Category: لاہور

لاہور: پنجاب انسدادِ منشیات فورس (اے این ایف) نے صوبائی وزیر سوشل ویلفیئر سہیل شوکت بٹ کے ماموں کے گھر پر چھاپہ مارا ہے، جبکہ کارروائی کے دوران وزیر اور اہلکاروں کے درمیان تلخ کلامی اور ہاتھا پائی بھی ہوئی ہے،

ترجمان پنجاب انسدادِ منشیات فورس کے مطابق لاہور کے علاقے باٹاپور کے بھسین گاؤں میں ایک گھر پر چھاپہ مارا گیا، جو صوبائی وزیر سہیل شوکت بٹ کے ماموں کی رہائش گاہ بتایا جاتا ہے۔ترجمان کا کہنا ہے کہ چھاپے کے دوران سہیل شوکت بٹ بھی موقع پر پہنچ گئے اور انہوں نے اہلکاروں کے ساتھ تلخ کلامی کی، جبکہ ہاتھا پائی کا واقعہ بھی پیش آیا۔ ترجمان کے مطابق وزیر اہلکاروں سے یہ کہتے رہے کہ ’’تمہیں میری بہن کے گھر آنے کی جرات کیسے ہوئی۔‘‘اے این ایف کے ترجمان نے مزید بتایا کہ واقعے کے حوالے سے صوبائی وزیر سہیل شوکت بٹ سے مؤقف لینے کی کوشش کی گئی، تاہم ان کا موبائل فون بند ملا اور رابطہ نہ ہو سکا۔

کاؤنٹر نارکوٹکس فورس کو کارروائی خفیہ اطلاع تھی کہ علاقے میں منشیات کے بڑے کاروبار ہوتا ہے۔ چھاپے کے دوران 3 سے 4 افراد کو حراست میں لیا گیا ہے۔ تفتیش کا دائرہ وسیع کر دیا گیا،صوبائی وزیر سہیل شوکت بٹ کے ماموں زاد بھائیوں سمیت متعدد افراد کو تحویل میں لیا گیا۔کاؤنٹر نارکوٹکس فورس کی بھاری نفری نے علاقے کا گھیراؤ کرکے سرچ آپریشن مکمل کیا،بھسین گاؤں میں مبینہ منشیات نیٹ ورک کے خلاف کارروائی، حساس مقامات کی تلاشی بھی لی گئی، حراست میں لیے گئے افراد سے تفتیش جاری، مزید گرفتاریاں متوقع ہیں، کاؤنٹر نارکوٹکس فورس حکام نے کارروائی کو قانون کے مطابق قرار دیتے ہوئے تحقیقات شروع کر دیں

‎مسلم لیگ ن کے صدر اور سابق وزیراعظم نواز شریف نے مظفرآباد میں پیش آنے والے ہیلی کاپٹر حادثے پر گہرے دکھ اور افسوس کا اظہار کرتے ہوئے شہید ہونے والے اہلکاروں کو خراج عقیدت پیش کیا ہے۔
‎اپنے تعزیتی پیغام میں نواز شریف نے کہا کہ ہیلی کاپٹر سانحے میں تمام اہلکاروں کی شہادت کی خبر سن کر انہیں شدید رنج پہنچا ہے۔ انہوں نے کہا کہ یہ واقعہ پوری قوم کے لیے افسوسناک ہے اور اس مشکل گھڑی میں ان کی تمام تر ہمدردیاں شہداء کے اہل خانہ اور افواج پاکستان کے ساتھ ہیں۔
‎نواز شریف نے کہا کہ پاکستان کے بہادر سپوت مادر وطن کے دفاع اور قومی سلامتی کے لیے ہمیشہ اپنی جانوں کا نذرانہ پیش کرتے رہے ہیں۔ قوم اپنے ان جانباز محافظوں کی قربانیوں کو ہمیشہ عزت و احترام کی نگاہ سے دیکھتی ہے اور ان کی خدمات کو فراموش نہیں کیا جا سکتا۔
‎انہوں نے مزید کہا کہ وطن کی خاطر جانوں کا نذرانہ پیش کرنے والے یہ شہداء پوری قوم کا فخر ہیں۔ ان کی قربانیاں قومی تاریخ کا روشن باب ہیں اور آنے والی نسلوں کے لیے مثال کی حیثیت رکھتی ہیں۔
‎سابق وزیراعظم نے شہداء کے درجات کی بلندی کے لیے دعا کرتے ہوئے کہا کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور ان کے اہل خانہ کو یہ عظیم صدمہ برداشت کرنے کی ہمت اور صبر جمیل عطا کرے۔
‎نواز شریف نے اس سانحے میں شہید ہونے والے اہلکاروں کی خدمات کو سراہتے ہوئے کہا کہ قوم اپنے محافظوں کی قربانیوں کی قدر کرتی ہے اور ان کے اہل خانہ کے دکھ میں برابر کی شریک ہے۔ انہوں نے دعا کی کہ اللہ تعالیٰ پاکستان کو ہر قسم کی آفات اور سانحات سے محفوظ رکھے۔
‎یہ حادثہ قومی سطح پر غم و افسوس کا باعث بنا ہے اور مختلف سیاسی، سماجی اور سرکاری شخصیات کی جانب سے شہداء کے اہل خانہ سے تعزیت اور ہمدردی کا اظہار کیا جا رہا ہے۔

‎راولپنڈی کی اڈیالہ جیل میں قید بانی پاکستان تحریک انصاف سے ملاقات کے لیے آنے والے پارٹی رہنماؤں کو ملاقات کی اجازت نہ مل سکی، جس کے باعث وہ مقررہ وقت ختم ہونے کے بعد واپس روانہ ہوگئے۔
‎ذرائع کے مطابق پارٹی رہنما مقررہ شیڈول کے تحت بانی پی ٹی آئی سے ملاقات کے لیے اڈیالہ جیل پہنچے تھے، تاہم ملاقات کا وقت ختم ہونے تک انہیں اندر جانے کی اجازت نہیں دی گئی۔ جیل انتظامیہ کی جانب سے ملاقات کے مقررہ اوقات کے بعد ملاقات کا عمل ممکن نہ بنایا جا سکا، جس کے نتیجے میں تمام رہنماؤں کو بغیر ملاقات واپس جانا پڑا۔
‎ملاقات کے لیے جیل پہنچنے والوں میں رکن قومی اسمبلی میاں فیاض حسین، حسن جویا، قاضی عمران اور راجہ عثمان غضنفر شامل تھے۔ یہ تمام رہنما بانی پی ٹی آئی سے اہم سیاسی اور تنظیمی امور پر مشاورت کے لیے ملاقات کے خواہاں تھے۔ تاہم طے شدہ وقت گزر جانے کے باوجود ملاقات نہ ہو سکی۔
‎ذرائع کا کہنا ہے کہ ملاقات کے لیے نامزد رہنماؤں کی فہرست میں جام امان اللہ کا نام بھی شامل تھا لیکن وہ جیل نہیں پہنچ سکے۔ دیگر رہنماؤں نے کافی دیر تک انتظار کیا مگر ملاقات کے انتظامات مکمل نہ ہونے کے باعث انہیں واپس جانا پڑا۔
‎دوسری جانب پارٹی رہنماؤں کی واپسی کے بعد سیاسی حلقوں میں ملاقات نہ ہونے کی وجوہات پر مختلف تبصرے اور قیاس آرائیاں سامنے آ رہی ہیں۔ بعض حلقے انتظامی وجوہات کو ذمہ دار قرار دے رہے ہیں جبکہ کچھ مبصرین اس معاملے کو سیاسی تناظر میں بھی دیکھ رہے ہیں۔
‎تاہم اس معاملے پر جیل انتظامیہ یا متعلقہ سرکاری حکام کی جانب سے تاحال کوئی باضابطہ بیان جاری نہیں کیا گیا۔ اس لیے ملاقات نہ ہونے کی اصل وجہ کے بارے میں حتمی طور پر کچھ کہنا قبل از وقت ہوگا۔
‎سیاسی مبصرین کے مطابق بانی پی ٹی آئی سے پارٹی رہنماؤں کی ملاقاتیں موجودہ سیاسی صورتحال میں خاص اہمیت رکھتی ہیں کیونکہ پارٹی کی حکمت عملی، تنظیمی معاملات اور مستقبل کے سیاسی فیصلوں کے حوالے سے ایسی ملاقاتوں کو اہم سمجھا جاتا ہے۔ اب یہ دیکھنا ہوگا کہ آئندہ دنوں میں اس ملاقات کے لیے دوبارہ وقت مقرر کیا جاتا ہے یا نہیں۔

چیف سیکرٹری پنجاب کی رہائش گاہ کے لان پر مبینہ طور پر 22 کروڑ روپے خرچ کیے جانے کی خبر کے معاملے پر این سی سی آئی اے نے نجی ٹی وی کے رپورٹر، اینکر اور تجزیہ کار کو نوٹس جاری کر دیے ہیں۔

این سی سی آئی اے نے ہیڈ آف انویسٹی گیشن سیل، پبلک نیوز،انور حسین سمرا،سینئر اینکر پرسن، پبلک نیوز،سلمان حیدر،تجزیہ کارارشاد بھٹی کو نوٹس جاری کرتے ہوئے 10 جون کو طلب کیا ہے،

پبلک نیوز پر نشر ہونے والی رپورٹ میں دعویٰ کیا گیا تھا کہ چیف سیکرٹری پنجاب اور دیگر بیوروکریٹس کی رہائش گاہوں کی تزئین و آرائش پر کروڑوں روپے خرچ کیے گئے۔ اس خبر کے بعد پبلک نیوز نے چیف سیکرٹری پنجاب اور دیگر متعلقہ افسران سے غیر مشروط معذرت کرتے ہوئے مؤقف اختیار کیا کہ خبرنشر کرنے میں غلطی ہوئی۔

یاد رہے کہ پبلک نیوز پر خبر چلنے کے بعد ارشاد بھٹی نے اس پر وی لاگ کیا تھا ،

قبل ازیں حکومت پنجاب کی جانب سے ایکس پر ایک پوسٹ میں کہا گیا تھا کہ ویلاگر ارشاد بھٹی کی جانب سے چیف سیکرٹری پنجاب سے متعلق اپنے وی لاگ (Vlog) میں لگائے گئے الزامات یکسر بے بنیاد، من گھڑت اور جھوٹ پر مبنی ہیں۔عوام کو گمراہ کرنے اور بغیر تصدیق کے من گھڑت افواہیں پھیلانا قانوناً جرم ہے۔ پاکستان کے پیکا ایکٹ (**PECA**) اور قانونِ ہتکِ عزت (Defamation Law)** کے تحت کسی بھی شہری یا سرکاری عہدیدار کی ساکھ کو نقصان پہنچانے کے لیے جعلی خبریں پھیلانا اور بغیر ثبوت الزامات لگانا قانوناً جرم ہے۔ مرتکب شخص سخت سزا اور بھاری جرمانے کا سامنا کرتا ہے۔حکومتِ پنجاب اس پروپیگنڈے کو یکسر مسترد کرتی ہے۔ ارشاد بھٹی کو اب اپنے وی لاگ میں کیے گئے دعووں اور الزامات کو عدالت میں ثابت کرنا ہوگا، جس کے لیے حکومتِ پنجاب قانونی چارہ جوئی کا حق محفوظ رکھتی ہے۔

محرم الحرام کے پیش نظر سوشل میڈیا پر خصوصی سائبر پٹرولنگ کرتے ہوئے قابل اعتراض، اشتعال انگیز، مذہبی جذبات کو ٹھیس پہنچانے والا مواد شیئر کرنے پر اب تک 5 ہزار سے زائد اکاؤنٹس اور ویب سائٹس کو بلاک کیا جاچکا ہے۔

رپورٹ کے مطابق محرم الحرام کے پیش نظر سوشل میڈیا پر خصوصی سائبر پیٹرولنگ کی جارہی ہے، سائبر مانیٹرنگ ٹیمیں 24 گھنٹے متحرک، قانون شکنی پر فوری کارروائی ہوگی۔حکام کے مطابق قابل اعتراض، اشتعال انگیز، مذہبی جذبات کو ٹھیس پہنچانے والا مواد شیئر کرنا جرم ہے، سائبر پیٹرولنگ یونٹس نفرت انگیز تقاریر، جعلی اکاؤنٹس اور اشتعال انگیز پوسٹ کی نشاندہی کررہےہیں۔

دوسر ی جانب محرم الحرام کے دوران فول پروف سکیورٹی انتظامات کیلئے فوج اور رینجرز کے دستے طلب کر لئے گئے،محکمہ داخلہ پنجاب نے پاک فوج اور رینجرز کی خدمات طلب کرنے کیلئے وفاقی وزارت داخلہ کو مراسلہ لکھ دیا،قانون نافذ کرنے والے ادارے محرم الحرام کے پُرامن انعقاد کیلئے خدمات سر انجام دیں گے،مجموعی طور پر پنجاب کے 39 اضلاع میں فوج اور رینجرز کی 137 کمپنیوں کی خدمات طلب کی گئیں،پنجاب میں پاک فوج کی 61 اور رینجرز کی 76 کمپنیاں تعینات کرنے کیلئے مراسلہ لکھا گیا،پاک فوج اور رینجرز کے دستے مختلف اضلاع کی ضرورت کے مطابق یکم سے 11 محرم کے دوران خدمات سرانجام دیں گے،وفاقی وزارت داخلہ کو مراسلہ پنجاب پولیس کی درخواست پر سکیورٹی میں معاونت کیلئے لکھا گیا