Category: لاہور

اسلام آباد: چیئرمین پاکستان علماء کونسل علامہ طاہر محمود اشرفی نے خطبۂ جمعہ میں پاکستان کے عالمی امن کے لیے کردار کو سراہتے ہوئے عسکری اور سول قیادت کو زبردست خراجِ تحسین پیش کیا۔

انہوں نے کہا کہ اللہ تعالیٰ نے پاکستان کو پہلے میدانِ جنگ میں عزت، وقار اور کامیابی عطا کی اور آج سفارتکاری کے میدان میں بھی دنیا کو امن کی راہ دکھانے کا اعزاز بخشا ہے۔ ان کا کہنا تھا کہ پاکستان نے خطے اور عالمی سطح پر امن و استحکام کے فروغ کے لیے مؤثر کردار ادا کیا ہے جسے دنیا بھر میں سراہا جا رہا ہے۔علامہ طاہر اشرفی نے کہا کہ یہ کامیابی فیلڈ مارشل سید عاصم منیر کی مدبرانہ قیادت، وزیراعظم پاکستان کی مسلسل کاوشوں اور قومی اداروں کے باہمی تعاون کا نتیجہ ہے۔ انہوں نے کہا کہ قومی قیادت نے دانشمندانہ حکمت عملی کے ذریعے پاکستان کا مثبت تشخص اجاگر کیا اور امن کے قیام کے لیے اہم کردار ادا کیا۔انہوں نے برادر اسلامی اور دوست ممالک کا بھی شکریہ ادا کرتے ہوئے کہا کہ پاکستان کے دوست ممالک نے ملک پر اعتماد کا اظہار کیا اور امن کے قیام کی کوششوں میں مثبت اور تعمیری کردار ادا کیا، جس پر پوری قوم ان کی شکر گزار ہے۔

علامہ طاہر اشرفی نے اس عزم کا اظہار کیا کہ پاکستان مستقبل میں بھی عالمی امن، استحکام اور بین الاقوامی تعاون کے فروغ کے لیے اپنا مثبت کردار جاری رکھے گا۔

لاہور: پاکستان ریلوے میں بھرتیوں کے حوالے سے سوشل میڈیا پر ایک جعلی اور گمراہ کن اشتہار وائرل ہونے کا انکشاف ہوا ہے، جس کے بعد شہریوں میں تشویش پھیل گئی اور متعدد افراد نے ریلوے حکام سے رابطہ کر کے بھرتیوں کے بارے میں معلومات حاصل کرنے کی کوشش کی۔

ریلوے حکام کے مطابق سوشل میڈیا پر گردش کرنے والا اشتہار مکمل طور پر بوگس ہے اور اس کا پاکستان ریلوے سے کوئی تعلق نہیں۔ حکام کا کہنا ہے کہ وائرل اشتہار سندھی زبان میں جاری کیا گیا تھا جس میں جونیئر انجینئر کی آسامیوں کا ذکر کیا گیا۔پاکستان ریلوے نے وضاحت کرتے ہوئے کہا ہے کہ ادارے میں جونیئر انجینئر کے نام سے کوئی سیٹ موجود نہیں، لہٰذا اشتہار میں دی گئی معلومات حقائق کے منافی ہیں۔ریلوے انتظامیہ کا کہنا ہے کہ جعلی اشتہار کے باعث بڑی تعداد میں شہری بھرتیوں کے حوالے سے استفسارات کرتے رہے، جس سے غیر ضروری ابہام پیدا ہوا۔ حکام نے عوام سے اپیل کی ہے کہ وہ ملازمتوں سے متعلق معلومات صرف سرکاری ذرائع اور پاکستان ریلوے کی جانب سے جاری کردہ اعلانات سے ہی حاصل کریں۔

پاکستان ریلوے نے خبردار کیا ہے کہ سوشل میڈیا پر پھیلائی جانے والی غیر مصدقہ معلومات پر یقین نہ کیا جائے اور کسی بھی مشکوک اشتہار کی صورت میں متعلقہ ادارے سے تصدیق ضرور کی جائے۔

مرکزی مسلم لیگ کے صدر خالد مسعود سندھو نے ایران ،امریکہ کے درمیان معاہدے پر دستخط کا خیرمقدم کرتے ہوئے کہا ہے کہ دونوں ممالک کے درمیان مفاہمت کا عمل خطے میں پائیدار امن اور استحکام کے لیے حوصلہ افزا قدم ہے،فاتح پاکستان نے ثالثی کا کردار ادا کر کے دنیا کو پیغام امن دیا،فیلڈ مارشل سید عاصم منیر نےخطے میں امن کے لیے ذمہ دارانہ کردار ادا کیا،

خالد مسعود سندھو کا کہنا تھا کہ پاکستان ہمیشہ سے تنازعات کے حل کے لیے بات چیت، سفارتکاری اور باہمی احترام کی پالیسی کا حامی رہا ہے،خطے میں امن کے قیام کے لیے پاکستان کی مسلسل کوششیں قابلِ تحسین ہیں ،فیلڈ مارشل عاصم منیر نے قومی قیادت کے ساتھ مل کر علاقائی کشیدگی میں کمی اور مذاکراتی ماحول کو فروغ دینے کے لیے مؤثر کردار ادا کیا، پاکستان کی خارجہ پالیسی ہمیشہ امن، استحکام، علاقائی تعاون اور بین الاقوامی قوانین کے احترام پر مبنی رہی ہے، جبکہ طاقت کے استعمال کے بجائے سفارتی ذرائع کو ترجیح دینا وقت کی اہم ضرورت ہے، پاکستان نے ہر موقع پر ایک ذمہ دار ریاست ہونے کا ثبوت دیا ہے اور ملکی سلامتی، علاقائی امن اور عوامی فلاح کے لیے اپنی مثبت کاوشیں جاری رکھی ہیں،مرکزی مسلم لیگ خطے میں امن، استحکام، قومی خودمختاری اور عوامی خوشحالی کے اصولوں پر مبنی سیاست پر یقین رکھتی ہے اور پاکستان کو ترقی و استحکام کی راہ پر گامزن دیکھنا چاہتی ہے۔

لاہور ہائیکورٹ میں چکوال فائرنگ واقعہ پر جوڈیشل ایکٹوازم پینل کی ہنگامی درخواست دائرکر دی گئی

9 سالہ ہانیہ احمد کے قتل اور اہلِ خانہ کے زخمی ہونے پر عدالتی تحقیقات کی استدعا کی گئی،جوڈیشل ایکٹوازم پینل نے اسکاٹ لینڈ یارڈ کی معاونت سے تحقیقات کرانے کا مطالبہ کر دیا،چکوال واقعہ پولیس کی مبینہ اندھا دھند فائرنگ کا نتیجہ قراردیا گیا،درخوااست میں کہا گیا کہ سی سی ڈی کے خلاف 2025 سے اب تک 924 سے زائد ہلاکتوں کا ریکارڈ عدالت میں پیش کیا جائے،ہانیہ احمد کا قتل ایک الگ واقعہ نہیں بلکہ سنگین ادارہ جاتی مسئلے کی علامت ہے،سی سی ڈی کی کارروائیوں پر شفافیت اور احتساب کے فقدان کا الزام ہے،سپریم کورٹ یا ہائیکورٹ کے حاضر یا ریٹائرڈ جج کی سربراہی میں جوڈیشل کمیشن بنانے کی استدعا کی گئی،اسکاٹ لینڈ یارڈ کی فرانزک اور تکنیکی معاونت شامل کرنے کا مطالبہ کیا گیا،تمام ذمہ دار سی سی ڈی اہلکاروں کے خلاف فوری مقدمات درج کرنے کی درخواست کی گئی،سی سی ٹی وی فوٹیج، وائرلیس لاگز اور اسلحہ ریکارڈ محفوظ بنانے کی استدعا کی گئی،

محمد اظہر صدیق ایڈوکیٹ کا کہناتھا کہ ہانیہ احمد کے قتل کی غیر جانبدار تحقیقات ناگزیر ہیں،بچے کی ہلاکت کے بعد آزاد عدالتی تحقیقات ہی عوامی اعتماد بحال کر سکتی ہیں، سی سی ڈی کے لیے واضح اور انسانی حقوق سے ہم آہنگ قواعدِ استعمالِ طاقت مرتب کرنے کا مطالبہ کیا گیا،

اسلام آباد: محکمہ موسمیات نے ملک کے مختلف علاقوں میں تیز ہواؤں، آندھی، گرج چمک اور بارش کی پیشگوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔

محکمہ موسمیات کے مطابق وفاقی دارالحکومت اسلام آباد میں تیز ہواؤں، آندھی اور گرج چمک کے ساتھ بارش کا امکان ہے، جبکہ آزاد کشمیر اور گلگت بلتستان میں بھی مختلف مقامات پر بارش متوقع ہے۔ محکمہ موسمیات کا کہنا ہے کہ کشمیر کے بعض علاقوں میں موسلادھار بارش اور ژالہ باری بھی ہو سکتی ہے۔خیبرپختونخوا کے مختلف اضلاع میں آندھی اور گرج چمک کے ساتھ بارش کی توقع ظاہر کی گئی ہے، جبکہ بعض مقامات پر ژالہ باری کا بھی امکان ہے۔پنجاب میں لاہور، فیصل آباد، ملتان سمیت متعدد شہروں میں بارش اور آندھی کی پیشگوئی کی گئی ہے۔ محکمہ موسمیات کے مطابق صوبے کے بعض علاقوں میں موسلادھار بارش اور ژالہ باری بھی ہو سکتی ہے۔

دوسری جانب سندھ کے بیشتر اضلاع میں موسم گرم اور خشک رہنے کا امکان ہے، تاہم کشمور، سکھر، جیکب آباد، گھوٹکی اور لاڑکانہ میں آندھی اور بارش متوقع ہے۔ کراچی میں گرد آلود ہواؤں کے ساتھ ہلکی بارش کا امکان ظاہر کیا گیا ہے۔محکمہ موسمیات کے مطابق بلوچستان کے بیشتر علاقوں میں موسم گرم اور خشک رہے گا، تاہم مشرقی بلوچستان اور جنوبی پنجاب کے بعض علاقوں میں تیز اور موسلادھار بارش کا امکان ہے۔ ژوب، زیارت، سبی، خضدار، قلعہ سیف اللہ اور دیگر اضلاع میں بھی بارش متوقع ہے جبکہ بعض مقامات پر موسلادھار بارش ہو سکتی ہے۔

محکمہ موسمیات نے شہریوں کو آندھی، تیز ہواؤں اور ممکنہ ژالہ باری کے دوران غیر ضروری سفر سے گریز اور احتیاطی تدابیر اختیار کرنے کی ہدایت کی ہے۔

وزیراعلیٰ پنجاب مریم نواز شریف نے پبلک پرائیویٹ پارٹنرشپ کے تحت صوبے میں بڑے ترقیاتی اور صحت کے منصوبوں کی منظوری دیتے ہوئے نواز شریف میڈیکل سٹی میں سات جدید ہسپتالوں کے قیام کی منظوری دے دی ہے۔

مریم نواز شریف کی زیر صدارت ہونے والے اجلاس میں پبلک پرائیویٹ پارٹنرشپ سے متعلق مختلف امور کا تفصیلی جائزہ لیا گیا۔ اجلاس میں انسٹیٹیوٹ آف سرجیکل آرتھوپیڈک اینڈ میڈیکل ری ہیب اور چلڈرن ہسپتال فور کے قیام کی منظوری دی گئی۔ یہ منصوبے نواز شریف میڈیکل ڈسٹرکٹ کا حصہ ہوں گے۔اجلاس کو بریفنگ میں بتایا گیا کہ میڈیکل سٹی میں پلاسٹک ری کنسٹرکٹو سرجری اینڈ برن سینٹر، انسٹیٹیوٹ آف جینیٹک اینڈ بلڈ ڈیزیز، سنٹر آف ایکسی لینس نرسنگ اینڈ مڈوائفری، انسٹیٹیوٹ آف آپتھلمالوجی اور انفیکشن ڈیزیز ہسپتال بھی قائم کیے جائیں گے۔حکام کے مطابق نواز شریف میڈیکل سٹی میں مجموعی طور پر 1519 بستروں پر مشتمل سات بڑے ہسپتال مرحلہ وار تعمیر کیے جائیں گے، جس سے صوبے میں جدید طبی سہولیات کی فراہمی میں نمایاں بہتری آئے گی۔

اجلاس میں پنجاب پبلک پرائیویٹ پارٹنرشپ اتھارٹی کے 19 سال بعد مکمل طور پر فعال ہونے پر اطمینان کا اظہار کیا گیا۔ اس موقع پر پنجاب بھر میں 110 مجوزہ ترقیاتی منصوبوں میں پبلک پرائیویٹ پارٹنرشپ کے امکانات کا بھی تفصیلی جائزہ لیا گیا۔اجلاس میں پہلی مرتبہ پبلک پرائیویٹ پارٹنرشپ کے تحت طلبہ کے لیے ہاسٹل قائم کرنے کی تجویز پر غور کیا گیا، جبکہ سڑکوں، ٹرکنگ ٹرمینلز، بس اسٹینڈز، ماڈل بازاروں اور فوڈ اسٹریٹس کے منصوبوں کا بھی جائزہ لیا گیا۔

وزیراعلیٰ مریم نواز شریف نے کہا کہ پنجاب میں ترقی کا سفر ہر صورت جاری رکھا جائے گا اور پبلک پرائیویٹ پارٹنرشپ کا مقصد ترقیاتی عمل میں نجی شعبے کی مؤثر شمولیت کو یقینی بنانا ہے۔ انہوں نے کہا کہ پبلک پرائیویٹ پارٹنرشپ کے وژن کے تحت ترقیاتی منصوبوں کو بروقت اور مؤثر انداز میں پایۂ تکمیل تک پہنچایا جائے گا۔

لاہور: گزشتہ روز لاہور سمیت پنجاب کے مختلف علاقوں میں آندھی اور طوفانی بارش نے نظامِ زندگی متاثر کر دیا، جبکہ خراب موسم کے باعث فضائی آپریشن بھی متاثر ہوا اور پروازوں کی آمد و روانگی میں مشکلات کا سامنا کرنا پڑا۔

فیصل آباد میں گرج چمک کے ساتھ ہونے والی شدید بارش کے دوران ایک مکان کی چھت گر گئی، جس کے نتیجے میں 5 افراد زخمی ہوگئے۔ زخمیوں کو فوری طور پر قریبی اسپتال منتقل کر دیا گیا جہاں انہیں طبی امداد فراہم کی جا رہی ہے۔دوسری جانب کراچی کے مختلف علاقوں میں بوندا باندی سے موسم خوشگوار ہوگیا اور شہریوں نے گرمی کی شدت میں کمی پر اطمینان کا اظہار کیا۔

بہاولنگر میں بارش کے دوران دیوار گرنے سے 3 افراد زخمی ہوگئے، جبکہ چنیوٹ میں آسمانی بجلی گرنے کے باعث ایک شخص جاں بحق اور ایک زخمی ہوگیا۔طوفانی بارش اور تیز ہواؤں کے باعث راجن پور، بورے والا اور جہانیاں میں متعدد درخت جڑوں سے اُکھڑ گئے، جبکہ کئی علاقوں میں بجلی کے فیڈرز ٹرپ ہونے سے بجلی کی فراہمی بھی متاثر رہی۔ادھر پنجاب کے دیگر کئی شہروں میں بھی بارش ریکارڈ کی گئی، جبکہ ڈیرہ اسماعیل خان میں بارش کے باعث پیش آنے والے مختلف حادثات میں 4 افراد جان کی بازی ہار گئے۔محکمہ موسمیات نے آئندہ دنوں میں بھی ملک کے مختلف علاقوں میں بارشوں اور آندھی کے سلسلے کے جاری رہنے کی پیش گوئی کی ہے اور شہریوں کو احتیاطی تدابیر اختیار کرنے کی ہدایت کی ہے

معروف پاکستانی ٹک ٹاکر کاشف ضمیر کی معروف اسلامی اسکالر مولانا طارق جمیل سے ملاقات کی ویڈیو سوشل میڈیا پر تیزی سے وائرل ہو رہی ہے۔

کاشف ضمیر نے فوٹو اور ویڈیو شیئرنگ پلیٹ فارم انسٹاگرام پر مولانا طارق جمیل سے ملاقات کی ویڈیو شیئر کی، جس میں وہ مولانا طارق جمیل کو ایک قیمتی رولیکس گھڑی بطور تحفہ پیش کرتے نظر آتے ہیں۔وائرل ویڈیو میں دیکھا جا سکتا ہے کہ مولانا طارق جمیل نے کاشف ضمیر کی جانب سے پیش کیا گیا تحفہ خوش دلی اور خوش اسلوبی سے قبول کیا، جس کے بعد یہ ویڈیو سوشل میڈیا صارفین کی توجہ کا مرکز بن گئی۔

ویڈیو کے سامنے آنے کے بعد مختلف صارفین کی جانب سے دلچسپ تبصرے بھی کیے جا رہے ہیں۔ بعض صارفین نے اس ملاقات کو سراہا، جبکہ کچھ نے تحفے کی نوعیت اور اس کی قیمت کے حوالے سے اپنے خیالات کا اظہار کیا۔

یاد رہے کہ اس سے قبل بھی کاشف ضمیر کی بھارتی فلم انڈسٹری کے معروف اداکار سنجے دت کو مہنگے تحائف دینے کی ویڈیوز سوشل میڈیا پر وائرل ہو چکی ہیں، جن پر صارفین نے مختلف آراء کا اظہار کیا تھا۔

مظفرآباد: آزاد کشمیر قانون ساز اسمبلی کے انتخابات 2026 کے لیے پاکستان مسلم لیگ (ن) نے 37 انتخابی حلقوں سے اپنے امیدواروں کی فہرست جاری کر دی ہے۔

جاری کردہ فہرست کے مطابق ایل اے-02 چکسواری سے عظیم بخش چوہدری، ایل اے-03 میرپور سٹی سے چوہدری محمد سعید، ایل اے-04 کھڑی سے چوہدری رخسار احمد اور ایل اے-05 برنالہ سے وقار احمد نور کو پارٹی ٹکٹ جاری کیا گیا ہے۔اسی طرح ایل اے-06 سماہنی سے محمد رزاق چوہدری، ایل اے-07 بھمبر سٹی سے چوہدری طارق فاروق، ایل اے-09 نکیال سے عمیر نعیم اور ایل اے-10 کوٹلی سے فتح محمود الحسن مسلم لیگ (ن) کے امیدوار ہوں گے۔فہرست کے مطابق ایل اے-11 سہنسہ سے محمد آصف، ایل اے-12 چڑھوئی سے محمد ریاست خان، ایل اے-13 کھوئی رٹہ سے ایاز احمد اور ایل اے-14 دھیرکوٹ سے راجہ فیصل آزاد کو انتخابی میدان میں اتارا گیا ہے۔باغ، پونچھ اور حویلی کے حلقوں میں بھی پارٹی نے اپنے امیدواروں کا اعلان کر دیا ہے۔ ایل اے-15 وسطی باغ سے مشتاق احمد منہاس، ایل اے-16 شرقی باغ سے سردار میر اکبر خان، ایل اے-17 حویلی سے چوہدری محسن عزیز اور ایل اے-19 ہجیرہ سے سردار عامر الطاف خان مسلم لیگ (ن) کے امیدوار ہوں گے۔

مظفرآباد ڈویژن میں ایل اے-29 مظفرآباد سٹی سے سید افتخار علی گیلانی، ایل اے-30 ہٹیاں دوپٹہ سے ڈاکٹر مصطفیٰ بشیر عباسی، ایل اے-32 چکار سے سابق وزیراعظم آزاد کشمیر راجہ محمد فاروق حیدر خان اور ایل اے-33 لیپہ سے چوہدری محمد رشید کو پارٹی ٹکٹ جاری کیا گیا ہے۔مہاجرین جموں و کشمیر کی مخصوص نشستوں پر بھی امیدوار نامزد کیے گئے ہیں۔ ایل اے-34 جموں ون سے ناصر حسین ڈار، ایل اے-35 جموں ٹو سے چوہدری محمد اسماعیل، ایل اے-37 جموں فور سے مریم جاوید اور ایل اے-38 جموں فائیو سے ذیشان علی کو امیدوار نامزد کیا گیا ہے۔مسلم لیگ (ن) کی فہرست میں دیگر امیدواروں میں شاہ غلام قادر، نورین عارف، راجہ محمد صدیق، محمد نعیم خان، سید شوکت علی شاہ، محمد یاسین لون اور محمد احمد رضا قادری بھی شامل ہیں۔

پارٹی قیادت کا کہنا ہے کہ امیدواروں کے انتخاب کا عمل مکمل مشاورت اور حلقوں کی سیاسی صورتحال کا جائزہ لینے کے بعد مکمل کیا گیا ہے، جبکہ انتخابی مہم کے آغاز کے ساتھ ہی امیدوار عوامی رابطہ مہم کو مزید تیز کریں گے۔

‎لاہور: لاہور پولیس نے انٹیلی جنس بیسڈ آپریشن کے دوران جعلسازی کے ایک منظم نیٹ ورک کو بے نقاب کرتے ہوئے باپ بیٹوں سمیت چار ملزمان کو گرفتار کر لیا۔ پولیس کے مطابق ملزمان ایک فیکٹری نما سیٹ اپ قائم کر کے جعلی کرنسی، شناختی کارڈ، تعلیمی اسناد اور دیگر سرکاری دستاویزات تیار کرنے میں ملوث تھے۔
‎ترجمان ڈی آئی جی آپریشنز کے مطابق کارروائی خفیہ اطلاعات کی بنیاد پر کی گئی، جہاں پولیس نے جدید مشینری سے لیس ایک خفیہ مرکز پر چھاپہ مار کر ملزمان کو گرفتار کیا۔ گرفتار افراد میں گینگ کا مبینہ سرغنہ ریاض، اس کا بیٹا ساجن ریاض جبکہ عمران اور آصف شامل ہیں۔
‎پولیس حکام کا کہنا ہے کہ یہ گروہ نہ صرف جعلی پاکستانی کرنسی بلکہ غیر ملکی کرنسی بھی تیار کرتا تھا۔ ابتدائی تحقیقات کے مطابق تیار کی جانے والی جعلی کرنسی ملک کے مختلف شہروں کے علاوہ بیرون ملک بھی سپلائی کی جاتی تھی، جس سے اس نیٹ ورک کے دائرہ کار کا اندازہ لگایا جا سکتا ہے۔
‎چھاپے کے دوران ملزمان کے قبضے سے بڑی مقدار میں جعلی پاکستانی اور غیر ملکی کرنسی، جدید پرنٹنگ مشینیں، کمپیوٹر سسٹمز، خصوصی کیمیکل اور دیگر سامان برآمد کیا گیا، جو جعلی نوٹ اور دستاویزات کی تیاری میں استعمال کیا جاتا تھا۔
‎تفتیش کے دوران ایک اہم انکشاف بھی سامنے آیا کہ گینگ کے مبینہ سربراہ ریاض نے بیرون ملک سے جدید کلر میچنگ ٹیکنالوجی کی باقاعدہ تربیت حاصل کر رکھی تھی۔ پولیس کے مطابق اسی مہارت کی مدد سے جعلی کرنسی اور دستاویزات کو اصل کے قریب ترین شکل دی جاتی تھی تاکہ انہیں آسانی سے پہچانا نہ جا سکے۔
‎پولیس نے ملزمان کے خلاف تھانہ شاہدرہ ٹاؤن میں مقدمہ درج کر لیا ہے جبکہ مزید تفتیش جاری ہے۔ حکام کا کہنا ہے کہ تحقیقات کے دوران اس نیٹ ورک سے جڑے دیگر افراد اور ممکنہ سہولت کاروں کی بھی نشاندہی کی جا رہی ہے۔ پولیس کا مؤقف ہے کہ جعلسازی اور مالی جرائم میں ملوث عناصر کے خلاف کارروائیاں آئندہ بھی بلاامتیاز جاری رہیں گی تاکہ عوام کو ایسے جرائم سے محفوظ رکھا جا سکے۔