لاہور میں غیر ملکی خواتین کے مبینہ اغوا اور زیادتی کے ہائی پروفائل کیس میں ایک اور اہم پیش رفت سامنے آئی ہے۔ اغوا میں مبینہ طور پر استعمال ہونے والی گاڑی سے پیش آنے والے ٹریفک حادثے کے بعد متاثرہ گاڑی کے مالک نے بھی الگ مقدمہ درج کرا دیا ہے،
پولیس کے مطابق حادثے کا مقدمہ گاڑی کے ڈرائیور عثمان کی مدعیت میں درج کیا گیا ہے۔ ایف آئی آر میں مؤقف اختیار کیا گیا ہے کہ وہ ایک نجی ہاؤسنگ سوسائٹی سے بھٹہ چوک کی جانب جا رہا تھا کہ ائیرپورٹ روڈ پر ایک تیز رفتار گاڑی نے اس کی گاڑی کو ٹکر مار دی۔ تصادم کے نتیجے میں اس کی گاڑی کو تقریباً تین لاکھ روپے مالیت کا نقصان پہنچا، جبکہ حادثے کے فوراً بعد دوسری گاڑی کا ڈرائیور موقع سے فرار ہو گیا۔مقدمے کے متن کے مطابق عثمان نے فوری طور پر ایمرجنسی ہیلپ لائن ون فائیو پر اطلاع دی، جس کے بعد پولیس موقع پر پہنچی۔ حادثے کے دوران گاڑی میں موجود غیر ملکی خواتین باہر نکل کر اپنی جان بچانے کے لیے قریبی دکان میں پناہ لینے میں کامیاب ہوئیں۔
دوسری جانب ڈی آئی جی آپریشنز لاہور فیصل کامران نے میڈیا کو بریفنگ دیتے ہوئے بتایا کہ غیر ملکی خواتین کے مبینہ اغوا کیس میں اب تک آٹھ ملزمان کو گرفتار کیا جا چکا ہے۔ ان کے مطابق واردات میں استعمال ہونے والی گاڑی اور اس کے مالک کی بھی شناخت کر لی گئی ہے، جبکہ گرفتار ملزمان کا تعلق لاہور، سرگودھا اور دیگر علاقوں سے بتایا جاتا ہے۔ڈی آئی جی کے مطابق پولیس نے جس مکان پر چھاپہ مارا، وہاں چند نوجوان کرائے پر مقیم تھے۔ انہوں نے بتایا کہ ابتدائی طور پر یہ اطلاعات سامنے آئیں کہ مکان میں رہنے والوں میں سے کوئی شخصیت نائب وزیراعظم کا رشتہ دار ہو سکتی ہے، تاہم اس حوالے سے تصدیق کے لیے متعلقہ خاندان سے رابطہ کیا گیا۔ ان کا کہنا تھا کہ وزیراعلیٰ پنجاب مریم نواز کو بھی تمام صورتحال سے آگاہ کیا گیا، جنہوں نے واضح ہدایت دی کہ کیس کو مکمل طور پر میرٹ پر چلایا جائے اور جو بھی قصوروار ثابت ہو، اسے قانون کے مطابق سزا دی جائے۔فیصل کامران نے ان خبروں کی بھی تردید کی کہ غیر ملکی خواتین خود اغواکاروں کے چنگل سے نکل کر محفوظ مقام تک پہنچی تھیں۔ انہوں نے کہا کہ متاثرہ خواتین کے بیانات کے مطابق انہیں پنجاب پولیس نے بازیاب کرایا۔ ان کے مطابق ایک ملزم رضا ڈار خواتین کو گاڑی میں ائیرپورٹ لے جا رہا تھا کہ بھٹہ چوک کے قریب خواتین نے مزاحمت کی، جس کے دوران ملزم سے ہاتھا پائی ہوئی اور گاڑی حادثے کا شکار ہو گئی۔
ڈی آئی جی نے مزید بتایا کہ حادثے کے بعد خواتین نے گاڑی سے چھلانگ لگا کر قریبی اسٹور میں پناہ لی، جہاں سے پولیس نے بروقت کارروائی کرتے ہوئے انہیں بحفاظت ریسکیو کیا۔ انہوں نے کہا کہ دو خاتون ایس پیز نے متاثرہ غیر ملکی خواتین کو اعتماد میں لے کر طبی معائنے کے لیے آمادہ کیا، جس کے بعد قانونی کارروائی کو آگے بڑھایا گیا۔پولیس کا کہنا ہے کہ کیس کی مختلف پہلوؤں سے تفتیش جاری ہے اور شواہد کی روشنی میں مزید گرفتاریاں بھی متوقع ہیں۔
