Category: کراچی

اوڈیرولال کی رہائشی خاتون نے اپنے بھتیجے پر مبینہ جنسی زیادتی کا الزام عائد کیا ہے۔تفصیلات کے مطابق ہالا کے علاقے اوڈیرولال کی رہائشی خاتون نے اپنے سگے بھتیجے پر الزام عائد کیا ہے کہ اس نے زیادتی کا نشانہ بنایا اور منہ بند رکھنے کے لئے دھمکیاں دے رہا ہے۔ متاثرہ خاتون کے مطابق اس کا بھتیجا شوکت اسے اوطاق پر لے گیا اور زبردستی جنسی زیادتی کا نشانہ بنایا، میں دہائی دیتی رہی کہ ظلم مت کرو لیکن اس نے ایک نہ سنی اور زیادتی کا نشانہ بناڈالااور جب واقعہ کی رپورٹ درج کرانے تھانے گئی تو پولیس نے مقدمہ درج کرنے کے بجائے مجھ پر طنز کے تیر برسانا شروع کردیئے۔
خاتون نے کہاکہ بھتیجا زیادتی کے بعد منہ بند رکھنے کے لیے دھمکیاں دے رہا ہے، اس نے کہاکہ زبان کھولنے پر وہ مجھے قتل کردے گا، چیف جسٹس پاکستان گلزار احمد، وزیراعلی سندھ مراد علی شاہ اور آئی جی سندھ سے درخواست ہے کہ مجھے انصاف دلایا جائے۔

کور ہیڈکوارٹرز کراچی میں کمانڈ کی تبدیلی کی تقریب کا انعقاد
لیفٹیننٹ جنرل محمد سعید نے کورکمانڈر کراچی کی ذمہ داریاں سنبھال لیں، لیفٹیننٹ جنرل ندیم انجم نے کمانڈ لیفٹیننٹ جنرل محمد سعید کے حوالے کردی ۔

تفصیلات کے مطابق لیفٹیننٹ جنرل محمد سعید نے کورکمانڈر کراچی کی ذمہ داریاں سنبھال لیں، نئے تعینات ڈی جی آئی ایس آئی لیفٹیننٹ جنرل ندیم انجم نے کمانڈ لیفٹیننٹ جنرل محمد سعید کے حوالے کردی۔ پاک فوج کے شعبہ تعلقات عامہ آئی ایس پی آر کے مطابق کور ہیڈکوارٹرز کراچی میں کمانڈ کی تبدیلی کی تقریب کا انعقاد ہوا، لیفٹیننٹ جنرل محمد سعید نے کورکمانڈر کراچی کی ذمہ داریاں سنبھال لیں، لیفٹیننٹ جنرل ندیم انجم نے کمانڈ لیفٹیننٹ جنرل محمد سعید کے حوالے کی۔
واضح رہے رواں سال 26 اکتوبر کو پاک فوج کے لیفٹیننٹ جنرل ندیم احمد انجم کو آئندہ کیلئے باقاعدہ نئے ڈائریکٹر جنرل انٹر سروسز انٹیلی جنس( ڈی جی آئی ایس آئی) تعینات کردیا گیا ہے، وزیراعظم عمران خان کے دستخط کے بعد ڈی جی آئی ایس آئی کی تقرری کا نوٹیفکیشن جاری کیا جا چکا ہے۔ موجودہ ڈی جی آئی ایس آئی لیفٹیننٹ جنرل فیض حمید 19 نومبر تک اپنے عہدے پر کام جاری رکھیں گے۔ لیفٹیننٹ جنرل ندیم انجم کے باقاعدہ چارج سنبھالنے کے بعد موجودہ ڈی جی آئی ایس آئی لیفٹیننٹ جنرل فیض حمید کورکمانڈر پشاور کا عہدہ سنبھال لیں گے ۔

شہر میں مافیا نے دودھ مہنگا کردیا جس کے نتیجے میں دودھ 140 روپے لیٹر جبکہ دہی 220 روپے کلو کردیا گیا۔

کراچی میں دودھ سرکاری نرخ سے 46 روپے زائد میں فروخت ہونے لگا۔ ڈیری مافیا نے 8 نومبر سے دودھ 10 روپے لیٹر اضافے کا اعلان کیا تھا۔ ایسوسی ایشن نے کہا ہے کہ دو ماہ بعد فی لیٹر قیمت میں مزید 30 روپے کا اضافہ کیا جائے گا۔

کمشنر کراچی کی زیرِ صدارت 25 اکتوبر اور 4 نومبر کو متعلقہ ایسوسی ایشنز کے اجلاس منعقد ہوچکے ہیں اور 4 نومبر کو ڈیری فارمرز ہول سیلرز اجلاس میں تخمینہ مرتب کرنے کے لیے کمیٹی بنادی گئی تھی۔ قیمت کے تعین کے حوالے سے قائم کمیٹی کی سفارشات سے قبل اضافہ غیر قانونی ہے۔

ناظم جوکھیو قتل کیس میں کیس پولیس کے تفتیشی افسر کو تبدیل کردیا گیا ، جس کے بعد نئے تفتیشی افسر نے عدالت سے تفتیش کے لئے مزید وقت کی استدعا کردی ہے۔

تفصیلات کے مطابق ناظم جوکھیو قتل کیس کی ملیر کورٹ میں سماعت ہوئی ، جس میں وکیل مدعی نے کہا ملزم جام اویس کو بغیر ہتھکڑی عدالت میں پیش کیا گیا، عدالت کو نشاندہی پر ایس ایچ او میمن گوٹھ نے ملزم کو ہتھکڑی لگائی‌۔

جس پر عدالت نے تفتیشی افسر پر برہمی کا اظہاراگر ایسا ہی چلتا رہا توآپ کے خلاف کارروائی کریں گے، مدعی کے وکیل کا کہنا تھا کہ پولیس نے جائے وقوعہ کا معائنہ کیا نہ فارم ہاؤس کی سی سی ٹی وی لی۔

مقتول کا موبائل بھی برآمد نہیں کیا جاسکا نہ ہی سی ڈی آر کرایا گیا۔

وکیل نے استدعا کی کہ مقتول کا موبائل بھی برآمد نہیں کیا جاسکا نہ ہی سی ڈی آر کرایا گیا، مقدمے میں دہشتگردی، اغوا اور دھمکانے کی دفعات شامل کی جائیں۔

ناظم جوکھیو قتل کیس میں پولیس کا تفتیشی افسر تبدیل کر دیا جبکہ نئے تفتیشی افسر نے تفتیش کے لئے مزید وقت کی استدعا کردی۔

اس سے قبل ناظم جوکھیو قتل کیس میں کراچی کی ملیر کورٹ نے پیپلز پارٹی کے ایم پی اے جام اویس سمیت تین ملزمان کے جسمانی ریمانڈ میں تین دن کی توسیع کرتے ہوئے پیشرفت رپورٹ طلب کرلی تھی۔

کراچی : بلدیہ شرقی کے چھ اساتذہ سندھ کے بہترین اساتذہ قرار دیئے گئے ۔

ایڈمنسٹریٹر بلدیہ شرقی شعیب احمد ملک اور میونسپل کمشنر غلام سرور راہپوٹو نے ڈائریکٹر ایجوکیشن شیرعلی اور بلدیہ شرقی کے سندھ میں چھ بہترین اساتذہ کا ایوارڈ حاصل کرنے والے اساتذہ کو مبارکباد پیش کرتے ہوئے کہا ہے کہ اس بات پر بے انتہا خوشی ہے کہ بلدیہ شرقی کے محکمہ تعلیم میں ایسے اساتذہ موجود ہیں جو قوم کے معمار تیار کرنے میں اپنا بھرپور کردار ادا کر رہے ہیں،اساتذہ نہ صرف کراچی بلکہ سندھ میں نمایاں مقام حاصل کر رہے ہیں اور ان کی خدمات کو ہر سطح پر تسلیم کیا جارہا ہے جو کہ قابل فخر بات ہے، میونسپل کمشنر غلام سرور راہپوٹو نے کہا کہ بہترین اساتذہ کی موجودگی کی وجہ سے بلدیہ شرقی کے اسکول، نجی اسکولوں کا مقابلہ کر رہے ہیں، کوشش کریں گے کہ بلدیہ شرقی کے اسکولوں کو مزید بہتری کی جانب گامزن کیا جائی.پاکستان پرائیویٹ اسکولز ایسوسی ایشن کی جانب سے کو پی اے ایف میوزیم میں تقریب کا انعقاد کیا گیا کہ جس میں بہترین ٹیچرز ایوارڈ دئیے گئے جس میں بلدیہ شرقی وہ واحد ضلعی بلدیہ تھی جس میں چھ اساتذہ کو بہترین ٹیچرز کے ایوارڈ سے نوازا گیا یہ ایوارڈ روبینہ عرفان، مہ جبیں اعجاز، فوزیہ مشہود، حمیرا افتخار، سیما احمد اور عظمی یٰسین کو دئیے گئے یاد رہے کہ بلدیہ شرقی کے تین اسکولوں کو بھی بہترین اسکول قرار دیا جاچکا ہے ۔

سیہون شریف کے سید عبداللّٰہ شاہ میڈیکل انسٹیٹیوٹ میں زیرِ علاج بچے کے جسم میں دو دل ہونے کا انکشاف ہوا ہے، دو دل رکھنے والے 4 سال کے بچے کا تعلق نواب شاہ قاضی احمد سے ہے اس حوالے سے بچے کے والد نے کہا کہ بیٹے کو چیک اپ کے لیے این آئی سی وی ڈی سیہون لایا تو ڈاکٹروں نے مختلف ٹیسٹ کرائے۔
دوسری جانب ڈائریکٹر این آئی سی وی ڈی ڈاکٹر معین الدین صدیقی نے بتایا کہ ٹیسٹ میں بچے کے جسم میں دو دل پائے گئے۔ڈاکٹر معین الدین نے کہا کہ 4 سال کے کامران کا ایک دل دائیں جانب اور دوسرا بائیں جانب ہے، میڈیکل سائنسز میں جسم میں دو دل کے کیسز بہت کم سامنے آتے ہیں۔اس حوالے سے ماہر امراضِ قلب ڈاکٹر عبدالرحمن جمالی نے کہا کہ میں نے پہلی بار ایسا کیس دیکھا ہے۔ڈاکٹر عبدالرحمن جمالی نے کہا کہ دو دل کے سبب بچے کو مستقبل میں تکلیف ہوسکتی ہے لہٰذا بچے کو علاج کے لیے کراچی بھیجیں گے

کراچی میں کرکٹ کھیلتے ہوئے نوجوان موت کے منہ میں چلا گیا ۔
گیند کی طرف بھاگتے ہوئے سڑک پر اپنی جانب تیزی سے آتا ہوا رکشہ نہ دیکھ سکا اور اس کے ساتھ ٹکرانے کی وجہ سے اس کو شدید دماغی چوٹ آئی جو جان لیوا ثابت ہوئی ۔
صوبہ سندھ کے دارالحکومت کراچی میں کرکٹ کھیلتے ہوئے نوجوان موت کے منہ میں چلا گیا ۔ رپورٹ کے مطابق شہر قائد کے علاقے اورنگی ٹاون کے رہائشی کاشف انصاری کے کرکٹ سے جنون کی حد تک لگاؤ نے اس کی جان لے لی ، نوجوان کرکٹ کھیلنے کے لئے ہفتے کی شب اپنے گھر سے گیا مگر زندہ واپس نہ آیا ، کیوں کہ قذافی روڈ پر کھیلے گئے نائٹ کرکٹ میچ کے دوران فیلڈنگ کرتے ہوئے کاشف انصاری گیند کی طرف بھاگتے ہوئے سڑک پر اپنی جانب تیزی سے آتا ہوا رکشہ نہ دیکھ سکا اور اس کے ساتھ ٹکرانے کی وجہ سے اس کو شدید دماغی چوٹ آئی ، دماغ پر چوٹ لگنے کی وجہ سے کاشف انصاری کے دماغ کے 2 آپریشن ہوئے لیکن وہ زندہ نہ بچ سکا ۔
خیال رہے کہ کرکٹ کھیلتے ہوئے کے عالمی سطح پر اب تک سب سے زیادہ انگلینڈ کے کھلاڑی ہلاک ہوئے تاہم اس فہرست میں پاکستان کے بھی دو کھلاڑی شامل ہیں ، ان میں سب سے کم عمر انگلینڈ کے آرتھر ایئرلم تھے جو باؤلنگ کرتے تھے، وہ صرف 17برس کی عمر میں سر پر گیند لگنے سے اس دنیا سے رخصت ہو گئے تھے۔