Category: کراچی

کراچی: سیکرٹری صحت سندھ ذوالفقارعلی شاہ کا اس حوالے سے کہنا ہےکہ ویکسینیشن کرنے والے تمام افراد بطور بوسٹر فائزر ویکسین لگواسکیں گے، فیصلہ حتمی طور پر کرلیا گیا ہے۔

تفصیلات کے مطابق محکمہ صحت سندھ نے کورونا کی نئی لہر سے بچاؤ کے لئے اہم فیصلہ کرلئے ہیں، اور اب تمام ویکسینیٹڈ افراد بطور بوسٹر فائزر ویکسین بھی لگوائیں گے، تاہم بوسٹر ڈوز لگانے کی کوئی فیس نہیں لی جائے گی۔

سیکرٹری صحت سندھ ذوالفقارعلی شاہ کا اس حوالے سے کہنا ہےکہ ویکسینیشن کرنے والے تمام افراد بطور بوسٹر فائزر ویکسین لگواسکیں گے، فیصلہ حتمی طور پر کرلیا گیا ہے اور آئندہ دو سے تین دنوں میں نوٹیفکیشن بھی جاری ہوجائے گا، فیصلہ کورونا کی نئی لہر سے حفاظتی تدابیر کے طور پر لیا گیا ہے۔

سیکرٹری صحت کا کہنا تھا کہ کوئی سی بھی ویکسینیشن کے دو ڈوز مکمل ہونے کے بعد شہری بطور بوسٹر فائزر ویکسین لگواسکیں گے، فائزر ویکسین کو بطور بوسٹر پہلے بھی استعمال کیا جاچکا ہے، ائیرپورٹ پر ویکسینیشن کے حوالے سے فیصلہ وفاقی حکومت کرے گی، اس وقت بوسٹر ڈوز صرف جناح اسپتال اور ڈاؤ اوجھا اسپتال میں دستیاب ہے، کوشش ہے کہ بوسٹر ڈوز کا دائرہ پورے سندھ تک پھیلایا جائے، بوسٹر ڈوز لگانے کی کوئی فیس نہیں لی جائے گی۔

کراچی: نسلہ ٹاور کے اطراف 4 سے زائد افراد کے جمع ہونے پر پابندی عائد کردی گئی۔

تفصیلات کے مطابق نسلہ ٹاور کے اطراف 4 یا 4 سے زائد افراد کے جمع ہونے پر پابندی عائد کردی گئی ہے، اور حوالے سے کمشنر کراچی نے باضابطہ نوٹیفکیشن بھی جاری کیا ہے۔

نوٹیفکیشن کے مطابق انتظامیہ کی جانب سے لگائی گئی رکاوٹ عبور کرنے پر بھی مکمل پابندی ہوگی، اور خلاف ورزی کرنے والوں کے خلاف دفعہ 144 کے تحت کارروائی کی جائے گی، جب کہ پابندی کا اطلاق نسلہ ٹاور کے مکمل مسمار ہونے کے تک برقرار رہے گا۔

واضح رہے کہ سپریم کورٹ نے 26 نومبر کی سماعت کے تحریری حکم نامے میں نسلہ ٹاور کے انہدام کے لیے کمشنر کراچی کو 2 سو مزدوروں کی جگہ 4 سو مزدور لگانے کی ہدایت کی ہے، جب کہ کمشنر کراچی کا کہنا ہے کہ نسلہ ٹاور کو گرانے کی کارروائی ایک ہفتے میں یقینی بنائیں گے۔

کراچی : سندھ حکومت پر وزیر اعظم کے الزامات دراصل ا ن کی اپنی نالائقی اور نااہلی کو چھپانے کی کوشش ہے ۔

پاکستان پیپلز پارٹی کے سینئر رہنما اور وزیرِ اعلی سندھ کے مشیرِ برائے زراعت منظور حسین وسان نے وزیر توانائی امتیاز احمد شیخ اور وزیر برائے ایکسائز و ٹیکسیشن مکیش کمار چاولہ کے ہمراہ ہفتے کو سندھ اسمبلی کے کمیٹی روم میں مشترکہ پریس کانفرنس منعقد کی۔اس موقع پر وزیر اعلی سندھ کے مشیرِ زراعت منظور حسین وسان نے پریس کانفرنس سے خطاب کرتے ہوئے کہا کہ سندھ حکومت پر وزیر اعظم کے الزامات دراصل ا ن کی اپنی نالائقی اور نااہلی کو چھپانے کی کوشش ہے۔
انہوں نے کہا کہ سندھ میں گندم ،کھاد، چینی وغیرہ کی قلت کا جھوٹا الزام درست نہیں۔ انہوں نے کہا کہ سندھ کے علاوہ باقی تین صوبوں میں پی ٹی آئی کی حکومت ہے اور وہاں ان اشیاء کی شدید قلت کو چھپانے اور لوگوں کی تکالیف سے پہلو تہی کرنے کے لئے سندھ حکومت پر بے بنیاد الزامات لگائے جاتے ہیں۔

منظور حسین وسان نے کہا کہ پنجاب کے مقابلے میں سندھ میں یوریا اور جراثیم کش ادویات کم قیمت پر مل رہی ہیں۔

انہوں نے کہا کہ سندھ حکومت نے صوبے میں کھاد اور جراثیم کش ادویات کے تمام ڈیلرز کو مناسب قیمت پر فراہمی کی ہدایات دی ہوئی ہیں جو بھی ڈیلر خلاف ورزی کا مرتکب پایا جائے گا اس کے خلاف کارروائی کی جائے گی اور جو کوئی گرانفروشی کا مرتکب پایا جائے گا اس پر جرمانہ عائد کیا جائے گا۔انہوں نے کہا کہ پنجاب کے مقابلے میں سندھ میں یوریا کھاد سستی مل رہی ہے۔
منظور وسان نے کہا کہ پاکستان کے عوام یہ بات اچھی طرح سمجھتے ہیں کہ وزیراعظم اپنی حکومت کی نااہلی چھپانے کے لئے سندھ حکومت پر تنقید کرتے ہیں۔انہوں نے کہا کہ پاکستان پیپلز پارٹی کا منشور کسانوں اور محنت کشوں کے استحکام کا منشور ہے لہذا ہم اچھی فصل کا فائدہ اپنے کسان کو منتقل کرتے ہیں۔منظور حسین وسان نے کہا کہ وزیر اعظم عمران خان رٹے رٹائے جملے یعنی کرپشن ، کسی کو نہیں چھوڑوں گا اور مدینہ ریاست کے الفاظ سے عوام کو نہیں بہلا سکتے۔
انہوں نے شوگر اسکینڈل پر کچھ بھی کارروائی نہیں کی یہ مارتے بھی ہیں اور روتے بھی ہیں میں ان کا نام عمران خان کے بجائے الطاف خان رکھتا ہوں۔انہوں نے کہا کہ لوگوں کو ریلیف دینا ان کے بس کی بات نہیں کیونکہ ریلیف دینے کی نہ ان کی نیت ہے نہ ریلیف دینے کی ان کو سمجھ ہے۔انہوں نے کہا کہ اکتوبر تک ان کا جانا ٹھہر گیا ہے۔اس موقع پر صوبائی وزیر برائے ایکسائز و ٹیکسیشن مکیش کمار چاولہ نے کہا کہ وفاقی حکومت یوریا پرائس فکس کرتی ہے لیکن تین ماہ سے یوریا فیکٹریوں نے بکنگ بند کی ہوئی تھی اور کل سے بکنگ شروع کی ہے۔
انہوں نے کہا کہ سندھ کی گیس سے یوریا بنتی ہے لیکن سندھ کو یوریا کی فراہمی میں مشکلات ہیں انہوں نے واضح کیا کہ اگر سندھ کو اس کے حصے کی یوریا نہیں ملی تو سندھ حکومت شدید احتجاج کرے گی۔ انہوں نے وفاقی حکومت کی پالیسیوں پر افسوس کا اظہار کرتے ہوئے کہا کہ جو ملک یوریا برآمد کرتا تھا وہ اب یوریا درآمد کرنے پر مجبور ہے یہی حال گندم اور چینی کا بھی ہے۔
انہوں نے کہا کہ وفاقی حکومت بڑے بڑے مگرمچھوں اور بڑے بڑے چوہوں کو بے نقاب کرے اور پکڑے۔مشترکہ پریس کانفرنس سے خطاب کرتے ہوئے وزیرِ توانائی سندھ امتیاز احمد شیخ نے کہا کہ اس وقت پاکستان بھر میں گیس کی قلت شدید ترین مسئلہ ہے۔ سندھ تقریبا 65 فیصد گیس پیدا کرتا ہے لیکن ہمیں ہمارے حصے کی گیس نہیں دی جارہی ہماری صنعتیں بند اور گھروں کے چولہے ٹھنڈے پڑے ہیں لیکن وفاقی حکومت کو کوئی احساس نہیں انہوں نے کہا کہ ‘لگتا ہے کہ شدید سردیوں میں وفاقی حکومت احساسِ سردی پروگرام شروع کرے گی اور ان کی طرف سے جلانے کے لئے لکڑیاں بانٹی جائیں گی’ ۔
انہوں نے کہا کہ وفاقی حکومت کی پالیسیوں کے سبب ملک میں گیس کی قلت ہے، فصلوں کو پانی نہیں مل رہا۔ انہوں نے کہا کہ سندھ سب سے زیادہ گیس ، کوئلہ اور پیٹرول پیدا کرتا ہے لیکن اپنے جائز حصے سے محروم ہے۔ انہوں نے کہا کہ نا اہل لوگ وقت پر فیصلے نہیں کرسکے لہذا اب سزا پاکستان کے عوام بھگت رہے ہیں۔ انہوں نے کہا کہ دنیا بھر میں پیٹرول کی قیمتیں کم ہورہی ہیں لیکن ہمارے وفاقی حکومت اس کی قیمت آسمان تک لے جارہی ہے لوگوں کو ریلیف دینے کے بجائے تنگ کیا جارہا ہے۔امتیاز احمد شیخ نے وفاقی حکومت سے مطالبہ کیا کہ سوئی سدرن گیس کمپنی جب آپ سے نہیں چلتی تو اسے سندھ حکومت کے حوالے کریں ہم اسے بہترین انداز میں چلانے کی صلاحیت کے حامل ہیں .

کراچی : جماعت اسلامی کے تحت آج سندھی ہوٹل نیو کراچی میں بلدیاتی مسائل اور صحت وصفائی کی بدترین صورتحال پر احتجاجی کیمپ لگایا جائے گا

تفصیلات کے مطابق اسلامی نیوکراچی ضلع شمالی کے تحت آج اتوار 28نومبر دوپہر 4:00 بجے سندھی ہوٹل نیو کراچی میں بلدیاتی مسائل اور صحت و صفاء کی بدترین صورتحال کے بدترین صورتحال کے حوالے سے احتجاجی کیمپ لگایا جائے گا جس سے اسامہ رضی نائب امیر جماعت اسلامی کراچی، محمد یوسف امیر جماعت اسلامی ضلع شمالی ،نجیب ایوبی جنرنل سیکریٹری پبلک ایڈ کراچی خصوصی خطاب کریں گے ۔
ناظم علاقہ نیوکراچی ڈاکٹر محمد شکیل نیاہل علاقہ نیوکراچی سے بھرپور شرکت کی اپیل ہے۔

کراچی : بلدیہ عظمی کراچی کے پارکس، گارڈن،عمارتیں اور سٹی کونسل ہال کو ادبی کانفرنسوں اور مشاعروں کے انعقاد کے لئے استعمال کیا جائے گا ۔

ایڈمنسٹریٹر کراچی، مشیر قانون اور ترجمان حکومت سندھ بیرسٹر مرتضی وہاب نے کہا ہے کہ بلدیہ عظمی کراچی کے پارکس، گارڈن،عمارتیں اور سٹی کونسل ہال کو ادبی کانفرنسوں اور مشاعروں کے انعقاد کے لئے استعمال کیا جائے گا، انگریزی زبان سیکھتے سیکھتے ہم نے اپنی قومی زبان اردو کو بھلا دیا ہے، ہم نے اپنے ماضی کو بھلا کر جو نئی چیزیں سیکھنی شروع کی ہیں اس کی وجہ سے آج اردو زبان کا یہ حال ہے، ایسی کانفرنسز منعقد ہونی چاہئیں تاکہ آنے والے بچوں کو ماضی کے ہیروز سے روشناس کرایا جاسکے، یہ بات انہوں نے انجمن ترقی اردو کے زیر اہتمام مولوی عبدالحق کانفرنس سے خطاب کرتے ہوئے کہی، اس موقع پر صدر انجمن ترقی واجد جمال، سابق صدر جامعہ کراچی شعبہ اردوڈاکٹر شاداب احسانی، اردوکے نامورادیب محقق وادب دوست شہری تقریب میں شریک تھے، ایڈمنسٹریٹر کراچی بریسٹر مرتضی وہاب نے کہا کہ لمحہ فکریہ ہے کہ کراچی سے زیادہ لاہور میں بہتر اردو سنی اور بولی جاتی ہے، بدقسمتی سے ہم لوگوں نے تہذیب وتمدن کو بھلا دیا ہے جس کی وجہ سے آج اردو کا یہ حال ہوا ہے، انہوں نے کہا کہ ایسے اجتماعات اب بند کمروں میں نہیں ہونے بلکہ بڑی بڑی جگہوں پر کھلی فضاء میں ہونے چاہئیں، انہوں نے کہا کہ آج بھی بلدیہ عظمی کراچی کی کونسل کی قرار داد اردو میں لکھی جاتی ہے اور بلدیہ عظمی کراچی کے مرکزی بلڈنگ میں جو تختیاں آویزاں ہیں وہ بھی اردو زبان میں ہیں، سندھ حکومت فراخدلی کیساتھ انجمن ترقی اردو کو گرانٹ دیتی ہے جس کا مقصد اردو کی ترویج اور ترقی میں اپنا بھر پور کردار ادا کرنا ہے، اردو زبان کی ترویج کیلئے سب کو مل کر کام کرناہوگا، انہوں نے کہا کہ مادری اور علاقائی زبانوں کی اپنی اپنی اہمیت ہے لیکن اردو لوگوں کو جوڑنے کی زبان ہے آپ ملک میں کسی بھی شہر میں چلے جائیں جو زبان آپ کے کام آئے گی وہ اردو ہے، آپ کو اس علاقے کی زبان نہ بھی آتی ہو لیکن اردو وہاں آپ کا ساتھ دے گی، انہو ں نے کہا کہ انجمن ترقی اردو جدید فنون کو استعمال کرتے ہوئے زبان کی ترویج پر کام کررہی ہے اور جس پر وہ خراج تحسین کے مستحق ہیں، اردو قومی زبان ہے اور اس کی ترویج وفروغ کیلئے سندھ حکومت ہر طرح تعاون کریگی، سابق صدر جامعہ کراچی شعبہ اردو ڈاکٹر شاداب احسانی نے خطاب کرتے ہوئے کہا کہ پاکستان کے پہلے وزیراعظم جہانگیر پارک کراچی میں ہر ماہ خطاب کرتے تھے، ہماری خواہش ہے کہ ایڈمنسٹریٹر کراچی بیرسٹر مرتضی وہاب اس روایت کو زندہ کریں گے، میری ایڈمنسٹریٹر کراچی سے درخواست ہے کہ وہ مہینہ میں ایک بار شعراء ، ادیبوں، دانشوروں اور عمائدین کیساتھ مکالمہ رکھیں جس کا مقصد اردو زبان کا فروغ ہو۔