بھٹو زرداری کا کہنا تھا کہ آج ملک میں عام آدمی مہنگائی کی وجہ سے پریشان ہے اور اس کی صرف ایک وجہ عمران خان کی نااہلی ہے، قوم مہنگائی کی صورت میں تبدیلی کی وہ خوف ناک قیمت ادا کررہی ہے جس کا ازالہ اگلی کئی حکومتوں کو کرنا ہوگا، گھٹتی آمدنی اور بڑھتی مہنگائی کے بحران کو روکنے کے لئے عمران خان عملی اقدامات کریں یا گھر جائیں۔

وزارت انفارمیشن ٹیکنالوجی و ٹیلی کمیونیکیشن کے تعاون سے کراچی پریس کلب میں صحافیوں کیلئے ڈیجیٹل اسٹوڈیو قائم کردیا گیا جس کا افتتاح وفاقی وزیر آئی ٹی و ٹیلی کمیونیکیشن سید امین الحق نے ہفتہ کو پریس کلب میں منعقدہ ایک پروقار تقریب میں کیا۔ اس موقع پر ممبر آئی ٹی سید جنید امام، کراچی پریس کلب کے صدر فاضل جمیلی، سیکرٹری رضوان بھٹی نے ڈیجیٹل اسٹوڈیو کے قیام کے حوالے سے تفصیلات سے آگاہ کیا۔
تقریب میں کراچی پریس کلب کی نائب صدر شازیہ حسن،جوائنٹ سیکرٹری ثاقب صغیر،خازن عبدالوحیدراجپر، کورننگ باڈی ارکان عبدالوسیع قریشی، فاروق سمیع،حامدالرحمن،عبدالعزیزہنگور سمیتسابق صدر امتیاز خان فاران،اے ایچ خانزادہ سمیت صحافیوں کی بڑی تعداد نے شرکت کی۔

اس موقع پر خطاب کرتے ہوئے وفاقی وزیر سید امین الحق نے کہا کہ ایم کیوایم نے بلا امتیاز رنگ و نسل و سیاسی وابستگیوں سے بالاتر ہوکر ہمیشہ عوام کی خدمت کا شعار اپنایا ہے۔

مجھے نہیں معلوم کہ کراچی پریس کلب کی باگ دوڑ کس گروپ کے پاس ہے اور نہ مجھے اس سے دلچسپی ہے۔کراچی پریس کلب صحافیوں کی سہولت کا ایک مرکز ہے، اگر میں یا میری جماعت اس ادارے کیلئے کچھ اچھا کررہے ہیں تو اس کے پیچھے صرف ایک ہی مقصد ہے کہ صحافیوں کو سہولیات فراہم کرنا۔انہوں نے کہاکہ کہ میرے پاس وزارت آئی ٹی کا قلمدان ہے، کراچی پریس کلب میں ڈیجیٹل اسٹوڈیو کے قیام کیلئے مجھ سے جو ہوسکا وہ میں نے کیا ہے کیونکہ یہ تمام صحافی میرے ہیں۔
ڈیجیٹل اسٹوڈیو کے قیام سے مجھے امید ہے کہ صحافیوں کو اپنے پیشہ ورانہ فرائض کی ادائیگی میں مزید آسانیاں فراہم ہوں گی۔ میں کراچی پریس کلب کے عہدیداران اور گورننگ باڈی کے ساتھ ساتھ تمام صحافتی تنظیموں کو اس بات کا یقین دلاتا ہوں کہ ایم کیوایم نے جس طرح ماضی میں بھی صحافتی مسائل پر آواز بلند کرنے میں ہمیشہ پہل کی ہے۔وفاقی وزیر آئی ٹی نے کہا کہ ہمارا اصل مقصد عوام کی خدمت ہے تو جب بھی ملک و قوم کے خلاف کوئی عمل ہوگا ایم کیوایم اس کا حصہ کبھی نہیں ہوگی۔
اس موقع پر سید امین الحق نے سندھ حکومت کی عوام دشمنی پالیسی پر کڑی تنقید کرتے ہوئے کہا کہ سندھ پر تقریبا 13 برسوں سے پیپلز پارٹی کی بلاشرکت غیرے حکومت ہے۔ان 13 برسوں میں پیپلز پارٹی نے کراچی، حیدرآباد، سکھر، لاڑکانہ، نوابشاہ سمیت سندھ بھر کے عوام کے ساتھ جو سلوک کیا ہے اور اس کا انفراسٹرکچر جس سازش کے تحت تباہ کیا جارہا ہے وہ کسی سے ڈھکا چھپا نہیں۔
سندھ کے عوام کو تاریکیوں، پسماندگی اور جہالت میں مبتلا کرکے انھیں ذہنی اور جسمانی طور پر غلام بنانے کی سازش پیپلز پارٹی کی جانب سے کی جارہی ہے۔ اور میں آپ سب کو بتادوں کہ اگر پیپلز پارٹی کے اس عمل کے خلاف آپ سب نے آواز بلند نہیں کی تو آپ کا سندھ، ہمارا سندھ پتھروں کے دور کا صوبہ بن جائے گا۔ کوئی یہ بتائے کہ پیپلز پارٹی نے ان 13 برسوں میں سندھ میں تعلیم، صحت، روزگار، سڑکوں پانی و سیوریج کے نظام، سمیت عام آدمی کی زندگی بہتر بنانے کیلئے کون سے اقدامات کیئے۔
سندھ حکومت بتائے کہ 13 برسوں میں مختص کردہ 1800 ارب روپے سے زائد ترقیاتی فنڈز کہاں استعمال ہوئے۔ کتنی یونیورسٹیاں، اسپتال، سڑکیں تعمیر کی گئیں۔۔ جواب ۔۔۔۔ صفر بٹا صفر سے زیادہ کچھ نہیں ہوگا۔۔ البتہ سندھ کے وزرا کے دعوے، سیاسی بیانات، اور الزام تراشیاں اس عرصے میں ضرور عروج پر رہی ہیں۔ اس کے ساتھ ہی جب بھی وزیراعلی سندھ کو صوبے کے منصوبوں میں شرکت کیلئے ہم نے دعوت دی انھوں نے کبھی سنجیدگی کا مظاہری نہیں کیا بلکہ جواب تک دینے کی زحمت نہیں کی جاتی۔
وفاقی وزیر آئی ٹی نے کہا کہ ایم کیو ایم موجودہ حکومت کا حصہ ہیمیری ایک وزارت آئی ٹی نے چاروں صوبوں میں جس طرح بلاامتیاز عوامی منصوبے شروع کیئے ہیں اس جیسی کوئی ایک مثال مجھے کوئی لاکر بتادے۔ سید امین الحق نے بتایا کہ سندھ کے 19 اضلاع کے 3 ہزار 227 پسماندہ علاقوں میں براڈ بینڈ سروسز کی فراہمی کے 6 مختلف پراجیکٹس پر 3 ارب 38 کروڑ روپے کرچ کیئے جارہے ہیں یہ منصوبے دسمبر 2022 تک مکمل اور اس سے ایک کروڑ افراد کو سہولیات فراہم ہوں گی۔
ٹیکنالوجی کی بڑھتی ضروریات اور ہائی اسپیڈ انٹر نیٹ و موبائل سروسز کیلئے سندھ کے 7 اضلاع کی 230 یونین کونسلوں میں ایک ہزار 905 کلومیٹر طویل فائبر آپٹیکل کیبل بچھانے کے 3 مختلف منصوبوں پر 5 ارب 10 کروڑ روپے خرچ کیئے جارہے ہیں جس کی تکمیل سے 75 لاکھ کی آبادی کو سہولیات میسر ہوں گی۔سید امین الحق نے کہا کہ کراچی میں اسٹیٹ آف آرٹ آئی ٹی پارک منصوبہ 31 ارب روپے کی لاگت سے شروع کیا جارہا ہے جس سے نہ صرف ہزاروں افراد کو روزگار ملے گا بلکہ کراچی انفارمیشن ٹیکنالوجی کے شعبے میں اپنے ہنر مندوں کے ذریعے ڈیجیٹل دنیا سے منسلک ہوجائے گا۔