Category: کراچی

ویسٹ پولیس کی بڑی کاروائی، ایم کیو ایم لندن گروپ کا ٹارگیٹ کلر گرفتار۔

ملزم کاشف عرف ٹرک ایم کیو ایم لندن کے بدنام زمانہ ٹارگیٹ کلر زوہیب عرف WC عرف ڈاکٹر کا ساتھی ہے، ملزم اپنے ساتھی زوہیب کے قتل کے بعد سے نامعلوم مقام پر فرار ہو گیا تھا۔

ملزم نے مورخہ 03 مارچ 2021 کو اپنے متعلق معلومات پولیس کو دینے والے ہیرا اور JJ نامی دو اشخاص کو اغواء کیا اور سیکٹر 1-D فیملی پارک میں لے جاکر بدترین تشدد کا نشانہ بنایا اور ان کی برہنہ ویڈیو ریکارڈ کی۔

ایس ایچ او اورنگی نے انٹیلیجنس اطلاع پر چھاپہ مار کاروائی کر کے ملزم کاشف عرف ٹرک کو گرفتار کیا۔

گرفتار ملزم سے موقع پر غیر قانونی اسلحہ بمعہ ایمونیشن برآمد۔گرفتار ملزم کیخلاف مقدمہ الزام نمبر 959/2021 درج۔

گرفتار مبینہ ٹارگیٹ کلر کو مزید تفتیش کے لئے تفتیشی حکام کے حوالے کیا جائے گا۔گرفتار ملزم سے برآمد اسلحہ فارنزک کیلئے بھیجا جائے گا۔

ملزم ایم کیو ایم لندن کا ایکٹیو ورکر ہے اور قبل از بھی سنگین نوعیت کے مقدمات میں گرفتار ہو کر جیل جا چکا ہے۔

گشت پر مامور موٹرسائیکل سوار اہلکاروں نے ڈکیتی کی کوشش ناکام بنادی تاہم ملزمان با آسانی فرار ہونے میں کامیاب ہوگئے۔

تفصیلات کے مطابق کراچی میں نبی بخش تھانے کی حدود میں پولیس مقابلہ ہوا ، جس میں گشت پرمامور موٹرسائیکل سواراہلکاروں نےڈکیتی کی کوشش ناکام بنا دی۔

مقابلےکی سی سی ٹی وی فوٹیج حاصل کرلی ، جس میں دیکھا جاسکتا ہے کہ پولیس اہلکاراورڈاکوؤں کے درمیان براہ راست فائرنگ کاتبادلہ ہوا لیکن پولیس اہلکاروں نے فرار ہونے والے ملزمان کا پیچھاتک نہیں کیا۔

فوٹیج میں پولیس اہلکار گلی میں رک کر متاثرہ دکاندارسے پوچھ گچھ میں وقت ضائع ہوتا رہا اور ملزمان آسانی سےفرارہوگئے.

پولیس اہلکاروں نےنہ کنٹرول پرآگاہ کیا اورنہ ہی متعلقہ تھانے کو بتایا، فوری آگاہی کی صورت میں ناکہ بندی کرکےملزمان کوگرفتارکیاجاسکتاتھا۔

نامعلوم مشکوک افراد کراچی انٹرنیشنل ایئرپورٹ میں داخل، بغیر کسی پاس اور دستاویزات کے نامعلوم شخص کراچی ایرپورٹ میں داخل ہوگیا۔

ایف آئی اے امیگریشن کائونٹر انچارج ثمینہ صدیقی نے مشکوک شخص کو روکا، ایف آئی اے کی خاتون افسر نے مشکوک شخص کو روکا تو کوئی دستاویز نہیں تھا۔

ایف آئی اے نے مشکوک افراد کو اے ایس ایف کے حوالے کردیا، اے ایس ایف کی دونوں مشکوک افراد سے پوچھ گچھ شروع،

مشکوک شخص سے دستاویز اور شناختی کارڈ مانگنے پر ایرپورٹ سے باہر بھاگنے لگا، ایرپورٹ ٹرمینل بلڈنگ میں بغیر کسی اجازت نامے کے داخل ہونا سیکورٹی رسک ہے

نامعلوم شخص کے پاس شناختی کارڈ اور ایئرپورٹ انٹری پاس بھی نہیں تھا،مشکوک افراد فلائی بغداد کی پرواز کی امیگریشن کے دوران ایف آئی اے کائونٹر تک پہنچے.

پاکستان کی معروف اور سینیئر اداکارہ دردانہ بٹ انتقال کر گئیں ، وہ کئی دن سے وینٹی لیٹرپرتھیں، ان میں کورونا کی بھی تشخیص ہوئی تھی۔

تفصیلات کے مطابق پاکستان کی معروف اور سینیئر اداکارہ دردانہ بٹ عرف دودی کراچی میں انتقال کر گئیں، وہ کینسر کے عارضے میں مبتلا اورکئی دن سے وینٹی لیٹرپر تھیں جبکہ ان کو کورونا کی بھی تشخیص ہوئی تھی۔

آرٹس کونسل آف پاکستان کراچی کے صدر احمد شاہ نے دردانہ بٹ کے انتقال پر گہرے دکھ کا اظہار کرتے ہوئے کہا ہے کہ دردانہ بٹ آرٹس کونسل آف پاکستان کراچی کی معزز ممبر تھیں، ان سے میرا بہت پرانا تعلق تھا۔

احمد شاہ کا کہنا تھا کہ آرٹس کونسل کراچی کی گورننگ باڈی گہرے دکھ میں ہے، دعا ہے کہ اللہ دردانہ بٹ کے درجات بلند کرے آمین۔

واضح رہے کہ 83 سالہ دردانہ بٹ نے اداکاری کا آغاز 70 کی دہائی میں پاکستان ٹیلی ویژن کے مشہور کامیڈی ڈرامہ ’ففٹی ففٹی‘ میں معین اختر کے ساتھ کیا تھا۔

دردانہ بٹ نے مشہور ڈرامے ’ڈگ ڈوگی‘ میں اشرف کی ماں کا کردار نبھایا تھا جب کہ ڈرامہ رسوائی میں امّاں کا کرداد نبھایا تھا۔

سینئر اداکارہ کو ان کی بہترین صلاحیتوں کے اعتراف میں سال 1985 میں پی ٹی وی کی جانب سے بہترین اداکارہ کا ایوارڈ بھی دیا جا چکا ہے۔

ساحل پر پھنسے جہاز کو نکالنے والی کرین بردار بوٹ کے بھی اینکرز خراب ہوگئے اور کرین بردار بوٹ بھی ساحل پرپھنس گئی۔

تفصیلات کے مطابق کراچی کے ساحل پر پھنسے جہاز کا ریسکیو آپریشن سلجھنے کے بجائے مزید الجھ گیا، جہازکو نکالنے والی کرین بردار بوٹ کے بھی اینکرز خراب ہوگئے اور کرین بردار بوٹ بھی پھنسےہوئے جہاز کی طرح ساحل پرپھنس گئی۔

جہازنکالنے کے لیے کل ہونے والا آپریشن بھی خطرے میں پڑ گیا، ریسکیوذرائع کا کہنا ہے کہ جہازسے قبل کرین بردار بوٹ کوساحل سےنکالنا ہوگا.

آج جہاز کے ریسکیوآپریشن سے قبل کرین بارج کو ریسکیو کیا جائے گا، کرین بارج کے لیے ریسکیوآپریشن آج شروع ہوگا۔

گذشتہ روز متعلقہ ٹیم کو آپریشن کے دوسرے روز بھی ناکامی کا سامنا کرنا پڑا تھا ، جس کے بعد حکام نے آپریشن ملتوی کردیا گیا تھا.

حکام کا کہنا تھا کہ کرین بردار بوٹ میں تکنیکی خرابی کی وجہ سے لنگر ڈراپ نہیں ہوپایا، کرین بردار کشتی کو 400میٹر قریب لاکر جہاز سے رسہ باندھنے کی کوشش کی گئی۔

حکام نے بتایا کہ اینکر ڈالنے والی ٹگ بوٹ جہاز سے600میٹر تک قریب پہنچ سکی، اینکر اور دیگر چیزیں وقت پر ہوئیں تو کل12بجے آپریشن دوبارہ شروع کریں گے۔

خیال رہے کہ وزارتِ جہاز رانی نے کراچی کے ساحل پر پھنسنے والے نجی کمپنی کے مال بردار جہاز ہینگ ٹانگ 77 کو ناکارہ قرار دیتے ہوئے قبضے میں لے لیا ہے۔

اسی ضمن میں وفاقی وزیر بحری امور علی زیدی نے اپنے ٹوئٹر پیغام میں کہا تھا کہ جہاز کو پورٹ اسٹیٹ رول کے تحت تحویل میں لیا گیا۔

یوم آزادی کے موقع پر تخریب کاری کے خدشے کے پیش نظر کراچی سمیت سندھ بھر میں 13 اور 14 اگست کو موٹر سائیکل کی ڈبل سواری پر پابندی عائد کر دی گئی ہے۔

حکومت سندھ کی جانب سے جاری اعلامیے کے مطابق سندھ رینجرز کی جانب سے بتایا گیا ہے کہ یوم آزادی کے موقع پر نکالی جانے والی ریلیوں کو دشمن ایجنسیز یا تخریب کار عناصر کی جانب سے ٹارگٹ کیا جا سکتا ہے اس لیے انہوں نے صوبے میں ڈبل سواری پر پابندی کی درخواست کی ہے۔

محکمہ داخلہ سندھ کی جانب سے جاری نوٹیفکیشن کے مطابق خواتین، بزرگ شہری، صحافی، معذور افراد، 12 سال سے کم عمر بچے، قانون نافذ کرنے والے اداروں کے اہلکار، نجی سکیورٹی گارڈز اور ضروری سروس ملازمین ڈبل سواری پر پابندی سے مستثنیٰ ہوں گے۔

محکمہ داخلہ سندھ کی جانب سے ڈبل سواری پر پابندی کے حوالے سے جاری اعلامیہ محکمہ داخلہ سندھ کی جانب سے ڈبل سواری پر پابندی کے حوالے سے جاری اعلامیہ جاری اعلامیے میں ڈبل سواری پر پابندی کی خلاف ورزی کرنے والوں کے خلاف متعلقہ ایس ایچ او کو دفعہ 144 کے تحت کارروائی کرنے کی ہدایت کی گئی ہے

امیر جماعت اسلامی کراچی حافظ نعیم الرحمن نے کہا کہ جماعت اسلامی کراچی کے عوام کی امیدوں کا محورومرکز بن گئی ہے۔صرف جماعت اسلامی ہی واحد جماعت ہے جو تین کروڑ سے زائد عوام کے جائز اور قانونی حقوق کے حصول اور شہر کے دیرینہ مسائل کے حل کے لیے موثر آواز اُٹھا رہی ہے اور جدو جہد کر رہی ہے۔
کنٹونمنٹ بورڈ کے انتخابات میں عوام کی جانب سے بھرپور پذیرائی سے حوصلہ مل رہا ہے۔کنٹونمنٹ بورڈ کے انتخابات میں کامیابی حاصل کریں گے ۔عوام کو دوست دشمن کی تمیز ہوچکی ہے۔کارکنان رابطہ عوام مہم کوتیز کریں۔کنٹونمنٹ بورڈ کے بعد بلدیاتی انتخابات کے لیے بھی تیاریاں شروع کردیں ۔ان خیالات کا اظہار انہوں نے ضلع کورنگی کے ہرسطح کے ناظمین کے اجتماع سے اپنے خصوصی خطاب میں کیا۔
اجتماع سے امیر ضلع کورنگی عبدالجمیل خان،نائب امیر سید اقبال سعید،سیکریٹری عبدالحفیظ ،پبلک ایڈ کمیٹی کے صدرمحمد شفیق نے بھی خطاب کیا ،جبکہ ناظمین شعبہ جات اور ناظمین علاقہ جات نے اپنی اپنی ششماہی رپورٹس پیش کی۔حافظ نعیم الرحمن نے کہا کہ جماعت اسلامی ایک نظریاتی جماعت اور اقامت ِ دین کی جدو جہد کی تحریک ہے ، جماعت اسلامی نے کراچی کے عوام کی ہمیشہ بلاتفریق رنگ ونسل خدمت کی ہے اورہم کراچی کے عوام کے بنیادی مسائل کے حل اور آئینی و قانونی حقوق کے حصول کی جدو جہد میں مصروف ہیں ۔
پیپلز پارٹی اور ایم کیو ایم دونوں نے مل کر شہر کو لوٹا اور اسے تباہ و برباد کیا ہے۔پی ٹی آئی نے بھی کراچی کے لیے عملاً کچھ نہیں کیا صرف زبانی جمع خرچ اور دعوئوں اور وعدوں سے اہل کراچی کو دھوکہ دیا جا رہا ہے ۔انہوں نے کہا کہ ناظمین جماعت اسلامی کی جدو جہد کا ستون ہیں اور ہمارا پورا اسٹریکچرناظمین کے ہی مرہون منت ہے ایک موثر اور فعال ناظم ہی بہتر نتائج دے سکتا ہے۔
انہوں نے کہا کہ کنٹونمنٹ بورڈ کے انتخابات کے سلسلے میں مختلف علاقوں میں انتخابی سرگرمیاں تیزی کے ساتھ جاری ہیں ، ہماری کوشش ہے کہ عوام سے زیادہ سے زیادہ رابطہ کرین اور ان کے بنیادی مسائل ترجیحی بنیادوں پر حل کرانے کی کوششیں کریں ۔

کراچی والوں کا دہائیوں کا انتظار ختم ہوا، شہر قائد کا پہلا ماس ٹرانزٹ منصوبہ افتتاح کیلئے تیار، گرین لائن منصوبے کی بسیں پاکستان کیلئے روانہ کر دی گئیں۔ تفصیلات کے مطابق گورنر سندھ عمران اسماعیل کی جانب سے ملک کے سب سے بڑے شہر کراچی کے شہریوں کو بڑی خوشخبری سنائی گئی ہے۔

سماجی رابطوں کی ویب سائٹ ٹوئٹر پر جاری پیغام میں گورنر سندھ عمران اسماعیل نے بتایا کہ گرین لائن منصوبے کی بسیں چین کی بندرگاہ تیانجن کی جانب روانہ ہو گئی ہیں۔ دو بڑے بحری جہازوں کے ذریعے 80 بسیں پاکستان بھیجی جائیں گی۔

یہ بحری جہاز تیانجن بندرگاہ سے رواں ماہ اگست کے وسط تک روانہ ہو جائیں گے اور امید ہے کہ بسیں بہت جلد کراچی پورٹ پہنچ جائیں گی۔

واضح رہے کہ وفاقی حکومت کے مطابق گرین لائن منصوبے کا اکتوبر کے ماہ میں افتتاح کر دیا جائے گا۔ جبکہ وفاقی حکومت کی جانب سے رواں مالی سال کے بجٹ میں کراچی ٹرانسفارمیشن پلان کے لیے739 ارب روپے مختص کیے گئے ہیں۔ وفاقی حکومت کے 98 ارب جبکہ سرکاری و نجی شعبے کے اشتراک سے 509 ارب شامل ہوں گے۔ ۔رواں مالی سال میں گرین لائن بس کراچی کیلئے 2ارب 9 کروڑ، سرکلرریلوے کیلئے ایک ارب 36 کروڑ اور کے فور کراچی کیلئے15ارب روپے مختص کیے گئے ہیں۔ یہاں یاد رہے کہ گرین لائن منصوبہ 6 سال کے طویل عرصے میں مکمل ہو گا۔ وفاقی اور سندھ حکومت کے اختلافات کے باعث منصوبہ غیر معمولی تاخیر کا شکار ہوا۔