Category: کراچی

کراچی : بلدیہ عظمیٰ کراچی اپنے ملازمین کو سہولتیں پہنچانے اور ان کے مسائل کے حل کیلئے بھرپور اقدامات کر رہی ہے ۔

ایڈمنسٹریٹر کراچی،مشیر قانون اور ترجمان حکومت سندھ بیرسٹر مرتضیٰ وہاب نے کہا ہے کہ شہریوں کو صحت بخش ، صاف ،شفاف پینے کی پانی کی فراہمی کے لئے کراچی کے مختلف مقامات پر آر او پلانٹ لگانے میں کے ایم سی بھرپور تعاون کرے گی، یہ خدمت خلق بھی ہے اور شہریوں کی صحت کے لئے بھی بہتر ہوگا، یہ بات انہوں نے کے ایم سی بلڈنگ میں سیلانی ویلفیئر ٹرسٹ کے زیر انتظام آر او پلانٹ کا افتتاح کرتے ہوئے کہی، میٹروپولیٹن کمشنر ایس ایم افضل زیدی، سیلانی ویلفیئر ٹرسٹ کے صدر یوسف لاکھانی، سی ای او محمد غزال، افضل ، آر او پلانٹ کے ڈیزائن انجینئر سید ابو فیصل اور کے ایم سی کے دیگر افسران بھی اس موقع پر موجود تھے، ایڈمنسٹریٹر کراچی نے فیتہ کاٹ کر آر او پلانٹ کا باقاعدہ افتتاح کیا ، انہوں نے کہا کہ بلدیہ عظمیٰ کراچی اپنے ملازمین کو سہولتیں پہنچانے اور ان کے مسائل کے حل کے لئے بھرپور اقدامات کر رہی ہے، سماجی اور فلاحی ادارے شہر کی بہتری اور ترقی کے لئے ہمارے ساتھ مل کر کام کریں، انہوں نے کہا کہ کراچی میں سماجی اور فلاحی ادارے قابل قدر خدمات انجام دے رہے ہیں اور کراچی کے لاکھوں شہری ان کی خدمات سے مستفید ہوتے ہیں، اس موقع پر ایڈمنسٹریٹر کراچی کو بتایا گیا کہ یہ آر او پلانٹ ترکی کی وزارت ثقافت و سیاحت اور TIKA کے مالی تعاون سے تعمیر کیا گیا ہے اور اس پر 28 لاکھ روپے لاگت آئی ہے، انہوں نے کہا کہ اس آر او پلانٹ سے روزانہ 40 ہزار لیٹر صاف پینے کا پانی فراہم کیا جاسکے گا اور ایک دن میں 20 ہزار افراد کی ضروریات پوری کرے گا، کے ایم سی کے افسران و ملازمین اور اطراف کے مکین بھی اس سے فائدہ اٹھا سکیں گے، انہوں نے بتایا گیا کہ یہ آر او پلانٹ ایک منٹ میں سات گیلن پانی کو صاف کرنے اور پینے کے قابل بنانے کی صلاحیت رکھتا ہے، انہوں نے کہا کہ جو مشینری یہاں نصب کی گئی ہے وہ انتہائی ایڈوانس ہے اور جتنی بھی پرائیویٹ کمپنیاں پینے کا پانی سپلائی کرتی ہیں اس آر او پلانٹ کا پانی اس سے کہیں زیادہ بہتر اورصحت بخش ہے، سیلانی ویلفیئر ٹرسٹ اب تک صوبائی سندھ میں 55 آر او پلانٹ تعمیر کرچکی ہے اور شہری اس سے بھرپور استفادہ کر رہے ہیں، سیلانی ویلفیئر ٹرسٹ نے ایڈمنسٹریٹر کراچی کو پیشکش کی کہ وہ جہاں بھی ہمیں جگہ فراہم کریں گے وہاں آر او پلانٹ تعمیر کیا جائے گا تاکہ شہریوں کو صحت بخش پانی مہیا ہو اور آلودہ پانی اور غیر معیاری پانی پینے سے بچ سکیں، ایڈمنسٹریٹر کراچی نے آر او پلانٹ سے نکالنے والے پانی کو پی کر اسے تسلی بخش قرار دیا۔

کراچی : سوشل میڈیا میں کراچی سفاری پارک میں موجود ہتھنیوں سے متعلق چلنے والی خبروں کا نوٹس لیتے پاکستان پیپلز پارٹی کی رہنما اور رکن سندھ اسمبلی شرمیلا فاروقی نے کراچی سفاری پارک کا دورہ کیا ۔

اس موقع پر رکن سندھ اسمبلی شرمیلا فاروقی کو ہتھنیوں کو فراہم کی جانے والی خوراک اور سہولیات کے بارے میں بریفننگ دی گئی۔ رکن سندھ اسمبلی شرمیلا فاروقی کو بتایا گیا کہ سونو اور ملکہ کی صحت اور متوازن خوراک کی فراہمی پر خصوصی توجہ دی جارہی ہے۔ رکن سندھ اسمبلی شرمیلا فاروقی نے سونو اور ملکہ کو فراہم کی جانے والی خوراک پر اطمینان کا اظہار کیا اور ان جانوروں کی خدمت پر مامور عملے کو ان کی اچھی دیکھ بھال کی بھی ہدایت کی۔

کراچی : آنٹی پاکستان نے ٹویٹر پر راتوں رات دھوم مچا دی ۔

پاکستان اور بھارت کے مابین بھارتی فلم فینٹم کو لے کر جس جنگ کا آغاز ہوا تھا اس میں دونوں ممالک بالخصوص پاکستان کی عوام اورڈرامہ و فلم انڈسٹری سے تعلق رکھنے والے افراد نے بڑھ چڑھ کر حصہ لیا۔ اس دوران سماجی رابطے کی ایک ویبسائٹ ٹویٹر پر راتوں رات ہی ایک خاتون نے اپنے ٹویٹس کے ذریعے دھوم مچا دی۔

ٹویٹر پر اس خاتون کا اکاؤنٹ ’آنٹی پاکستان‘ کے نام سے ہے۔

آنٹی پاکستان نے ماورا حسین کی حمایت میں بولنا کیا شروع کیا سب کی بولتی بند ہو گئی البتہ اس جنگ میں بیشتر خواتین اور لڑکیوں نے بھی آنٹی پاکستان کا بھر پور ساتھ دیا۔ آنٹی پاکستان نے اپنے ٹویٹس کے ذریعے جنید جمشید، حمزہ علی عباسی اور دیگر کو خوب تنقید کا نشانہ بنایا اور تو اور آنٹی پاکستان نے پی ٹی آئی چئیر مین عمران خان کو بھی نہ بخشا۔

راتوں رات ٹویٹر پر شہرت کی بلندیوں کو چھُونے والی آنٹی پاکستان کے فالوورز میں بھی حیرت انگیز حد تک اضافہ ہوا ہے جبکہ ٹویٹر صارفین نے آنٹی پاکستان کے حق اور مزاح سے بھر پور ٹویٹس پر لبیک بھی کہنا شروع کر دیا ہے .

کراچی: ڈپٹی کنوینر ایم کیو ایم پاکستان اور پارلیمانی لیڈر سندھ اسمبلی کنور نوید جمیل نے کہا ہے کہ عدالتوں سمیت بڑے اداروں کو بھی آزما لیا اب کراچی پر ہونے والے ظلم کے خلاف ہمیں خود احتجاج کرنا ہوگا۔

کراچی میں احتجاجی مظاہرے سے خطاب کرتے ہوئے کنور نوید جمیل نے کہا کہ کراچی کے با شعور لوگ ٹیکس کی مد میں پیسہ دیتے ہیں، ان پیسوں سے پورا ملک اور دارالخلافہ چلتا ہے، پاکستان بنانے والوں کو سندھ میں پیپلز پارٹی کی متعصب قیادت کے نرغے میں کر دیا ہے، نہ کوئی عدالت، نہ تو کوئی ادارہ اور نہ ہی وفاقی حکومت داد رسی کو آتی ہے، ہر ایک اختیار شہری سندھ کی عوام سے چھین لیا ہے، جعلی ڈومیسائل بنا کر سندھ کے شہری علاقوں کو نوکریوں سے محروم کیا، جس پرایم کیو ایم پاکستان کی پٹیشن آج بھی عدالتوں میں سماعت کی منتظر ہیں، عدلیہ آج بھی شہری سندھ کو انصاف نہ دے سکی سندھ کی متعصب حکومت یہ سمجھنے لگی ہے کہ کراچی کی بربادی ان کا بنیادی فرض ہے۔

رہنما ایم کیو ایم کاکہنا تھا کہ نیا بلدیاتی قانون تاریخ کا بد ترین کالا قانون ہے، ٹاؤن پلاننگ، اسکول، اسپتال اور شہری ادراے بلدیاتی حکومتوں سے لے کر اپنے قبضے میں لے لئے ہیں،ہمارا تمام اداروں اور فیصلہ سازوں سے یہ سوال ہے کہ 22 کروڑ عوام کو آزادی دلوانے، 70 سال سے پورے پاکستان کو معاشی سہارے دینے کا یہ نتیجہ ہے؟ کیا یہ اس کا انتظار کر رہے ہیں کہ پانی بند کرنے کے بعد کراچی کے لوگوں پر ہوا بھی بند کر دی جائے۔
کنور نوید جمیل نے کہا کہ اب کراچی کے عوام کے ساتھ ایم کیو ایم پاکستان نے یہ فیصلہ کر لیا ہے کہ اس ظالمانہ نظام کی مزید اطاعت نہیں کی جائے گی، اب یہ متعصب حکومت قانون واپس نہیں لیتی تو شہری سندھ کے عوام پیپلز پارٹی کی متعصب حکومت سے چھٹکارا حاصل کریں گے اور حقوق کی جدوجہد کے ساتھ اب علیحدہ صوبے کی جدوجہد بھی کریں گے۔ وزیر اعظم پاکستان، گورنر سندھ اور چیف جسٹس آف پاکستان اس کالے قانون سمیت تمام سندھ حکومت کے اٹھائے ہوئے غیر قانونی اقدامات پر فوری ایکشن لیں تاکہ عوام کو ریلیف مل سکے۔

اس موقع پر سابق میئر کراچی وسیم اختر نے کہا کہ کراچی کے لوگ سندھ حکومت کی نااہلی سے تنگ ہیں، انہوں نے اسکول اور اسپتال واپس لے لئے، اس ظالمانہ نظام کے خلاف جدوجہد میں اپنی جانوں کا نذرانہ پیش کریں گے، جب تک ہم کراچی پر مستقل ڈاکہ ذنی کو ختم نہیں کریں گے سکون سے نہیں بیٹھیں گے، کراچی کے لوگ بہت بڑی تحریک چلانے کو تیار ہو جائیں، وزیر اعظم عمران خان سمیت تمام اعلیٰ حکام نے کراچی کے عوام کیلئے فی الفوراقدامات نہیں کئے توعوام کسی کو بھی معاف نہیں کریں گے۔

‏کراچی : کراچی کے شہریوں کے لئے خوشخبری.

ملکی تاریخ کا سب سے بڑا کروز لائنر شپ پاکستان پہنچ گیا.

کروزشپ میں 14 منزلیں اور 1411 کمرے موجود ہیں.

کروز شپ میں 7 اسٹار ہوٹل،شاپنگ مالز اور،گیمنگ زون ، تین بڑے ہالز موجود ہیں.
‎
ملکی تاریخ کا سب سے بڑا کروز لائنر شپ پاکستان پہنچ گیا.

پاکستانی کمپنی نیو چوائس انٹرپرائزز نے اس جہاز کو شپ بریکنگ کے لئے خریدا تھا

کروز شپ کی بہترین صورت حال کو دیکھ کر کروز شپ کواب ہوٹل یا کروز کے لئے تبدیل کرنے کا فیصلہ کیا جارہا ہے ۔

کراچی: بلدیاتی ملازمین کی ہڑتال کے باعث کچرا اٹھانے کا کام رکنے سے شہر میں کچرے کے ڈھیر لگنے لگے۔ بلدیاتی عملے نے کچرا اٹھانے اور سیوریج کا کام چھوڑ رکھا ہے ۔

کراچی سمیت سندھ بھر میں بلدیاتی ملازمین نے تنخواہوں کے معاملے پر ہڑتال کررکھی ہے جس سے شہر کے مختلف علاقوں میں کچرے کے انبار لگنا شروع ہوگئے ہیں بلدیاتی عملے نے کچرا اٹھانے اور سیوریج کا کام احتجاجاً چھوڑ رکھا ہے جس سے شہر کے گلی محلوں میں کچرے کے ڈھیر لگ گئے ہیں ۔

شہریوں کا کہنا ہےکہ دو تین روز سے بلدیاتی عملہ کچرا اٹھانے نہیں آرہا جس سے گلی محلوں میں بدبو پھیل رہی ہے اور بیماریاں پھیلنے کا خدشہ ہے دوسری جانب بلدیاتی ملازمین کا کہنا ہے کہ او زیڈ ٹی کی کمی کے باعث کٹوتی سے ہر ماہ 35 فیصد تنخواہوں سے محروم ہورہے ہیں ۔

ورکرز فیڈریشن اور سیکرٹری لوکل گورنمنٹ کے درمیان مذاکرات ناکام ہوگئے ہیں۔

بلدیاتی ملازمین کی ہڑتال کےباعث جہاں کراچی میں صورتحال انتہائی خراب ہے وہیں حیدرآباد ، سکھر ،لاڑکانہ، نواب شاہ اور سندھ کے دیگر اضلاع میں بھی صفائی کا نظام درہم برہم ہوگیا ہے۔

واضح رہے کہ بلدیاتی ملازمین کی جانب سے آڈیٹر جنرل آف سندھ کےذریعے ٹریژری سےتنخواہیں دینے کا مطالبہ کیا گیا ہے ۔