Category: کراچی

پاکستان پیپلز پارٹی کے چیئرمین بلاول بھٹو زرداری نے حسن اسکوائر، غریب آباد، لیاقت آباد، سندھی ہوٹل، چونا ڈپو، گولیمار، گلبہار، لسبیلہ، پٹیل پاڑہ، دھوراجی، پی ای سی ایچ ایس، بہادرآباد سمیت کراچی کے مختلف علاقوں کا دورہ کیا۔
اس دوران چیئرمین بلاول بھٹو زرداری نے دھوراجی میں واقع کڈنی ہل پارک میں شجرکاری مہم میں حصہ لیا جبکہ پی ای سی ایچ ایس میں نکاسی آب کے منصوبے کا معائنہ بھی کیا۔

چیئرمین بلاول بھٹو زرداری غلام رسول ٹیرس گارڈن بھی گئے، جبکہ وہ ایمپریس مارکیٹ کے دورے کے موقع پر دکان داروں میں گھل مل گئے۔اس موقع پر دکان داروں نے چیئرمین بلاول بھٹو زرداری کے ہمراہ سیلفیاں بھی بنائیں جبکہ دورے کے دوران انہیں ڈرائی فروٹ کے تحائف بھی پیش کیے گئے۔اس موقع پر چیئرمین بلاول بھٹو زرداری نے عوام کے مسائل سنے اور ان کے فوری حل کے لیے ہدایات بھی جاری کیں۔

وزیراعلیٰ سندھ سید مراد علی شاہ کا کہنا ہے کہ گزشتہ 24 گھنٹوں میں کورونا کے مزید 19971 نمونے ٹیسٹ کئے گئے ہیں۔

تفصیلات کے مطابق مراد علی شاہ نے کہا کہ گزشتہ 24 گھنٹوں کے دوران 1702 نئے کیسز سامنے آئے ہیں۔

وزیراعلیٰ سندھ نے کہا کہ گزشتہ 24 گھنٹوں میں 122252 ویکسینیشن کی گئی ہیں جس کے بعد سندھ بھر میں اب تک ویکسینیشن کی تعداد 10333698 یعنی 30.03 فیصد ہے۔

ان کا کہنا تھا کہ سندھ میں مجموعی طور پر کوویڈ کے 5431239 ٹیسٹ کیے گئے ہیں، صوبے میں اب تک 424072 کیسز ہوچکے ہیں۔

مراد علی شاہ نے کہا کہ آج عالمی وبا کے مزید 1483 مریض صحتیاب ہوگئے جس کے بعد 368724 کورونا کے مریض صحتیاب ہوچکے ہیں۔

انہوں نے کہا کہ آج مزید 86 مریض انتقال کرگئے، مجموعی تعداد 6713 ہوگئی ہے۔

سید مراد علی شاہ کا کہنا ہے کہ اس وقت 48635 مریض زیرِعلاج ہیں، 47418 مریض گھروں،371 مریض آئسولیشن سینٹرز پر، 1180 مختلف اسپتالوں میں زیرِعلاج ہیں جس میں سے 1040 مریضوں کی حالت تشویشناک بتائی جارہی ہے۔

انہوں نے کہا کہ صوبہ بھر کے 1702 کورونا کیسز میں 876 نئے کیسز کا تعلق شہر کراچی سے ہے۔

سید مراد علی شاہ کا کہنا ہے کہ کراچی شرقی میں277 ، کراچی وسطی میں 217، جنوبی کراچی میں 162، کورنگی میں 107، کراچی غربی میں 65 اور ملیر میں 48 مزید کیسز ظاہر ہوئے۔

وزیراعلیٰ سندھ سید مراد علی شاہ کا کہنا تھا کہ حیدرآباد میں 192، سکھر میں 45، گھوٹکی میں 44، خیرپور میں 42، مٹیاری میں 38، سجاول اور سانگھڑ میں 37-37، تھرپارکر اور شکارپور میں 35-35، ٹنڈو محمد خان اور کشمور میں 34-34، بدین اور ٹھٹہ میں 28-28، جیکب آباد میں 23، دادو میں 19، نوابشاہ اور عمرکوٹ میں 18-18، نوشہروفیروز میں 16، لاڑکانہ میں 14، ٹنڈوالہیار میں 12، قمبر میں 11، جامشورو میں 8، میرپورخاص میں 7 نئے کیسز رپورٹ ہوئے۔

اپوزیشن لیڈر سندھ اسمبلی حلیم عادل شیخ نے کہا کہ ضیاء الدین یونیورسٹی کے طلباء کے ساتھ زیادتی افسوسناک ہے۔

تفصیلات کے مطابق اپوزیشن لیڈر سندھ اسمبلی حلیم عادل شیخ نے کہا کہ 35 ہزار بچوں کے مستقبل کو نقل مافیا کے رحم و کرم پر چھوڑ دیا گیا ہے ، اسکولوں کو سینٹر بنانے کے بعد سینٹرز پر عملہ ہی موجود نہیں ہے۔

انہوں نے کہا کہ نقل مافیا امتحانی مراکز کا کنٹرول سنبھال کر امتحان کروارہے ہیں ، سندھ حکومت نے تعلیمی نظام کو طبقات میں تقسیم کردیا ہے ، وزیر محکمہ بورڈ اینڈ یونیورسٹیز انتظامات میں مکمل ناکام ہوچکے ہیں۔

حلیم عادل شیخ نے کہا کہ بورڈ میں کوئی ناظم امتحانات تک موجود نہیں ، سندھ حکومت باالخصوص کراچی کی تعلیم پر سیاہ دھبا بن چکی ہے۔

اپوزیشن لیڈر سندھ اسمبلی حلیم عادل شیخ نے کہا کہ تعلیم دشمن جماعت کے خلاف اسمبلی کے باہر احتجاج کریں گے ، صوبے کو اناڑیوں کے ہاتھوں یرغمال ہونے نہیں دیں گے۔

پیپلز پارٹی کے چیئرمین بلاول بھٹو زرداری نے پی پی پی میں شمولیت اختیار کرنے والوں کو خوش آمدید کہا۔

تفصیلات کے مطابق پاکستان پیپلزپارٹی کے چیئرمین بلاول بھٹو زرداری سے مختلف سیاسی جماعتوں سے پیپلزپارٹی میں شمولیت اختیار کرنے والوں نے ملاقات کی۔

ملاقات میں چیئرمین بلاول بھٹو زرداری کے ہمراہ پاکستان پیپلزپارٹی شعبہ خواتین کی مرکزی صدر رکن سندھ اسمبلی فریال تالپور بھی موجود تھیں۔

چیئرمین بلاول بھٹو زرداری سے ایم کیو ایم کے سابق سینیٹرز مولانا تنویر الحق تھانوی، طاہر مشہدی، سابق اراکین اسمبلی علی راشد، وقار شاہ، منوہر لعل، سمیتا افضال، سلیم بندھانی اور خلیل اللہ نے ملاقات کی۔

چیئرمین بلاول بھٹو زرداری سے ایم کیو ایم کے سوشل میڈیا سیل کی سابق انچارج تحسین عابدی، ممتاز نوحہ خواں ایس ایم نقی اور کلفٹن کنٹونمنٹ بورڈ کے سابق نائب چیئرمین نجیب ولی نے بھی ملاقات کی۔

معروف اسکالر اور علامہ عرفان حیدر عابدی مرحوم کے صاحبزادے علامہ محمد علی عابدی اور پی ٹی آئی کراچی کے سابق جنرل سیکریٹری سردار عزیز نے بھی چیئرمین بلاول بھٹو زرداری سے ملاقات کی۔

چیئرمین بلاول بھٹو زرداری کے ہمراہ وزیراعلیٰ سندھ، پی پی پی سندھ کے صدر نثار کھوڑو، جنرل سیکریٹری وقار مہدی، وزیربلدیات اور نجمی عالم بھی موجود تھے۔

پاکستان پیپلز پارٹی کے چیئرمین بلاول بھٹو زرداری نے کہا ہے کہ پیپلز پارٹی کراچی کو بہتری کی طرف لے کر جارہی ہے۔

کراچی میں میڈیا سے گفتگو کے دوران بلاول بھٹو زرداری نے کہا کہ کراچی میں بہت مسائل ہیں اس سے انکارنہیں کر سکتے، ہم عوام کے مسائل حل کرنا چاہتے ہیں، کراچی تبدیل ہوچکا ہے، شہر میں ایڈمنسٹریٹر کی تقرری کے بعد کام بہتر ہورہے ہیں، جگہ جگہ ترقیاتی کام چل رہے ہیں، کچھ مکمل ہوچکے ہیں اور چند ہونے والے ہیں۔

چیئرمین پیپلز پارٹی نے کہا کہ ایم کیو ایم کے دور میں ضلع وسطی کچرے کا ڈھیر تھا، کراچی کےعوام تحریک انصاف اور ایم کیوایم کو پہچان چکےہیں، عمران خان اور ایم کیوایم نے شہرمیں نہ تو ایک اینٹ لگائی اور نہ ہی ایک قطرہ پانی فراہم کیا، ہمارے پاس وسائل کم ہیں،وفاق ہمیں اپنا حق نہیں دے رہا، حکومت سے پوچھتے ہیں کہ شہر کو دیا گیا 11 سو ارب کے پیکیج کا کیا ہوا؟ سندھ نے اپنے وسائل سے پانی کی قلت کا خاتمہ کیا ہے، ہم شہر کو بہتری کی طرف لے جارہے ہیں، عوام سے اپیل ہے کہ ہمارے ساتھ دیں اور ہمارے ساتھ تعاون کریں۔
سندھ میں بلدیاتی انتخابات کے حوالے سے بلاول بھٹو زرداری نے کہا کہ سندھ کے بلدیاتی نظام نے اپنی آئینی مدت پوری کرکے جمہوری روایت کو زندہ رکھا، مردم شماری کا معاملہ طے ہوتے ہی ہم لوکل باڈیزانتخاب کرانےکو تیار ہیں۔

بلاول بھٹو زرداری نے کہا کہ موجودہ دور حکومت میں عوام کے حق روزگار پر ڈاکا ڈالا جارہا ہے، ایک کروڑ روزگار دینے کا وعدہ کرنے والی حکومت لوگوں سے روزگار چھین چکی ہے، پیپلزپارٹی نے حکومت کے خلاف پہلے روز سے مقابلہ کیا ہے، پی ڈی ایم کو غیرجمہوری حکومت کو ہٹانے کا راستہ دکھایا تھا لیکن انہوں نے اس راستے کا انتخاب نہیں کیا یہ ان کی مرضی تھی۔ پی ڈی ایم کے آئندہ ہونے والے جلسے کو خوش آمدید کہتے ہیں۔

کراچی کے علاقے ایف بی ایریا بلاک 20 میں موٹرسائیکل سوار ملزمان نے گھر کے دروازے پر نوجوان سے موبائل فون چھین لیا۔ملزمان کے خوف سے ایک شہری بائیک چھوڑ کر بھاگ گیا۔
ملزمان نے فائرنگ کرنے کی کوشش کی مگرگولی نہ چل سکی۔واردات کی سی سی ٹی وی فوٹیج سامنے آگئی۔ملزمان نے شناخت چھپانے کے لئے ماسک پہن رکھا ہے۔متاثرہ شہریوں نے واردات کی درخواست سمن آباد تھانے میں دے دی۔پولیس تاحال ملزمان کو گرفتار نہ کرسکی۔

صوبہ سندھ کے دارالحکومت کراچی سے کالعدم تحریک طالبان پاکستان کے 2 دہشت گردوں کو گرفتار کرکے ان کے قبضے سے دستی بم برآمد کرلیے۔ تفصیلات دہشت گردوں کو کراچی کے علاقے ابراہیم حیدری سے گرفتار کیا گیا ، جن کا تعلق کالعدم تحریک طالبان پاکستان سے ہے جو افغانستان سے تربیت حاصل کرکے آئے تھے ، دہشت گردوں کے قبضے سے 2 دستی بم برآمد بھی ہوئے۔
پولیس ذرائع سے معلوم ہوا ہے کہ گرفتار کیے گئے ایک دہشت گرد کی شناخت نعمت اللہ عرف بابا جب کہ دوسرے کی پیر اللہ کے نام سے ہوئی ، نعمت اللہ کا ایک بھائی جیل میں ہے جب کہ دوسرا پولیس مقابلے میں مارا جا چکا ہے ، نعمت اللہ نے مخبری کے شبہ میں مہتاب نامی شخص کو قتل کیا تھا ، جس کو مارنے کے احکامات حکیم اللہ محسود نے دیے تھے۔
چند روز قبل بھی سکیورٹی اداروں نے بروقت کاروائی کرکے کراچی میں دہشتگردی کا بڑا منصوبہ ناکام بنا دیا، کراچی شیرشاہ سے کالعدم تنظیم کے 2 دہشتگرد گرفتار کرلیے، دہشت گرد بھارتی خفیہ ایجنسی کیلئے کام کرتے ہیں، ملزمان ریلوے ٹریک، کوئلہ ٹرین اور گیس لائن کو نشانہ بنانا چاہتے تھے ، مبینہ دہشت گردوں سے 2 دستی بم، ملک دشمن لڑیچر پر مبنی سی ڈیز برآمد ہوئی ہیں۔

ایس ایس پی کیماڑی فدا حسین نے بتایا کہ گرفتار مبینہ دہشت گرد پڑوسی ملک کی خفیہ ایجنسی کے لیے کام کرتے ہیں، مبینہ دہشت گرد سوشل میڈیا پر نوجوانوں کی ذہن سازی میں بھی ملوث ہیں۔ ملزموں نے ریلوے ٹریک، کوئلہ ٹرین اور گیس لائن کو نشانہ بنانے کی منصوبہ بندی کی ، مبینہ دہشت گرد قانون نافذ کرنے والے اداروں کے افسران کی ریکی بھی کررہے تھے، مبینہ دہشت گردوں کو حساس ادارے کی مدد سے پکڑا گیا۔
اسی طرح لاہور میں بھی سکیورٹی اداروں نے بروقت کاروائی کرکے دہشتگردی کی منصوبہ بندی ناکام بنائی تھی، سی ٹی ڈی نے لاہور سمیت پنجاب بھر میں مختلف انٹیلی جنس بیسڈ آپریشن کیے، خفیہ آپریشن کے دوران لاہور سے کالعدم دہشتگرد تنظیم القاعدہ سے تعلق رکھنے والے3 دہشتگردوں کو گرفتار کرلیا، ان دہشتگردوں میں محمد فرحان ، محمد ارشد اور مظہر عباس شامل ہیں، گرفتار دہشتگرد حکومتی تنصیبات کو نشانہ بنانے کا منصوبہ بنا رہے تھے۔

جماعت اسلامی پاکستان کے مرکزی جنرل سیکریٹری اور جمعیت کے سابق ناظم اعلیٰ امیر العظیم سندھ کے دوروزہ دورے پر کراچی پہنچ گئے، صوبائی اعلامیہ کے مطاق وہ آج مٹھی تھرپارکر، ٹھٹہ،26اگست کو بدین، ٹنڈومحمد خان اور حیدرآباد میں یومِ تاسیس کے حوالے سے منعقدہ اجتماعات سے خطاب اور دیگر دعوتی وتنظیمی امور کا جائزہ لیں گے۔
صوبائی امیر محمد حسین محنتی ومقامی رہنماء بھی ان کے ہمراہ ہونگے، یاد رہے کہ جماعت اسلامی کے 80ویں یومِ تاسیس کے حوالے سے سندھ میں 21تا31اگست عشرہ یومِ تاسیس منایا جارہا ہے جس میں منعقدہ سیمینار، مذاکرے اور اجتماعات میں مقررین جماعت اسلامی کی 80سالہ دعوتی،تنظیمی وسیاسی خدمات کے حوالے سے اظہار خیال کریں گے۔

پاکستان تحریک انصاف کے رہنما وسربراہ بیت المال سندھ حنید لاکھانی نے کہا ہے کہ سندھ حکومت کراچی کی عوام کو تحفظ فراہم کرنے میں مکمل ناکام ہوچکی ہے، شہر پر ڈاکوئوں کا راج ہے روزانہ ڈاکو لوٹ مار، اسٹریٹ کرائمز اور ڈکیتی کی وارداتوں میں شہریوں کو گولیاں مار دیتے ہیں ، کراچی کے شہری آئے روز اپنی نقدی اور قیمتی اشیاء سے محروم ہوجاتے ہیں، سندھ پولیس صوبائی حکومت کے وزیروں کی سیکورٹی میں مصروف ہے ان کو شہریوں کے جان و مال کے تحفظ سے کوئی سروکار نہیں ہے، ان خیالات کا اظہارانہوں نے حنید لاکھانی سیکرٹریٹ سے جاری کردہ بیان میں کیا، حنید لاکھانی نے کہا کہ لوٹ مار کی وارداتوں میں ڈکیت غریب شہریوںکو زخمی کر دیتے ہیں مزاحمت یا بائیک نہ روکنے پر معصوم شہریوں کو تشدد کا نشانہ بناتے ہیں یا ان پر فائرنگ کر دیتے ہیں، ایسا لگتا ہے جیسے اس شہر میں ریاست یا قانون نام کی کوئی چیز ہی نہیں ہے ، شہریوں کے جان مال کی ذمہ داری ریاست کی ہوتی ہے ،وزیراعلیٰ سندھ سمیت تمام صوبائی وزراء خواب خرگوش کے مزے لینے اورکرپشن کے لئے نئے راستے ڈھونڈنے میں مصروف رہتے ہیں، کراچی کے شہر ی اپنے ہی گھروں میں اب اپنے آپ کو غیر محفوظ سمجھنے لگے ہیں اپنے گھروں کے باہر نکلتے ہیں تو ڈکیت ان کو گن پوائنٹ پر لوٹ لیتے ہیں اور افسوس کی بات تو یہ ہے کہ معصوم شہری جب اپنی فریاد لیکر پولیس کے پاس جاتے ہیں تو وہ لوگ بھی دلاسے اور آسرے دیکر روانہ کردیتے ہیں عملی کاروائی نہیں کرتے انہوں نے کہا کہ اٹھارویں ترمیم کے بعد صوبے کی سیکورٹی ،تعلیم، انفراسٹریکچر سمیت تمام معاملات صوبائی حکومت کے پاس منتقل ہوچکے ہیں پیپلز پارٹی گزشتہ تین دہائیوں سے سندھ میں اقتدار پر براجمان ہے لیکن سندھ حکومت نے صوبے کی عوام کے لیئے کچھ بھی نہیں کیا اور نہ ہی یہ لوگ عوام کی بہتری کے لیئے کچھ کریں گے، انہوں نے مزید کہا کہ وفاقی حکومت کراچی کے لوگوں کے مسائل کو حل کرنے کے لیئے اقدامات کر رہی ہے اس وقت شہر میں اسٹریٹ کرائمز، لوٹ مار اور ڈاکو راج قائم ہے ۔

‏بلاول زرداری کے دورے کراچی پر پی ٹی آئی کراچی کے صدر خرم شیر زمان کا ردعمل.آج کراچی کی سڑکیں گھوم کر یقیناً فرزند زرداری کے چاروں طبق روشن ہوچکے ہیں.

بلاول نےضلع وسطی میں جس کچرے کا ڈھیر اور تعفن برداشت کیا وہ عوام روزانہ جھیلتے ہیں.
‏المیہ یہ ہے کہ بلاول کی شاہی سواری کو کسی ٹریفک کا سامنا نہیں ہوا.

خود کو کراچی کا بیٹا کہنے والے بلاول کو کراچی کےعلاقوں کے نام بھی معلوم ہیں؟

عوام کے ٹیکس پر پلنے والوں کو وسائل کا رونا روتے ہوئے شرم آنی چاہیے.بلاول کراچی کے عوام کو بتائیں ان کے بچوں کو کب تعلیم ، صحت اور امن ملے گا.

بلاول عوام سے پوچھیں کہ وہ کیسے گندا پانی استعمال کرکے زندگی بسر کررہے ہیں.پی پی کراچی کے عوام کی تکلیفوں پر نمک پاشی کا سلسلہ بند کرے.

‏پی پی نے 90 فیصد سے زائد ریونیو دینے والے شہر کو صدیوں پیچھے دھکیل دیا ہے.پی پی عوام کے خون پسینے کا ٹیکس اپنی کرپشن کے نذر کررہی ہے.

کراچی کے عوام کا میڈیٹ تحریک انصاف کو حاصل ہے.عوام کے حقیقی نمائندے ہونے کی حیثیت سے عوامی حقوق کیلئے آواز بلند کریں گے کراچی کے عوام شاہی ٹولے کے ڈراموں کو مسترد کرچکے ہیں.