پی ٹی آئی کے مرکزی جوائنٹ سیکریٹری محمد علی شیروانی کا کراچی کے علاقے مواچھ گوٹھ میں دھماکے کی مذمت
دھماکے میں قیمتی جانوں کے نقصان پر افسوس ہے۔یوم آزادی کے موقع پر اس طرح کا واقعہ امن خراب کرنے کی کوشش ہے۔
شرپسند عناصر کے خلاف صوبائی حکومت ایکشن لے۔ شہر میں بد امنی کے واقعات لمحہ فکریہ ہے۔
رینجرز اور قانون نافذ کرنے والے ادارے شہر میں امن و امان کو برقرار رکھنے میں کردار ادا کریں۔
واقعے میں زخمیوں کی جلد صحتیابی کے لیے دعا گوہ ہیں۔
کراچی کے علاقے بلدیہ ٹائون میں ہفتہ کی رات ہونے والے دستی بم حملے میں نئی نویلی دلہن سانحے کا شکار ہونے سے بچ گئی۔ حملے میں خواتین اور بچوں سمیت 13 افراد جاں بحق، جب کہ 7 افراد زخمی ہوئے ہیں۔واقعہ اس وقت رونما ہوا جب شادی کے بعد دلہن کے اعزاز میں لانڈھی کے علاقے شیرپائو کالونی میں خاندان کی خواتین کیلئے ایک تقریب کا اہتمام کیا گیا تھا، روایتی اصولوں کے مطابق تقریب میں خواتین ہی مدعو تھیں،یہی وجہ ہے کہ حملے میں بڑی تعداد میں خواتین ہی نشانہ بنیں۔
قسمت نے دلہن کا ساتھ دیا اور وہ حملے کے متاثرین میں شامل ہونے سے بچ گئی۔ ہنستے مسکراتے اور کھلتے ہوئے چہرے شادی کے گانوں کو دہراتے تقریب سے واپس اپنی منزل کی جانب رواں دواں تھے کہ دہشت گردی کا نشانہ بن گئے۔
تقریب میں شرکت کیلئے خواتین کو لانے لے جانے کیلئے منی شہزور ٹرک کا بندوبست کیا گیا تھا۔سفید رنگ کے اس شہزور کا عقبی حصہ 25 مسافروں کے بیٹھنے سے بھر گیا تھا۔
جس میں خواتین کے ہمراہ ان کے بیٹے بھائی بھی سوار تھے۔ منی ٹرک جیسے ہی مواچھ گوٹھ کے موڑ پر پہنچا، یکا یک ہنستے گاتے چہروں کی خوشیاں ماتم میں تبدیل ہوگئیں۔دہشت گرد اس بھرے ٹرک پر دیسی ساختہ ہینڈ گرینڈ پھینک کر با آسانی فرار ہونے میں کامیاب ہوگئے۔اے این پی سندھ کے سیکریٹری جنرل یونس بونیری نے اس ضمن میں بتایا کہ بلدیہ دھماکے میں پارٹی رکن فرمان علی کی بیٹی بھی زخمی ہوئی۔
ذرائع کے مطابق فرمان علی جانسن کمپنی میں کام کرتا ہے اور مزدور لیڈر بھی ہے۔ فرمان علی اور اس کی فیملی گزشتہ 40 سال سے عوامی نیشنل پارٹی سے وابستہ ہے۔بونیری نے مزید بتایا کہ فرمان علی اور اس کے چاروں بھائی شیرپا ئوکالونی قائد آباد میں رہتے ہیں اور اس حادثے میں جاں بحق ہونے والی خواتین اور بچوں کا تعلق ان کے بھائیوں سے ہے۔انہوں نے بتایاکہ خاندان کا تعلق سوات سے ہے۔
کچھ روز قبل فرمان علی کے خاندان کی بیٹی کی شادی بلدیہ ٹائون میں مقیم لڑکے سے ہوئی۔ لڑکے کا تعلق بھی سوات سے ہے اور آپس میں رشتے دار ہیں۔ فرمان علی کے خاندان میں ایک رسم ہے جس کے مطابق شادی کے کچھ روز بعد لڑکے والے لڑکی والوں کی دعوت کرتے ہیں جس میں لڑکی والوں کے گھر کی خواتین شرکت کرتی ہیں اور واپسی پر لڑکی کو کچھ دنوں کے لیے اپنے ساتھ لے جاتی ہیں اور گزشتہ روز بھی کچھ ایسا ہی ہوا۔
یونس بونیری کے مطابق فرمان علی کی فیملی نے کھانے کے بعد رخصت لی۔ انہوں نے ایک شہزور ٹرک کرائے پر لیا۔ اس ٹرک کے کیبن میں چٹائی بچھائی اور تمام خواتین اور بچے اس کیبن میں بیٹھ گئے۔یونس بونیری کے مطابق رسم کے مطابق دلہن کو ان کے ساتھ جانا تھا مگر دلہے کے گھر والوں نے اسے یہ کہہ کر روک لیا کہ رات زیادہ ہوگئی ہے اور دلہن کو دلہا اتوار کو کل کسی وقت بھی دن میں خود چھوڑ جائے گا۔
جس کی وجہ سے دلہن اس ٹرک میں سوار نہیں ہوئی۔ اور حادثے میں محفوظ رہی۔حملے میں 6 خاندانوں کی خواتین دہشت گردوں کا نشانہ بنیں۔ جب کہ نشانہ بننے والوں میں 9 خواتین شامل ہیں، جو آپس میں رشتے دار ہیں۔ ان سب کا تعلق سوات سے ہے۔حادثے کا شکار سلیمہ بی بی عمر 50 سال زوجہ شمشیر علی اپنے 3 بیٹوں کے ساتھ اس المناک حادثے کا شکار ہوئیں۔ ان کے بیٹوں میں 13 سالہ سفیان، 11 سالہ حماد اور 6 سالہ فہد شامل ہیں۔
ابتدا میں 6 سالہ فہد کو شدید زخمی حالت میں نیشنل انسٹی ٹیوٹ آف چائلد ہیلتھ منتقل کیا گیا تھا، تاہم وہ جانبر نہ ہوسکا اور دوران علاج چل بسا۔حملے میں رحیم دل کی 47 سالہ اہلیہ ملکین بھی اپنے 2 بیٹوں 16 سالہ سلمان اور 15 سالہ عثمان کے ساتھ لقمہ اجل بنی۔ حملے کے بعد 16 سالہ سلمان کئی گھنٹے تک موت سے جنگ لڑتا رہا اور زندگی کی بازی ہار گیا۔
حملے کا شکار ہونے والی دیگر خواتین کی شناخت 45 سالہ شاہین بیگم، 40 سالہ صداقت بی بی اور 25 سالہ نصرت بی بی کے ناموں سے کی گئی ہیں، جن کے گھر کا سربراہ دلدار ہے۔ صداقت بی بی نے زندگی کی آخری سانسیں ڈاکٹر رتھ فائو سول اسپتال میں لیں۔حملے میں جاں بحق دیگر افراد میں میراج خان کی اہلیہ 40 سالہ شربت بی بی، جب کہ شیر علی کی 25 سالہ بیٹی اقصی بھی شامل ہے۔
اسی حادثے میں شیر علی کے خاندان کی دیگر 3 خواتین 30 سالہ اقرا، 45 سالہ صفیہ بھی زخمی ہوئیں۔مواچھ گوٹھ کے اس حملے میں اظہار خان کی 34 سالہ اہلیہ سکینہ بی بی تو بچ گئی تاہم ان کا ایک سال کا بیٹا زویان ان سے بچھڑ گیا۔دستی بم حملے میں زخمی دیگر افراد کی شناخت 35 سالہ رخسانہ زوجہ عبدالرشید، 35 سالہ وزارت زوجہ شاہد اور 25 سالہ سمیرا بنت فرمان کے ناموں سے کی گئی ہے .
امیر جماعت اسلامی ضلع کیماڑی فضل احد نے مواچھ گوٹھ بلدیہ ٹائون میں دہشتگردی کے واقعے میں رہنما جماعت اسلامی اسلم خان سواتی کے گھرانے کے 13افراد کی شہادت پر گہرے دکھ اور افسوس کا اظہار کرتے ہوئے اسے قانون نافذ کرنے والے اداروں کی نااہلی قرار دیتے ہوئے کہا کہ شہر کراچی ایک بار پہر دہشت گردوں کے نشانے پر ہے۔
خواتین اور بچوں پر کریکر حملہ ایک بزدلانہ کاروائی ہے۔ملک دشمن عناصر ایک بار پہر شہر میں منظم ہو رہے ہیں ۔ملیر منگھوپیر اور اب مواچھ گوٹھ میں جماعت اسلامی کے رہنمائوں اور انکے اہل خانہ کے ساتھ دہشتگردی کے واقعات تشویش ناک ہے۔ایک سال قبل کشمیر ریلی میں بم حملے میں ملوث ملزمان بھی اب تک گرفتار نہیں ہوسکے۔
جب تک ان وارداتوں میں ملوث دہشتگرد گرفتار نہیں کئے جاتے شہر میں پائیدار امن قائم نہیں ہوسکتا۔
پولیس ،رینجرز اور قانون نافذ کرنے والے ادارے حالیہ واقعات کی تحقیقات میں تیزی لاتے ہوئے ملوث دہشتگردوں کو فوری گرفتار کریں۔انہوں نے مزید کہا کہ مواچھ گوٹھ دہشتگردی کا واقعہ قومی سانحہ ہے۔قومی تقریبات اور تہواروں پر دہشتگردی کے واقعات نہایت افسوس ناک ہیں۔پوری قوم اسلم خان سواتی کے غم میں برابر شریک ہے۔دریں اثناء امیر جماعت اسلامی ضلع کیماڑی فضل احد نے اسپتال جاکر مریضوں کی عیادت کی اور اسلم خان کی اہلیہ ،بیٹی اور خاندان کے دیگر افراد کی شہادت پر تعزیت کی۔
کراچی کے علاقے سپرہائی وے پرواقع احسن آباد کے ایک ہوٹل پر نامعلوم ملزمان کی فائرنگ سے لاڑکانہ کا رہائشی 50 سالہ شخص ہلاک ہوگیا۔ ڈی ایس پی سہراب گوٹھ سہیل فیض کے مطابق واردات احسن آباد کی اٹاور سوسائٹی میں ہوٹل پر ہوئی، ڈی ایس پی سہیل فیض نے جائے وقوع کا معائنہ کیا اور ابتدائی رپورٹ پولیس حکام کو پیش کی۔
50 سالہ ریاض علی چانڈیو کی میت ایدھی ایمبولینس کے ذریعے عباسی اسپتال منتقل کردی گئی ہے۔سہیل فیض کے مطابق مقتول ریاض علی لاڑکانہ کا رہائشی تھا، وہ اسی علاقے میں ایک زیر تعمیر گھر کا چوکیدار تھا۔ڈی ایس پی سہراب گوٹھ سہیل فیض کے مطابق نامعلوم ملزمان نے نائن ایم ایم پستول سے گولیاں ماریں، پولیس کے مطابق مذکورہ شخص کو مبینہ طور پر ذاتی دشمنی کی بنیاد پر قتل کیا گیا ہے تاہم پولیس تفتیش شروع کردی گئی ہے۔
وزیراعلیٰ پنجاب سردار عثمان بزدار نے کراچی واقعہ کی شدید مذمت کی ہے۔ وزیراعلی عثمان بزدارنے افسوسناک واقعہ میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔
وزیراعلیٰ عثمان بزدار نے کہا کہ اس واقعہ کی جتنی بھی مذمت کی جائے کم ہے۔ جشن آزادی پر معصوم لوگوں کی زندگیوں سے کھیلنے والے درندوں کا کوئی مذہب نہیں۔انہوں نے کہا کہ پنجاب حکومت جاں بحق افراد کے لواحقین کے غم میں برابر کی شریک ہے اور ہماری تمام تر ہمدردیاں جاں بحق افراد کے لواحقین کے ساتھ ہیں۔وزیراعلیٰ عثمان بزدار نے زخمی افراد کی جلد صحت یابی کیلئے دعا کی ہے۔
کراچی میں کلفٹن کے ساحل پر پھنسے غیر ملکی بحری جہاز ہینگ ٹونگ کو نکالنے کا آپریشن 21 اگست تک ملتوی کرنے کا فیصلہ کیا گیا ہے۔
ذرائع کے مطابق سی ویو کے ساحل پر پھنسے جہاز کو نکالنے کیلئے نئی حکمت عملی بنائی جائے گی۔بحری جہاز ہینگ ٹونگ کا 8 ٹن وزنی وائر کا ٹگ بوٹ سے منسلک ہونا تقریبا ناممکن ہے۔ذرائع نے بتایا کہ نئی حکمت عملی میں ڈائیورز کی مدد سمیت چھوٹی بارج کے استعمال پر غور کیا گیا ہے۔
شہرقائد کے علاقے مواچھ گوٹھ میں جس گاڑی پر دستی بم حملہ ہوا اس کے ڈرائیور کا بیان پولیس حکام نے قلم بند کرلیا ہے۔ڈرائیور نے اپنے بیان میں کہاکہ بلدیہ میں شادی کی دعوت سے واپسی پر دھماکا ہوا، حملے کے بعد فوری طور پر پولیس اور ریسکیو کو فون کیا، اس دوران ٹرک کے قریب آتے کسی کو نہیں دیکھا۔
پولیس کو ریکارڈ کرائے گئے بیان میں ڈرائیور نے بتایا کہ دھماکے کی آواز بہت زیادہ تھی کچھ سمجھ نہیں آرہا تھا، دھماکے کی آواز سنی تو گاڑی روک دی۔ڈرائیو نے کہاکہ میرے ساتھ فیملی کے 2لوگ اور بیٹھے تھے، دھماکے سے گاڑی کا صرف پچھلا شیشہ ٹوٹا۔پولیس کے مطابق مواچھ گوٹھ میں ٹرک پردستی بم حملے کی تحقیقات جاری ہیں، دستی بم ہوا میں ہی پھٹنے سے اموات زیادہ ہوئیں، ٹرک کے فرش پر چھروں کے نشانات نہیں ہیں، زیادہ تر زخمی اور اموات جسم کے اوپری حصے پر چھرے لگنے سے ہوئیں، حملے سے متعلق تحقیقات کررہے ہیں۔
ڈپٹی کمشنر و ایڈمنسٹریٹر کورنگی ڈاکٹر محمد بخش راجہ دھاریجو کی ہدایت پر بلدیہ کورنگی کی جانب سے محرم الحرام کے موقع پر امام بارگاہوں ،مجالس گاہوں اور جلوسوں کے روٹس پر خصوصی بلدیاتی انتظامات کی انجام دیہی کو یقینی بنا یا جارہا ہے ،امام بارگاہوں کے اطراف اور جلوسوں کے روٹس پر سڑکوں کی تعمیر و مرمت ،صفائی وستھرائی اور روشن ماحول کے قیام کو یقینی بنا نے کے لئے بلدیہ کورنگی کا متعلقہ محکمہ شب ور وز مصروف ہے ۔
میونسپل کمشنر بلدیہ کورنگی محمد فہیم خان نے کہا کہ عزاداروں کو ہر ممکن بلدیاتی سہولیات کی فراہمی کے لئے بلدیہ کورنگی کی جانب سے اقدامات کررہے ہیں مساجد و امام بارگاہوں ،مجالس گاہوں کے اطراف اور عشرہ محرم الحرام کے دوران برآمد ہونے والے جلوسوں کے روٹس پر صفائی وستھرائی ،اسٹریٹ لائٹس کی درستگی روشن ماحول کا قیام اور شاہراہوں کی پیچ ورک کا کام ہنگامی بنیادوں پر انجام دیا جارہا ہے ان خیالات کا اظہار انہوںنے بلدیہ کورنگی کے متعلقہ محکماجاتی سربراہان کے ہمراہ ڈسٹرکٹ کورنگی کا تفصیلی دورہ کرکے امام بارگاہوں اور جلوسوں کے روٹس کا معائنہ کرتے ہوئے کیا اس موقع پر انہوںنے منتظمین سے ملاقات کی اور بلدیہ کورنگی کی جانب سے جاری انتظامات پر تبادلہ خیال کیا۔
منتظمین نے مثالی اور بہتر انتطامات کے حوالے سے ڈی سی کورنگی اور میونسپل کمشنر بلدیہ کورنگی کے اقدامات کو سراہا ۔میونسپل کمشنر فہیم خان نے منتظمین کو یقین دلا یا کہ تمام تر انتظامات آپ کی تجاویز اور مشاورت کے ساتھ انجام دیا جارہا ہے اور انجام دیا جاتا رہیگا انہوںنے اس موقع پر متعلقہ محکموں کو ہدایت کی کہ امام بارگاہوں اور مجالس گاہوں پر جراثیم کش اسپرے انجام دیا جائے اور جلوسوں کے روٹس اور امام بارگاہوں کے اطراف سڑکوں پر چونے کا چھڑکائو کیا جائے میونسپل کمشنر بلدیہ کورنگی نے بلدیہ کورنگی کے متعلقہ محکموں کو ہدایت کی کہ جلوس سے قبل روٹس کا معائنہ کیا جائے اور جہاں ضرورت ہو وہاں فوری انتظامات کو یقینی بنا یا جائے ۔
سندھ اسمبلی میں اپوزیشن لیڈر حلیم عادل شیخ کہتے ہیں میں ٹھٹھہ پولیس کو سلام پیش کرتا ہوں، سب اسی طرح اپنا کام کریں اور موقع پہنچیں تو ایسے جرائم پیشہ افراد کا خاتمہ یقینی ہے-
ٹھٹھہ واقعے سے متعلق اپنے وڈیو بیان میں حلیم عادل شیخ کا کہنا تھا کہ 14 سالہ بچی کی لاش کو قبر سے نکال کر زیادتی کی گئی، ورثاء کے رابطے پر میں متاثرہ خاندان کے پاس پہنچا.
اطلاع ملنے پر ایس ایس پی ٹھٹھہ ڈاکٹر عمران خان نے ایک جھونپڑی میں کیمپ لگایا اور سخت نوٹس لیا۔
انہوں نے کہا کہ پولیس کا ملوث درندے کو ڈھونڈنے کے دوران مقابلہ ہوا اور وحشی درندہ مارا گیا، پولیس کے فوری کارروائی پر ٹھٹہ پولیس کہ سلام پیش کرتا ہوں۔
چیئرمین پی ایس پی مصطفی کمال نے کہا ہے کہ کورونا وائرس کے دوران کراچی کے تاجروں کا بہت نقصان ہوا ہے، مشکل حالات کے باوجود پاکستان کی محبت کم نہیں ہوئی۔کراچی کے علاقے برنس روڈ پر پاک سرزمین پارٹی اور آل تاجر سندھ اتحاد کی جانب سے یوم آزادی کی مناسبت سے پرچم کشائی کی تقریب کا انعقاد کیا گیا۔
اس موقع پر مصطفی کمال نے کہا کہ سندھ حکومت نے 13 سال سے کراچی کو ایک قطرہ پانی نہیں دیا، جو پانی آرہا تھا وہ بھی ہائیڈرنٹس کے ذریعے عوام کو دیا جارہا ہے۔مصطفی کمال نے کہا کہ سندھ حکومت نے ڈھائی لاکھ نوکریاں دیں، جن میں سے ایک بھی کراچی کے لئے نہیں ہے۔انہوں نے کہا کہ کراچی میں کورونا ٹائم بتاکر آتا ہے، 4 گھنٹے کے بجائے 24گھنٹے کاروبار کھول دیں، فیصلے جب ٹھیک ہوں گے، جب ہم ان فیصلوں کو اون کریں گے۔
چیئرمین پی ایس پی نے کہا کہ آج اس تجدید کا دن ہے، جو آزادی ہمارے آباو اجداد نے حاصل کی تھی، اس کی تکمیل باقی ہے۔انہوں نے کہا کہ ہمیں آزادی جب محسوس ہوگی جب ہمارے مسائل ختم ہوں گے، جن اسپتالوں میں وزیر کے بچوں کا علاج ہو وہاں ہمارے بچوں کا بھی علاج ہو۔مصطفی کمال نے کہا کہ پورے پاکستان میں وہ حالات نہیں ہیں جو سندھ اور کراچی کے ہیں۔انہوں نے کہا کہ پیپلز پارٹی اور انگریزوں میں کوئی فرق نہیں، ایسے حکمرانوں کو میں بالکل نہیں مانتا۔پی ایس پی چیئرمین نے کہا کہ پی ڈی ایم والے کراچی میں جلسہ کرنے آرہے ہیں، قائدین پیپلز پارٹی کے کراچی کے خلاف اقدامات پر ضرور بات کریں۔