Category: کراچی

محکمہ موسمیات کا کہناہے کہ بدھ کو شہر میں بلوچستان کی گرم ریگستانی ہوائیں چلنے کے سبب پارہ 38 ڈگری کو چھوسکتا ہے۔

محکمہ موسمیات کراچی کے ارلی وارننگ سینٹر فارہیٹ ویو کے مطابق بدھ کو شہر میں دن کے وقت سمندری ہوائیں معطل رہنے اور بلوچستان کی گرم شمال مغربی ہوائیں چلنے کا امکان ہے جس کے سبب درجہ حرارت میں اضافہ ہوسکتا ہے۔

محکمہ موسمیات کا کہنا ہے کہ گرمی کا پارہ 38 ڈگری سینٹی گریڈ تک بڑھ سکتا ہے تاہم شام کے وقت سمندر کی بند ہوائیں دوبارہ بحال ہونے کی توقع ہے۔
محکمہ موسمیات کے مطابق پیر کو شہر کا زیادہ سے زیادہ درجہ حرارت 36.5 ڈگری سینٹی گریڈ ریکارڈ ہوا جبکہ ہوا میں نمی کا تناسب 66 فیصد رہا۔

وزیر اطلاعات و محنت سندھ سعیدغنی نے کہا ہے کہ ہمارے پاس اداروں میں افرادی قوت کی کمی ہے، عدالت کی مہربانی سے سندھ پبلک سروس کمیشن فنکشنل نہیں ہے، ججزہماری اپیل سنیں شنوائی نہیں ہورہی۔ محسن پاکستان ڈاکٹر عبدالقدیر کی بیماری کے دوران سوائے وزیر اعلی سندھ کے وزیر اعظم یا کسی بھی صوبے کے وزیر اعلیٰ یا وزیر اعظم نے نہیں پوچھا۔
میں سمجھتا ہوں وزیراعظم اور دیگر صوبوں کے وزراء اعلیٰ کو معافی مانگنی چاہیے اور وزیر اعظم کو ان کی قبر پر کھڑے ہوکر میڈیا کے سامنے معافی مانگیں۔ سندھ حکومت مزدور دوست حکومت ہے۔ محکمہ محنت کے حوالے سے بہت ساری چیزیں ابھی کرنا باقی ہیں ہم نے سب سے زیادہ قوانین بنائے ہیں۔
ان خیالات کا اظہار انہوںنے پیر کے روز نیشنل انسٹی ٹیوٹ لیبر ایڈمنسٹریٹریشن ٹریننگ(NILAT) کے تحت 60 ویں پوسٹ گریجویٹ ڈپلومہ کورس برائے لیبر ایڈمنسٹریٹریشن اینڈ انڈسٹریل ویلفیئر کی افتتاحی تقریب سے بحثیت مہمان خصوصی خطاب اور بعد ازاں میڈیا سے بات چیت کرتے ہوئے کیا۔

اس موقع پر سیکرٹری محنت سندھ لئیق احمد، مزدور رہنماء حبیب الدین جنیدی ،ناصرمنصور، ڈی جی نیلات انجینئر غلام سرور اوتیرو، نورالہدی، کورس کوآڈینیٹر سید ایوب علی و دیگرنے بھی خطاب کیا۔ تقریب سے خطاب کرتے ہوئے صوبائی وزیر سعید غنی نے کہا کہ میرا نیلات میں آناجانا وزیربننے سے پہلے کا ہے۔ انہوںنے کہا کہ یہ اہم ادارہ ہے، ماضی میں اس کوصحیح استعمال نہیں کیا گیا۔
سعید غنی نے کہا کہ اس ادارے کی عمارت 1965میں بنی آج تک وفاق نے اس کی تزئین وآرائش نہیں کی تھی۔اٹھارویں ترمیم کے بعد ہم نے اس کام کوشروع کیاہے۔ سعید غنی نے کہا کہ اس ادارے میں مزدورلیڈران سے لیکرافسران کی تربیت ہوتی ہے۔
انہوں نے کہا کہ ہم نے اس سلسلے میں معزز عدالیہ میں اپنی درخواست جمع کرائی ہے لیکن ابھی تک اس کیس پر شنرائی نہیں ہورہی ہے۔ انہوںنے کہا کہ میری معزز عدلیہ اور ججز صاحبان سے استدعا ہے کہ وہ ہماری اپیل کی شنوائی شروع کریں، فیصلہ انہوں نے قانون کے تحت کرنا ہے، اگر وہ یہ کہتے ہیں کہ سندھ پبلک سروس کمیشن ختم کردیں تو ہم ان کی بات کو تسلیم کرتے ہوئے اس کی عمارت کو ہی ڈھا دیں گے اور تعیناتی کے لئے کوئی اور قانونی راستہ دیکھیں گے۔

وزیراعلی سندھ سید مراد علی شاہ نے وفاقی وزیر برائے آبی وسائل چوہدری مونس الہی سے ملاقات میں کہا کہ انکی حکومت 1991 کے پانی کے معاہدے کے علاوہ پانی کی تقسیم کی کوئی بھی اسکیم قبول نہیں کرے گی ، بشمول تین درجے کے فارمولے کے۔انھوں نے کہا کہ ارسا کو مضبوط بنانے کیلئے معاہدے اور ٹھوس اقدامات کیے جائیں تاکہ وہ پانی کے معاہدے کو اس کے حقیقی روح کے مطابق نافذ کیا جاسکے اور خریف کے ابتدائی اور اختتامی عرصے کے دوران پنجاب میں لنک کینال کھولنے کی اجازت نہ دی جائے۔
اجلاس پیر کو وزیراعلی ہاس میں منعقد ہوا۔ وفاقی وزیر مونس الہی کی معاونت وفاقی آبی سیکرٹری شہزاد بنگش ، جوائنٹ سیکرٹری پانی مہر علی شاہ اور ڈائریکٹر اشعر عباس زیدی نے کی جبکہ وزیراعلی کی معاونت انکی ٹیم نے کی جس میں وزیر آبپاشی جام خان شورو ، چیئرمین پی اینڈ ڈی حسن نقوی ، چیف انجینئر آبپاشی ظریف کھوڑو ، ممبر ارسا زاہد جونیجو ، وزیراعلی سندھ کے ایڈیشنل سیکرٹری فیاض جتوئی شامل تھے .
اجلاس کے آغاز میں وفاقی وزیر مونس الہی نے کہا کہ انہوں نے پانی کی تقسیم کی اسکیم کے بارے میں ان کے نقطہ کو سننے کیلئے صوبے کے اسٹیک ہولڈرز سے ملاقات شروع کی ہے۔ انہوں نے مزید کہا کہ وہ تمام بقایا مسائل کو خوش اسلوبی سے حل کرنا چاہتے ہیں۔ وزیراعلی مراد علی شاہ نے وفاقی وزیر کی جانب سے پانی کی تقسیم کے مسئلے کو حل کرنے کی کوششوں کا خیرمقدم کرتے ہوئے کہا کہ 1991 کا معاہدہ مشترکہ مفادات کونسل اجلاس نے منظور کیا جوکہ تمام صوبوں کیلئے قابل قبول ہے۔
انہوں نے کہا کہ ہماری معمولی شکایت ہے کہ ہم چاہتے ہیں کہ وفاقی حکومت ارسا کو مضبوط کرے تاکہ وہ پانی کے معاہدے کو اس کے حقیقی روح کے مطابق نافذ کرسکے اور مزید کہا کہ ارسا معاہدے پر عملدرآمد کرنے میں ناکام رہا ہے اور پنجاب کو اپنی لنک کینال کھولنے کی اجازت دی ہے۔ مراد علی شاہ نے ماضی کی تاریخ سے متعلق بتاتے ہوئے کہا کہ سندھ کا پانی پچھلی کئی صدیوں سے آبپاشی کیلئے استعمال کیا جا رہا ہے۔

سابق صدر آصف علی زرداری کی بڑی صاحبزادی بختاور بھٹو کے ہاں بیٹے کی پیدائش ہوئی جس کا اعلان انہوں نے سماجی رابطے کی ویب سائٹ ٹویٹر پر ٹویٹ کرتے ہوئے کیا۔بختاور بھٹو نے اپنے شوہر محمود چوہدری کو ٹیگ کرتے ہوئے بتایا کہ ہمارے ہاں بیٹے کی ولادت ہوئی ہے۔جب کہ بلاول بھٹو زرداری نے بھی ماموں بننے پر خوشی کا اظہار کیا۔
بلاول بھٹو نے ٹویٹر پر ٹویٹ کرتے ہوئے کہا کہ میں آفیشلی ماموں بن گیا۔
زرداری خاندان کو اس خوشی کے موقع پر سوشل میڈیا پر سیاسی شخصیات کے ساتھ ساتھ صارفین کی جانب سے بھی مبارکباد دی جا رہی ہے۔ بختاور بھٹو زرداری اور پاکستانی نژاد دبئی کے صنعتکار محمود چوہدری کا نکاح 30 جنوری کو ہوا، بختاور بھٹو نے اپنی زندگی کے اس بڑے دن ڈیزائنر وردہ سلیم کا گولڈن عروسی جوڑا زیب تن کیا اور ساتھ ہیروں کے ہار کا انتخاب کیا۔

ایم کیو ایم پاکستان کے سربراہ خالد مقبول صدیقی نے کہا ہے کہ چاہتے تھے ڈاکٹر قدیر کی تدفین مزارِ قائد پر ہو۔

انہوں نے کہا کہ ایم کیو ایم چاہتی تھی کہ قائدِ اعظم کے مزار کے احاطے میں ڈاکٹر عبدالقدیر خان کی تدفین کی جاتی۔ایک بیان کے ذریعے انہوں نے محسنِ پاکستان ڈاکٹر عبدالقدیر کے انتقال پر تعزیت کا اظہار کیا ہے۔ایم کیو ایم پاکستان کے سربراہ خالد مقبول صدیقی یہ بھی کہا کہ پاکستان کا دفاع ڈاکٹر عبدالقدیر خان کی امانت ہے۔

ایم کیو ایم پاکستان کے کنوینر ڈاکٹر خالد مقبول صدیقی نے ڈاکٹر عبدالقدیر خان کی غائبانہ نماز جنازہ جو حیدرآباد میں ادا کی گئی بعد ازاں پریس کانفرنس سے خطاب کرتے ہوئے کہا کہ فرزند پاکستان ڈاکٹر عبدالقدیر خان کے اجداد نے پاکستان بنایا اور انھوں نے انہیں ناقابل تسخیر بنا کر محسن پاکستان کا اعزاز حاصل کیا آج ان ہی کے قبیلے اور قوم کے افراد نے ان کو خراج عقیدت پیش کیا میں ارباب اقتدار واختیارسے یہ سوال پوچھتا ہوں کہ پاکستان کے جوہری منصوبے خالق کو اس کی زندگی میں وہ عزت اور قدر کیوں نہ ملی جو اس کو ملنی چاہیے تھی آج وہ ہمارے درمیان نہیں ہیں لیکن کراچی سے خیبر تک اس کی یاد منائی جا رہی ہے قوم سوگوار ہے ایم کیو ایم پاکستان کے تمام دفاتر میں کل بروز پیر عبدالقدیرغائبانہ نماز جنازہ ادا کی جائے گی۔ڈاکٹر خالد مقبول صدیقی کا مذید کہنا تھا کہ اس پاکستان کے اس عظیم سپوت کی یادگاریں ایم کیو ایم پاکستان تعمیر کرے گی جس نے اپنا سب کچھ پاکستان کیلئے قربان کیا اور بھارت کے ایٹمی دھماکوں کا منہ توڑ جواب دیا میں ملک کی وفاقی اور صوبائی حکومتوں سے کہتا ہوں کہ ائیرپورٹ اور بڑی بڑی عمارتوں کو قومی ہیرو کے نام سے منصوب کیا جائے۔پاکستان کی تاریخ قائداعظم محمد علی جناح سے شروع ہوتی ہے پھر لیاقت علی خان اور اس کے بعد ڈاکٹر عبدالقدیر خان اس کے سوا ہماری تاریخ میں کچھ نہیں اللہ تعالیٰ ڈاکٹر عبدالقدیر خان کی مغفرت فرمائے،درجات بلند فرمائے اور ان کے اہل خانہ کو یہ صدمہ برداشت کرنے کی توفیق عطا فرمائے۔اس موقع پر سینئر ڈپٹی کنونیرعامر خان،ڈپٹی کنونیر کنور نوید جمیل، ڈپٹی کنونیر وسابق میئر کراچی وسیم ا ختر اراکین رابطہ کمیٹی،آئی ایس ٹی سی کے ذمہ داران اورحیدرآباد ڈسٹر کٹ کے ذمہ داران بھی موجود تھے۔
دریں اثناء ایم کیو ایم پاکستان نے 3روزہ یوم سوگ کا اعلان کرتے ہوئے اپنی تمام تنظیمی مصروفیات منسوخ کرنے کا اعلان کر دیاَ

صوبائی وزیر بلدیات، دیہی ترقی، پبلک ہیلتھ انجینئرنگ سید ناصر حسین شاہ نے محسن پاکستان ایٹمی سائنسدان ڈاکٹر عبدالقدیر خان کے انتقال پرگہرے دکھ اور افسوس کا اظہارکرتے ہوئے کہا ہے کہ ڈاکٹر عبدالقدیر ہمارے ملک کا بڑا ثاثہ تھے، جن کی خدمات کو ہمیشہ یاد رکھا جائے گا اوران کی بدولت ہی آج پاکستان ایٹمی طاقت کے طور پر ابھر کر سامنے آیا ۔
انہوں نے کہاکہ ایسے محسن صدیوں میں پیدا ہوتے ہیں ۔سید ناصر حسین شاہ نے دعا کی کہ اللہ پاک ان کی مغفرت فرمائے اور پوری امت مسلمہ اور لواحقین کو یہ صدمہ برداشت کرنے کی توفیق عطا فرمائے ۔

این سی او سی کے اجلاس کی روشنی میں اہم فیصلہ، سندھ حکومت نے صوبے بھر میں تمام جامعات کل سے 100 فیصد حاضری کیساتھ کھولنے کا اعلان کر دیا ۔ تفصیلات کے مطابق صوبہ سندھ میں تمام جامعات اور تعلیمی بورڈز پیر سے 100 فیصد حاضری کے ساتھ کھولنے کا اعلان کردیا۔سندھ کے وزیر برائے جامعات اسماعیل راہو کا کہنا ہے کہ صوبے میں تمام نجی اورسرکاری جامعات کل سے100 فیصد حاضری کےساتھ کھولی جائیں گی۔
ان کا کہنا تھاکہ فیصلہ این سی او سی کے اجلاس کی روشنی میں کیا گیا ہے۔صوبائی وزیر کا کہنا تھاکہ ویکسینیشن یقینی بنانے کیلئے جامعات میں محکمہ صحت والے کاؤنٹر لگائیں گے۔خیال رہے ملک میں کورونا کا زور ٹوٹنے پر این سی اوسی نے پیر 11 اکتوبر سے تعلیمی ادارے معمول کے مطابق کھولنے کی اجازت دے دی، وفاقی وزیر اسد عمر نے کہا کہ ملک میں کورونا وباء کا پھیلاوٴ کم ہونے اور ویکسی نیشن کی بنیاد پر اب کلاسیں معمول کے مطابق ہوسکیں گی، پیر سے تعلیمی اداروں کو معمول کے مطابق کلاسز کی اجازت ہوگی۔
وفاقی وزیر منصوبہ بندی اور چیئرمین این سی اوسی اسد عمر کی زیرصدارت این سی اوسی کا اجلاس ہوا، اجلاس میں کورونا وباء کے پھیلاؤ کی صورتحال اور ویکسی نیشن کے ڈیٹا کے پیش نظر پیر سے تعلیمی ادارے معمول کے مطابق کھولنے کا فیصلہ کیا گیا ، وفاقی وزیر اسد عمر نے کہا کہ پیر 11 اکتوبر سے تمام تعلیمی اداروں میں کلاسز معمول کے مطابق ہوں گی ، تعلیمی اداروں میں معمول کے مطابق کلاسیں شروع کرنے کی اجازت کا فیصلہ کورونا بیماری کے پھیلاوٴ میں کمی اور سکولوں میں ویکسی نیشن کے پروگرام کے آغاز کی بنیاد پر کیا گیا ہے۔

وزیرِاعظم سمیت کسی کو میری یاد تک نہیں آئی، ڈاکٹر عبدالقدیر خان کا علالت کے دوران شکوہ، ڈاکٹر قدیر کا وزیراعلیٰ سندھ کو لکھا خط منظر عام پر آ گیا۔ تفصیلات کے مطابق ڈاکٹر عبدالقدیر خان نے اپنے خط میں وزیراعلیٰ سندھ کو کہا کہ آپ کے علاوہ وزیرِ اعظم اور دیگر صوبوں کے وزرائے اعلیٰ کو میری یاد تک نہ آئی۔
نجی ٹی وی کے مطابق ایٹمی پروگرام کے خالق محسن پاکستان ڈاکٹرعبدالقدیر خان کا وزیراعلیٰ سندھ مراد علی شاہ کو لکھا خط منظرِ عام پر آگیا ہے، جس میں انہوں نے وزیراعلیٰ سندھ کی جانب سے بھیجے گئے گلدستے کا شکریہ ادا کیا۔ڈاکٹر عبدالقدیر نے لکھا کہ میں اب پہلے سے بہت بہتر محسوس کررہا ہوں، میں شکر گزار ہوں کہ میرے صوبے کے وزیراعلیٰ نے مجھے مشکل وقت میں یاد رکھا، وزیراعلیٰ سندھ کے علاوہ وزیرِ اعظم اور دیگر صوبوں کے وزرائے اعلیٰ کو میری یاد تک نہ آئی ۔
واضح رہے کہ وزیراعلیٰ سندھ مراد علی شاہ نے ڈاکٹر عبدالقدیر کو گلدستہ بھیجا تھا جس میں ان کی صحت یابی کے لئے نیک خواہشات کا اظہار کیا گیا تھا، جب کہ ڈاکٹر عبدالقدیر خان کی جانب سے وزیراعلیٰ سندھ کو جوابی خط 4 اکتوبر کو اسلام آباد سے لکھا گیا۔دوسری جانب ڈاکٹرعبدالقدیرخان کواسلام آباد کے ایچ 8 قبرستان میں پورے سرکاری اعزاز کے ساتھ سپردخاک کردیا گیا ، جسد خاکی کی تدفین سے قبل گارڈ آف آنرز پیش کیا گیا، مسلح افواج و پولیس کے دستوں نے سلامی پیش کی۔

محسن پاکستان ایٹمی سائنسدان ڈاکٹر عبدالقدیر خان کی نماز جنازہ ادا کردی گئی۔ تفصیلات کے مطابق ڈاکٹر عبدالقدیر خان کی نماز جنازہ ان کی وصیت کے مطابق وفاقی دارالحکومت اسلام آباد کی فیصل مسجد میں ادا کی گئی ، جس میں تمام وفاقی وزراء ، مسلح افواج کے سربراہان، سپیکر قومی اسمبلی شریک ہوئے ،اس کے علاوہ قائم مقام صدر مملکت ، چیئرمین جوائنٹ چیف سمیت تمام اعلی ریاستی شخصیات بھی نماز جنازہ میں شریک ہوئیں ، اس موقع پر عوام کا جم غفیر بھی اپنے محسن کو الوداع کہنے کے لیےاسلام آباد کی فیصل مسجد پہنچا ، اس موقع پر اسلام آباد میں فیصل مسجد اور اس کے اطراف میں ابر رحمت بھی برستا رہا ، ڈاکٹر عبدالقدیر خان کے انتقال پر قومی پرچم بھی سرنگوں رہا ۔
وزیر اعظم عمران خان نے ڈاکٹر عبدالقدیر خان کے انتقال پر اظہار افسوس کرتے ہوئے کہا کہ ہماری قوم ان سے بہت پیار کرتی ہے کیوں کہ انہوں نے ہمیں ایٹمی ہتھیاروں کی ریاست بنانے میں اہم کردار ادا کیا ، انہوں نے کہا کہ ڈاکٹر اے کیو خان کے انتقال پر بہت دکھ ہوا ، انہوں نے ہمیں ایک جارحیت والے بڑے ایٹمی پڑوسی کے خلاف تحفظ فراہم کیا ہے ، پاکستانی عوام کے لیے وہ ایک قومی ہیرو ہیں ، ڈاکٹر عبدالقدیر خان کو ان کی وصیت کے مطابق فیصل مسجد کے احاطے میں سپرد خاک کیا جائے گا۔
صدر پاکستان عارف علوی نے بھی ڈاکٹر عبدالقدیر خان کے انتقال افسوس کا اظہار کرتے ہوئے کہا کہ ڈاکٹر عبدالقدیر خان کے بارے میں جان کر بہت دکھ ہوا ، ڈاکٹر عبدالقدیر خان کو ذاتی طور پر 1982 سے جانتا تھا ، ڈاکٹرعبدالقدیر خان نے ملکی دفاع کو ناقابل تسخیر بنایا ، قوم ان کی خدمات کو کبھی نہیں بھولے گی ۔ اسی طرح چیئرمین جوائنٹ چیفس آف سٹاف کمیٹی اور تمام سروسز چیفس نے پاکستان کے معروف سائنسدان ڈاکٹر عبدالقدیر خان کی وفات پر گہرے دکھ کا اظہار کیا ہے ، پاک فوج کے شعبہ تعلقات عامہ ( آئی ایس پی آر ) کے مطابق آرمی چیف جنرل قمر جاوید باجوہ نے کہا ہے کہ ڈاکٹر عبدالقدیر خان نے پاکستان کے دفاع کو مضبوط بنانے کے لیے گرانقدر خدمات سر انجام دیں ، اللہ تعالی مرحوم کے درجات بلند کرے۔