Category: لاہور

پاکستان علماء کونسل کے چیئرمین حافظ طاہر محمود اشرفی نے کہا ہے کہ پاکستان کے استحکام، سلامتی اور بقا کے لیے علماء و مشائخ کا کردار بنیادی اہمیت رکھتا ہے، تمام مکاتب فکر کے علماء، مشائخ اور مدارس کے منتظمین ملک کے دفاع اور استحکام کے لیے متحد ہیں۔

حافظ طاہر محمود اشرفی نے مدارس سے متعلق منعقدہ کانفرنس سے خطاب کرتے ہوئے کہا کہ پاکستان ہمارا ملک ہے اور اس کی سلامتی، استحکام اور دفاع ہم سب کی مشترکہ ذمہ داری ہے۔ قیام پاکستان کے وقت بھی علماء و مشائخ نے اہم کردار ادا کیا اور آج بھی ملک کے دفاع اور استحکام کے لیے تمام مکاتب فکر ایک پلیٹ فارم پر موجود ہیں۔انہوں نے کہا کہ کانفرنس میں مدارس کو درپیش مختلف مسائل پر تفصیلی غور کیا گیا اور فیصلہ کیا گیا ہے کہ جن معاملات کا حل متعلقہ حکومتی و دیگر فورمز پر ہونا ہے، انہیں جلد حل کروانے کے لیے مؤثر اقدامات کیے جائیں گے۔چیئرمین پاکستان علماء کونسل کا کہنا تھا کہ معاہدہ مکہ مسلم امہ کے اتحاد اور وحدت کی جانب ایک اہم پیش رفت ہے۔ موجودہ حالات میں اسلامی دنیا کے درمیان مضبوط اتحاد کی ضرورت پہلے سے کہیں زیادہ ہے۔ انہوں نے کہا کہ مکہ مکرمہ کے دروازے دیگر اسلامی ممالک کے لیے بھی کھلے ہیں اور مسلم دنیا کے اتحاد کو مزید مضبوط بنانے کی ضرورت ہے۔حافظ طاہر محمود اشرفی نے واضح کیا کہ اسلام کی سربلندی اور پاکستان کی سلامتی و استحکام کے لیے تمام مکاتب فکر ایک پرچم تلے متحد ہیں۔ پاکستان کا دفاع، سلامتی اور استحکام ہمیں اپنی جانوں سے بھی زیادہ عزیز ہے۔انہوں نے مزید بتایا کہ دیگر مدارس کے بورڈز کے ساتھ مل کر مدارس کے لیے ایک مربوط اور مضبوط نظام تشکیل دینے کا فیصلہ کیا گیا ہے۔ مدارس کی رجسٹریشن، اکاؤنٹس اور مالی معاملات کو بہتر بنانے کے لیے بھی اقدامات کیے جائیں گے تاکہ دینی اداروں کو درپیش انتظامی مسائل کا مؤثر حل نکالا جاسکے۔

کانفرنس سے خطاب کرتے ہوئے مفتی محمد زبیر نعیم نے کہا کہ مدارس کے مختلف مسائل پر تفصیلی گفتگو ہوئی ہے اور انہیں متعلقہ فورمز پر جلد حل کروانے کا فیصلہ کیا گیا ہے۔علامہ محمد تقیّر عباس نے کہا کہ کانفرنس میں ملک بھر کے 22 ہزار مدارس کے نمائندگان شریک ہیں۔ انہوں نے کہا کہ مدارس دینیہ ملک بھر میں لاکھوں بچوں کو تعلیم فراہم کرنے والے اہم ادارے ہیں، اس لیے ان کے مسائل کا حل ضروری ہے۔مفتی الشیخ عبد اللطیف نے مدارس کی رجسٹریشن اور مالی معاملات کو بہتر انداز میں حل کرنے پر زور دیتے ہوئے کہا کہ حکومت مدارس کے مالی مسائل کے حل کے لیے مؤثر اقدامات کرے۔مولانا فرید احمد حقانی نے کہا کہ مدارس کو درپیش مسائل جس فورم پر حل ہونے ہیں، حکومت انہیں جلد حل کرے۔ ان کا کہنا تھا کہ مدارس ریاست کی مکمل پالیسی کی حمایت کرتے ہیں اور ملکی استحکام کے لیے اپنا کردار ادا کرتے رہیں گے۔مفتی غلام اصغر صدیقی نے کہا کہ مدارس کی جانب سے فراہم کردہ تفصیلات کی بنیاد پر رجسٹریشن کا عمل مکمل کیا جائے اور مدارس کی رجسٹریشن، اکاؤنٹس اور مالی معاملات کو شفاف اور بہتر بنانے کے لیے مؤثر اقدامات کیے جائیں۔

لاہور: روزنامہ خبریں کی جانب سے اے بی ایس ڈیولپرز سے وابستہ افراد اور پاک 247 نیوز کے نمائندے کو پنجاب ڈیفیمیشن ایکٹ 2024 کے تحت قانونی نوٹس جاری کیا گیا ہے، جس میں مبینہ طور پر ہتکِ عزت، ادارے کی ساکھ مجروح کرنے، تضحیک آمیز مواد اور بدنیتی پر مبنی جھوٹے بیانات کے الزامات عائد کرتے ہوئے مجموعی طور پر ایک ارب روپے (100 کروڑ روپے) کے جنرل، اسپیشل اور پونٹیو ہرجانے کا دعویٰ کیا گیا ہے۔

10 اگست 2026 کو جاری کیے گئے قانونی نوٹس کے مطابق نوٹس اے بی ایس کے چیف ایگزیکٹو آفیسر ڈاکٹر سبیل اکرام، محسن جاوید، ذیشان ڈوگر، مدثر رحمانی، قاسم جنجوعہ، شرجیل احمد میر، اسامہ خالد اور پاک 247 نیوز کے نمائندے منان گیلانی کو مخاطب کرتے ہوئے جاری کیا گیا ہے۔نوٹس میں کہا گیا ہے کہ مذکورہ افراد اے بی ایس ڈیولپرز، گراؤنڈ فلور، پرل ون ٹاور، اقبال بلاک، بحریہ ٹاؤن لاہور کے رہائشی ہیں،قانونی نوٹس کے مطابق ڈیلی خبریں ایک معروف اور باوقار اخباری و میڈیا ادارہ ہے جو پرنٹ اور ڈیجیٹل صحافت کے شعبے میں قانونی طور پر کام کر رہا ہے۔ نوٹس میں مؤقف اختیار کیا گیا ہے کہ ادارے نے کئی برسوں کے دوران پیشہ ورانہ، غیر جانب دار اور ذمہ دارانہ صحافت کے ذریعے عوامی اعتماد، ساکھ اور نیک نامی حاصل کی ہے۔نوٹس میں مزید کہا گیا ہے کہ نامزد افراد کو اطلاعات اور دستیاب شواہد کی بنیاد پر ذمہ دار قرار دیا گیا ہے اور ان کے خلاف پنجاب ڈیفیمیشن ایکٹ 2024 کے تحت کارروائی کا حق محفوظ رکھا گیا ہے۔قانونی نوٹس میں مبینہ طور پر ایسے بیانات، مواد یا الزامات کا حوالہ دیا گیا ہے جن کے بارے میں ڈیلی خبریں کا مؤقف ہے کہ وہ ادارے کی ساکھ کو نقصان پہنچانے، اس کی پیشہ ورانہ حیثیت کو متاثر کرنے اور عوامی سطح پر بدنام کرنے کے مترادف ہیں۔

نوٹس میں کہا گیا ہے کہ مبینہ طور پر غلط اور بدنیتی پر مبنی مواد کی اشاعت یا تشہیر سے ڈیلی خبریں کی ساکھ، کاروباری مفادات اور عوامی اعتماد کو نقصان پہنچا، جس کے باعث قانونی چارہ جوئی کا حق استعمال کیا جا رہا ہے۔قانونی نوٹس میں ایک ارب روپے کے جنرل، اسپیشل اور پونٹیو ڈیمیجز یعنی عمومی، خصوصی اور تادیبی ہرجانے کا مطالبہ کیا گیا ہے۔نوٹس میں مزید قانونی نکات اور متعلقہ الزامات کی تفصیلات بیان کیے جانے کا حوالہ دیتے ہوئے کہا گیا ہے کہ فریقین کو پنجاب ڈیفیمیشن ایکٹ 2024 کے تحت اپنے اقدامات کے قانونی نتائج کا سامنا کرنا ہوگا۔

‎لاہور میں پولیس اہلکاروں کی ٹارگٹ کلنگ کے مقدمات میں مبینہ طور پر مطلوب ملزم طارق کے بارے میں پنجاب پولیس کے ریکارڈ سے انکشاف ہوا ہے کہ وہ اس سے قبل بھی دو مقدمات میں شامل رہ چکا ہے۔
‎پولیس ریکارڈ کے مطابق طارق 2023 میں راولپنڈی کے بنی تھانے میں درج ایک مقدمے میں مدعی تھا، جبکہ 2026 میں اسے لاہور کے راوی روڈ تھانے میں درج غیر قانونی اسلحہ کے مقدمے میں ملزم نامزد کیا گیا۔
‎پولیس ذرائع کے مطابق غیر قانونی اسلحہ کے مقدمے میں طارق کے قبضے سے 30 بور پستول اور گولیاں برآمد کی گئی تھیں۔ اسلحہ برآمدگی کے بعد پولیس نے ملزم کے خلاف قانونی کارروائی شروع کی اور اسے عدالت میں پیش کیا گیا۔
‎پولیس ریکارڈ کے مطابق مقدمے کی تفتیش مکمل ہونے کے بعد طارق کے خلاف چالان بھی عدالت میں جمع کرایا گیا تھا۔ تاہم اب اس کا نام لاہور میں پولیس اہلکاروں کی ٹارگٹ کلنگ کی تحقیقات میں بھی سامنے آیا ہے۔
‎ذرائع کا کہنا ہے کہ پولیس ملزم کے سابقہ ریکارڈ، رابطوں اور ممکنہ دیگر ساتھیوں سے متعلق تحقیقات کر رہی ہے تاکہ اس بات کا تعین کیا جا سکے کہ آیا اس کا تعلق صرف انفرادی جرائم تک محدود تھا یا وہ کسی منظم گروہ یا نیٹ ورک کا حصہ رہا ہے۔
‎پولیس حکام کی جانب سے تحقیقات جاری ہیں اور ٹارگٹ کلنگ کے واقعات میں ملزم کے مبینہ کردار سے متعلق مزید شواہد اکٹھے کیے جا رہے ہیں۔ حکام کی کوشش ہے کہ ملزم کے سابقہ مقدمات اور موجودہ تحقیقات کے درمیان ممکنہ روابط کا بھی جائزہ لیا جائے۔

آل پاکستان رائٹرز ویلفیئر ایسوسی ایشن (اپووا) کے زیرِ اہتمام 14 اگست کی مناسبت سے جشنِ آزادی کی ایک پروقار تقریب لاہور کے معروف ہوٹل پاک ہیریٹیج میں منعقد ہوئی۔ تقریب سینئر وائس چیئرمین ملک یعقوب اعوان کی سرپرستی اور بانی و صدر ایم ایم علی کی زیرِ نگرانی منعقد ہوئی، جبکہ معروف شاعر، استاد اور کالم نگار ناصر بشیر نے تقریب کی صدارت کی۔

تقریب میں ادب، صحافت، تعلیم، سماجی خدمت، طب، فنون اور دیگر شعبہ ہائے زندگی میں نمایاں خدمات انجام دینے والی شخصیات کو شانِ پاکستان ایوارڈز سے نوازا گیا۔ تقریب کی نظامت کے فرائض سمیرا شفق اور قرۃ العین خالد نے خوبصورتی سے انجام دیے۔تقریب کا آغاز حافظ محمد زاہد کی تلاوتِ کلامِ پاک سے ہوا، جبکہ فائزہ شہزاد نے بارگاہِ رسالت ﷺ میں نعتِ رسولِ مقبول ﷺ پیش کی۔

جشنِ آزادی کی اس تقریب کا سب سے منفرد، جذباتی اور یادگار پہلو سانحہ اے پی ایس پشاور میں شہید ہونے والے معصوم بچوں کے والدین کی خصوصی شرکت تھی، جو پشاور سے لاہور تشریف لائے۔تقریب کے دوران جب شہدائے اے پی ایس کے والدین کو خصوصی طور پر اسٹیج پر مدعو کیا گیا اور ان کے شہید بچوں کی عظیم قربانیوں کو خراجِ عقیدت پیش کرتے ہوئے ایوارڈز دیے گئے تو پورا ہال جذباتی کیفیت میں ڈوب گیا۔اسی موقع پر ڈی جے کی جانب سے ملی جذبے سے بھرپور نغمہ "مجھے دشمن کے بچوں کو پڑھانا ہے” پیش کیا گیا۔ نغمے کے ساتھ ہی تقریب کا ماحول انتہائی جذباتی ہوگیا۔ شہداء کے والدین، مہمانوں اور شرکاء کی آنکھیں اشکبار ہوگئیں۔ وہ لمحہ ایسا تھا کہ ہال میں موجود شاید ہی کوئی آنکھ ہو جو نم نہ ہوئی ہو۔شہدائے اے پی ایس کے والدین کی لاہور آمد نے جشنِ آزادی کی اس تقریب کو ایک منفرد اور تاریخی حیثیت دے دی۔ اس موقع پر اس عزم کا اعادہ کیا گیا کہ پاکستان کے لیے جانوں کا نذرانہ پیش کرنے والے شہداء اور ان کے خاندانوں کی قربانیوں کو قوم کبھی فراموش نہیں کرے گی۔

تقریب سے راشد محمود، ظلِ ہما، عمر سلیم گھمن، ڈاکٹر فضیلت بانو، حسن راشد، اشفاق احمد، سامعہ خان، ایم اے شہزاد خان، طاہرہ سراء،شہزادی گلفام، کرنل آصف ڈار، فائزہ شہزاد، ناز پروین، ڈاکٹر شاہدہ سردار، ندیم نظر، چوہدری غلام غوث، ریاض احمد احسان اور سیدہ فائزہ شیرازی اور عابدہ سمیت متعدد نامور شخصیات نے خطاب کیا۔مقررین نے اپنے خطابات میں کہا کہ پاکستان ہمارے بزرگوں کی بے شمار قربانیوں کا ثمر ہے۔ آزادی ایک عظیم نعمت ہے اور اس نعمت کی حفاظت ہم سب کی مشترکہ ذمہ داری ہے۔ انہوں نے کہا کہ ملک کی ترقی، خوشحالی، سلامتی اور استحکام کے لیے ہر شہری کو اپنی صلاحیتوں کے مطابق مثبت کردار ادا کرنا چاہیے۔مقررین نے بالخصوص شہدائے پاکستان اور شہدائے اے پی ایس کو خراجِ عقیدت پیش کرتے ہوئے کہا کہ ان کی قربانیاں قوم کے لیے ہمیشہ مشعلِ راہ رہیں گی۔

تقریب کے دوران پاکستان کے مختلف علاقوں کی ثقافت کو بھی اجاگر کیا گیا۔ کے پی کی جنرل سیکرٹری ناز پروین کی جانب سے بانی و صدر اپووا ایم ایم علی کو کے پی کی روایتی ثقافتی پگڑی پہنائی گئی، جبکہ سینئر وائس چیئرمین ملک یعقوب اعوان کو چترالی ٹوپی پہنائی گئی۔ عمر سلیم گھمن کو بھی ثقافتی پگڑی پہنائی گئی۔ثقافتی روایات کے اس خوبصورت اظہار نے تقریب کے حسن میں مزید اضافہ کیا اور پاکستان کے مختلف صوبوں اور ثقافتوں کے درمیان محبت، یگانگت اور قومی یکجہتی کا پیغام اجاگر کیا۔

تقریب کے آغاز سے قبل شرکاء کے لیے پرتکلف لاہوری بوفے ناشتے کا اہتمام کیا گیا، جس سے مہمانوں اور شرکاء نے بھرپور لطف اٹھایا۔ روایتی لاہوری ذائقوں سے مہمانوں کی تواضع تقریب کی خوبصورت روایات میں شامل رہی۔

تقریب کے اختتام پر فائزہ شہزاد کی کتاب کی رونمائی بھی کی گئی، جبکہ ان کی سالگرہ کا کیک کاٹ کر انہیں مبارکباد پیش کی گئی۔ اس کے علاوہ سلمیٰ کشم، عافیہ بزمی، ناہید گل، ردا امانت، حسن علی اور قاسم خان کی سالگرہ کے کیک بھی کاٹے گئے۔جشنِ آزادی کی اس پروقار تقریب نے جہاں قومی جذبے، حب الوطنی اور آزادی کی خوشیوں کو اجاگر کیا، وہیں شہدائے اے پی ایس کے والدین کی شرکت نے اسے ایک ایسی یادگار تقریب بنا دیا جس میں قومی خوشی، شہداء سے عقیدت، ثقافتی رنگ، ادبی سرگرمی اور انسانی جذبات سب ایک ساتھ نظر آئے۔تقریب کے اختتام پر پاکستان کی سلامتی، خوشحالی، ترقی، استحکام اور شہدائے وطن کے درجات کی بلندی کے لیے خصوصی دعا کی گئی،اور تقریب کے اختتام پر سانحہ اے پی ایس کے شہدا کے والدین نے ایم ایم علی کو بھی یادگاری شیلڈ پیش کی

وزیراعلیٰ پنجاب مریم نواز شریف نے صوبے کو 2029 تک جنوبی ایشیا کا سب سے زیادہ آرٹیفیشل انٹیلیجنس (اے آئی) فعال صوبہ بنانے کا ہدف مقرر کر دیا۔

وزیراعلیٰ مریم نواز شریف سے صوبائی مشیر برائے مصنوعی ذہانت و خصوصی اقدامات علی مصطفیٰ ڈار نے ملاقات کی، جس میں پنجاب اے آئی وژن 2029 کی باضابطہ لانچنگ کے حوالے سے مشاورت کی گئی۔ملاقات کے دوران صوبائی مشیر علی مصطفیٰ ڈار نے وزیراعلیٰ کو اے آئی آفس کی گزشتہ دو ماہ کی کارکردگی پر تفصیلی بریفنگ دی۔ انہیں پنجاب میں قائم کیے گئے دنیا کے پہلے آرٹیفیشل انٹیلیجنس فعال ڈیلیوری یونٹ سے بھی آگاہ کیا گیا۔علی مصطفیٰ ڈار نے پنجاب کے اے آئی ایجنڈے پر عملدرآمد کے لیے تشکیل دی گئی اعلیٰ سطحی ٹیم اور گلوبل ڈیلیوری ماہرین کے تعاون سے تیار کردہ آن بورڈنگ پروگرام کے بارے میں بھی بریفنگ دی۔

ملاقات میں پنجاب کو جنوبی ایشیا کا سب سے زیادہ اے آئی این ایبلڈ صوبہ بنانے کے وژن پر جاری پیشرفت کا جائزہ لیا گیا۔ وزیراعلیٰ مریم نواز شریف کو اے آئی وژن 2029 کے چھ بنیادی ستونوں پر بھی تفصیلی بریفنگ دی گئی۔اس موقع پر اے آئی وژن 2029 پر پیشرفت کا جائزہ لینے کے لیے پہلی سی ایم اے آئی اسٹاک ٹیک کے انعقاد سے متعلق امور پر بھی تبادلہ خیال کیا گیا۔وزیراعلیٰ مریم نواز شریف نے پنجاب میں مصنوعی ذہانت کے استعمال کو فروغ دینے اور حکومتی نظام کو جدید ٹیکنالوجی سے ہم آہنگ کرنے کے عزم کا اظہار کیا۔

لاہور میں ہربنس پورہ کنال روڈ پر تیز رفتار کار بے قابو ہو کر درخت سے جا ٹکرائی، جس کے نتیجے میں گاڑی میں سوار 5 افراد جاں بحق ہوگئے۔

ریسکیو 1122 کے مطابق حادثہ اس وقت پیش آیا جب سفید رنگ کی کار تیزی سے جارہی تھی کہ اچانک بے قابو ہو کر درخت سے ٹکرا گئی۔ریسکیو حکام کے مطابق حادثے میں کار میں سوار پانچوں افراد جان کی بازی ہار گئے، جن کی لاشیں قریبی اسپتال منتقل کردی گئی ہیں۔ حادثے کی مزید تحقیقات جاری ہیں