Category: لاہور

دنیا میں خام تیل کا سیلاب آیا ہوا ہے۔ عالمی منڈی میں خام تیل کی قیمت بیس سال کی کم ترین سطح پر ہیں۔لیکن ایک سے زیادہ وجوہ کی بنا پر پاکستان اس صورتحال سے فائدہ اٹھانے کی پوزیشن میں نہیں۔ یوں بھی یہ ایک عارضی مندی ہے جو چند ماہ بعد ختم ہوجائے گی۔ گزشتہ ہفتہ تاریخ کا انوکھا واقعہ ہوا کہ امریکہ میں خام تیل کی قیمت چند روز تک منفی میں چلی گئی۔ یعنی تیل بیچنے والے کہہ رہے تھے کہ ہم سے رقم لے لو اور تیل لے جاؤ۔ وجہ یہ تھی کہ امریکہ میں جن بڑے بڑے تاجروں نے تیل کے سودے کیے ہوئے تھے ان کے پاس خریدا ہوا(بُک کیا ہوا) تیل لیکر رکھنے کی جگہ نہیں تھی کیونکہ پہلے سے ذخیرہ شدہ تیل فروخت نہیں ہوا تھا۔ کورونا وبا کی وجہ سے ہر طرح کی نقل و حمل‘ ٹرانسپورٹ بہت کم ہوگئی ہے۔ امریکہ میں تیل کااستعمال ساٹھ فیصد سے زیادہ کم ہوچکاہے۔ لاک ڈاؤن کی وجہ سے امریکہ کے اندر اور دنیا بھر میںسیاحت رُکی ہوئی ہے۔ ہوائی جہازکا سفر بہت کم ہوگیا ہے۔ ہوائی جہازوں کی صنعت میں تیل کی کھپت آدھی رہ گئی ہے۔جب امریکی تیل کی قیمت منفی میں گئی اس روز پاکستان میں بعض لوگوں میںخاصا جوش و خروش پیدا ہوگیا۔ خوش فہمی کا اظہار ہونے لگا کہ اب پاکستان میںبھی پیٹرولیم مصنوعات کی قیمتیںبہت نیچے چلی جائیںگی۔حالانکہ پاکستان میں تیل کی قیمتیں امریکی منڈی سے جڑی ہوئی نہیں ہیں۔

ہمارے ہاں تیل کی قیمتوں کا تعین لندن سے نکلنے والی تیل کی قیمت یعنی برینٹ سے ہوتا ہے۔ جس دن امریکی منڈی میں قیمت منفی میں تھی برینٹ میں خام تیل کی قیمت تقریبا ًستائیس ڈالر فی بیرل تھی ۔چند روز بعدہی ا مریکی تیل کا نرخ بھی واپس اُوپر آکر ساڑھے سولہ ڈالر فی بیرل پرپہنچ گیا۔ تاہم مجموعی طور پر یہ بات درست ہے کہ اس سال کے شروع کی نسبت عالمی منڈی میںخام تیل کی قیمتیں بہت گر گئی ہیں۔جنوری میںبرینٹ خام تیل کا نرخ ساٹھ ڈالر فی بیرل تھا۔اب یہ قیمت ایک تہائی رہ گئی ہے۔ گزشتہ ایک ماہ سے برینٹ کی قیمت اکیس سے اٹھایئس ڈالر کے درمیان اُوپر نیچے ہوتی رہتی ہے۔ پہلے تو تیل پیدا کرنے والے دو بڑے ممالک روس اور سعودی عرب کے درمیان تیل کی پیداوار کم کرنے پر اختلافات ہوئے جس سے تیل کی قیمت گرنا شروع ہوگئی۔ رہی سہی کسر کورونا وبا کے باعث ہونے والے لاک ڈاؤن نے پوری کردی۔ اس شدید بحران سے ڈر کر روس اور سعودی عرب نے اتفاق رائے بھی کرلیا ۔ اوپیک اور روس نے مجموعی طور پر خام تیل کی پیداوار میں کمی کا اعلان کردیا لیکن دنیا میں معاشی سرگرمی اتنی کم ہوگئی ‘تیل کا استعمال اتنا کم رہ گیا کہ قیمت فی الحال واپس اُوپر نہیں جاسکی۔ بظاہر اچھا لگ رہا ہے کہ پیٹرولیم مصنوعات کی قیمتیں بہت کم ہوگئی ہیں لیکن پاکستان جیسے ممالک اس کساد بازاری سے فائدہ اٹھانے کی پوزیشن میں نہیں کیونکہ تیل کی قیمت میں گراوٹ عارضی اور چند ماہ کے لیے ہے۔ ماہرین کا اندازہ ہے کہ تیل کی قیمتیں صرف پانچ چھ ماہ نیچے رہیں گی۔ یورپ اور امریکہ لاک ڈاؤن میں نرمی کی طرف جارہے ہیں۔ جوں جوں معاشی سرگرمیاں بڑھیں گی‘ تیل کا استعمال زیادہ ہوگا‘ اسکی طلب بڑھے گی تو اسکی قیمت میں بھی اضافہ ہوجائے گا۔ تخمینہ ہے کہ اس سال کے آخر تک یہ دوبارہ چالیس ڈالر فی بیرل تک بڑھ جائیں گی اور اگلے سال ساٹھ ڈالر تک ہو جائیں گی۔تیل پیدا کرنے والے تما م ممالک کا مفاد اسی میں ہے کہ تیل کی قیمت کم سے کم پچاس سے ساٹھ ڈالر فی بیرل کے درمیان رہیں۔موجودہ حالات میںپاکستان کو ایک فائدہ یہ ہوسکتا تھا کہ تیل کا درآمدی بل کم ہونے سے زرمبادلہ کی بچت ہوجاتی لیکن کورونا وبا کے باعث یورپ اور امریکہ کی منڈیوں میں ہمارا مال جانا بند ہوگیا۔

برآمدات میں شدید کمی ہوگئی۔اس پر مستزاد بیرون ملک پاکستانیوں کی ملک میں بھیجی جانے والی ترسیلات زر کم ہوگئیں۔اتنافائدہ نہیںہوا جتنا نقصان ہوگیا۔ اسی بحران پر قابو پانے کی غرض سے عالمی مالیاتی فنڈ نے پاکستان کو فوری طور پر تقریباً ڈیڑھ ارب ڈالر کا مزید قرض دیا ہے۔اگر ہماری تیل ذخیرہ کرنے کی استعداد زیادہ ہوتی تو ہم تیل کی موجودہ کساد بازاری سے فائدہ اٹھا سکتے تھے لیکن ایسا نہیں ہے۔ ہمارا ملک اپنی ضرورت کے صرف بیس دنوں کا تیل ذخیرہ کرسکتا ہے۔ اپریل کے ماہ میں پاکستان کے تمام ذخیرے تیل سے بھرے ہوئے تھے ۔لاک ڈاون کے باعث پیٹرول اور ڈیزل کی کھپت بھی کم ہوگئی ہے۔ گزشتہ ایک ماہ میں ہم نے تیل کا ایک جہاز بھی درآمد نہیں کیا کیونکہ ہمارے پاس اسے رکھنے کی جگہ ہی نہیں ۔ بعض لوگوں کا خیال ہے کہ پاکستان حکومت پیٹرولیم کی عالمی منڈی میں گراوٹ کے مطابق ملک میں پیٹرول اور ڈیزل کی قیمتیں مزید کم کردے۔ یہ فیصلہ ملک کی معیشت کی کمزور صورتحال دیکھتے ہوئے مناسب اقدام نہیں ہوگا۔وفاقی حکومت کو ٹیکسوں کی مد میں لاک ڈاؤن کے باعث تین سو ارب روپے سے زیادہ کاخسارہ ہوا ہے۔ کورونا بحران سے نپٹنے کے لیے بارہ سو ارب روپے اضافی خرچ کرنے پڑرہے ہیں۔ ابھی تو اس امدادی رقم میں مزید اضافہ متوقع ہے۔ مئی کا سارا مہینہ بھی نیم کرفیو میں گزرے گا۔ حکومت کو اضافی وسائل کی ضرورت پڑے گی۔ یہ تو ایک جنگی صورتحال ہے۔ اگر اس وقت حکومت پیٹرولیم مصنوعات کی قیمتیں بہت زیادہ کم کر بھی دے گی تو ٹرانسپورٹراوردیگر کاروباری ادارے اس فائدے کو نہ تو صارفین کو منتقل کریں گے نہ حکومت کو زیادہ ٹیکس دیں گے بلکہ یہ تو لاک ڈاؤن سے ہونے والے نقصانات کی تلافی کے لیے حکومت سے ٹیکسوں میں چھوٹ اور آسان شرائط پر قرضے مانگ رہے ہیں ۔ ان حالات میں مناسب یہی ہے کہ حکومت پیٹرول‘ ڈیزل کی قیمتوں میں کمی کرنے کے بجائے انہیں موجودہ سطح پر رکھے اور عالمی منڈی میں گراوٹ سے پہنچنے والا فائدہ پیٹرول‘ڈیزل پر ایمرجنسی کورونا ٹیکس لگا کر قومی خزانہ میں ڈالے تاکہ جو اضافی اخراجات ہورہے ہیں ان کے لیے استعمال کیا جاسکے۔

عدنان عادل

تقریباًایک ماہ سے پورے ملک میں ایک نیم کرفیو کی صورتحال ہے۔لوگوں کی بڑی تعداد گھروں میں محصور ہے۔طویل لاک ڈاؤن ان کے اعصاب پر بھاری پڑ رہا ہے۔بہت سے لوگ کام کاج پر لوٹنا چاہتے ہیں۔ محنت مشقت کرکے اپنی روزی کمانا چاہتے ہیں۔ حقیقت پسندی کا تقاضا ہے کہ حکومت اب معاشی سرگرمیاںمکمل بحال کرنے کی اجازت دے۔ کورونا وبا نے اب تک پاکستان میں بڑے پیمانے پر نقصان نہیں پہنچایا۔ اعداد و شمار بتاتے ہیں کہ ہمارے ملک میں کورونا سے بیمار ہونے والے لوگوں میں مرنے والوں کی شرح صرف ڈیڑھ فیصد ہے۔ ان میں وہ لوگ بھی شامل ہیں جو زیادہ عمر کے تھے یا انہیں پہلے سے کوئی بڑی بیماری لاحق تھی جواس وائرس کی وجہ سے پیچیدہ ہوگئی۔زیادہ تر لوگ جس طرح عام نزلہ زکام سے صحت یاب ہوجاتے ہیں اس طرح کورونا سے بھی شفایاب ہوجاتے ہیں۔ جہاں تک کورونا وائرس پراچھی طرح قابو پانے کا تعلق ہے تو یہ اسوقت تک ممکن نہیں جب تک اس سے بچاؤ کی ویکسین بن کر عام استعمال میں نہیں آجاتی ۔

مستند ڈاکٹروں اور سائنس دانوں کا یہی کہنا ہے کہ ویکسین بازار میں آنے میں ایک سے ڈیڑھ سال لگے گا۔ ابھی تو یہ بھی معلوم نہیں کہ جو لوگ کورونا وائرس کا شکار ہونے کے بعد ٹھیک ہوجاتے ہیں وہ ہمیشہ کے لیے صحت یاب ہوجاتے ہیں یا انہیں دوبارہ بھی یہ انفیکشن لاحق ہوسکتا ہے۔ جنوبی کوریا سے خبریں آئی ہیں کہ وہاں بہت سے مریض ٹھیک ہوگئے ‘ انکا ٹیسٹ منفی آگیا لیکن کچھ دنوں کے بعد ان میں دوبارہ وائرس نکل آیا۔ جیسے اور بہت سے وائرس ہماری زندگی کا حصہ بن چکے ہیں کورونا بھی ہماری زندگیوں میں داخل ہوچکا ہے۔ اس سے پیدا ہونے والی بیماری زُکام کی ایک قسم ہے جواگرمریض کی قوتِ مدافعت کمزور ہو اورمرض بگڑ جائے تو زیادہ خطرناک ہوجاتی ہے۔ کتنے ہی لوگ ہیں جن کے جسم میں کورونا وائرس موجود ہے لیکن ان کی مدافعت مضبوط ہونے کی وجہ سے ان میں علامات ظاہر نہیں ہورہیں۔ہمارے معاشی حالات میںتوممکن نہیں کہ کروڑوں لوگوں کے کورونا ٹیسٹ کیے جائیں۔ یہ کام تو امریکہ جیسا ملک نہیں کرسکا۔ اس وقت دیہات میں معمول کے مطابق کام کاج ‘ کاروبارِ حیات چل رہا ہے‘ وہاں کوئی وبا نہیں پھیلی۔ لیکن شہروں‘ قصبوں میں لوگوں کی اکثریت اپنے گھروں میں بند ہے۔ بیروزگاری پھیل گئی ہے۔ حکومت ایک کروڑ بیس لاکھ خاندانوں تک تیزی سے امدادی رقوم پہنچا رہی ہے۔بعض نجی ادارے بھی ضرورت مند خاندانوں کی مدد کررہے ہیں۔ لیکن سفید پوش طبقہ جو نہ امداد مانگتا ہے نہ لینا چاہتا ہے وہ کام کاج اور کاروبار پر پابندیوں کی سختی محسوس کررہا ہے۔ ایک ہفتہ پہلے کچھ محدود تعداد میں کارخانوں‘ ملوں کو کھولنے کی اجازت دی گئی ہے ۔سندھ میں ماہی گیروں کو سمندرسے مچھلیاں پکڑنے کی اجازت بھی مل گئی ہے۔تاہم ملک کا بیشتر کاروبار بند ہے۔بہت سے ہنرمند افراد پر سے پابندی ہٹانے کا اعلان کیا گیاتھا لیکن اسکا نوٹی فکیشن جاری نہیں کیا گیا۔ ملک میں تقریباًتیس لاکھ پرچون دکاندارہیں جن کی اکثریت روزی کمانے سے محروم ہوچکی ہے۔ ایک طبقہ سخت لاک ڈاؤن جاری رکھنے کا حامی ہے۔ اس کا خیال ہے کہ مزید ایک ماہ تک یہ پابندیاں قائم رہنی چاہئیں۔ دکانیں‘ صنعتیں‘ عبادت گاہیں مکمل بند رہیں۔ نقل و حمل بہت ہی کم ہو۔لوگ گھروں میں بیٹھیں۔ ان لوگوںکا موقف ہے کہ پاکستان میں کورونا وبا مئی کے آخر تک اپنے عروج پر پہنچے گی اور اگر اسے سماجی فاصلہ کے ذریعے نہ روکا گیاتو ملک میں لاکھوں لوگ بیمار ہوجائیں گے جنہیں ہمارے ملک کا صحت کا نظام سنبھال نہیں سکے گا۔

اس لیے بہتر یہی ہے کہ لوگ گھر بیٹھ کر اس وبا سے بچنے کی کوشش کریں جیسا کہ اب تک کیا گیا ہے۔ دیکھنا یہ ہے کہ کیا پاکستان کی اکثر آبادی اس پوزیشن میں ہے کہ وہ گھر بیٹھ کر اپنے بنیادی اخراجات پورے کرسکے؟ کیا پاکستان کی ریاست کے اتنے وسائل ہیں کہ وہ کروڑوں لوگوں کو گھر بٹھا کر چند ماہ تک روٹی کھلا سکے؟ میرے خیال میں ایسا ممکن نہیں ہے۔پاکستان میںایک ماہ سے زیادہ طویل لاک ڈاؤ ن کرنا حقیقت پسندانہ فیصلہ نہیں ہوگا۔ یہ ٹھیک ہے کہ شہروں کے درمیان مسافروں کی آمد و رفت کی گاڑیاں نہ چلائی جائیں‘ صرف سامان کی نقل و حمل ہوتی رہے جو اب بھی جاری ہے۔ مسافر بسوں میں درجنوں لوگ قریب قریب بیٹھتے ہیں جس سے وائرس کا پھیلاؤ بڑھ سکتا ہے۔عدالتیں بھی کچھ اور عرصہ بند رکھی جاسکتی ہیں۔ تعلیمی ادارے بھی چند ماہ مزید بند رہنے سے کوئی بڑا نقصان نہیں ہوگا۔ یوں بھی سخت گرمی کا موسم سر پر ہے۔ کروڑوں بچے‘ نوجوان گھروں سے اسکولوں‘ کالجوں کے لیے نکلتے ہیں تو سڑکوں‘ گلیوں میںہجوم بڑھ جاتا ہے۔ ویسے بھی سرکاری اسکولوں ‘ کالجوںمیں ایک ایک کلاس میں پچاس پچاس ‘سو سو بچے ساتھ ساتھ دیر تک بیٹھتے ہیں۔ یہ بڑا خطرہ ہے۔ تاہم‘ صنعتی پیداوار کے کارخانے اور ملیں مزید بند رکھنا معاشی تباہی کے مترادف ہوگا۔ ملک میں کام کاج کرنے والی آبادی کا ایک چوتھائی صنعتوں سے وابستہ ہے۔ اگر یہ مزید بند رہیں تو محنت کش عوام کا بھٹہ بیٹھ جائے گا۔ حکومت نے بارہ ہزار کی امداد دی ہے اس میں ایک خاندان کا بمشکل ایک ماہ گزارہ ہوگا۔حکومت دوسری بار ایک کروڑ بیس لاکھ خاندانوں کو اتنی امداد دینے کی استعداد نہیں رکھتی۔ لوگوں کو کام کاج کرکے ہی اپنا گھر چلانا ہوگا۔ حقیقت پسندی کا تقاضا یہی ہے کہ چند احتیاطی شرائط کے ساتھ تمام صنعتوں اور دکانداروں کو اب کام شروع کرنے کی اجازت دے دی جائے ۔کوئی بھی ملک چاہے وہ کتنا امیر‘ ترقی یافتہ ہوطویل عرصہ تک لاک ڈاؤن کا متحمل نہیں ہوسکتا۔ یہی وجہ ہے کہ ہم سے کہیں زیادہ متاثر ہونے والے یورپ کے ممالک بھی کاروباری سرگرمیاں کھولتے جارہے ہیں۔

عدنان عادل