Category: کراچی

اس ماہ کے شروع میں میٹرک کے امتحانات کے دوران جب سے میڈیا رپورٹس میں سوالیہ پرچے لیک ہونے کا انکشاف ہوا ہے سندھ میں بورڈ کے امتحانات صوبے میں مروجہ ‘کاپی کلچر’ کی وجہ سے ملک کے باقی حصوں کے لیے مضحکہ خیز بنے ہوئے ہیں جبکہ امتحانات کے دوران پابندیوں کے اعلان کے باوجود موبائل فون، گائیڈ بُکس اور پرچیوں کی مدد سے نقل اور چیٹنگ کا عمل جاری ہے۔

دھوکہ دہی کے کلچر کے پیچھے سرگرم مجرموں کے ساتھ سختی سے نمٹنے کے اپنے دعوؤں کے باوجود بورڈ آف سیکنڈری ایجوکیشن سندھ صوبے میں دھوکہ دہی مافیا پر قابو پانے میں ناکام رہا ہے۔

میڈیا رپورٹس کے مطابق پیر کے روز صوبے میں انٹرمیڈیٹ کے امتحانات کے پہلے روز ہی چیٹنگ اور پیپر لیک ہونے کے متعدد واقعات سامنے آئے تھے۔

اس سے قبل موصول ہونے والی اطلاعات کے مطابق میٹرک کے امتحانات کے دوران بھی طلباء اور اساتذہ کے موبائل فونز اور پیپرز کے استعمال سمیت غیر منصفانہ ذرائع استعمال کرنے کا انکشاف ہوا تھا۔

پیر کے روز اندرون سندھ سے پیپر لیک ہونے کی اطلاعات سامنے آئیں جہاں محراب پور اور نواب شاہ میں قائم کئے گئے امتحانی مراکز میں امتحانی عملے کی موجودگی میں موبائل فون اور گائیڈز کا کھل کر استعمال کیا گیا۔ فزکس کا پیپر مبینہ طور پر امتحان شروع ہونے سے پہلے ہی لیک ہوگیا تھا۔

فزکس کا سوالیہ پیپر امتحان کے وقت سے پہلے ہی میرپورخاص، سانگھڑ، محراب پور، نواب شاہ ، تھری میر واہ اور شہید بینظیر آباد میں سوشل میڈیا پر گردش کرہا تھا، جبکہ انتظامیہ نے اس لیک کو روکنے کے لیے کوئی اقدام نہیں اٹھایا۔

تاہم بورڈ کی ٹیموں نے متعدد امتحانی مراکز پر چھاپے مارے جنہوں نے موبائل فونز ضبط کیے جو امتحانات کے دوران چیٹنگ اور نقل کے لیے استعمال ہو رہے تھے۔

اطلاعات کے مطابق سکھر بورڈ نے چیٹنگ کی روک تھام کے لیے 21 خصوصی ٹیمیں تشکیل دی تھیں اور صوبائی حکومت سے مطالبہ کیا تھا کہ امتحانی ہالوں اور اس کے آس پاس دفعہ 144 نافذ کی جائے

ڈائریکٹر محکمہ موسمیات سردار سرفراز نے یکم سے3 ستمبر تک بارش کے امکان کے پیش نظر کراچی، ٹھٹھہ اور بدین کے نشیبی علاقوں میں اربن فلڈنگ کا خطرہ ظاہر کیا ہے۔

گفتگو کرتے ہوئے ڈائریکٹر محکمہ موسمیات سردار سرفراز نے بتایا کہ ہوا کا کم دباؤ مشرقی سندھ پر ہے جو جنوب کی جانب بڑھ رہا ہے۔

ڈائریکٹر محکمہ موسمیات کے مطابق سندھ اور پنجاب کے جنوبی علاقوں میں یکم سے 3 ستمبر تک کہیں تیز اور کہیں معتدل بارش کا امکان ہے۔

آ ج سے سندھ، کل سے کراچی میں بارشیں
انہوں نے کراچی، ٹھٹھہ اور بدین کے نشیبی علاقوں میں اربن فلڈنگ کا خطرہ بھی ظاہر کیا ہے۔

سپریم کورٹ کی جانب سے برطرف ملازمین کی بحالی کے ایکٹ دوہزار دس کو کالعدم قرار دینے کے حکم پر عملدرآمد شروع کردیا گیا۔

اعلیٰ عدالتی فیصلے کے تحت وفاقی ادارے پی ایس او سے ملازمین کی برطرفی کا حکم جاری کردیا گیا ہے۔ گزشتہ ہفتے محکمہ سوئی گیس سے سینکڑوں ملازمین کو برطرف کیا گیا تھا۔

اس حوالے سے ذرائع کا کہنا ہے کہ پی ایس او نے ملازمین کو برطرفی کے لیٹر جاری کردیئے ہیں، پی ایس او کے ایچ آر ڈیپارٹمنٹ نے متعلقہ ملازمین اور افسران کے کو مراسلہ ارسال کر دیا۔

مراسلہ میں کہا گیا ہے کہ سپریم کورٹ آف پاکستان کے فیصلے میں مذکورہ ایکٹ کو آئین کی خلاف ورزی قرار دے کر کالعدم قرار دیا گیا ہے، مذکورہ ایکٹ کے مطابق برطرفی کے بعد ملازمت پر بحال ان ملازمین کو فوری طور پر کام سے روک دیا گیا ہے۔

مراسلے میں ملازمین کو ڈیوٹی کے لئے آنے سے روک دیا گیا ہے، اکاونٹس کی تفصیلات ملازمین کو ارسال کردی جائیں۔ فیصلے کے مطابق بحالی کے وقت ملنے والی یکمشت رقم بھی واپس لی جائے۔

یاد رہے کہ سپریم کورٹ نے17 اگست کو پیپلزپارٹی پارٹی کے دور میں جاری ہونے والے سیکڈ ایمپلائز دی انسٹیٹ ایکٹ دوہزار دس کو کالعدم قرار دیا تھا۔ اسی ایکٹ کے تحت نوے کی دہائی میں نواز شریف حکومت میں بے دخل کیے گیے ملازمین کو بحال کیا گیا تھا۔

پی ایس او نے ملک کی عدالت عالیہ کے حالیہ فیصلے کی تعمیل میں2010 کے ایکٹ کے تحت بحال ہونے والے 63 ملازمین کو ملازمت سے سبکدوش کرنے کا فیصلہ کرلیا ہے۔

ولیکا چورنگی پر کے الیکٹرک کے سب اسٹیشن میں دھماکا ہوا ، دھماکے کے نتیجے میں کوئی زخمی یا کسی جانی نقصان کے بارے میں فی الحال کوئی اطلاعات نہیں۔

تفصیلات کے مطابق کراچی کے علاقے ولیکا چورنگی پر کے الیکٹرک کے سب اسٹیشن میں دھماکا ہوا ، دھماکے سے اطراف کی دیواریں گرگئیں ، پولیس اور ریسکیو جائے وقوعہ پرپہنچ گئے ہیں۔

پولیس حکام کا کہنا ہے کہ دھماکےکی نوعیت کاتعین کیا جارہا ہے، فائربریگیڈ کی گاڑی موقع پر پہنچ گئی ہے تاہم حادثے میں کوئی زخمی یا جانی نقصان نہیں ہوا۔

یاد رہے گذشتہ ماہ مواچھ گوٹھ میں منی ٹرک پر کریکر حملے میں دو بچوں سمیت 13 افراد جاں بحق ہوگئے ‏تھے، ایس پی بلدیہ نے بتایا تھا کہ گاڑی میں بیس سے پچیس افراد سوار تھے.

خواتین اوربچوں کی ‏تعداد زیادہ تھی، متاثرہ خاندان لانڈھی شیرپاؤ کالونی کا رہائشی ہے جو کہ شادی کی تقریب ‏سےواپس آرہےتھے کہ بلدیہ مواچھ موڑپر موٹر سائیکل سوار نےکریکر پھینکا۔

واقعے کے بعد منی ‏ٹرک کےڈرائیورکوحراست میں لے لیا تھا۔

پولیس اور رینجرز نے مشترکہ کارروائی کرتے ہوئے اے ایس آئی اکرم خان کے قتل میں ملوث ملزم کو اورنگی ٹاؤن سے گرفتار کرلیا۔

ترجمان رینجرز کے مطابق رینجرز اور پولیس نے انٹیلی جنس معلومات پر اورنگی ٹاؤن میں مشترکہ کارروائی کی اور اے ایس آئی اکرم خان کے قتل میں ملوث ملزم محمدآصف عرف بھایا کو منگھو پیر اجتماع گاہ سے گرفتار کرلیا۔

رینجرز نے بتایا کہ ملزم محمدآصف 28اگست کو اےایس آئی کے قتل میں ملوث ہے، ملزم کو سی سی ٹی وی فوٹیج کی مدد سے گرفتار کیا گیا، فوٹیج میں ملزم محمد آصف کو پولیس اہلکار پر فائرنگ کرتے دیکھا گیا۔

یہ بھی کہا گیا کہ دوران تفتیش ملزم نے اےایس آئی اکرم خان کی ٹارگٹ کلنگ کا اعتراف کرلیا، ملزم اوراس کاساتھی محمدشاہین عرف بہاری کئی بارجیل جاچکے ہیں۔

اس ضمن میں ترجمان رینجرز کا مزید کہنا تھا کہ دونوں کے خلاف متعدد تھانوں میں مقدمات درج ہیں، ملزم کے ساتھی کی گرفتاری کے لیے چھاپے مارے جارہے ہیں، ملزم کو اسلحہ سمیت مزید تفتیش کے لیے پولیس کے حوالے کردیا گیا۔

سول ایوی ایشن اتھارٹی کی جانب سے شہر قائد میں شدید بارشوں کی پیشگوئی کے بعد ہائی الرٹ جاری کردیا ہے۔

سول ایوی ایشن اتھارٹی نے ایئرپورٹ مینجر کی ہدایات پر ہنگامی حالات سے نمٹنے کےلیے منصوبہ بندی کی، ایئرپورٹ مینجر نے ایئرپورٹ کی حدود میں جہازوں کو محفوظ جگہ پارک کرنے کی ہدایت بھی کی۔

سول ایوی ایشن نے ہدایات جاری کی ہیں کہ طیاروں کے ساتھ وزن باندھا جائے تاکہ ہوا سے دیگر طیاروں سے نہ ٹکرائیں۔

سی اے اے نے ہدایات کی ہیں کہ ایئرپورٹ رن وے پر محفوظ فضائی آپریشن کےلیے ہنگامی اقدامات کیے جائیں کیوں کہ بارشوں کے ببعد ایئرپورٹ کے اطراف کیڑے مکوڑے آنے سے پرندے آنے کا خدشہ ہوتا ہے۔

سول ایوی ایشن کی جانب سے ہدایت جاری کی گئی ہے طیاروں کی محفوظ لینڈنگ اور ٹیک آف کےلیے برڈ شوٹرز تعینات کیے جائیں۔

پاکستان کے لیجنڈ اداکار اور کامیڈین عمر شریف کی اسپتال سے وہیل چیئر پر بیٹھے ہوئے تصویر وائرل ہورہی ہے۔

گزشتہ روز سوشل میڈیا پر عمر شریف کی دو تصاویر وائرل ہوئیں جن میں سے ایک تصویر میں وہ وہیل چیئر پر بیٹھے ہوئے کافی بیمار نظر آرہے ہیں۔ مختلف سوشل میڈیا پلیٹ فارمز کے مطابق یہ تصاویر اسپتال کی ہیں جہاں عمر شریف خرابی صحت کی وجہ سے گئے تھے۔ تاہم انہیں کیا ہوا ہے اس بارے میں فی الحال تفصیلات منظر عام پر نہیں آئی ہیں۔

سوشل میڈیا پلیٹ فارمز کے مطابق عمر شریف کے گھر والوں نے مداحوں سے ان کی جلد صحت یابی کے لیے دعا کی درخواست کی ہے۔

لیجنڈ کامیڈین عمر شریف کی یہ تصاویر دیکھتے ہی دیکھتے سوشل میڈیا پر وائرل ہوگئیں اور لوگوں نے ان کی تصویر پر تبصرہ کرتے ہوئے ان کی صحت کے حوالے سے تشویش کا اظہار کیا اور ان کی جلد صحت یابی کے لیے دعا کررہے ہیں۔

عمر شریف کے نام سے مشہور پاکستان کے معروف اداکار، کامیڈین، ہدایت کار، پروڈیوسر اور ٹیلی ویژن شخصیت کا اصل نام محمد عمر ہے۔ عمر شریف کا شمار نہ صرف پاکستان کے بلکہ برصغیر کے نامور کامیڈینز میں ہوتا ہے۔

ان کا مشہور اسٹیج ڈراما ’’بکرا قسطوں پر‘‘ پاکستان اور بھارت کے ساتھ ساتھ دنیا بھر میں بے حد مقبول ہوا تھا

عدالت نے غیر ملکی خاتون کو شناختی کارڈ جاری کرنے والے نادرا کے ڈپٹی سپرنٹنڈنٹ کو ریمانڈ پر جیل بھیج دیا۔

تفصیلات کے مطابق فیڈرل انویسٹی گیشن ایجنسی کی جانب سے غیر ملکی خاتون کو شناختی کارڈ اجرا کرنے پر نادرا کے اعلیٰ افسران کو گرفتار کیا گیا تھا جنہیں ایف آئی اے نے عدالت میں پیش کردیا۔

تفتیشی افسر نے عدالت کو بتایا کہ ملزم کا نام گلفام بروہی ہے جو نادرا میں بطور ڈپٹی سپرنٹنڈنٹ ملازمت کرتا ہے۔

ایف آئی اے کا کہنا تھا کہ غیر ملکی خاتون نے 58 برس کی عمر میں کمپیوٹرائزڈ شناختی کارڈ بنوایا، گلفام بروہی کی معاونت سے غیر ملکی خاتون کا شناختی کارڈ بنایا گیا۔

ایف آئی اے افسر کا عدالت میں کہنا تھا کہ ملزمہ نے جس ریکارڈ سے شناختی کارڈ بنوایا وہ سعید اللہ کو جاری ہوا تھا۔

فیڈرل انویسٹی گیشن ایجنسی کے مطابق ججعلی شناختی کارڈ اسکینڈل میں اب تک چھ مقدمات درج ہوئے ہیں، جعلی شناختی کارڈ اسکینڈل میں گرفتار ملزمان کی تعداد 17 ہے جن میں نادرا کے اعلیٰ افسران اور غیر ملکی شہری و ایجنٹ شامل ہیں۔

موٹاپے کے شکار افراد میں کووڈ کی طویل المعیاد علامات کا خطرہ زیادہ ہوسکتا ہے۔

یہ بات امریکا میں ہونے والی ایک طبی تحقیق میں دریافت کی گئی۔کلیولینڈ کلینک کی اس تحقیق میں کووڈ کی طویل المعیاد پیچیدگیوں کے خطرے کی جانچ پڑتال میں دریافت کیا گیا کہ زیادہ جسمانی وزن والے افراد میں اس کا امکان زیادہ ہوسکتا ہے۔

تحقیق میں بتایا کہ جو لوگ موٹاپے کے شکار ہوتے ہیں ان میں کووڈ کے دائمی مسائل کا خطرہ دیگر کے مقابلے میں 30 فیصد زیادہ ہوتا ہے۔

اس تحقیق کے لیے ایسے 3 ہزار کے قریب افراد کا جائزہ لیا گیا جو کووڈ کو شکست دے چکے تھے اور ان کی مانیٹرنگ جنوری 2021 تک جاری رکھی گئی۔

نتائج سے معلوم ہوا کہ کووڈ کی دائمی پیچیدگیاں بہت زیادہ عام ہوتی ہیں، بیماری کو شکست دینے والے لگ بھگ 40 فیصد افراد کو مختلف مسائل کا سامنا تھا۔

نتائج سے یہ بھی ثابت ہوا کہ کووڈ کے ابتدائی مرحلے میں ہسپتال میں داخل ہونے کا خطرہ موٹاپے کے شکار افراد میں دیگر کے مققابلے میں 30 فیصد زیادہ ہوتا ہے۔

دیگر تحقیقی رپورٹس میں بھی ثابت ہوا تھا کہ موٹاپا کووڈ کی سنگین شدت کا خطرہ بڑھانے والا ایک عنصر ہے جس کے باعث ہسپتال اور آئی سی یو میں داخلے اور وینٹی لیٹر سپورٹ کی ضرورت زیادہ ہوسکتی ہے۔

محققین کا کہنا تھا کہ کووڈ اور اس کی دائمی پیچیدگیوں سے بچنے کا بہترین طریقہ ویکسنیشن کرانا ہے۔انہوں نے کہا کہ ہم جانتے ہیں کہ ویکسینز موٹاپے کے شکار افراد کو کووڈ سے بیمار ہونے سے بچانے کے لیے بہت زیادہ مؤثر ہیں۔

انہوں نے مزید کہا کہ کن مریضوں میں طویل المعیاد پیچیدگیوں کا خطرہ زیادہ ہے، یہ جان کر ہم کہہ سکتے ہیں کہ ان مریضوں کے لیے ویکسینز ناگزیر ہیں۔

ان کا کہنا تھا کہ ضرورت اس بات ہے کہ موٹاپے کے شکار افراد میں ویکسنیشن کی حوصلہ افزائی کی جائے۔

اس تحقیق پر ابھی کام جاری ہے اور محققین کی جانب سے یہ تعین کرنے کی کوشش کی جارہی ہے کہ کووڈ کے شکار افراد کو کس طرح کی نگہداشت کی ضرورت ہوسکتی ہے۔

اس تحقیق کے نتائج طبی جریدے جرنل آف ڈائیبیٹس، اوبیسٹی اینڈ میٹابولزم میں شائع ہوئے

پاکستان پیپلز پارٹی کے چیئرمین بلاول بھٹو زرداری نے وفاقی حکومت کی جانب سے پاکستان میڈیا ڈویلپمنٹ اتھارٹی (پی ایم ڈی اے) کے مجوزہ بل کو مسترد کرتے ہوئے کہا ہے کہ سرکاری ملازمین کی ایک کمیٹی کو پورے میڈیا کا مالک و مختار بنا دینا کسی صورت منظور نہیں۔

بلاول ہاوَس میڈیا سیل کراچی سے جاری کردہ بیان کے مطابق پی پی پی چیئرمین نے مزید کہا کہ حکومت میڈیا ٹریبونل کے قیام سے خود پر تنقید کرنے والوں کی آوازوں کو دبانا چاہتی ہے۔

پاکستان میڈیا ڈویلپمنٹ اتھارٹی کا مجوزہ بل ملک میں آزادی صحافت کا خاتمہ کردے گا۔ انہوں نے مزید کہا کہ پاکستان پیپلزپارٹی پی ایم ڈی اے کے قیام کی ہر صورت میں اور ہر سطح پر مخالفت کرے گی۔

چیئرمین بلاول بھٹو زرداری نے کہا کہ پاکستان میڈیا ڈویلپمنٹ اتھارٹی کے مجوزہ بل کی منظوری کے خلاف جدوجہد میں صحافی برادری کے ساتھ کھڑا ہوں۔ پاکستان پیپلزپارٹی پی ایم ڈی اے کے کالے قانون کے خلاف صحافیوں کے احتجاج میں شریک ہوگی۔

پی پی پی چیئرمین نے کہا کہ حکومت اپنی ناہلی اور کرپشن کے بے نقاب ہونے کی وجہ سے میڈیا پر پابندیاں لگانا چاہتی ہے۔