Category: کراچی

سندھ کے تمام مکاتب فکر کے علما نے مذہبی ہم آہنگی کی مثال قائم کر دی۔

مفتی تقی عثمانی،علامہ باقر زیدی، صابر کربلائی، مولانا جان نعیمی، مفتی منیب الرحمن، ڈاکٹر جمیل احمد، شبر رضا،مفتی عابد مبارک اور دیگر علما محرم کے دوران اپنے پیروکاروں کو اخوت، بھائی چارے اور مذہبی تقریبات پر امن اور مذہبی عقیدت سے منانے کی تلقین کرتے رہے، انھوں نے باہمی اخوت سے تمام اندرونی اور بیرونی سازشوں کو ناکام بنانے کا عزم دہرایا۔

علما نے کہا کہ ایسے موا قع پر کچھ لوگ ایسی باتیں کرتے ہیں جن سے شدت پسندی یا نفرت انگیزی یا فرقہ واریت پھیلتی ہے، ایسی بات نہیں کرنی چاہیے،اپنے وطن کو نعمت سمجھ کر اس کی قدر اور اللہ تعالیٰ کا شکر ادا کرنا چاہیے۔

جشن آزادی کے موقع پر لاہور کے گریٹر اقبال پارک میں خاتون سے بدتمیزی کی وائرل ویڈیو نے شوبز سے وابستہ شخصیات کو بھی سیخ پا کر دیا، فن کاروں نے ملزمان کو نشانِ عبرت بنانے کا مطالبہ کر دیا۔

تفصیلات کے مطابق لاہور کے گریٹر اقبال پارک میں یومِ آزادی کے موقع پر خاتون ٹک ٹاکر سے دست درازی کا خوف ناک واقعہ 14 اگست کی رات پیش آیا، سوشل میڈیا پر ویڈیو وائرل ہونے کے بعد پولیس نے 400 افراد کے خلاف مقدمہ درج کر لیا۔ جب کہ وزیر اعلیٰ پنجاب عثمان بزدار نے ملزمان کی فوری گرفتاری کا حکم دے دیا ہے۔

سوشل میڈیا پر اس واقعے کی شدید مذمت کرتے ہوئے ملزمان کے خلاف سخت ایکشن کا مطالبہ کیا جارہا ہے۔ پاکستان کے ٹوئٹر ٹرینڈ پینل پر سرفہرست ٹرینڈز اسی واقعے سے متعلق ہیں، سرفہرست ٹرینڈ میں ’مینارِ پاکستان‘ شامل ہے۔ ان ٹرینڈز کا استعمال کرتے ہوئے عوام کی بڑی تعداد غم و غصے کا اظہار کررہی ہے۔
معروف شوبز شخصیات بھی اس واقعے پر مذمت کرتے ہوئے پیغامات شیئر کررہی ہیں۔ نامور اداکار عدنان صدیقی نے مینارِ پاکستان پر نوجوان لڑکی سے دست درازی اور زدوکوب کرنے میں ملوث ملزمان کے خلاف سخت ایکشن کا مطالبہ کردیا۔

عدنان صدیقی نے کہا کہ ’اب ایسی صورت حال میں کہ جب ہمارے پاس مینارِ پاکستان واقعے کے تمام تر شواہد موجود ہیں تو ملزمان اب تک سلاخوں کے پیچھے کیوں نہیں گئے؟‘ انہوں نے سوال کیا کہ کیا ہم ان پولیس اہل کاروں کو اس بھیانک فعل کے ذمہ داران کو سلاخوں کے پیچھے ڈال کر ایکشن میں نہیں دیکھ سکتے ہیں؟

اداکارہ ماہرہ خان نے طنزیہ انداز میں کہا کہ ’میں معافی چاہتی ہوں۔ میں بھول گئی تھی۔ یہ تو لڑکی کی اپنی غلطی ہے، بے چارے 400 آدمی، خود کو روک نہ سکے۔

عائزہ خان نے کہا کہ گھررہیں محفوظ رہیں،جان کو خطرہ ہے، یہ سب کورونا کی وجہ سے سب کہتے آئے ہیں، شرم آتی ہے اور خوف آتا ہے کہ گھر میں رہیں تو محفوظ کیونکہ باہر آپ کی عزت کو خطرہ ہے۔

مہوش حیات نے کہا کہ ایک بارپھر میرے پاس کچھ کہنے کے لیے الفاظ نہیں ہیں، ہر مہذب معاشرے میں خواتین کی عزت اور مقام ہوتا ہے لیکن یہ سب کچھ ہمارے ہاں نہیں ہے،اب میں پاکستان کی ہر بیٹی کے لیے پریشان ہوں، اللہ ہماری حفاظت کرے۔

نعمان اعجاز نے کہا کہ مینار پاکستان واقعے پر سر شرم سے جھک گیا ہے، مجھے بڑی تکلیف اور دکھ پہنچا ہے، ایسے مسلمان ہوتے ہیں؟، ایسے مرد اور پاکستانی ہوتے ہیں؟، واقعے کے ذمے داروں کو ڈوب مرنا چاہیے، وزیر اعظم سے درخواست ہے کہ سب کو پکڑ کر عبرت کا نشان بنایا جائے۔

اداکارہ صنم جنگ نے مینارِ پاکستان میں خاتون ٹک ٹاکر سے دست درازی کے خوفناک واقعے پر شدید برہمی کا اظہار کیا ہے۔صنم جنگ نے اپنی انسٹا اسٹوری پر مینارِ پاکستان واقعے پر غم وغصے کا اظہار کرتے ہوئے لکھا ہے کہ یہ انتہائی ناگوار واقعہ ہے۔
انہوں نے لکھا کہ یہ واقعہ انتہائی مایوس کن اور خوفناک بھی ہے کہ خواتین کو سرعام ہراساں کیا جاتا ہے۔

اداکارہ نے سوال کیا کہ کیا یہ آپ کی ماوں نے آپ کو سکھایا ہے کیا آپ کے مذہب نے آپ کو یہ سکھایا ہے ۔انہوں نے لکھا کہ ہم مذہب کے بارے میں بات صرف تب کرتے ہیں جب معاملہ خواتین کے لباس کا ہو، اِن بدکردار لوگوں کے بارے میں کیا خیال ہے ۔اداکارہ نے لکھا کہ بیمار ذہنیت رکھنے والے ان تمام 400 لوگوں کو سلاخوں کے پیچھے ہونا چاہیے، ہر روز ایک نئی کہانی ہیڈلائنز بناتی ہے۔

جمعیت علماء اسلام کے رہنماء، جامعہ عثمانیہ شیرشاہ کے رئیس قاری محمد عثمان نے کہا کہ نواسہ رسول حضرت امام حسین رضی اللہ تعالیٰ عنہ کی زندگی امت مسلمہ کے لئے مشعل راہ ہے۔ واقعہ کربلا باطل کے خلاف جدوجہد کا درس دیتا ہے۔ حسینی کردار کے ذریعے آج بھی باطل کو ہرایا جاسکتا ہے جسکی واضح مثال افغانستان میں باطل کے مقابلے پر حق کی فتح ہے۔
سیدنا حضرت امام حسینؓ نے اسلام کی سربلندی کیلئے سب کچھ قربان کردیا۔ نوجوان نسل صحابہ کرام کی عملی زندگیوں کو اپنانے کی کوشش کرے۔ یوم عاشورہ پر اپنے پیغام میں قاری محمد عثمان نے کہا کہ حضرت امام حسینؓ اور شہدائے اسلام کو خراج عقیدت پیش کرنے کاسب سے بہترین طریقہ تعلیمات حسینی کو اپنی زندگی کا مقصد بنانا ہے۔
حضرت امام حسینؓ کی شہادت میں امت مسلمہ اور نوع انسانی کے لئے صبر واستقامت، عزم و استقلال اور ہر حال میں اپنے حق موقف پر ڈٹے رہنے کا درس ملتا ہے۔

انہوں نے کہا کہ جس طرح اس ماہ میں عبادت کا ثواب زیادہ ہوجاتا ہے، اسی طرح اس ماہ کے اندر معصیات کے وبال وعقاب کے بڑھ جانے کا بھی اندیشہ ہے، اس لیے ہر مسلمان کے لیے ضروری ہے کہ اس محترم مہینہ میں ہر قسم کی بدعات وخرافات سے احتراز کرے۔ انہوں نے کہا کہ تاریخ اسلام کا سب سے بڑا حادثہ جسے سانحہ کربلا کہتے ہیں وہ اسی مبارک مہینے محرم الحرام میں پیش آیا کہ اپنے ہی نبی کی آل کو اپنوں کا لبادہ اوڑھ کر ذبح کر دیا۔
انہوں نے کہا کہ خاص طور پر یکم محرم الحرام کو خلیفہ دوم، مراد رسول ؐ سیدنا حضرت عمر فاروقؓ اور دس محرم الحرام کو نواسہ رسول ؐسیدنا حضرت حسینؓ کی اپنے قافلے اور خاندان نبوتؐ کے افراد کے ساتھ شہادت جیسے واقعات سے نہ صرف مسلمان بلکہ انسانیت اور تاریخ انسانیت متاثر ہوئے بغیر نہ رہ سکی۔ انہوں نے کہا کہ ان اہم واقعات کی وجہ سے امت نے اسلام کی سربلندی کی جدوجہد کے سفر کو مدینہ اور کربلا سے وابستہ کرلیا ہے۔
انہوں نے کہا کہ خون شہادت سے اسلامی تاریخ سرخرو ہے اور مسلمانوں کا ایمانی جذبہ اسی جدوجہد کا درس اور زندگی کی حرارت محسوس کرتا ہے۔ انہوں نے کہا کہ یہ دن ہمیں اہلِ بیتِ عظام پر بیتنے والے حادثہ کی یاد ہی نہیں دلاتا بلکہ یہ سبق بھی دیتا ہے کہ جب نظریہ اور مقصد خطرے میں پڑ جائے تو اس کے سامنے کسی چیز کی اہمیت نہیں رہتی۔ انہوں نے کہا کہ یہ عظیم دن ہمیں یاد دلاتا ہے کہ جب اسلام کی آفاقی اقدار نظر انداز ہو جائیں اور ذاتی مفادات اہمیت اختیار کرجائیں تو اس کے نتیجے میں سماجی انصاف خطرے میں پڑجاتا ہے۔
قاری محمدعثمان نے کہا کہ آج کے حالات میں جب اسلامی جمہوریہ پاکستان بیرونی دباؤ کا شکار اور چاروں اطراف سے دشمن کے گھیرے میں ہے۔ دوسری طرف ہمارے پڑوس میں 40 سال کے تاریخ کے بدترین مظالم کے بعد اسلام اور مسلمانوں کی فتح پر ایک بار پھر دنیائے کفر واویلا کرکے اسلام اور مسلمانوں کے خلاف صف بندی کررہی ہے لہذا آج پوری امت مسلمہ افغانستان میں تاریخ کے اسلامی انقلاب کی بھرپور حمایت اور تائید کرتے ہوئے ایک بار پھر حسینی کردار کو دھرانے کیلئے متحد ہو کر حضرت امام حسین سے محبت کا عملی مظاہرہ کرے۔
انہوں نے کہا کہ ان حالات میں ہمارا فرض ہے کہ داخلی طور پر رواداری اور پُرامن بقائے باہمی کے اصولوں پر عمل کیا جائے۔ یہی وقت کی ضرورت اور محرم الحرام کا پیغام ہے۔

پاک سر زمین پارٹی کے چیئرمین سید مصطفی کمال نے کہا واقعہ کربلا کا خلاصہ یہ ہے کہ یزید تھا امام حسین رضی اللہ عنہ ہیں۔ حق کی خاطر سب کچھ لٹا دینے کا نام خانوادہ رسول محمد صلی اللہ علیہ وآلہ وسلم ہے۔ ناتواں ہونے کے باوجود ظلم کے سامنے حق پر کھڑے رہنا درس کربلا ہے۔ ہمیں اہل بیت علیہ السلام کی سنت کو زندہ کرنا ہے۔
ظلم کے خلاف خاموشی اختیار کرنا نا صرف ظالم کا ساتھ دینے کے مترادف ہے بلکہ ظالم کو مضبوط کرنا ہے، مرنا تو سب نے ہے، دنیا بھر کے قبرستان ایسے لوگوں سے بھرنے پڑے ہیں جو ظلم کیخلاف اس لیے آواز بلند نہیں کرتے تھے کہ وہ زندہ بچ جائیں گے۔ کرہ ارض پر جب کوئی حکمران تکبر میں غرق ہوکر ظلم کرتا ہے تب تب درس حسینی رضی اللہ عنہ یاد رکھنے کی ضرورت ہوتی ہے۔
سندھ کی یزیدی حکومت نے شہر کراچی کے ڈھائی کروڑ سے زائد لوگوں کا پانی بند کیا ہوا۔ پاک سر زمین پارٹی یوم عاشور کے بعد پیپلز پارٹی کی یزیدی حکومت کے خلاف احتجاجی تحریک کا آغاز کرئے گی جو پینے کے پانی کیلئے بھی انسانوں کو ترسا رہے ہیں۔ اب ہر فرد کو ظالموں کے خلاف اپنا کردار ادا کرنا ہوگا اور ہماری آواز میں اپنی آواز شامل کرنی ہوگی۔ ان خیالات کا اظہار انہوں نے یوم عاشور کے موقع پر پاکستان ہاس سے جاری ایک بیان میں کیا۔ سید مصطفی کمال نے مزید کہا کہ یوم عاشور کے بعد ظالموں کے خلاف پوری قوت سے کھڑے ہونگے اور گولی چلی تو اپنے سینے پیش کریں گے۔

ایف پی سی سی آئی میں برسر اقتدار گروپ بزنس میں پینل (بی ایم پی)کے سر پرست اعلی اور ایف پی سی سی آئی،سارک چیمبر آف کامرس کے سابق صدر طارق سعید مرحوم کو بدھ کی شام میوہ شاہ قبرستان میں سپردخاک کردیا گیا۔۔واضح رہے کہ طارق سعیدطویل اورشدید علالت کے باعث ضیاالدین ہسپتال میں داخل تھے ۔
قبل ازیں طارق سعید کی نمازجنازہ ڈیفنس فیز6کی مسجد صہیم میں ادا کی گئی۔نمازجنازہ میںایف پی سی سی آئی کے صدر میاں ناصر حیات مگوں،یونائٹیڈ بزنس گروپ کے صدرزبیرطفیل،عارف حبیب گروپ کے سربراہعارف حبیب،فیڈریشن کے نائب صدرحنیف لاکھانی،ہمایوں سعید،خرم طارق سعید،حنیف گوہر،زبیرموتی والا،زکریاعثمان،مظہرعلی ناصر،شکیل احمدڈھینگڑا،مرزااختیار بیگ،اکبرعبداللہ،شبیرمنشا چھرا،خرم اعجاز، شیخ اسلم،امجدرفیع،ممتازشیخ،شوکت احمد،کراچی چیمبر کے صدر شارق وہرہ،احمدچنائے،سلطان چالہ،عابدچنائے،اقبال اللہ والا،جاوید چنائے،عثمان شیخ، مطلوب رضوی اورتجارت وصنعت سے وابستہ سینکڑوں افراد اورانکے اہل خانہ نے شرکت کی۔
جبکہ ایف پی سی سی آئی کے سابق صدور ایس ایم منیر،افتخار علی ملک،سینیٹر الیاس احمدبلور،میاں محمدادریس، زبیرطفیل،کیپٹن عبدالرشید ابڑو،یو بی جی کینیڈا چیپٹر کے چیئرمین نوید بخاری،خالدتواب،طارق حلیم،شبنم ظفر،منیرسلطان،کریم عزیزملک،رحمت اللہ جاوید،زاہداقبال،حاجی افضل،آغانعمت اللہ مظہر،سہیل الطاف،ثمینہ فاضل،سعیدہ بانو،رضوانہ شاہد،ناہیدمسعود،عبدالشکورکھتری اوردیگر رہنماں نے طارق سعید کی وفات پر گرے دکھ اورافسوس کا اظہار کرتے ہوئے انکی مغفرت کی دعا کی ہے۔
طارق سعیدپاکستان میں تجارتی سیاست میں تاریخ ساز شخصیت تھے اور انہیں دنیا بھر میں احترام کی نگاہ سے دیکھا جاتا تھا۔وہ طویل عرصہ تک ملک بھر کی کاروباری برادری کی سربراہی کرتے رہے جبکہ ایف پی سی سی آئی اور کراچی چیمبرآف کامرس میں ان کے نامزد کردہ نمائندے صدر اور دیگر عہدوں پر فائز ہوتے تھے اورطارق سعید کو پاکستان میں بزنس کمیونٹی کا انتہائی مضبوط ترین لیڈر مانا جاتا تھا،انہوں نے پاکستانی سیاست میں بھی حصہ لیتے ہوئے کراچی سے پی ای سی ایچ ایس اور لائنزایریا کیقومی اسمبلی کی نشست پر انتخاب لڑا تھا جس میں انہیں شکست ہوئی تھی ۔انکے صاحبزادے خرم سعید اوربھائی ہمایوں سعید بھی ایف پی سی سی آئی کے نائب صدر رہ چکے ہیں۔

صوبائی وزیر ترقی نسواں سیدہ شہلا رضا نے کہا ہے کہ حق کی خاطر باطل کے سامنے ڈٹ جانا ہی حسینیت ہے، حضرت امام حسین، ان کے رفقا اور بالخصوص باپردہ و پاک بیبیوں نے دین ِ حق کی سربلندی کے لیے جو عظیم قربانیاں دیں اس کی مثال رہتی دنیا تک قائم رہے گی۔
سیدہ شہلا رضا نے کہا کہ واقعہ کربلا اور اس کے بعد جس طرح سیدہ زینب نے تمام غمزدہ قافلے کو سمیٹا، اس کی حفاظت کو یقینی بنایا اور یزیدیت کے آگے ڈٹی رہیں وہ آج کے دور کی خواتین کے لیے مشعل راہ ہے۔

انہوں نے کہا کہ شہدائے کربلا کا غم تمام غموں اور فرقوں سے بالاتر ہے، حالات کا تقاضہ ہے کہ ہم مذہبی ہم آہنگی کو برقرار رکھتے ہوئے امن و امان قائم رکھیں اور محرم الحرام کو پورے عقیدت و احترام سے گزاریں۔ انہوں نے کہا کہ کورونا پوری شدت سے اپنے وار جاری رکھے ہوئے ہے، ایسے میں جلوسوں اور مجالس میں کورونا ایس او پیز کا خیال رکھا جانا چاہیئے۔

کراچی میں حضرت امام حسین رضی اللہ تعالی عنہ اور ان کے رفقا کی عظیم قربانیوں کی یاد میں یوم عاشورعقیدت و احترام کے ساتھ منایا جارہا ہے۔

شہدائے کربلا کی یاد میں ملک بھر میں یوم عاشور انتہائی عقیدت واحترام کے ساتھ منایا جارہا ہے، اس موقع پر مختلف شہروں میں چھوٹے بڑے جلوس برآمد ہورہے ہیں، جن کی سیکیورٹی کے لیے انتہائی سخت انتظامات کیے گئے ہیں جب کہ کراچی سمیت پورے صوبے میں موٹرسائیکل کی ڈبل سواری پر پابندی عائد ہے، اس کے علاوہ جلوس کے راستوں میں موبائل فون سروس بھی معطل رہے گی۔

کراچی میں یوم عاشور کا مرکزی جلوس نشتر پارک سے برآمد ہوگا جو اپنے مقررہ راستوں سے ہوتا ہوا امام بارگاہ حسینہ ایرانیاں کھارادر پہنچے گا۔ جلوس کی گزرگاہوں پر منتظمین کی جانب سے پانی اور دودھ کی سبیلیں لگائی گئیں ہیں جب کہ جلوس کی سیکیورٹی کے لیے رینجرز اور پولیس کی بھاری نفری تعینات ہے۔

جماعت اہل سنت پاکستان کے سابق امیر کراچی سابق ممبر قومی اسمبلی علامہ سید شاہ تراب الحق قادری کے منظورِ نظر خادمِ محمد اشرف قادری( فوٹو اسٹیٹ والی) شدید علالت کے سبب میمن ہسپتال گلشن اقبال نزد محکمہ موسمیات کے ICU وارڈ میں زیر علاج ہیں ۔
نظام مصطفی پارٹی کے سربراہ سابق وفاقی وزیر ڈاکٹر حاجی محمدحنیف طیب نے ان کی صحت یابی کے لیے دعاکی عوام الناس سے محمداشرف قادری کے لیے خصوصی دعاکی اپیل کی ہے ۔ اشرف قادری کے دوبیٹے (11 اپریل 2006 بارہ ربیع الاول) کو نشتر پارک بم دھماکے میں شہید ہوئے تھے ۔

دنیا کے سب سے زیادہ جاہل ترین 10 ممالک کے اقوام کی فہرست جاری کردی گئی جس کے مطابق جاہل ترین ممالک میں بھارت کا پہلا نمبر ہے ۔
غیر ملکی میڈیا کے مطابق ایک حالیہ سروے میں یہ فہرست جاری کی گئی ہے جس میں سب سے زیادہ جاہل ترین ممالک کے اقوام کے بارے بتایا گیا ہے ، اس میں بھارت کوجاہل ترین ملک قراردے دیاگیاجبکہ فہرست میں چین دوسرے ،تائیوان تیسرے ،جنوبی افریقہ چوتھے نمبر پرہیں ۔فہرست میں امریکہ پانچویں،برازیل چھٹے، تھائی لینڈ ساتویں، سنگاپورآٹھویں،ترکی نویں جبکہ انڈونیشیا کودسواں نمبردیاگیا۔پہلے دس ممالک میں پاکستان کا نام نہیں ہے جبکہ بھارت جہالت میں سرفہرست رہا۔