Category: کراچی

پاک سر زمین پارٹی کے چیئرمین سید مصطفی کمال نے کہا کہ واقعہ کربلا کا خلاصہ یہ ہے کہ یزید تھا امام حسین رضی اللہ عنہ ہیں۔ حق کی خاطر سب کچھ لٹا دینے کا نام خانوادہ رسول محمد صلی اللہ علیہ وآلہ وسلم ہے۔ ناتواں ہونے کے باوجود ظلم کے سامنے حق پر کھڑے رہنا درس کربلا ہے۔ ہمیں اہل بیت علیہ السلام کی سنت کو زندہ کرنا ہے۔
ظلم کے خلاف خاموشی اختیار کرنا نا صرف ظالم کا ساتھ دینے کے مترادف ہے بلکہ ظالم کو مضبوط کرنا ہے، مرنا تو سب نے ہے، دنیا بھر کے قبرستان ایسے لوگوں سے بھرنے پڑے ہیں جو ظلم کیخلاف اس لیے آواز بلند نہیں کرتے تھے کہ وہ زندہ بچ جائیں گے۔ کرہ ارض پر جب کوئی حکمران تکبر میں غرق ہوکر ظلم کرتا ہے تب تب درس حسینی رضی اللہ عنہ یاد رکھنے کی ضرورت ہوتی ہے .
سندھ کی یزیدی حکومت نے شہر کراچی کے ڈھائی کروڑ سے زائد لوگوں کا پانی بند کیا ہوا۔ پاک سر زمین پارٹی یوم عاشور کے بعد پیپلز پارٹی کی یزیدی حکومت کے خلاف احتجاجی تحریک کا آغاز کرئے گی جو پینے کے پانی کیلئے بھی انسانوں کو ترسا رہے ہیں۔ اب ہر فرد کو ظالموں کے خلاف اپنا کردار ادا کرنا ہوگا اور ہماری آواز میں اپنی آواز شامل کرنی ہوگی۔ ان خیالات کا اظہار انہوں نے پاکستان ہاس میں اراکینِ سینٹرل ایگزیکٹو کمیٹی و نیشنل کونسل اور مرکزی شعبہ جات کے اراکین سے خطاب کرتے ہوئے کیا۔ سید مصطفی کمال نے مزید کہا کہ یوم عاشور کے بعد ظالموں کے خلاف پوری قوت سے کھڑے ہونگے اور گولی چلی تو اپنے سینے پیش کریں گے۔

کراچی میں دماغ کھانے والے جرثومے نیگلیریا فاؤلیری کا ایک اور کیس رپورٹ ہوگیا، 38 سالہ ذیشان میں نیگلیریا وائرس کی تصدیق ہوگئی جسے آئی سی یو میں داخل کردیا گیا۔

تفصیلات کے مطابق کراچی کے علاقے نارتھ کراچی کے رہائشی 38 سالہ ذیشان ولد عثمان میں نیگلیریا جرثومے کی تصدیق ہوئی ہے۔ ذیشان نجی اسپتال کی آئی سی یو میں زیر علاج ہے۔ رپورٹ کے مطابق ذیشان 11 اگست کو نیگلیریا سے متاثر ہوا، نگلیریا کی تشخیص 16 اگست کو نجی اسپتال میں ہوئی۔

واضح رہے کہ رواں سال سندھ میں نیگلیریا کا یہ ساتواں کیس ہے۔ طبی ماہرین کے مطابق نیگلیریا دماغ کھانے والا جرثومہ ہے جو صاف پانی میں افزائش پاتا ہے۔ نیگلیریا ناک کے ذریعے دماغ کی جھلی کو متاثر کرتے ہوئے انسانی دماغ کو کھانے کی صلاحیت رکھتا ہے جس سے انسان کی موت واقع ہوجاتی ہے۔
ماہرین نے کہا ہے کہ نیگلیریا سے بچاؤ کے لیے پانی میں کلورین کا 50 فیصد ہونا ضروری ہے، گھروں میں موجود ٹینکوں کو سال میں کم سے کم دو بار صاف کیا جائے، کلورین کی گولیوں کا استعمال کیا جائے، پینے اور وضو کے لیے پانی کو ابال کر استعمال کیا جائے۔

نواسہ رسول سیدنا حضرت حسین رضی اللہ عنہ اور جتنے بھی شہدا ہیں،ان کی قربانی سے ثابت ہوتا ہے کہ باطل قوتوں کے سامنے کبھی سر نھیں جھکانا بلکہ سر کٹا دینا ہی سنت حسینیت اور سنت صحابہ ہے، سیدنا حضرت حسینؓ کی قربانی امت مسلمہ کو صبر اور جذبہ ایثار کا درس دیتی ہے۔ ان خیالات کا اظہار مسلم اسٹوڈنٹس آرگنائزیشن کراچی ڈویژن کے ناظم محمد عادل انصاری اور ناظم اطلاعات شاہ احمد پیرزادہ نے یوم عاشورہ یوم شہادت سیدنا حضرت حسینؓ کے حوالے سے مسلم میڈیا سیل سے جاری بیان میں کیا۔
انہوں نے کہا کہ نواسہ رسول سیدنا حسینؓسے حضو رﷺ بے انتہاء محبت کرتے تھے اور فرماتے تھے کہ میں حسین سے محبت کرتا ہوں اے اللہ تو بھی حسین سے محبت کر اور لسان نبوت سے جنت کے دونوں شہزادے حسن و حسین نے جنت کی بشارت حاصل کی،اور دین اسلام کے لیے دونوں شہزادوں نے ایسی لازوال قربانیاں پیش کی کہ رسول اللہ نے حسن و حسین دونوں کو جنت کے جوانوں کے سردار ہونے کی بشارت دی، حضرت حسینؓ آخری دم تک اپنے نانا کے دین کی حفاظت کرتے رہے اور اپنے ساتھ اپنے بہتر رفقاء کو اسلام کے لیے قربان کر کے ہمیشہ کے لیے خود بھی سرخرو ہو گئے اور اسلام کو بھی ہمیشہ کے لیے سرخرو کر دیا، ناظم اطلاعات ایم ایس او کراچی کا کہنا تھا کہ آج کے دن مسلم اسٹوڈنٹس آرگنائزیشن پاکستان اسلام کے اس عظیم محسن کو خراج تحسین پیش کرتی ہے اور آپ کے فضائل اور مناقب کو بیان کرنے کے لیے MSO دس محرم الحرام کوتربیتی نشستوں کا انعقاد کرے گی۔
ایم ایس او حضرت حسین سے یہ عہد وفا کرتی ہے کہ آپ کے مشن کو پوری دنیا میں پھیلانے کی خاطر کبھی کسی قربانی سے دریغ نھیں کرے گی۔

ولیس نے غیرت کے نام پر بیوی کو قتل کرنے والے ملزم شوہر کو گرفتارکرلیاہے۔تفصیلات کے مطابق میمن گوٹھ پولیس نے دہرے قتل کی واردات میں ملوث ملزم ہزارلاشاری ولد خیرمحمد لاشاری کوگرفتارکرلیا ۔ میمن گوٹھ پولیس نے بتایا کہ 17 مارچ کو گھر سے خاتون 60 سالہ حیاتاں بی بی کی گلہ کٹی لاش برآمد ہوئی تھی جسے غیرت کے نام پر اس کے شوہر ہزار لاشاری اوربیٹے ظہور نے مل کرقتل کیا تھا اورموقع سے فرار ہو گئے تھے۔
پولیس نے واقعے کامقدمہ الزام نمبر 2021/87 بجرم دفعہ 34/302 کے تحت درج کرکے تحقیقات شروع کردی تھیں ۔ پولیس کے مطابق گرفتار ملزم ہزار لاشاری نے دوران تفتیش دہرے قتل کا اعتراف کرتے ہوئے بتایا کہ اس نے اپنی بیوی کو پڑوسی اللہ بخش کے ساتھ دیکھ لیا تھا جس پر بیٹے ظہور کے ساتھ مل کر بیوی کو کلہاڑی کے وارکرکے قتل کیا۔
واردت کے وقت بیٹاظہورگھر کے باہر دروازے پر موجود رہا تھا جس کے بعد وہ فرار ہو گئے تھے۔
پولیس کے مطابق گرفتار ملزم نے انکشاف کیا کہ 13 اگست کواس کے بیٹے نے پڑوسی اللہ بخش کو دکان پر فائرنگ کرکے ہلاک کردیا تھا۔ پولیس کے مطابق واقعے کے بعد بیٹا ظہوراوراس کا ایک ساتھی فرار ہے جس کی تلاش کی جارہی ہے ۔ پولیس نے بیٹا ظہور کے خلاف مقدمہ الزام نمبر 2021/316 بجرم دفعہ 34/302 کے تحت درج کر کے تفتیش شروع کردی ہے۔

ایڈیشنل کمشنر کراچی اور منیجنگ ڈائریکٹر سندھ سالڈ ویسٹ مینجمنٹ بورڈ زبیر احمد چنہ نے جلوس کے راستوں کی صفائی ستھرائی اور دیگر انتظامات کا معائنہ کرنے کے لئے نمائش سے کھارادر کا دورہ کیا اس موقع پر امام بارگاہوں کے منتظمین سے ملاقات کی، جبکہ انکے ہمراہ ایگزیکٹو ڈائریکٹر آپریشن طارق نظامانی، متعلقہ ڈائریکٹرز اور دیگر افسران موجود تھے۔
دیگر تفصیلات میں جلوس کے موقع پر عملہ تعینات رہے گا اور صفائی کا کام بروقت انجام دے گا۔ایم ڈی سالڈ ویسٹ کی ہدایت پر محرم الحرام کے سلسلے میں امام بارگاہوں اور جلوس کے راستوں پرصفائی ستھرائی، چونے کا چھڑکا اوراسپرے کے انتظامات جاری ہیں۔ اس سلسلے میں متعدد مقامات پر جراثیم کش ادویات کا اسپرے کیا گیا ہے۔
تمام چائنیز اور لوکل کنٹریکٹرزکو ہدایت کردی گئی ہے کہ وہ شہریوں کو ریلیف فراہم کرنے میں کوئی کوتاہی نہ برتیں اور ترجیحی بنیاد پر سارے انتظامات کریں۔

دریں اثنا ایم ڈی کی ہدایت پر شکایتی مراکز کو فعال رکھنے اور عوامی شکایات کابروقت ازالہ یقینی بنایا جائے گا۔ انہوں نے متعلقہ افسران کو دیگر اداروں کے ساتھ مکمل کورآڈینشن میں رہنے کی ہدایت کی۔جبکہ شہریوں سے اپیل ہے کہ شکایات کی صورت میں واٹس ایپ نمبر03181030851 اور ایپSSWMB KARACHI COMPLAINT پر رابطہ کر کے شکایات درج کرائیں۔

چیئرمین پیپلز پارٹی بلاول بھٹو زرداری نے کہا ہے کہ نیشنل ایکشن پلان پر فوری عمل کیا جائے اور افغانستان بارے پارلیمنٹ کو اعتماد میں لیا جائے، پاکستان کے ایک انچ کو بھی دہشت گردوں کے حوالے نہیں کرنے دیں گے،سی پیک منصوبوں کی سیکیورٹی کا فی الفور دوبارہ جائزہ لیا جائے، حکومت کو دہشتگردوں کو خوش کرنے کی روش ترک کرنا ہو گی، حکومت توجہ نہیں دے گی تو دہشت گردی کے واقعات میں اضافہ ہوگا، منگل کو کراچی میں پریس کانفرنس کرتے ہوئے چیئرمین پیپلز پارٹی بلاول بھٹو زرداری نے کہا کہ داسو، کوئٹہ اور کراچی میں حال ہی میں دہشتگرد حملے ہوئے جس کے بعد پاکستان میں سی پیک منصوبوں کی سیکیورٹی کا فی الفور دوبارہ جائزہ لیا جائے۔
حکومت کو دہشتگردوں کو خوش کرنے کی روش ترک کرنا ہو گی۔
افغان عوام نسلوں سے مشکلات کا سامنا کرتی آ رہی ہے۔ افغانستان میں جاری صورتحال افسوسناک ہے لیکن پاکستان کی پالیسی واضح ہرنے چاہیے تاہم اگر حکومت توجہ نہیں دے گی تو دہشت گردی میں اضافہ ہو گا۔بلاول بھٹو نے کہا کہ افغانستان کی موجودہ صورتحال تشویشناک ہے اور ہم افغان عوام کی بہادری کو سلام پیش کرتے ہیں۔

افغانستان میں شہریوں کی جان و مال کے تحفظ کویقینی بنانا چاہیے جبکہ افغانستان میں جاری صورتحال سے پاکستان پر بھی اثرات مرتب ہوں گے۔انہوں نے کہا کہ پاکستان میں نیشنل ایکشن پلان پر عمل ہونا چاہیے جبکہ ٹی ٹی پی اور دیگر دہشتگرد تنظیموں نے پاکستانی عوام کونشانہ بنایا۔ افغانستان میں اہل تشیع کو آزادی سے عزاداری کا موقع دیاجائے۔ چیئرمین پیپلز پارٹی نے کہا کہ ریاست پاکستان کو فاٹا اور بلوچستان کے نوجوانوں کو مصروف کرنا چاہیے جبکہ ریاست پاکستان کو آئینی اور قانونی وعدے پورے کرنے پڑیں گے۔
انہوں نے کہا کہ افغانستان میں جاری صورتحال پر پارلیمان کو اعتماد میں لیا جائے اس کے علاوہ خارجہ پالیسی کے معاملے پر بھی پارلیمان کو اعتماد میں لیا جائے۔ اسٹیک ہولڈرز کو دعوت دیں گے کہ افغان بھائیوں کو تحفظ فراہم کیا جائے۔بلاول بھٹو نے کہا کہ ریاست کو قوم پرستوں کو ساتھ لے کر چلنا ہو گا اور ہمیں اپنی خودمختاری کی حفاظت کرنا ہو گی، ہم افغانستان میں ایک بہتر ماحول پیدا ہونے کی امید کرتے ہیں۔
انہوں نے کہا کہ ہمیں افغان پناہ گزینوں کے معاملے کو دیکھنا پڑے گا جبکہ افغانستان میں جاری صورتحال افسوسناک لیکن پاکستان کی پالیسی بھی واضح ہونی چاہیے ۔ بلاول بھٹو نے سی پیک کے منصوبوں اور اس پر کام کرنے والوں کو سیکیورٹی فراہم کرنے کا مطالبہ کرتے ہوئے کہا کہ سی پیک کے منصوبے پاکستان کی ترقی کے لئے بہت ضروری ہیں، سی پیک منصوبوں کی سیکیورٹی کا ازسرنو جائزہ لیا جائے اور ان منصوبوں کو مکمل اور فول پروف سکیورٹی دی جائے۔
حکومت کو دہشت گردوں کو خوش کرنے کی روش ترک کرنا ہوگی، داسو، کوئٹہ اور کراچی میں حال ہی میں دہشتگردی کے واقعات ہوئے ہیں، یہاں تحریک طالبان ہے جنہوں نے عام آدمی سمیت پاک فوج کے جوانوں کو نشانہ بنایا، اگر حکومت توجہ نہیں دے گی تو دہشت گردی کے واقعات میں اضافہ ہوگا۔ دہشت گردوں کے خلاف کارروائیاں تیز کی جائیں تاکہ یہ عناصر پنپنے نہ پائیں، ہمیں اپنی خودمختاری کی حفاظت کرنا ہوگی، پاکستان کے ایک انچ کو بھی دہشت گردوں کے حوالے نہیں کرنے دیں گے۔

گورنر سندھ عمران اسماعیل سے امریکہ کے قونصل جنرل رابرٹ سلبرسٹین نے گورنر ہائوس میں ملاقات کی۔ ملاقات میں پاک امریکہ سفارتی وتجارتی تعلقات، خطہ کی صورتحال، پاکستان کی معاشی شہ رگ کراچی کا عالمی معیشت میں کردار اور سرمایہ کاری کے مواقع سمیت اہمیت کے حامل دیگر امور پر تفصیلی تبادلہ خیال کیا گیا۔
اس موقع پر نئے تعینات ہونے والے ڈپٹی قونصل جنرل میتھیو فارنس اور سیاسی و اقتصادی سربراہ الیگزینڈرا زٹل بھی موجود تھے۔ ملاقات میں موثر سفارت کاری کے ذریعہ خطہ میں دیر پا امن، خوشحالی، غربت کے خاتمہ اور مشترکہ مفادات کا تحفظ یقینی بنانے پر بھی اتفاق کیا گیا۔ گورنر سندھ نے کہا کہ دونوں ممالک کے درمیان مختلف شعبوں میں اقتصادی تعاون خوش آئند ہے۔
انہوں نے کہا کہ موجودہ دور حکومت میں پاکستان ترقی کی درست سمت کی طرف گامزن ہے۔ گورنر سندھ نے مذید کہا کہ خطے میں پائیدار امن کیلئے کشمیر میں مظالم کا خاتمہ اور مسئلہ کشمیر کا حل ضروری ہے۔ امریکہ کے قونصل جنرل رابرٹ سلبرسٹین نے گورنر سندھ سے گفتگو کرتے ہوئے کہا کہ امریکہ پاکستان کو خوشحال، ترقی یافتہ اور مستحکم دیکھنے کا خواہشمند ہے۔ انہوں نے مذید کہا کہ امریکی سرمایہ کار تعلیم اور صحت سمیت مختلف شعبوں میں سرمایہ کار ی کیلئے بھرپور دلچسپی رکھتے ہیں۔

مسلم لیگ (ن) سندھ کے نائب صدر حاجی طیب زر کی رہائش گاہ دارالسلام سوسائٹی کورنگی میں ہر سال کی طرح امسال بھی محرم الحرام شہادت امام حسین ؓ کی یاد میں 10 محرم الحرام بروز جمعرات صبح10بجے تا دوپہر1 بجے تک لنگر حلیم کا اہتمام کیا گیا ہے اس سلسلے میں لیگی رہنمائوں کے علاوہ مختلف سیاسی پارٹیوں کو دعوت نامے ارسال کردیئے گئے ہیں ۔

سندھ حکومت نے صوبے بھر میں تعلیمی ادارے کھولنے کا فیصلہ کرلیا۔ تفصیلات کے مطابق سندھ میں تعلیمی ادارے کھولنے سے متعلق اسٹیئرنگ کمیٹی اجلاس ہوا ، جس میں کراچی سمیت سندھ میں پیر 23 اگست سے 50 فیصد حاضری کے ساتھ تعلیمی ادارے کھولنے کا فیصلہ کیا گیا ، تاہم اس ضمن میں اسٹیئرنگ کمیٹی کی جانب سے کہا گیا ہے کہ جن اسکولوں میں ویکسی نیشن 100فیصد ہے وہ اسکول کھول سکتے ہیں۔
خیال رہے کہ اس سے پہلے سندھ حکومت نے تعلیمی ادارے مزید بند رکھنے کا فیصلہ کیا تھا ، یہ فیصلہ محکمہ تعلیم اورمحکمہ بورڈ اینڈ یونیورسٹیز کے اجلاس میں کیا گیا تھا ، جس میں وزیر تعلیم سندھ سردار شاہ ، وزیر جامعات اسماعیل راہو اور دیگر نے شرکت کی ، ذرائع کا کہنا ہے کہ اجلاس میں تعلیمی ادارے مزید رکھنے کا فیصلہ کیا گیا جس کے تحت صوبہ سندھ میں تعلیمی ادارے عاشورہ تک بندرہیں گے تاہم اس دوران امتحانات کاسلسلہ جاری رہےگا اور 6 محرم تک صوبے میں امتحانات ہوں گے تاہم اب سندھ حکومت نے صوبے بھر میں تعلیمی ادارے کھولنے کا فیصلہ کرلیا اور پیر 23 اگست سے 50 فیصد حاضری کے ساتھ تعلیمی ادارے کھولنے کا فیصلہ کیا گیا ہے۔