Category: لاہور

شوکت خانم ہسپتال کے چیف میڈیکل آفیسر ڈاکٹر عاصم یوسف نے سابق وزیراعظم عمران خان کی آنکھ کے علاج کے لیے تین ماہر امراض ریٹینا کے نام تجویز کیے، لیکن ان میں سے کسی ڈاکٹر کو بھی اڈیالہ جیل جانے کی اجازت نہ دی گئی۔
ذرائع کے مطابق، ڈاکٹر عاصم یوسف نے یہ نام سلمان اکرم راجہ کو فراہم کیے تھے، جن میں الشفا انٹرنیشنل ہسپتال کے ڈاکٹر عامر اعوان، ڈاکٹر مظہر اسحاق اور ڈاکٹر وقار مظہر شامل تھے۔ اس کے بجائے الشفا ہسپتال کے ڈاکٹر ندیم قریشی اور پمز کے ڈاکٹر عارف کو جیل بھیجا گیا ہے۔
‎ ڈاکٹر عاصم یوسف اور ڈاکٹر خرم مرزا کو بھی اڈیالہ جانے کی اجازت نہ ملی، اس لیے الشفا کا ڈاکٹر متبادل کے طور پر بھیجا گیا۔ ذرائع نے بتایا کہ عمران خان کو پہلا ٹیکہ 25 جنوری کو لگ چکا ہے، جبکہ دوسرا ٹیکہ 25 فروری کو لگنا ہے۔ ابھی یہ طے نہیں ہوا کہ دوسرا ٹیکہ جیل میں لگے گا یا اسپتال میں۔

وزیراعلیٰ پنجاب مریم نواز کے لیے نیا طیارہ خرید لیا گیا،گلف اسٹریم جی 500 طیارے کی قیمت 10 ارب روپے کے قریب بتائی جارہی ہے۔

ذرائع کے مطابق طیارے کا نمبر این 144 ایس اور قیمت تقریباً 10 ارب روپے ہے، اس طیارے کا پاکستان میں سفر کا ریکارڈ بھی ہے، یہ طیارہ ابھی پاکستان میں رجسٹرڈ نہیں ہوا، یہ امریکی رجسٹریشن پر ہے،طیارے کی خریداری پر پنجاب حکومت کو سوشل میڈیا پر تنقید کا سامنا ہے، صارفین کا کہنا ہے کہ عوام کے پیسے عوام پر لگائے جائیں، قومی خزانے سے لگژری طیارہ خریدنا زیب نہیں دیتا۔

دوسری جانب وزیر اطلاعات پنجاب عظمیٰ بخاری کا مؤقف ہےکہ ائیر پنجاب کے لیے ایک فلیٹ بنانا ہے جس میں ہرطرح کے جہاز ہوں گے، مختلف جہاز خرید رہے ہیں کچھ لیزپرلیں گے، یہ اسی سلسلےکی کڑی ہے، جیسے ہی معاملات حتمی شکل اختیار کریں گے آپ کو بتا دیں گے، مفتاح اسماعیل کو ادھوری بات کرنےکا بہت شوق ہے، ہم بہت ساری ٹیکس چوریوں سے متعلق بات کریں گے تو یہ سیاسی انتقام ہوجائےگا۔

دوسری جانب پنجاب ائیر لائن کی پہلی پرواز اپریل سے شروع ہوگی جس کے لیے پہلے مرحلے میں7 جہاز خریدے جا رہے ہیں،ذرائع پنجاب حکومت کے مطابق پنجاب ائیرلائن صوبے کی اپنی ائیرلائن ہوگی۔ پہلے مرحلے میں 2 سال تک صرف اندرون ملک پروازیں چلائی جائیں گی، پنجاب ائیرلائن 2 سال بعد انٹرنیشنل فلائٹس بھی شروع کرےگی۔نجی ٹی وی کے مطابق وزیراعلیٰ پنجاب کا موجودہ ہیلی کاپٹر بھی پنجاب ائیرلائن کا حصہ بنا دیا جائےگا، وزیراعلیٰ سرکاری سفر کے لیے پنجاب ائیرلائن کے جہاز استعمال کریں گی، ان کے لیے الگ سے خصوصی جہاز نہیں خریدا جائےگا۔ذرائع کے مطابق قومی خزانے پر اضافی بوجھ نہ ڈالنےکا فیصلہ کیا گیا ہے، موجودہ اور نئے جہازوں کو مکمل طور پر منافع کے حصول کے لیے استعمال کیا جائےگا، نئے جہاز مسافروں اور وزیراعلیٰ دونوں کے استعمال میں آئیں گے، وزیراعلیٰ پنجاب ائیر لائن کا جہاز استعمال کریں گی تو اس کا کرایہ دیا جائےگا۔

سماجی رابطے کی ویب سائٹ ایکس پر ایک صارف کا کہنا ہے کہ پاکستان اور پنجاب کی “اونچی اُڑان” پر سوالات کھڑے ہو گئے ،قومی ایئرلائن Pakistan International Airlines جس کے پاس 18 آپریشنل اور 30 قابلِ مرمت جہاز تھے، اسے تقریباً 10 ارب میں فروخت کر دیا گیا۔دوسری طرف 19 نشستوں والا ایک طیارہ 11 ارب میں خرید لیا گیا۔قومی ایئرلائن ختم کرکے صوبائی ایئرلائن بنانے کی دانشمندی کیا ہے؟ عوام جواب چاہتے ہیں۔

ایک اور صارف کا کہنا تھا کہ مسلم لیگ ن کی پنجاب حکومت کی طرف سے یہ موقف پیش کیا جا رہا ہے کہ مبینہ گلف اسٹریم طیارہ “ایئر پنجاب” کے فلیٹ کے لیےُ لیاجا رہا ہے، مگر بنیادی سوال یہ ہے کہ گلف اسٹریم کوئی کمرشل پسنجر جہاز نہیں بلکہ ایک لگژری پرائیویٹ جیٹ ہے جو دنیا بھر میں وی آئی پی موومنٹ کے لیے استعمال ہوتا ہے۔ ایسے میں یہ تاثر پیدا ہونا بالکل فطری ہے کہ یہ سہولت موجودہ یا آئندہ وزرائے اعلیٰ کے استعمال کے لیے ہوگی۔ اس پر بھونڈی صفائیاں دینے کے بجائے سچ واضح کرنا چاہیے کیونکہ مسئلہ صرف ایک جہاز کا نہیں بلکہ ترجیحات کا ہے۔

ایک ایسا صوبہ جہاں کروڑوں لوگ غربت کی لکیر سے نیچے زندگی گزار رہے ہوں، ہزاروں فیکٹریاں بند اور لاکھوں افراد بے روزگار ہوں، جہاں نوجوان روزگار کے لیے دربدر ہوں اور کاروباری سرگرمیاں سکڑتی جا رہی ہوں، وہاں سرکاری وسائل کا رخ روزگار، صنعت اور ریونیو جنریشن کی طرف ہونا چاہیے، نہ کہ نمائشی منصوبوں کی طرف۔ یہ پیسہ آخر عوام کا ہے، کوئی ذاتی جاگیر نہیں کہ جس پر دل چاہے تجربات کیے جائیں۔مزید تضاد یہ ہے کہ وفاقی سطح پر یہی جماعت نجکاری کا درس دیتی ہے، کہتی ہے حکومت کا کام کاروبار چلانا نہیں بلکہ ریگولیٹ کرنا ہے، پرائیویٹ سیکٹر کو آگے آنا چاہیے۔ مگر دوسری طرف صوبائی حکومت خود ایئرلائن بنانے نکل پڑی ہے۔ ایک ہی جماعت کے اندر پالیسی کا یہ تضاد آخر کس منطق کے تحت ہے؟ ایک طرف “پرائیویٹائزیشن”، دوسری طرف “سرکاری بزنس ایکسپینشن” عوام کو آخر کون سا بیانیہ ماننا چاہیے؟

اگر واقعی حکومت اپنی کمرشل اہلیت اور گورننس ماڈل ثابت کرنا چاہتی ہے تو میدان کھلا ہے۔ پنجاب کی ڈسکوز نجکاری کے عمل میں جا رہی ہیں انہیں سنبھال کر دکھائیں، اپنے نظم و نسق سے چلا کر عوام اور صنعت دونوں کو ریلیف دیں، لائن لاسز کم کریں، بجلی سستی کریں، ریکوری بہتر کریں۔ اصل امتحان وہ ہے جہاں عوام کو براہِ راست فائدہ پہنچے۔

حقیقت یہ بھی ہے کہ پاکستان میں فضائی سفر عام آدمی کی ضرورت نہیں بلکہ ایک محدود طبقے کی سہولت ہے۔ اندازاً صرف دو فیصد آبادی سالانہ فضائی سفر کرتی ہے، جبکہ بجلی سو فیصد پاکستانی استعمال کرتے ہیں۔ ہر گھر، ہر دکان، ہر اسپتال، ہر صنعت اور پوری معیشت بجلی پر چلتی ہے۔ اب فیصلہ خود کریں کہ زیادہ اہم کیا ہے ایک ایئرلائن یا بجلی کا نظام؟ اگر کمرشل کاروبار کرنے کا واقعی شوق ہے تو اس شعبے میں آئیں جہاں سو فیصد عوام کو ریلیف ملے، جہاں گورننس بہتر ہو تو نرخ کم ہوں، سروس بہتر ہو اور معیشت مضبوط ہو۔ورنہ یہ سب کچھ محض نمائشی منصوبے لگتے ہیں جو وقتی سرخی تو بنا سکتے ہیں مگر عوام کی زندگی نہیں بدل سکتے۔ قوم اب نعروں سے نہیں، ترجیحات سے فیصلے کرے۔

‎رمضان المبارک کی آمد کے پیش نظر پنجاب حکومت نے صوبے بھر کے اسکولوں کے اوقات کار میں تبدیلی کا اعلان کر دیا ہے تاکہ روزہ رکھنے والے طلبہ اور اساتذہ کو سہولت فراہم کی جا سکے۔
‎اسکول ایجوکیشن ڈپارٹمنٹ کی جانب سے 16 فروری کو جاری نوٹیفیکیشن کے مطابق تمام سرکاری اور نجی تعلیمی ادارے رمضان کے دوران نئے شیڈول کے تحت کام کریں گے۔ حکام کا کہنا ہے کہ اوقات کار میں ردوبدل کا مقصد تعلیمی سرگرمیوں کو جاری رکھتے ہوئے عبادات کے لیے مناسب وقت فراہم کرنا ہے۔
‎سنگل شفٹ اسکولوں کے اوقات
‎پیر سے جمعرات تک اسکول صبح 8:30 بجے کھلیں گے اور دوپہر 1:00 بجے بند ہوں گے، جبکہ جمعہ کے روز تعلیمی سرگرمیاں صبح 8:30 بجے سے دوپہر 12:30 بجے تک جاری رہیں گی۔
‎ڈبل شفٹ اسکولوں کا شیڈول
‎ڈبل شفٹ اسکولوں میں مارننگ شفٹ پیر تا جمعرات صبح 8:30 بجے سے دوپہر 12:30 بجے تک ہوگی۔ ایوننگ شفٹ دوپہر 1:00 بجے شروع ہو کر شام 4:00 بجے تک جاری رہے گی۔
‎جمعہ کے روز ڈبل شفٹ اسکولوں کی کلاسز دوپہر 2:30 بجے سے شام 5:00 بجے تک منعقد ہوں گی۔
‎نوٹیفیکیشن میں واضح کیا گیا ہے کہ لڑکیوں کے اسکول مقررہ اوقات سے 15 منٹ پہلے کھلیں گے اور 15 منٹ پہلے ہی بند کیے جائیں گے۔
‎حکومت کے مطابق یہ شیڈول پورے رمضان المبارک کے دوران نافذ رہے گا۔ پاکستان میں رمضان 2026 کا آغاز 19 فروری کو متوقع ہے، تاہم حتمی اعلان چاند نظر آنے کے بعد کیا جائے گا۔ رمضان کے دوران مسلمان سحر سے افطار تک روزہ رکھتے ہیں اور عبادات، تلاوتِ قرآن اور خیرات میں اضافہ کرتے ہیں۔

لاہور جمخانہ کلب کے سالانہ انتخابات میں ڈاکٹر علی رزاق نے تاریخی کامیابی حاصل کی اور مسلسل چوتھی بار سب سے زیادہ ووٹ حاصل کرنے والے امیدوار بن گئے، جو کلب کی انتخابی تاریخ میں ایک قابل ذکر سنگ میل ہے۔ اگرچہ 2026 کے حتمی نتائج ابھی سرکاری طور پر جاری نہیں کیے گئے، پچھلے انتخابات کے ریکارڈ سے علی رزاق کی کلب ممبران میں مضبوط مقبولیت کا اندازہ ہوتا ہے۔
گزشتہ سال 2025 کے انتخابات میں علی رزاق نے 1,923 ووٹ حاصل کیے تھے، جس میں انہوں نے سلمان صدیق اور واجد عزیز خان جیسے دیگر معروف امیدواروں کو پیچھے چھوڑا۔ اس مقابلے میں کل 3,015 بیلٹ ڈالے گئے اور 41 ووٹ ناقابل قبول قرار پائے۔
‎اگرچہ علی رزاق نے سب سے زیادہ ووٹ حاصل کیے، ان کے آزاد گروپ نے 12 رکن پر مشتمل ایگزیکٹو بورڈ میں سے صرف دو نشستیں حاصل کیں، جبکہ سلمان-مصباح پینل نے اکثریت حاصل کی۔
‎کلب کے اندرونی ذرائع کے مطابق، علی رزاق کی مسلسل کامیابی ممبران کے اعتماد اور ذاتی مقبولیت کی عکاسی کرتی ہے۔ گزشتہ انتخابات میں ان کے مضبوط ووٹ ٹالیز نے ان کی کلب کمیونٹی میں اثر و رسوخ اور پہچان کو واضح طور پر ظاہر کیا۔
‎14 فروری 2026 کو منعقد ہونے والے انتخابات میں متعدد پینلز حصہ لے رہے تھے، جن میں ریفارمرز گروپ، روایتی سلمان-مصباح پینل اور علی رزاق کا گروپ شامل تھے۔ امیدواروں نے شفافیت، گورننس اصلاحات، تفریحی سہولیات اور خاندانوں کے لیے بہتر انتظامات کے وعدوں پر مبنی مہم چلائی۔
‎جمخانہ کی روایت کے مطابق، علی رزاق کی مسلسل سب سے زیادہ ووٹ حاصل کرنے کی کارکردگی ممبران کی شمولیت اور کلب میں مقابلہ جاتی سیاست کو اجاگر کرتی ہے۔ کلب انتخابی کمیشن کی جانب سے 2026 کے حتمی نتائج آنے والے دنوں میں جاری کیے جائیں گے، جو اگلے مدت کے لیے نشستوں کی تقسیم اور قیادت کی تفصیلات واضح کریں گے۔

بانی و چیئرمین پاکستان تحریک انصاف عمران خان کے جیل میں علاج اور صحت سے متعلق ابتدائی رپورٹ ہوم ڈپارٹمنٹ پنجاب کو بھیج دی گئی ہے۔
جیل ذرائع کے مطابق بھیجی گئی رپورٹ میں عمران خان کے بلڈ پریشر، شوگر لیول اور کولیسٹرول کا مکمل چارٹ شامل ہے جبکہ بانی پی ٹی آئی کی آنکھوں سے متعلق رپورٹ بھی وزارت داخلہ پنجاب کو بھجوائی گئی ہے۔
‎ذرائع نے بتایا کہ عمران خان کی کنسلٹنسی رپورٹس اور میڈیکل اسٹاف کی تفصیلات بھی ہوم ڈپارٹمنٹ کو فراہم کی گئی ہیں۔ اس کے علاوہ بانی پی ٹی آئی کو کس ڈاکٹر نے چیک کیا، اس سے متعلق تمام تفصیلات پورٹ میں درج ہیں۔
‎جیل ذرائع کے مطابق آن ڈیوٹی ڈاکٹرز روزانہ تین مرتبہ عمران خان کا طبی معائنہ کرتے ہیں اور اس کا ریکارڈ باقاعدگی سے مرتب کیا جاتا ہے۔
‎واضح رہے کہ ہوم ڈپارٹمنٹ پنجاب نے اڈیالہ جیل حکام سے عمران خان کے میڈیکل چیک اپ سے متعلق مفصل رپورٹ طلب کی تھی۔