Category: لاہور

پاکستان بھر میں رمضان المبارک کا پہلا روزہ آج 3 مارچ کو ہوگا، جس کے لیے شہریوں نے رمضان کی خصوصی خریداری کے لیے بازاروں کا رخ کر لیا ہے۔ رمضان کی تیاریاں عروج پر ہیں، اور بازاروں میں کھانے پینے کی اشیاء اور پھلوں کی قیمتوں نے عوام کی آنکھیں کھول دی ہیں۔ قیمتوں میں اضافے نے شہریوں کے بجٹ کو متاثر کیا ہے، خصوصاً کھجلے اور پھینی کی خریداری میں بھی اضافہ دیکھنے کو مل رہا ہے۔

لاہور میں رمضان کی آمد کے ساتھ ہی مرغی کے گوشت کی قیمت 630 روپے فی کلو تک پہنچ گئی ہے، جبکہ سبزیوں کی قیمتوں میں بھی اضافہ ہوا ہے۔ ٹماٹر کی قیمت 100 روپے فی کلو اور پیاز کی قیمت بھی دگنی ہو گئی ہے۔ اس کے علاوہ، کیلے 300 روپے درجن اور سیب 450 روپے فی کلو کی قیمت پر پہنچ گئے ہیں۔اسلام آباد میں سبزیوں کی قیمتیں برقرار ہیں لیکن پھلوں کی قیمتوں میں اضافے کا سامنا ہے۔ امرود کی قیمت 250 سے 400 روپے فی کلو تک پہنچ گئی ہے، جبکہ سیب کی قیمت 350 روپے اور کینو 600 روپے درجن تک جا پہنچے ہیں۔کوئٹہ میں بھی پھلوں کی قیمتوں میں 30 فیصد تک اضافہ ہوا ہے، جس سے شہریوں کی پریشانی میں مزید اضافہ ہوگیا ہے۔پشاور میں اسٹرابیری کی قیمت 500 روپے فی کلو تک پہنچ گئی ہے، جبکہ سیب کی قیمت بھی ساڑھے 400 روپے فی کلو ہوگئی ہے۔

رمضان کا آغاز ہوتے ہی ملک بھر کی مساجد میں رونق بڑھ گئی ہے اور پہلی تراویح کی ادائیگی کی گئی۔ نماز عشاء کے بعد مساجد میں تراویح کا سلسلہ جاری ہے۔ مختلف شہروں میں تراویح کے لیے خصوصی انتظامات کیے گئے ۔

خدمت کا رمضان،ملک بھر میں سحر و افطار دسترخوان سجیں گے. مرکزی مسلم لیگ
مرکزی مسلم لیگ کے رہنماؤں نے کہا ہے کہ رمضان المبارک کے مقدس مہینے میں عوام کی خدمت کا سلسلہ جاری رہے گا۔ پاکستان کے تمام چھوٹے بڑے شہروں میں سحر و افطار کے لیے خصوصی دسترخوان لگائے جائیں گے، ماہ رمضان ہمیں قرب الٰہی کا بہترین موقع فراہم کرتا ہے۔دعا ہے رمضان المبارک پوری قوم کے لیے رحمت، برکت اور مغفرت کا ذریعہ بنے اور ملک میں خوشحالی و استحکام کا باعث ہو۔ رمضان المبارک کی آمد کے موقع پر مرکزی مسلم لیگ کے سیکرٹری جنرل سیف اللہ قصوری، نائب صدر حافظ طلحہ سعید، ڈپٹی سیکرٹری جنرل حافظ خالد نیک نے مشترکہ بیان میں کہا کہ رمضان المبارک برکتوں اور رحمتوں کا مہینہ ہے.مرکزی مسلم لیگ ہمیشہ سے عوامی فلاح و بہبود کے منصوبوں میں پیش پیش رہی ہے اور رمضان کے دوران بھی یہ سلسلہ جاری رہے گا۔ مرکزی مسلم لیگ کے زیر اہتمام ملک بھر میں لگائے جانے والے سحر و افطار دسترخوانوں میں معیاری کھانے کی فراہمی یقینی بنائی جائے گی، تاکہ روزہ داروں کو عزت و وقار کے ساتھ افطار اور سحری کی سہولت میسر ہو۔ خدمتِ خلق کا یہ جذبہ ہی حقیقی طور پر رمضان کی روح کو اجاگر کرتا ہے اور ہمیں نیکی کے اس موقع سے بھرپور فائدہ اٹھانا چاہیے۔ سحر و افطار دسترخوان مساجد، مدارس، عوامی مقامات پر لگائے جائیں گے، تاکہ زیادہ سے زیادہ مستحق افراد ان سہولیات سے مستفید ہو سکیں۔ سیف اللہ خالد کا مزید کہنا تھا کہ رمضان المبارک رحمتوں، برکتوں او رسعادتوں والامہینہ ہے۔ہر شخص کو چاہیے کہ وہ اپنے عقائد و اعمال کی اصلاح کرے ۔ زیادہ سے زیادہ توبہ و استغفارکرنے کو اپنا معمول بنایاجائے .ماہ رمضان میں قرآن مجید نازل ہوا، جو تمام انسانوں کی لیے ہدایت کی کتاب ہے۔ قرآن اپنے ماننے والوں کے اندر یہ صلاحیت پیدا کرتا ہے کہ وہ حق اور باطل کو پہچان سکیں اور دنیا میں اس کے عادلانہ نظام کے قیام کے لیے راہ ہموار کریں

سموگ تدارک کیس میں لاہور ہائیکورٹ نے ون وے کی خلاف ورزی کرنے والوں کو 10ہزار روپے جرمانہ کرنے کا حکم دے دیا

لاہور ہائیکورٹ میں انسداد سموگ کے حوالے سے درخواستوں کی سماعت ہوئی،لاہور ہائیکورٹ کے جسٹس شاہد کریم نے درخواستوں پر سماعت کی،دوران سماعت عدالت میں مختلف محکموں کے افسران نے رپورٹ پیش کی،ممبرجوڈیشل کمیشن نے کہاکہ عدالت نے حکم دیا تھا کہ سکولز ڈراپ لائنز بنائیں مگر ایل ڈی اے سکولوں مالکان کو نوٹس کرکے خاموش ہو گیا،وکیل ایل ڈی اے نے کہاکہ 4کنال والے سکولز مالکان کوڈراپ لائنز بنانے کے احکامات دے دیئے، عدالت نے سکولوں کی چھٹی کے وقت متعلقہ سروس روڈز کو ون وے کرنے کی ہدایت کی،جسٹس شاہد کریم نے کہاکہ ون وے کی خلاف ورزی کرنے والوں کو 10ہزار روپے جرمانہ کریں،لوگوں کو پتہ چل جائے کہ کچھ غلط کریں گے تو سزا ہوگی تو پھر سب ٹھیک ہوگا، سکولز کی پارکنگ ہونی چاہئے ایل ڈی اے حکام سی ٹی ڈی او کے ساتھ بیٹھ کر ٹریفک پلان بنائیں، لاہور بہت بہتر ہو گیا،اس میں سب کا کردار ہے ، میچز کے دوران بھی ٹریفک کا نظام بھی بہت بہتر ہے،کیس کی مزید سماعت جمعہ تک ملتوی کردی گئی۔

پنجاب کے شہر لاہور میں دہشت گردی کے خطرے کو ناکام بناتے ہوئے، سی ٹی ڈی (کاؤنٹر ٹیررازم ڈیپارٹمنٹ) نے ایک بڑی کارروائی کرتے ہوئے لاہور سمیت پنجاب کے مختلف شہروں سے 20 دہشت گردوں کو گرفتار کر لیا۔ ان دہشت گردوں میں دو انتہائی خطرناک فتنہ الخوارج بھی شامل ہیں۔

سی ٹی ڈی پنجاب نے مختلف انٹیلی جنس بیسڈ آپریشنز کے دوران لاہور اور پنجاب کے دیگر مختلف شہروں میں کامیاب کارروائیاں کیں۔ سی ٹی ڈی کے ترجمان کے مطابق، یہ کارروائیاں پنجاب کے 162 مختلف علاقوں میں کی گئیں، جن میں لاہور، فیصل آباد، خانیوال، بہاول نگر، راولپنڈی، چنیوٹ، میانوالی، ساہیوال، شیخوپورہ، سیالکوٹ، بہاولپور اور حافظ آباد شامل ہیں۔ ترجمان سی ٹی ڈی نے مزید بتایا کہ لاہور سے فتنہ الخوارج کے دو ارکان کو گرفتار کیا گیا، جن کا تعلق انتہائی خطرناک دہشت گرد تنظیم سے تھا۔ علاوہ ازیں، راولپنڈی سے ایک اور دہشت گرد منموہن سنگھ کو گرفتار کیا گیا، جس کا تعلق رحیم یار خان سے ہے۔

سی ٹی ڈی نے کارروائی کے دوران دہشت گردوں سے مختلف اقسام کا اسلحہ اور مواد برآمد کیا، جس میں دھماکہ خیز مواد، 3 آئی ای ڈی بم، 23 ڈیٹونیٹرز، 61 فٹ حفاظتی فیوز تار، متنازعہ پمفلٹس، نقدی اور موبائل فون شامل ہیں۔ ہشت گردوں کی شناخت صالح رضا، محمد ریاض، ابوبکر، بوال خان، محمد یونس، عثمان اور منموہن سنگھ کے ناموں سے ہوئی ہے۔ سی ٹی ڈی کی جانب سے رواں ہفتے میں 2231 کومبنگ آپریشنز بھی کیے گئے، جن کے دوران 495 مشتبہ افراد کو گرفتار کیا گیا۔ ان آپریشنز میں 87 ہزار 565 افراد سے پوچھ گچھ کی گئی، جن میں سے متعدد افراد کا تعلق دہشت گردی کے نیٹ ورک سے تھا۔

یہ کارروائیاں پنجاب بھر میں دہشت گردی کے خطرات کو روکنے اور امن و امان کی صورتحال کو برقرار رکھنے میں اہم کردار ادا کر رہی ہیں۔ سی ٹی ڈی کی اس کامیاب کارروائی نے لاہور کو ایک بڑی تباہی سے بچا لیا اور دہشت گردوں کے نیٹ ورک کو ایک بڑا دھچکا پہنچایا۔

وزیراعلیٰ پنجاب مریم نوازشریف نے دیہی خواتین کے لیے ایک تاریخی قدم اٹھاتے ہوئے تاریخ میں پہلی بار دیہی علاقوں کے لیے خصوصی بسوں کی سروس شروع کرنے کا اصولی فیصلہ کر لیا ہے۔ اس منصوبے کے تحت ہر دیہی تحصیل سے ڈسٹرکٹ ہیڈکوارٹر تک بس سروس فراہم کی جائے گی۔ وزیراعلیٰ مریم نوازشریف نے اس بات پر بھی اتفاق کیا کہ اس اقدام سے دیہی خواتین کو نقل و حمل کی سہولت ملے گی۔

وزیراعلیٰ مریم نوازشریف نے دیہی خواتین کی ٹرانسپورٹیشن کے حوالے سے ایک جامع پلان طلب کیا ہے اور ساتھ ہی ساتھ انٹر ویلج ٹرانسپورٹ پلان بھی ترتیب دینے کی ہدایت دی ہے۔ اس نئے ماس ٹرانزٹ سسٹم کے تحت دور دراز اضلاع میں 25 بسوں پر مشتمل ایک مرحلہ وار منصوبہ شروع کرنے پر غور کیا جا رہا ہے۔مریم نوازشریف نے اس بات پر زور دیا کہ ماس ٹرانزٹ سسٹم میں خواتین مسافروں کے لیے سبسڈی فراہم کی جائے تاکہ ان کے لیے آمد و رفت کی سہولتوں کو بہتر بنایا جا سکے۔ انہوں نے فوری طور پر اقدامات کرنے کی ہدایت دی ہے تاکہ اس منصوبے کو عملی جامہ پہنایا جا سکے۔وزیراعلیٰ مریم نواز نے کہا کہ پنجاب میں جدید ٹرانسپورٹ سسٹم دیہات میں رہنے والی خواتین کا حق ہے اور یہ ضروری ہے کہ انہیں جدید سہولتیں فراہم کی جائیں تاکہ ان کی زندگی میں آسانیاں آئیں۔ انہوں نے مزید کہا کہ دیہی علاقوں میں ٹرانسپورٹ کا نظام نہ ہونا خواتین کے لیے انتہائی تکلیف دہ ہے اور اس کا خاتمہ ضروری ہے۔انہوں نے یہ بھی کہا کہ جدید ٹرانسپورٹ سسٹم کی فراہمی سے دیہاتی خواتین کا اعتماد بڑھے گا اور اس کے ساتھ ساتھ طالبات اور مریض خواتین کو اپنے مقصد تک پہنچنے میں بھی سہولت ہو گی۔

وزیراعلیٰ مریم نوازشریف کا یہ اقدام دیہی خواتین کے لیے ایک نئے دور کا آغاز ہو گا، جس سے ان کی زندگی میں نمایاں تبدیلی آئے گی اور ان کے روزمرہ کے مسائل حل ہوں گے۔

عبادت گاہوں کو نشانہ بنانے والے اسلام اور انسانیت کے دشمن ہیں،خالد مسعود سندھو
مولانا سمیع الحق کے قاتلوں کو سزا ملتی تو آج مولانا حامدالحق حقانی پر حملے کی جرات نہ ہوتی. سیف اللہ خالد
حافظ طلحہ سعید، قاری یقوب شیخ، حافظ خالد نیک، تابش قیوم و دیگر کا مولانا حامد الحق حقانی کی شہادت پر اظہار افسوس

مرکزی مسلم لیگ کے قائدین نے نوشہرہ دھماکے میں جے یو آئی س کے سربراہ مولانا حامد الحق حقانی کی شہادت پر گہرے رنج و غم کا اظہار کرتے ہوئے حکومت سے مطالبہ کیا ہے کہ علما کرام کو تحفظ فراہم کیا جائے.مولانا حامد الحق پر حملہ پاکستان کے امن پر حملہ ہے،اکوڑہ خٹک دھماکہ بزدلانہ دہشت گردی اور ناقابل معافی جرم ہے. دہشت گردوں کو جلد از جلد عبرتناک سزا دی جائے، عبادت گاہوں کو نشانہ بنانے والے اسلام اور انسانیت کے دشمن ہیں، ملک دشمن عناصر کے خلاف سخت کارروائی ناگزیر ہو چکی.

مرکزی مسلم لیگ کے صدر خالد مسعود سندھو، سیکرٹری جنرل سیف اللہ قصوری، نائب صدر حافظ طلحہ سعید،جوائنٹ سیکرٹری قاری محمد یعقوب شیخ، ڈپٹی سیکرٹری جنرل حافظ خالد نیک،صدر مرکزی مسلم لیگ پنجاب چوہدری محمد سرور، ترجمان تابش قیوم،عارف اللہ، عمران بھٹی،فیصل ندیم و دیگر نے نوشہرہ دھماکے کی مذمت کی ہے اور مولانا حامد الحق حقانی کی شہادت پر افسوس کا اظہار کیا ہے. مرکزی مسلم لیگ کے رہنماؤں کا کہنا تھا کہ زخمیوں کی جلد صحت یابی کے لیے دعاگو ہیں اور حکومت سے مطالبہ کرتے ہیں کہ ایسے واقعات کی روک تھام کے لیے سخت اقدامات کیے جائیں۔مرکزی مسلم لیگ کے صدر خالد مسعود سندھو کا کہنا تھا کہ مولانا حامد الحق حقانی کی دھماکے میں‌شہادت یہ نہ صرف ایک دینی نقصان ہے بلکہ قومی سانحہ بھی ہے۔دھماکے کی فوری اور غیر جانبدارانہ تحقیقات کی جائیں اور ذمہ داروں کو سخت سے سخت سزا دی جائے۔

مرکزی مسلم لیگ کے سیکرٹری جنرل سیف اللہ قصوری کا کہنا تھا کہ خیبر پختونخوا میں علما کرام کو مسلسل نشانہ بنایا جا رہا ہے، جو کہ ایک تشویشناک امر ہے۔ انہوں نے حکومت سے مطالبہ کیا کہ علما کرام کو مکمل تحفظ فراہم کیا جائے،مولانا سمیع الحق پر حملہ کرنے والوں کو سزا مل گئی ہوتی تو آج مولانا حامد الحق حقانی پر حملہ نہ ہوتا. دہشت گردی کا دین اسلا م سے کوئی تعلق نہیں.

حافظ طلحہ سعید،قاری محمد یعقوب شیخ، حافظ خالد نیک و دیگر نے دھماکے کے متاثرین کے اہل خانہ سے دلی ہمدردی کا اظہار کرتے ہوئے حکومت سے مطالبہ کیا کہ دہشت گردی کے خاتمے کے لیے سخت اور عملی اقدامات کیے جائیں تاکہ ملک میں امن و امان کی فضا بحال ہو سکے۔ بادت گاہوں اور مذہبی مقامات کی سیکیورٹی مزید سخت کی جائے تاکہ مستقبل میں ایسے واقعات کی روک تھام ممکن ہو سکے