Category: کراچی

کراچی: پاکستان پیپلزپارٹی نے سندھ میں ایک بار پھر نیا بلدیاتی نظام لانے کا فیصلہ کیا ہے، جس کی بلاول بھٹو زرداری نے بھی منظوری دے دی۔ ٹاؤن سسٹم پھر سے بحال ہو جائے گا ۔
تفصیلات کے مطابق  پاکستان پیپلزپارٹی کے چیئرمین بلاول بھٹو زرداری نے سندھ میں نئےبلدیاتی نظام کی منظوری دے دی، جس کے بعد کل نئے بلدیاتی نظام کا بل اسمبلی میں پیش کیا جائے گا۔
پاکستان پیپلزپارٹی بل کی منظوری کے حوالے سے پُرامید ہے اور بتایا جارہا ہے کہ منظوری کے بعد مجوزہ بلدیاتی نظام میں بڑی تبدیلیاں کی جائیں گی۔
نئے بلدیاتی نظام کے تحت کراچی میں ضلع کونسل اور ڈی ایم سی کے نظام کو ختم کر کے صوبے کے ہر ڈویژن میں ٹاؤن سسٹم نافذ کیا جائے گا، کراچی میں ضلع کونسل اورڈی ایم سیزکی جگہ 25 ٹاؤنز تشکیل دیے جائیں گے، جو جنرل (ر) پرویز مشرف کے دور میں 18 تھے۔
نئےبلدیاتی نظام میں میئرکراچی کو مزیداختیارات دیے جائیں گے جبکہ یونین کونسل کے چیئرمینز بھی بااختیار ہوں گے۔  نئےنظام میں میونسپل سہولیات کو ایک پلیٹ فارم میں یکجاکیاجائےگا۔
پاکستان پیپلزپارٹی نے نئےبلدیاتی نظام میں ایم کیوایم اورجماعت اسلامی کی تجاویزکو بھی شامل کیا ہے۔

کراچی : امیر اہل سنت مولانا محمدالیاس قادری نے کہا ہے کہ ہماری نیکی ظاہر ہوجائے،لوگ تعریفیں کرنے لگیں،واہ واہ ہونے لگے، زیادہ لوگوں میں اعلان اورسوشل میڈیا پر وائر ل ہوجائے،اخبار میں اشتہار لگ جائے تو ہمیں خوشی ہوتی ہے،ہم پھولے نہیں سماتے، مگر قربان جایئے اللہ پاک کے نیک اور پاکیزہ لوگوں کی سوچ پر، ان کی ہمت پر،ان کے اخلاص پر یہ لوگ خالص اللہ کی رضا کیلئے نیکیاں کیا کرتے تھے،ہمارے بزرگان دین نیک اعمال میں اخلاص کا بہت لحاظ رکھا کرتے اور اپنی نیکیاں چھپانے کا خوب اہتمام فرماتے تھے۔
ان خیالات کا اظہار انہوں نے عالمی مدنی مرکز فیضان مدینہ کراچی میںہفتہ وار سنتوں بھرے اجتماع سے بیان کرتے ہوئے کیا۔

امیر اہل سنت نے فرمایا کہ آخرت میں نجات کیلئے نیکیاں کرنا بہت ضروری ہے،اسی طرح اپنی نیکیوں کو ریاکاری کی تباہ کاری سے بچانا بھی ضروری ہے،ریاکاری شرک کے مشابہت رکھتی ہے،اس سے ریاکاری کی سنگینی کا معلوم ہوتا ہے۔ ریاکاری دجال کے فتنے سے زیادہ خطر ناک ہے، ریاکاری کا علاج یہ ہے کہ نیکیوں کو چھپایا جائے، وہ نیکیاں جو چھپ کر کی جاسکتی ہیں جیسے تہجد،نفل نمازیں،صدقہ وخیرات وغیرہ ایسی نیکیوں میں کوشش کریں کہ اللہ پاک کے سوا کسی کو ان کا علم نہ ہو، البتہ وہ نیکیاں جن کا اظہار ضروری ہے انہیں اخلاص کے ساتھ کیا جائے۔

امیر اہل سنت نے اپنے بیان میں مزید فرمایا کہ ریاکاری کی وجہ سے بہت نقصان ہوتا ہے، نیکی کرنا آسان کام نہیں ہے،ایک نیکی کرنے کے لئے انسان ایک ہی وقت میں دو دشمنوں سے جنگ لڑتا ہے،ایک نفس امارہ اور دوسرا شیطان، یہ دنوں انتہائی خطر ناک دشمن ہیں،یہ ہر وقت نیکیوں سے روکتے رہتے ہیں،انسان ان دونوں کی مخالفت کرکے نیکی کرتا ہے،ریاکاری کی نیت سے نیکیوں کا اظہار کرنے والے کا محض عمل بے کار کردیا جاتا،تب بھی صرف اتنا ہوتا کہ گویا اس نے نیکی کی ہی نہیں، لیکن بات یہ نہیں ہے بلکہ ریاکار تو وہ خطا کار ہے جو کرتا نیکی ہے مگر ریاکاری کے سبب گنہگار لکھ دیا جاتا ہے،دکھاوے کیلئے نیکی کرنا ریاکاری کی نیت سے نیکی کا اظہار کردیناخطر ناک ہے۔
امیر اہل سنت نے فرمایا کہ جس طرح ریاکاری کی نیت سے نیکیوں کا اظہار اچھا نہیں اسی طرح گناہوں کا اظہار بھی نہ کریں، ایمان کا تقاضہ ہے کہ بندہ ریاکاری سے ہر دم بچتا رہے اور نیک کام صرف اور صرف اللہ پاک کی رضا کیلئے کیا کرے، اللہ پاک سے دعا ہے اپنے نیک بندوں کا صدقہ ہمیں بھی اخلاص کی دولت عطا فرمائے

کراچی : پیٹرولیم ڈیلرز کے بعد بلڈر اور ڈویلپرز ایسوسی ایشن نے ہڑتال کا اعلان کر دیا۔

تفصیلات کے مطابق ملک میں کھانے پینے کی اشیاء کے ساتھ ساتھ بلڈنگ میٹریل مہنگا ہونے سے گھر بنانا بھی خواب بن گیا۔ریت، بجری، سیمنٹ ، اینٹوں اور سرئیے سمیت تمام بلڈنگ میٹریل کی قیمتیں آسمان سے باتیں کرنے لگی ہیں۔پٹرولیم ڈیلرز نے گذشتہ روز کاروبار بند کیا تو آج بلڈرز اور ڈویلپرز ایسوسی ایشن نے بھی شٹر گرا دئیے۔
کراچی میں تمام پراجیکٹس پر کام بند کر دیا گیا۔سابق چئیرمین حسن بخشی نے 92 نیوز کے پروگرام ہارڈ ٹاک پاکستان میں گفتگو کرتے ہوئے کہا کہ تعمیراتی سامان بہت مہنگا ہو چکا۔ایسے کاروبار نہیں چل سکتے۔کراچی میں بلڈنگ مارکیٹ متاثر ہے۔

سریے کی قیمت پر ریگولیٹری ڈیوٹی ہٹانا چاہئیے۔خیال رہے کہ اس سے قبل پٹرولیم ڈیلرز کی ہڑتال نے عوام کا جینا محال کیے رکھا۔

پٹرولیم ڈیلرز ایسوسی ایشن نے اپنے مارجن میں اضافہ کرنے کا مطالبہ منظور نہ کیے جانے پر جمعرات کے روز ملک گیر ہڑتال کر دی تھی۔گذشتہ شب پٹرولیم ڈیلرز ایسوسی ایشن اور پٹرولیم ڈویژن کے درمیان معاملات طے پا گئے۔ حکومت کیساتھ معاملات طےپانے کے بعد پٹرولیم ڈیلرز ایسوسی ایشن نے ملک گیر ہڑتال ختم کرنے کا اعلان کیا ۔ہڑتال ختم کرنے کے اعلان کے فوری بعد ملک بھر کے پٹرول پمپس کھلنا شروع ہو گئے۔
میڈیا رپورٹس کے مطابق پٹرولیم ڈیلرز ایسوسی ایشن اور پٹرولیم ڈویژن کے مابین مذاکرات کے بعد پٹرولیم ڈویژن ‏نے فی لیٹر پیٹرول پر مارجن میں99 پیسے اضافے پر رضامندی کا اظہار کیا ہے۔یٹرولیم ڈویژن نے 6 ماہ بعد ڈیلرز مارجن کاجائزہ لینےکی یقین دہانی بھی کرواتے ہوئے کہا ہے کہ ڈیلرز مارجن ‏اضافہ 4.90 روپے فی لیٹر کیا جائےگا۔