Category: کراچی

کورنگی مہران ٹاؤن میں واقع فیکٹری میں آتشزدگی کا مقدمہ فیکٹری مالکان، منیجر و دیگر افسران کے خلاف درج کرلیا گیا۔

تفصیلات کے مطابق شہر قائد کے علاقے کورنگی انڈسٹریل ایریا میں واقع چمڑا رنگنے کی فیکٹری میں آتشزدگی کا مقدمہ کورنگی انڈسٹریل ایریا تھانے میں درج کیا گیا ہے جس میں فیکٹری کے 2 مالکان، منیجر، 2 سپروائزر اور چوکیدار نامزد کیا گیا ہے۔

ایف آئی آر میں کہا گیا ہے کہ فیکٹری میں ایمرجنسی صورتحال میں نکلنے کا کوئی راستہ نہیں تھا، عمارت ایسے بنائی گئی کہ ایمرجنسی میں کوئی باہر بھی نہیں نکل سکتا جب کہ فیکٹری میں داخل ہونے کا بھی صرف ایک ہی راستہ تھا۔

ایف آئی آر کے متن میں کہا گیا ہے کہ فیکٹری میں کوئی الارم سسٹم بھی موجود نہ تھا۔

ذرائع کا کہنا ہے کہ فیکٹری آتشزدگی واقعے میں ملوث ملزمان میں سے تاحال کوئی گرفتار نہ ہوسکا۔

واضح رہے کہ گزشتہ روز فیکٹری میں آگ لگنے سے 16 افراد جاں بحق ہوئے جب کہ ایک شخص حادثے میں اپنے بیٹے کی موت پر صدمے سے چل بسا۔

متحدہ قومی موومنٹ پاکستان کے ڈپٹی کنوینر وسیم اختر نے مرکز بہادر آباد پر ایک ہنگامی پریس کانفرنس سے خطاب کرتے ہوئے کہا کہ ایم کیو ایم پاکستان ماہ اگست کو ماہ آزادی کے طور پر منا رہی ہے اس ضمن میں آج ملک کے طول عرض میں مختلف تقریبات کا انعقاد کیا گیا تھا اور بالخصوص کراچی کے علاقے ناظم آباد میں ماہ آزادی کرکٹ ٹورنامنٹ رکھا گیا تھا لیکن آج صبح کورنگی مہران ٹان کی فیکٹری میں لگنے والی آگ کے باعث 16افراد کی جانیں گئیں آج کراچی کے مختلف گلی کوچوں میں جنازے اٹھ رہے ہیں لہذا ایم کیو ایم پاکستان نے آج ہونے والے تمام تنظیمی پروگرامز ملتوی کردئے گئے ہیں اس کی بنیادی وجہ یہ ہے کہ اراکین رابطہ کمیٹی و اراکین پارلیمنٹ مختلف علاقوں میں اٹھنے والے جنازوں میں شرکت کرینگے فیکٹری میں جل کر جاں بحق ہونے والے افراد کا تعلق ہمارے علاقوں سے ہے اور یہ ہمارے لوگ ہیں ہم انکے غم میں برابر کے شریک ہیں،ہم شو بزنس سے تعلق رکھنے والے افراد اور مختلف شعبہ ہائے زندگی سے تعلق رکھنے والے اکابرین سے معذرت خواہ ہیں کہ ہمیں آج کے پروگرامز منسوخ کرنے پڑے۔
اس موقع پر رابطہ کمیٹی کے رکن و وفاقی وزیر سید امین الحق نے گفتگو کرتے ہوئے کہا کہ آج کے آگ لگنے کے واقعے میں سندھ حکومت کے دعووں کی قلعی کھل گئی ہے جس میں وہ دعوے کرتے پھرتی ہے لیکن وزیر محنت کی نااہلی اور بدعنوانی روز روشن کی طرح واضح ہوگئی ہے جب ہم جائے حادثہ پر پہنچے تو تمام کھڑکیوں اور دروازوں پر لوہے کی گرلذ لگی ہوئی تھیں اور عمارت میں کسی بھی ہنگامی اخراج کا بندو بست نہیں تھا وزیر محنت اور سندھ بلڈنگ کنٹرول اتھارٹی بھی اس واقع کے ذمہ دار ہیں جس میں 16قیمتی جانیں ضائع ہوئی وزرت محنت کے انسپیکٹرز اور ڈائریکٹرز نظرانے وصول کر کے غیر قانونی طریقے سے فیکٹری چلانے کی اجازت دے رہے ہیں۔
سید امین الحق نے مزید کہا کہ وفاقی حکومت نی52فائر ٹینڈر اور 2بازر فراہم کئے لیکن سندھ حکومت نے اپنی صلاحیت اور استعد اد کار بڑھانے میں ناکام رہی ایک جانب کراچی کے شہری شعلوں کی لپیٹ میں تھے تو دوسری جانب ایڈمنسٹریٹر کراچی ایئر کنڈیشن کمرے میں بیٹھ کر پریس کانفرنس کر رہے تھے جبکہ انہیں جائے حادثہ میں ہونا چاہئے تھا۔سید امین الحق نے مطالبہ کیا کہ وزیر محنت استعفی دیں اور اس واقع میں ملوث افراد کیخلاف کاروائی کی جائے اس کے ساتھ ساتھ جاں بحق اور زخمی ہونے وافراد کے اہل خانہ کو 25لاکھ فی کس کا معاوضہ ادا کیا جائے۔
اس موقع پر وسیم اختر نے ان 5افراد کے اہل خانہ سے بھی تعزیت کی جو ساحل سمندر پر ڈوب کر جاں بحق ہوئے اور انکا تعلق اورنگی ٹان سے ہے۔اس موقع پر رابطہ کمیٹی کے اراکین عبدالوسیم،نعیم صدیقی،خالد سلطان اور ڈاکٹر عبدالقادر خانزادہ،رکن صوبائی اسمبلی صداقت حسین بھی موجود تھے۔

پاکستان ڈیموکریٹک موومنٹ میں شامل جماعتوں کا اجلاس کل ہفتہ کو کراچی میں پی ڈی ایم کے سربراہ مولانا فضل الرحمان کی صدارت میں ہوگا۔اجلاس میں شہباز شریف اور دیگر رہنما شریک ہوں گے۔اجلاس میں اتوار کو مزار قائد پر پی ڈی ایم کے جلسے پی ٹی آئی حکومت کے خلاف احتجاجی تحریک اور دیگر امور پر مشاورت ہوگی۔
اجلاس کے بعد مولانا فضل الرحمن۔شہباز شریف اور دیگر رہنماپریس کانفرنس کریں گے۔دریں اثناء کہ جے یوآئی ف کے ترجمان اسلم غوری کے مطابق مولانا فضل الرحمان کراچی میں تین دن قیام کریں گے۔مولانا فضل الرحمان ہفتہ کو پی ڈی ایم کے سربراہی اجلاس کی صدارت کریں گے۔ مولانا فضل الرحمان اتوار کو کراچی میں استحکام پاکستان و حقوق سندھ جلسہ کی صدارت کریں گے۔مولانا فضل الرحمان پیر کو کراچی میں پارٹی قیادت سے ملاقاتیں کریں گے۔

کورنگی فیکٹری میں آگ لگنے کے دوران ریسکیو اداروں کے 3 رضا کار دم گھٹنے اور چھت سے گر کر زخمی ہوگئے۔
کورنگی صنعتی ایریا کے علاقے کورنگی مہران ٹاؤن سکیٹر ایف سیکز میں قائم لیگیج فیکٹری میں جمعہ کی صبح دس بجے آگ کی اطلاع ملتے ہی ریسکیو ارادوں کے رضا کار موقع پر پہنچ گئی ، ریسکیو عمل کے دوران ایدھی اور چھیپا کے تین رضا کار دم گھٹنے اور چھت سے گر کر زخمی ہوگئے ، جہیں طبی امداد کے لئے جناح اسپتال منتقل کیا گیا ،جہاں پر انکی شناخت اسد ، رضوان اور مدثر کے ناموں سے ہوئی ، ریسکیوادارے کے ترجمان نے بتایا کہ سیکنڈ فلور پر ریسکیو کے دوران سیڑھی سلپ ہونے ، دھوائیں سے دم گھنٹے اور چھت سے گر کر تین رضاکار زخمی ہوئے تھے ،تاہم اسپتال میں تینوں کی حالت خطرے سے باہر بتائی جاتی ہے۔

پورٹ قاسم کے قریب ٹریلر کی ٹکرسے نوجوان جاں بحق ہوگیا۔تفصیلات کے مطابق بن قاسم کے علاقے پورٹ قاسم نزد آغا اسٹیل مل کے قریب تیز رفتار ٹریلرکی ٹکرسے موٹرسائیکل سوار جاں بحق ہوگیا جس کی لاش ایدھی ایمبولنس کے ذریعے جناح اسپتال لائی گئی ، پولیس کے مطابق متوفی کی شناخت 23سالہ محمد غلام ولد اجمل خان کے نام سے ہوئی ،پولیس کے مطابق حادثے کا ڈرائیور موقع سے فرار ہوگیا جبکہ پولیس نے ٹریلر قبضے میں لیکر ڈرائیور کی تلاش شروع کردی۔

لیاقت آباد ایف سی ایریا میں ڈامر کی مشین کی صاف کرتے ہوئے آگ بھڑک اٹھی جس کے نتیجے میں تین افراد جھلس کر زخمی ہوگئے ، جنہیں طور پر ایمبولنس کی مدد سے عباسی شہید اسپتال منتقل کیا گیا۔
ایس ایچ او شریف آباد عبدالخالق انصاری نے بتایا کہ ایف سی ایریا میں ڈامر کی مشین کی صفائی کے دوران میشن کے اندر ایک بکس میں اچانک لگی جس کے نتیجے میں دو بھائی سمیت تین افراد جھلس کر زخمی ہوگئے زخمیوں میں 22سالہ سلمان ولد مومن اسکا بھائی 15سالہ ارسلان اور15سالہ ثاقب ولد صابر شامل ہے ،انھوں نے بتایا کہ زخمی ہونے والے افراد مزدور ہے جنہیں عباسی شہید اسپتال میں طبی امداد دی جارہی ہے۔

ایڈمنسٹریٹر کراچی و ترجمان سندھ حکومت بیرسٹر مرتضی وہاب نے جمعہ کے روز ذوالفقار آباد آئل ٹینکرز پارکنگ ٹرمینل کا دورہ کیا، اس موقع پر ڈپٹی کمشنر اور ایس ایس پی ملیر بھی بیرسٹر مرتضی وہاب کے ہمراہ تھے ،ڈپٹی کمشنر ملیر اور متعلقہ حکام نے ایڈمنسٹریٹر کراچی کو بریفنگ دی، ایڈمنسٹریٹر کراچی بیرسٹر مرتضی وہاب نے ذوالفقار آباد آئل ٹینکرز پارکنگ ٹرمینل کے اندورنی حصے میں ٹینکرز، ڈرائیورز اور ٹرمینل میں آنے والوں کے لئے دستیاب سہولیات کا جائزہ لیا اور موقع پر بہتری کے احکامات جاری کئے،انہوں نے ذوالفقار آباد آئل ٹینکرز پارکنگ ٹرمینل کو دوبارہ مکمل فعال کرنے کی ہدایات بھی دیں،ایڈمنسٹریٹر کراچی نے کہا کہ آئل ٹینکرز کی وجہ سے شہر بھر میں سڑکوں پرٹریفک کی روانی متاثر ہوتی ہے اور ٹریفک جام کے مسائل کا سامنا ہوتا ہے ، ذوالفقار آباد آئل ٹینکرز پارکنگ ٹرمینل کے فعال ہونے سے شہر میں ٹریفک کے نظام میں بہتری آئے گی، ایڈمنسٹریٹر کراچی بیرسٹر مرتضی وہاب نے آئل ٹینکرز ڈرائیورز سے ملاقات کی اور ان کے مسائل کے حل کے لئے احکامات بھی جاری کئے۔
دریں اثناء ایڈمنسٹریٹر کراچی بیرسٹر مرتضی وہاب سے سینئرڈائریکٹر اینٹی انکروچمنٹس بلدیہ عظمی کراچی بشیر صدیقی نے ملاقات کی، اس موقع پر شہر میں تجاوزات کے مختلف مسائل پر گفتگو ہوئی، سینئرڈائریکٹر اینٹی انکروچمنٹس نے ایڈمنسٹریٹر کراچی بیرسٹر مرتضیٰ وہاب کو شہر کے مختلف علاقوں میںغیرقانونی تجاوزات کے خلاف اقدامات اور خالی کرائی گئی جگہوں کے متعلق تفصیلی بریفنگ دی۔

کراچی آفیسرز ویلفیئر ایسوسی ایشن کے نائب صدور عبدالمنان قائم خانی اور منظر وارثی نے ایڈمنسٹریٹر کراچی سے اپیل کی ہے کہ ملازمین جو کنٹریکٹ پر تھے سب مستقل نہیں کئے گئے جسکی سیاسی اور رشوت ستانی کی وجوہات تھیں انہیں اصل لسٹ لیکر مستقل کرنے کے علاوہ جو مستقل ہوگئے انہیں اعتراضات لگا کر تنخواہوں سے ا ھروم کردیا گیا ہے انکو فوری کلئیر کیا جائے۔
انہوں نے کہا کہ کے ایم سی کے کنٹریکٹ ملازمین مستقل ہونے کے باوجود تنخواہوں سے محروم ہیں جبکہ بعض سیاسی بنیادوں ]پر مستقل نہیں کئے گئے۔ محکمہ صھت عزر گناہ بدتر از گناہ کا مرتکب ہو رہا ہے۔ صوبائی کابینہ سے منظوری کے بعد تنخواہیں روکنے اور میڈیکل فٹنس میں تاخیر کا کوئی جواز نہیں ۔
ایڈمنسٹریٹر کراچی نوٹس لیں کنٹریکٹ ملازمین کی اصل لسٹ کے مطابق رہ جانے والے ملاز،مین بھی مستقل کئے جائیں۔ کے ایم سی میں پسند نا پسند کی بنیاد پر سالہا سال سے کام کرنے والے ملازمین کا استحصال کیا گیا۔ عبدالمنان قائم خانی اور منظر وارثی نے کہا کہ کنٹریکٹ ملاز،میں جنکی تعداد 722دکھائی گئی جبکہ یہ اس سے کہیں زیادہ تھی لیکن سیاسی بنیادوں پر اصل ملازمین کو شارٹ لسٹ کیا گیا۔
مخصوص افراد کو 31 جولائی 2018کو مستقل کرنے کی منظوری دی گئی جبکہ صوبائی کابینہ کی 29اپریل 2018اور سندھ ہائی کورٹ کے فیصلے کو جواز بنا کر یہ منظوریاں دی گئیں۔ لیکن 85ایسے ملازمین جنکی عمریں 42سال سے زائد تھیں اور اور بعض محکمہ جس میں لینڈ ، کچی آبادی ، اورنگی، ای اینڈ آئی پی و دیگر محکمے تھے انکے کئی ملازمین کو ایچ آر ایم کو رشوت نہ دینے اور سیاسی بنیادوں پر مستقلی کی لسٹ میں شامل نہیں کیا گیا۔
ان میں سے 85ملازمین کی 20اگست 2020کو تنخواہیں بند کردی گئیں ۔ جس پر متاثرہ ملازمین نے چیف سیکریٹری سندھ سے رجوع کیا تھا۔ انکی عمروں پر رعایت دے دی گئی تھی۔ ان 23ملازمین کو 16مئی 2021کو منظوری کے باوجود نئے تقرر نامے بھی جاری کئے گئے لیکن انہیں میڈیکل فٹنس نہیں دی جا رہی ۔ سینئر ڈائریکٹر میڈیکل سروسز نے معاملہ لٹکا کر تین ماہ سے ان ملازمین کو زچ کیا ہوا ہے جبکہ مستقل نہ کئے گئے ملازمین کی درخواستیں ایچ آر ایم میں ڈمپ کرکے انہیں فاقہ کشی پر مجبور کیا جا رہا ہے۔
کراچی آفیسرز ویلفیئر ایسوسی ایشن مطالبہ کرتی ہے کہ رہ جانے والوں کو ریکارڈ چیک کرکے مستقل اور بقیہ کی تنخواہیں جاری کی جائیں۔ ایدمنسٹریٹر کراچی مرتضی وہاب اسکا خصوصی نوٹس لیں۔ ہم امید کرتے ہیں کہ انکے ساتھ انصاف کیا جائے گا۔

جناح اسپتال میں ایم ایل اوز کو غیرقانونی طور پر میڈیکل رپورٹس لکھنے کیلئے دباؤڈالنے کا سلسلہ جاری ہے ۔ایڈیشنل پولیس سرجن جناح اسپتال ڈاکٹرسمعیہ نے قیدی کی میڈیکل رپورٹ ضروری ٹیسٹ کرائے بغیر جاری کردی اورفرانزک ڈپارٹمنٹ کے ڈاکٹرسونو مل کے ساتھ افسران کے سامنے ہتک آمیز رویہ اختیار کیا ۔
ذرائع کے مطابق جناح اسپتال میں تعینات ایڈیشنل پولیس سرجن ڈاکٹرسمعیہ کی جانب سے ایم ایل او اور فرانزک ڈپارٹمنٹ کے ڈاکٹرز پر دبا کا ڈالنے کا سلسلہ جاری ہے ۔تفصیلات کے مطابق جناح اسپتال کے ڈپارٹمنٹ آف فرانزک میڈیسن کے اسسٹنٹ پروفیسر ڈاکٹرسونو مل نے سیکرٹری صحت سندھ کو ایک خط ارسال کیا ہے ،جس میں کہا گیا ہے کہ قیدی رمیش ولد تابا کی موت کی وجوہات جاننے کے لیے ایک نوٹی فکیشن کے ذریعے میڈیکل بورڈ تشکیل دیا گیا جس میں ایڈیشنل پولیس سرجن ڈاکٹرسمعیہ سید ،ایم ایل او ڈاکٹر اوربحیثیت فرانزک ماہر مجھے شامل کیا گیا ۔
5مئی 2021کو جناح اسپتال کے مردہ خانے میں متوفی رمیش کے پوسٹ مارٹم کی کارروائی شروع کی گئی ۔ڈاکٹرسمعیہ نے اس دوران مجھے ایم ایل او کے ساتھ پوسٹ مارٹم لکھنے کو کہا ۔ہم نے معمول کی کارروائی کے تحت رپورٹ کے پہلے صحفے پر دستخط کیے اور تجویز دی کہ مکمل پوسٹ مارٹم رپورٹ مشترکہ طور پر آفس میں مرتب کی جائے کیونکہ یہاں بھارتی قونصلیٹ کے اسٹاف افسران موجود ہیں ۔
ڈاکٹرسونو مل نے اپنے خط میں انکشاف کیا کہ کیمیکل ایگزامنر سمیت دیگرضروری رپورٹس کے آئے بغیر ڈاکٹرسمعیہ نے ہم پر میڈیکل رپورٹ جاری کرنے کے لیے دبا ڈالا اور ہمارے ساتھ ہتک آمیز رویہ اختیار کیا گیا۔انہوںنے کہا کہ میں نے اس کے بعد کارروائی میں مزید حصہ لینے سے انکار کردیا اور ڈاکٹر سمعیہ نے بغیر دستخط اور منظوری کے رمیش کی موت کی وجہ حرکت قلب بند ہونا ظاہر کرکے از خود رپورٹ جاری کردی ،جس کا میں قطعی ذمہ دار نہیں ہوں اور اس حوالے سے اگر مستقبل میں کوئی کوتاہی کے عوامل سامنے آتے ہیں تو میں اس سے بری الذمہ ہوں ۔
یہاں یہ امر قابل ذکر ہے کہ جناح اسپتال میں اس سے قبل بھی ایم ایل اوز پر ایڈیشنل پولیس سرجن کی جانب سے دبا ڈالنے کی اطلاعات سامنے آتی رہی ہیں اور عید الاضحی کے پہلے روز بھی ٹریفک حادثات میں جاں بحق افراد کی میڈیکل رپورٹ لکھنے کے لیے ایم ایل اوز کو مجبور کیا گیا تھا اور اس حوالے سے ڈاکٹر حسام اور ڈاکٹر عمیر نے پولیس سرجن ڈاکٹر حامد جیلانی سے تحریری طور پر شکایت کی تھی جبکہ ایڈیشنل پولیس سرجن جناح اسپتال کے خلاف تحریری شکایت پولیس سرجن کراچی کو جمع کرادی گئی ہے۔

راغب سوشل ویلفیئر آرگنائزیشن کی جانب سے رنچھوڑ لائن کے علاقے مارواڑی والی لائن سلاوٹ جماعت ہال میں ایک روزہ فری میڈیکل کیمپ کا انعقاد کیا گیا اس موقع پر راغب سوشل ویلفیئر آرگنائزیشن کی صدر شبانہ شفیق نے میڈیا سے بات کرتے ہوئے کہا کہ موجودہ حالات میں لاک ڈائون کی وجہ سے شہریوں کے مسائل میں مزید اضافہ ہوگیا پہلے ہی طبی سہولیات بہت مہنگی ہیں لاک ڈائون کی وجہ سے ہونے والی بیروزگاری کی وجہ سے یہ مسلہ مزید سنگین ہوگیا ہے ہم پہلے بھی میڈیکل کیمپ شہر کے مضافاتی علاقوں میں لگاتے آئیں ہیں اس بار ہم شہر کی گنجان آبادی رنچھوڑ لائن کا انتخاب کیا گیا ۔
آج کے میڈیکل کیمپ تقریبا 750مریضوں کا طبی معائنہ کیا گیا اور تقریبا اس برابر ہی مریضوں کے ٹیسٹ کیئے گئے،جن تمام اقسام کے ٹیسٹ شامل ہیں شہریوں نے ماہر معالجیں سے اپنا طبی معائنہ کروایا ،اور مریضوںکو مفت ادویات بھی فراہم کی گئیںہمارا مقصد صرف عوام والناس کی خدمت ہے اور ہم اپنی کاوش کا مظاہرہ آئے دن کرتے رہتے ہیں جن میں اللہ ہمیں سرخروع کرتا ہے اور سلسلہ جاری ہے اور آئندہ بھی جاری رہے گا۔
اس موقع پر میں عوام سے گزارش کرتی ہوں کو کرونا وبا سے نمٹنے کیلئے شہری ایس اوپیز پر عمل کریں ۔اور اپنی ویکسی نیشن لازمی کروائیں اور صحت مندہ معاشرہ بنانے کے لیئے شہری اپنا بھر پور کردار اد ا کریں اور اچھے شہری ہونے کا ثبوت پیش کریں اس موقع پر بانی راغب سوشل ویلفیئر آرگنائزیشن محمد شفیق ،عامر ضیاء اور علاقے دیگر معززین نے بھی اپنے خیالات کا اظہار کیا اورفری میڈیکل کیمپ لگانے پر راغب سوشل ویلفیئر آرگنائزیشن کی کاوش کو سراہا ۔